Kalɛ 11:20 - NYANMIƐN NDƐ'N 1998

²⁰ Amun ´di i lele anglo klonglo kun, ɔ ´flan amun siɛn'n, lele ɔ ´bɔn amun bue nun. Kɛ bɔ amun yoli min bɔ n wo amun afiɛn'n min finfin, bɔ amun sun guali min wun, bɔ amun seli kɛ: ?Nguɛ ti yɛ e fin Ezipt lɔ e bali'n? Sa nga amun yoli'n i nuan fɔ nga n ´tu amun'n yɛ ɔ o lɛ-ɔ? › »

Kalɛ 11:20 ပူးပေါင်းရင်းမြစ်များ

2 Samiɛl 12:10

I sɔ'n ti, alɛ su jaso-man wɔ awlo'n nun le nan kɛ ɔ ´yo-ɔ, ɔ'a yo-ɔ, ɔ finfin bɔ a yoli min bɔ a fali Iri b'ɔ ti Ɛtfuɛ'n i yi'n yoli ɔ liɛ'n ti.

Jue Mun 106:15

I kusu fali like nga be usali'n mannin be. Ɔ fa mannin be, be dili i lele ɔ flannin be.

Ezipt Lɔ Tulɛ'n 16:13

Nnɔsua nun'n, aoko'm be bali be wa trantrannin ngblaliɛ'n i lika'n kwlaa nun, yɛ nglɛmun kusu'n, bɔlɛ ufue'n guali sin yiali ngblaliɛ'n.

Ezipt Lɔ Tulɛ'n 16:3

Izraɛlfuɛ'm be waan: «Sɛ ɔ ti kɛ Anannganman kunnin ye Ezipt lɔ i nun bɔ e ti nnɛn sɛ'm be sin'n, bɔ e nyan aliɛ kpa e di'n, wuun ɔ yoli kpa. Kpɛkuun amun fali e bali aawlɛ flɛnnɛn nga nun wa kɛ awe'n nunnun e ngba.»

Ezipt Lɔ Tulɛ'n 16:8

Moiz waan: «Anannganman wa man amun nnɛn amun ´di ndɛ nnɔsua. Ainman nglɛmun kusu'n, ɔ ´man amun kpaun nga ɔ ko ju amun dilɛ'n. Anannganman tili trikilɛ nga amun trikili i su lɛ'n. ?Afin waan yɛlɛ ye? Nán e su yɛ amun trikili-ɔ, sanngɛ Anannganman i su yɛ amun trikili-ɔ.»

Nyanndra Mun 27:7

Sran nga bɔ i ku ti yiwa'n, kannzɛ be mɛn i awɛma nzue-ɔ, ɔ di-man. Sanngɛ sran nga bɔ awe kun i'n, kannzɛ man like'n ɔ yo wi sɛ, sanngɛ ɔ yo fɛ i nuan nun.

Malasi 1:6

Min Anannganman bɔ n sie mɛn wunmuan'n, n se min nyrun jranfuɛ'm be kɛ yoo: «Bakan kwlaa i nyin yi i si, sran ng'ɔ ti afanniɛn'n kusu i nyin yi i min'n. ?Yɛ min li, nán min yɛ n ti amún si, ɔ nin amun min nin-ɔn? ?Yɛ ɔ yo sɛ, bɔ amún nyin yi-man min, bɔ amun sro-man min-ɔn? Amun yo min finfin, kpɛkuun amun usa kɛ: ‹?Finfin sɛ yɛ e yo wɔ-ɔ?›

Kalɛ 11:13

?Ninfan yɛ n ´ko nyan min nnɛn liɛ nan m'an fa man sran nga be ´sun gua mín wun yɛ'n, bɔ be ´se n kɛ m `man be nnɛn man be di yɛ mun-ɔn?

Kalɛ 11:19

Nán cɛn kunngba yɛ an ´di nnɛn sɔ nin-ɔn, nán cɛn nnyɔn ndɛ-ɔ, nán cɛn nnun annzɛ cɛn blu, annzɛ cɛn ablaɔn ndɛ-ɔ.

Kalɛ 11:21

Moiz seli kɛ: «Sran nga be sin yia min yɛ'n be ju sran akpi-akpi ya nsiɛn. Kpɛkuun ɔ waan a ´man be nnɛn lele anglo klonglo kun.

Kalɛ 14:3

?Ɔ yo sɛ ti yɛ man Anannganman waan ɔ ´fa e ´kɔ mɛn sɔ'n nun lɔ nan alɛ ko di ye nan é yi nin e mma kanngan mun e ko kaci alɛ nnɛn nin-ɔn? ?Sɛ e sa é sin Ezipt lɔ bɔbɔ'n, ɔ flunman-man? »

Kalɛ 14:4

Yɛ be seli be wiengu kɛ: «E `sie e kpɛnngbɛn kun nan e `sa é sin Ezipt lɔ.»

Kalɛ 16:13

A fa e jasoli mɛn kun bɔ i asiɛ'n ɔ yo like ye kpa, bɔ i kunngba'n ɔ ti nnɛn tawlɛ klanman'n i nun. A fali e bali kɛ e wa wu aawlɛ flɛnnɛn nga nun wa. Ɔ nyin a yi-mɛn i sɔ liɛ bɔ a yoli'n, kpɛkuun ɔ waan a ´tran é su kpɛnngbɛn a ´uka su ekun.

Kalɛ 20:4

?Nzu ti yɛ amun fali e bɔ e ti Anannganman i sran mun'n bali aawlɛ flɛnnɛn nga nun wa-a? ?E nin e nnɛn mun e kunlɛ ti yɛ amun fali ye bali wa-a?

Kalɛ 21:5

yɛ be tɔli Moiz nin Nyanmiɛn bé wun ndɛ tɛtɛ kanlɛ'n su-ɔ. Be waan: «?Nzu ti yɛ amun fali e Ezipt lɔ bali wa-a? ?E kunlɛ ti yɛ amun fali e bali aawlɛ flɛnnɛn'n nun wa-a? Be nyan-man aliɛ be di-mɛn i wa, yɛ be nyan-man nzue be nɔn-mɛn i wa, yɛ nyrɛnnɛn aliɛ nga ɔ'a flan ye .»

Sa nga bé yôli'n 13:41

‹Sran finfin yofuɛ mun, an `nian sa nga, man amún nuan bo amun wun, man amun awlo'n bo, afin amun blɛ su m ma yo sa kun. Sa sɔ'n, sɛ sran kan kle amun'n, an su lafi-man su .› »

1 Tɛsalonikfuɛ Mun 4:8

I sɔ'n ti, sran ng'ɔ fa-man ndɛ sɔ su'n, nán sran yɛ ɔ'a bu-mɛn i sran-an, Nyanmiɛn b'ɔ fɛli i Wawɛ'n mannin amun'n yɛ ɔ'a bu-mɛn i sran-an.

Zozie 24:27

I sin ɔ seli Izraɛlfuɛ'm be kɛ: «Amun `nian yɛbuɛ nga kpa. Ɔ ti lalofuɛ, afin sɛ ɔ ti sran'n, wuun n ´se kɛ ɔ tili ndɛ nga Anannganman kan kleli ye'n i kwlaa. Ɔ wa yo amun lalofuɛ man amun su yaci-man amun Nyanmiɛn'n i sulɛ.»

1 Samiɛl 10:19

I sɔ'n kpɛkuun-ɔn, ndɛ amu'an kaci amun sin amu'an si Nyanmiɛn. I b'ɔ deli amun blɛ kekle nin nyrɛnnɛn blɛ nun'n, amu'an kaci amun sin amu'an si i. Amun seli i kɛ: ‹Sie é su famiɛn kun.› Amun bla Anannganman nyrun akpasua-akpasua, i sin'n, amun `bla awlobo-awlobo.»

1 Samiɛl 2:30

I sɔ'n ti, min Anannganman bɔ n ti Izraɛlfuɛ'm be Nyanmiɛn'n, min waan: ‹Laa n seli kɛ wɔ awlo'n, ɔ nin wɔ akpasua'n be ´jran min nyrun be ´yi tɛ tititi.› Sanngɛ siɛn'n, min Anannganman, min waan: ‹Ɔ su yo-man sɔ kun, afin be nga be bu min sran'n, m ´bu be sran. Sanngɛ be nga be yo min finfin'n, be ´wun nyannzuɛn.