Jue Mun 72:6 - NYANMIƐN NDƐ'N 1998

⁶ Man ɔ yo kɛ nzue b'ɔ tɔ ijre bɔ b'a kpɛkpɛ'n su'n su sa. Man ɔ yo kɛ nzue dan b'ɔ lualua asiɛ'n sa.

Jue Mun 72:6 ပူးပေါင်းရင်းမြစ်များ

2 Samiɛl 23:4

ɔ ti kɛ nglɛmun wia b'ɔ ´fite'n, wuun nyanmiɛn ble'n nun-man lɛ'n sa'n. Ɔ kpaja weiin. Kɛ nzue'n ɔ'a tɔ ɔ'a kpɛ'n, i sɔ wia liɛ'n yɛ man ijre nga be o asiɛ'n bo'n be fu-ɔ.›

Jue Mun 65:10

A nian asiɛ'n i lika, a tɔ su nzue kpa sakpa, wɔ man i su ninnge'm be yo kpa lele kpe nun. Ee Nyanmiɛn, ɔ nzue ba b'ɔ sonji'n, ɔ ti yiwa piɛ. A yo man e ble'n ɔ yo ye. Wafa nga a fa siesie asiɛ'n i ye'n yɛ ɔ o yɛ:

Nyanndra Mun 16:15

Kɛ a wun srilɛ puɛpuɛ famiɛn'n nuan'n, wuun ɔ ti kɛ i mɛn'n nun sran'm be di alaje yɛ i aklunye'n ɔ ti kɛ nzue b'ɔ tɔ jɔ lika'n sa.

Nyanndra Mun 19:12

Kɛ famiɛn kun ko fa ya'n, ɔ yo sro kɛ asɔmɔli b'ɔ su kpan'n sa. Sɛ kusu ɔ nian ɔ nyrun klanman'n, ɔ ti kɛ bɔlɛ b'ɔ gua nnya'm bé su'n sa.

Ezai 5:6

N ´saci i, be su kpɛkpɛ-man vinyi'n su kun, be su tutu-man fie'n nun kun. Flɔn nin owie'm be ´fifi nun, yɛ n ´se nzue ng'ɔ mlan'n kɛ nán ɔ tɔ su.

Ndɛ Nga Nyanmiɛn I Nuan Ijɔfuɛ Oze Kannin'n 6:3

Man e si Anannganman. Amun man e kunndɛ kɛ e ´si i, afin i balɛ'n ti kɛ aliɛ b'ɔ cɛn b'ɔ to fuan-man'n sa. I balɛ'n wa yo kɛ nzue b'ɔ kpiti kpli tɔ'n sa. Ɔ wa yo kɛ munngun nun nzue b'ɔ man asiɛ'n jɔ'n sa.»

Mise 5:6

Zakɔb osu nunfuɛ nga be ka lɛ'n be ti'n, nvle kpanngban nga Izraɛlfuɛ sɔ'm be wo be afiɛn'n be yo kpa, kɛ ninnge bɔ bɔlɛ gua be su'n sa. Izraɛlfuɛ sɔ'm be ti nvle kpanngban sɔ'm be ´yo kɛ ijre bɔ nzue tɔ su'n sa. Nán sran yɛ man nzue sɔ'n tɔ-ɔ, i bɔbɔ i klun klo yɛ ɔ tɔ-ɔ .

Mmla'n 32:2

Man like nga n kle sran mun'n, ɔ yo kɛ nzue yɛ ɔ su tɔ sa. Man min ndɛ nga n kan be mun'n, be yo kɛ nglɛmun bɔlɛ'n b'ɔ gua'n sa. Man be yo kɛ nzue b'ɔ gua nnya'm be su'n sa. Man be yo kɛ nzue b'ɔ gua ijre'm be su'n sa.