Jue Mun 112:9 - NYANMIƐN NDƐ'N 1998

⁹ Ɔ ´cɛ sran like-ɔ, ɔ bu-mɛn i sin, ɔ tu i klun cɛ yalɛfuɛ'm be like. Nyanmiɛn nin i bé bo sɛ titi. I wunmiɛn'n ´uka su titi yɛ i kɔmin'n jin su .

Jue Mun 112:9 ပူးပေါင်းရင်းမြစ်များ

Jue Mun 111:3

Sa ng'ɔ yo be'n be yo nyɛnmɛn, be tu be nian, ɔ yo sa i nuan su tititi.

Jue Mun 112:3

I sɔ sran liɛ'n, muae nin aunnyan'n bɔ cɛ yɛ ɔ ´trɛn i awlo'n nun-ɔn. Nyanmiɛn nin i bé bo ´sɛ titi.

Jue Mun 75:10

N liɛ'n, n su yaci-man Zakɔb i Nyanmiɛn'n i dunman bolɛ. N ´to jue m ´mɛnmɛn i.

Jue Mun 92:10

Ɔ kpɔfuɛ'm be kusu be liɛ'n, be wa wu, ɔ kpɔfuɛ'm be ´wu. Sa sukusuku yofuɛ'm be ´bo sanndi.

Jue Mun 92:11

A man min wunmiɛn kɛ awuɛ'n i liɛ'n sa, a gua min ti su ngo mɔnnɛn.

Nyanndra Mun 14:24

Anyanbeun'n ɔ ti akunndanfuɛ'm be kɔmin su manlɛ like. Sinnglinfuɛ'm be ´ka be sinnzin'n nun titi.

Nyanndra Mun 19:17

Like nga sran kun fa cɛ yalɛfuɛ'n, ɔ ti kɛ Anannganman yɛ ɔ'a fa mɛn i sa . Ɔ man Anannganman ɔ ´yo i mo.

Nyanndra Mun 21:26

I konvi'n jaso-man ninnge'm bé su le. Sran kpa'n kusu, ɔ ´man sran like-ɔ ɔ bu-mɛn i sin.

Akunndanfuɛ'n 11:6

I sɔ'n ti'n, lua ɔ ninnge mun nglɛmun nun lele fa ju nnɔsua nun, nán de wunmiɛn. Afin a si-man ng'ɔ wa yo kpa-a, sɛ nglɛmun nun liɛ'n nin o, sɛ nnɔsua nun liɛ'n nin o, sɛ kusu nglɛmun nun liɛ'n nin nnɔsua nun liɛ'm be nnyɔn yɛ be ´yo kpa o.

Akunndanfuɛ'n 3:6

Ɔ lɛ blɛ kun bɔ be fa kunndɛ like-ɔ, yɛ ɔ lɛ blɛ kun bɔ be fa saci like bɔ be nyɛnnin nin-ɔn. Ɔ lɛ blɛ kun bɔ be fa yia like su-ɔ, yɛ ɔ lɛ blɛ kun bɔ be fa yi like blo-ɔ.

Ezai 32:8

Sanngɛ sran kpa'n i liɛ'n, akunndan kpa cɛ yɛ ɔ bu-ɔ. Yɛ sa kpa cɛ yɛ ɔ yo-ɔ.

Ezai 58:10

sɛ amun fa amun bɔbɔ amun like nga amun di'n i wie man sran nga awe kun i'n, sɛ amun man sran ng'ɔ ti yalɛfuɛ'n i aliɛ'n, sɛ n ´kwla se'n, amún kannin'n ɔ ´fuan aosin'n bɔ amun o nun'n, yɛ lika tuun bɔ amun tran nun'n, ɔ ´yo weiin kɛ wia jran sa.

Ezai 58:7

Sran ng'ɔ lɛ-man aliɛ'n, amun `mɛn i wie. Be nga be ti yalɛfuɛ bɔ be lɛ-man lawlɛ'n, amun `fa be sie. Sɛ amun wun sran wie bɔ i wun ti kplɛn'n, amun `mɛn i tannin man ɔ kla. Nán amun `kaci amún sin si amun wiengu klɔ sran'n .

Matthieu 6:4

nan like nga a fa man yalɛfuɛ'n ɔ'a yo nvialiɛ nun, nan ɔ Si b'ɔ wun nvialiɛ nun sa'n ɔ'a yo wɔ mo.»

Marc 14:7

Afin amun nin yalɛfuɛ mun yɛ amun ´ka wa titi-ɔ, an kwla yo be kpa blɛ kwlaa nga an klo'n, sanngɛ n liɛ'n, min nin amun su tran-man wa titi .

JÉSUS-CHRIST I DYASIN FE'N BO LUC KLELI'N 11:41

Sɛ an fa amun klowa mun nin amun talie mun be nun ninnge cɛ yalɛfuɛ amun klun-ufue su'n, ɔ ti kpa, yɛ like fi su yo-man fiɛn amun nyrun kun.

JÉSUS-CHRIST I DYASIN FE'N BO LUC KLELI'N 12:33

An `yo amun ninnge'm be atɛ, an `fɛ i sika'n cɛ yalɛfuɛ mun. An `kpɛ bɛtrɔ b'ɔ yo-man nvuɛn bɔ like wie-man nun'n, an `sie i Nyanmiɛn su lɔ, lɔ liɛ'n, awiefuɛ kɔ-man lɔ, nvɔlɛ di-man like lɔ.

JÉSUS-CHRIST I DYASIN FE'N BO LUC KLELI'N 16:9

I sɔ'n ti, amun kusu an `fa amun sika b'ɔ man ndɛ sran'm be di-man nanwlɛ'n, an `fa tra sran'm be janvuɛ nan cɛn nga amún sa nun wie'n, b'a sɔ amun nun anannganman tranwlɛ'n nun lɔ.

JÉSUS-CHRIST I DYASIN FE'N BO LUC KLELI'N 18:22

Kɛ Jésus tili i ndɛ sɔ'n, ɔ seli i kɛ: «Ɔ tɛ ka ɔ like kun yolɛ, yo ɔ́ bo ninnge'n kwlaa atɛ nan fɛ i sika'n man yalɛfuɛ mun, yɛ a wa nyan ninnge kpakpa nyanmiɛn su lɔ. Kɛ a ko yo i sɔ'n, bla wa su n su.»

Jean 13:29

Kɛ bɔ Zidas yɛ ɔ sie be bɔlɛ'n ti, be wie'm be bu i kɛ ɔ seli i kɛ ɔ ko to like nga be ´fa di cɛn'n annzɛ ɔ `cɛ yalɛfuɛ'm be like wie.

Sa nga bé yôli'n 20:35

N yoli i sɔ n fa kleli amun nan amun kusu an di junman sɔ, nan an uka be bɔ be lɛ-man wunmiɛn'n. An `bu e Min Jésus bɔbɔ i ndɛ b'ɔ kannin'n i akunndan, afin ɔ seli kɛ: ‹Sɛ a cɛ sran like'n, ɔ ti kpa tra kɛ be cɛ wɔ like'n.› »

Sa nga bé yôli'n 4:35

be fa blɛ be bɔ Jésus sunmannin be'n. Sika nga sran kun sa miɛn i wun'n, ɔ ba, be fa mɛn i.

Rɔmfuɛ Mun 12:13

An `ti amun niaan Kristfuɛ'm bé wun nyanman nun. An `yo aklunyefuɛ.

2 Korɛntfuɛ Mun 8:9

Afin an si ye dan nga e Min Jésus-Krist yoli ye'n: i b'ɔ ti anyanbeunfuɛ'n, ɔ kacili i wun yalɛfuɛ amun ti nan i yalɛ sɔ'n nun an kaci anyanbeunfuɛ.

Mmla'n 15:11

Yalɛfuɛ sa'n, ɔ ti-man kɛ be ´tu amun mɛn'n nun mlɔnmlɔn. I sɔ'n ti yɛ n kan kle amun kɛ sɛ amun mɛn'n nun yalɛfuɛ annzɛ aunnvuɛfuɛ wie i sa mian like wie wun'n, amun `fa mɛn i nin-ɔn .

Mmla'n 15:14

Like nga Anannganman amun Nyanmiɛn'n yoli man amun nyannin be'n, amun `man be wie, amun `man be amun nannin mun, nin bua mun, nin boli mun, nin amun ble, ɔ nin amun nzan'n wie.

Mmla'n 24:13

Kɛ sɛnzɛ'n ɔ tɔ cɛ'n, amun `fɛ i kondro'n `ko mɛn i man ɔ la fa kɛtɛ i su nan ɔ yra amun nguan. Sɛ amun yo i sɔ'n, sa kpa dan kun yɛ amu'an yo i Anannganman amun Nyanmiɛn'n i nyrun lɛ-ɔ.

1 Timote 6:18

Se be kɛ be yo sa ng'ɔ ti kpa'n, yɛ be yo sran ye, i sɔ'n yɛ ɔ ti anyanbeun kpa nin-ɔn. Man be yo aklunye, yɛ be cɛ sran like.

Hébreu 13:16

Nán an yaci sa kpa nin sran ye yolɛ'n, afin i sɔ like'n yɛ be yo-ɔ ɔ jɔ Nyanmiɛn klun-ɔn.

Hébreu 6:10

Afin Nyanmiɛn yo-man sa b'ɔ ti-mɛn i su'n, i wla fi-man junman nga an dili nin klolɛ nga an fa klo i b'ɔ man an yoli i sran'm be ye bɔ an tɛ yo'n su'n.

Sa nglô yile 22:11

Sran ng'ɔ yo sa tɛ'n, man ɔ yo wɔ i nyrun, sran ng'ɔ ti fiɛn'n, man ɔ kɛ i fiɛn'n su, sran ng'ɔ ti sran kpa'n, man ɔ yo sa kpa'n wɔ i nyrun, yɛ sran ng'ɔ ti Nyanmiɛn liɛ'n, man ɔ yo i liɛ tititi!»

1 Samiɛl 2:1

Yɛ Ani srɛli Nyanmiɛn-ɔn, ɔ seli kɛ: «Anannganman man n klun ɔ'a jɔ dan. Anannganman man m'an kwla man mín ti'n su. E nin min kpɔfuɛ mun e kan-an, ɔ ´kpɛ siɛn'n. Delɛ ng'ɔ deli min'n ti n klun ɔ'a jɔ.

1 Samiɛl 2:30

I sɔ'n ti, min Anannganman bɔ n ti Izraɛlfuɛ'm be Nyanmiɛn'n, min waan: ‹Laa n seli kɛ wɔ awlo'n, ɔ nin wɔ akpasua'n be ´jran min nyrun be ´yi tɛ tititi.› Sanngɛ siɛn'n, min Anannganman, min waan: ‹Ɔ su yo-man sɔ kun, afin be nga be bu min sran'n, m ´bu be sran. Sanngɛ be nga be yo min finfin'n, be ´wun nyannzuɛn.