Jue Mun 100:3 - NYANMIƐN NDƐ'N 1998

³ Man amun si kɛ Anannganman yɛ ɔ ti Nyanmiɛn nin-ɔn. I yɛ ɔ yili ye-ɔ, e ti i liɛ. E ti i sran mun, yɛ e ti kɛ i kuku nun nnɛn mun sa .

Jue Mun 100:3 ပူးပေါင်းရင်းမြစ်များ

2 Famiɛn Mun 19:19

Anannganman e Nyanmiɛn, de ye Sankerib sa nun, man asiɛ'n su famiɛn diwlɛ'm be nunfuɛ'm be kwlaa be si kɛ wɔ Anannganman ɔ kunngba cɛ yɛ a ti Nyanmiɛn nin-ɔn!»

1 Be Nyoliɛ 16:14

I Anannganman'n yɛ ɔ ti e Nyanmiɛn nin-ɔn. Ɔ di mɛn wunmuan'n i nunfuɛ'm be jɔlɛ.

Zɔb I Nyrɛnnɛn Wunlɛ 10:3

?I kpa'n, kɛ a kle min yalɛ'n, bɔ a yo min bɔ n ti ɔ́ sa nuan like'n min finfin'n, bɔ man sa nga sran nga be bu-man wɔ like fi'n be siesie'n i nuan yia'n, fɛ li yɛ ɔ yo wɔ-ɔ?

Jue Mun 119:73

A siesieli min kɛ be fa wu talie'n sa, kusu wɔ yɛ man n jran ca-a ɔ yo ye-ɔ. Man min ngwlɛlɛ man n `fa suan ɔ mmla mun.

Jue Mun 12:4

Man Anannganman nunnun be kwlaa nga be klo gblɛ kpɛlɛ'n nin be nga be ijɔ dandan'n.

Jue Mun 149:2

Izraɛlfuɛ mun, man amun klun jɔ i b'ɔ yili amun'n i dunman nun. Man Siɔnfuɛ'm bé wun kpaja be be famiɛn'n ti .

Jue Mun 46:10

Kɛ ɔ fɛ i lele b'ɔ ´fa ju mɛn'n i awieliɛ lɔ'n, ɔ'a yo man alɛ kunlɛ'n ɔ'a wie, ɔ'a bubu ta'm be nun, ɔ'a bubu cua'm be nun, ɔ'a wɔ nyrɛn'm be nun.

Jue Mun 78:52

Ɔ fɛli i nvle'n i nunfuɛ mun ɔli kɛ bua mun sa. Ɔ kankannin be aawlɛ flɛnnɛn'n nun kɛ bua mun sa.

Jue Mun 79:13

Sanngɛ e bɔ e ti ɔ sran mun'n, bɔ e ti kɛ ɔ́ kuku'n nun nnɛn mun sa'n, e liɛ'n e ´to jue e ´manman wɔ tititi, e ´bo e flɛ wɔ tititi.

Jue Mun 95:3

Afin Anannganman ti Nyanmiɛn kun b'ɔ ti kpli. Ɔ ti famiɛn dan ɔ sie ninnge'n kwlaa.

Ezipt Lɔ Tulɛ'n 6:7

N ´fa amun nvle'n n ´yo min nvle, n ´yo amun Nyanmiɛn, yɛ amun wa wun i wlɛ jrɛin kɛ n ti Anannganman amun Nyanmiɛn ng'ɔ ´de amun Eziptfuɛ'm be junman kekleekle nga be mian amun kɛ amun di be'n be nun.

Akunndanfuɛ'n 12:1

Blɛ bɔ a tɛ yo gbanflɛn'n, man ɔ́ wla kpɛn ɔ yifuɛ'n i su kwlaa nan nyrɛnnɛn blɛ'n ɔ'a ju. Man ɔ wla kpɛn i su nan w'a yo kpɛnngbɛn, afin ɔ kpɛnngbɛn blɛ sɔ'n nun'n, ɔ nyin wa tu nguan'n su .

Ezai 63:11

Yɛ i nvle nunfuɛ'm bé wla kpɛnnin laa blɛ'n nin Moiz be su-ɔ. Be waan: «?Sran ng'ɔ fɛli i nvle'n nunfuɛ mun nin be sunianfuɛ mun jenvie'n nun fiteli'n, ɔ o nin? ?Sran ng'ɔ fɛli i Wawɛ'n sieli be afiɛn'n, ɔ o nin?

Ezai 63:19

Kɛ e yoli kɛ sran'm bɔ a sie-man be'n nan ɔ dunman nun-man be su sa'n, ɔ'a cɛ kpa. Sɛ ɔ ti kɛ a su kpaci nyanmiɛn'n b'ɔ la nglo lɔ plaii'n nun'n yɛ a su jra wa'n, wuun oka'm be ´keje ɔ nyrun sa gbugbugbu.

Ezai 64:7

Ɔ nin sɔ'n ngba'n, Anannganman, a ti é si. E ti kɛ ufa sa, wɔ yɛ a ti ye ufuɛ-ɔ. E kwlaa e ti ɔ́ sa nuan like .

Zeremi 10:10

Anannganman'n ɔ ti Nyanmiɛn sakpa. Ɔ ti Nyanmiɛn kun b'ɔ lafi-man. I kunngba'n ti famiɛn b'ɔ ti adudua. Kɛ ɔ ko fa ya sa'n, asiɛ wunmuan'n keje. Nvle-nvle'm be nunfuɛ'm be yo i like'n wie fi-ɔ ɔ yo-man ye.

Ezekiɛl 34:11

Afin Anannganman Nyanmiɛn wan yoo: «M bɔbɔ yɛ n wa nian be lika-a, n ´nian be su.

Jean 17:3

Kɛ be se kɛ be ´nyan anannganman nguan'n, i bo'n yɛlɛ kɛ be ´si wɔ bɔ ɔ kunngba cɛ yɛ a ti Nyanmiɛn'n nin Jésus-Krist bɔ a sunmɛnnin i'n.

2 Korɛntfuɛ Mun 4:6

Nyanmiɛn b'ɔ seli kɛ: «Man lika'n kpaja'n,» i kunngba'n yɛ man e wun sa wlɛ weiin-ɔn. Ɔ man kɛ e nian Krist'n, e wun wafa nga Nyanmiɛn ti'n i kwlaa, afin i yɛ man e sili i-ɔ .

Efɛzfuɛ Mun 2:10

Afin e ti i sa nuan like, kɛ e nin Krist-Jésus e yoli sran wunmuan'n, Nyanmiɛn boli ye uflɛ nan e `yo nyoliɛ kpakpa ng'ɔ dun mmua sieli ye kɛ e `yo'n.

Mmla'n 32:15

Kɛ Izraɛl dili i sɔ like'n, bɔ i ku'n yili'n, b'a sɔn-mɛn i su kun. Kɛ ɔ wa cɛnnin b'ɔ yoli mlanmlan'n, kpɛkuun i Nyanmiɛn i ase yilɛ nun-ɔn, kusu wuun Nyanmiɛn yɛ ɔ yili i-ɔ. Ɔ yoli Nyanmiɛn i finfin, kusu wuun i yɛ ɔ sɛsɛ i-ɔ.

Mmla'n 32:6

?Amun waan amun fa amun sa tɛ sɔ'n guɛ i Anannganman su? Amun lɛ-man akunndan. ?Nzu sran yɛ be sinnzin'n cɛnnin sɔ-ɔ? ?Ɔ ti-man amun si? ?Nán i yɛ ɔ jrali amun-ɔn? ?Nɛ́n i yɛ ɔ fali amun fa yoli i nvle nin-ɔn?

Mmla'n 4:35

I waan amun `wun i sɔ nan amun si kɛ i kunngba cɛ yɛ ɔ ti Nyanmiɛn nan be fa like fi sunnzun i-ɔ ɔ yo-man ye.

Mmla'n 4:39

I sɔ'n ti, man amun wun i wlɛ ndɛkɛn, yɛ man ɔ tran amun akunndan nun titi kɛ Anannganman kunngba yɛ ɔ ti Nyanmiɛn nin-ɔn, man amun wun i wlɛ kɛ nyanmiɛn su lɔ o, asiɛ'n su wa o, like fi nin i sɛ-man.

Mmla'n 7:9

I sɔ'n ti, amun `si kɛ Anannganman amun Nyanmiɛn'n yɛ ɔ ti Nyanmiɛn nin-ɔn. Nyanmiɛn sɔ'n ɔ ti nanwlɛfuɛ, ɔ nin sran mun tra aenguɛ. Sɛ be klo i nan be fɛ i mmla'm be su'n, i kusu ɔ nian aenguɛ ng'ɔ nin be trali'n su yɛ ɔ si be aunnvuɛ lele fa wlu be anunman'm be mma liɛ'm be nun lele ju be akpasua akpi su.

1 Piɛr 2:25

Laa an ti kɛ bua bɔ b'a bo nzanndri'n sa, sanngɛ siɛn'n amu'an sa amún sin amun Tafuɛ b'ɔ ti amun Sunianfuɛ'n i sin .

1 Piɛr 2:9

Sanngɛ amun liɛ'n, an ti sran bɔ Nyanmiɛn fali amun, an ti Famiɛn Nyanmiɛn'n i nyrun jranfuɛ mun, an ti Nyanmiɛn i nvle'n nun sran mun, yɛ an ti i liɛ mlɔnmlɔn. Ɔ fali amun kɛ an yi i b'ɔ flɛli amun kɛ an jao aosin nun, an bla lika ng'ɔ kpaja kpa nun'n i ayɛ .

1 Piɛr 4:19

I sɔ'n ti, be nga be nyrɛnnɛn wunlɛ'n ɔ ti Nyanmiɛn klun su'n, man be fa bé wun man Nyanmiɛn b'ɔ yili be'n, bɔ be kwla fa bé wla guɛ i su'n. Man be yo sa ng'ɔ ti kpa'n tititi.

1 Jean 5:20

E si kusu kɛ Nyanmiɛn Wa'n bali yɛ ɔ kle ye ngwlɛlɛ nan e si Nanwlɛfuɛ'n. E nin Nanwlɛfuɛ sɔ'n y'a yo kun i wa Jésus-Krist ti. I yɛ ɔ ti Nyanmiɛn nin-ɔn, i yɛ be flɛ i nguan nin-ɔn.