Jɔlɛ Difuɛ Mun 6:8 - NYANMIƐN NDƐ'N 1998

⁸ yɛ Anannganman sunmannin i nuan ijɔfuɛ kun Izraɛlfuɛ'm be wun lɔ-ɔ. Nyanmiɛn nuan ijɔfuɛ'n seli kɛ: «Anannganman b'ɔ ti Izraɛl Nyanmiɛn'n i wan yoo: ‹Min fanngan nun yɛ man amun fin Ezipt kan amun yoli kanga lɔ'n bali-ɔ.

Jɔlɛ Difuɛ Mun 6:8 ပူးပေါင်းရင်းမြစ်များ

2 Famiɛn Mun 17:13

Anannganman fa ndɛ wlɛli i nuan ijɔfuɛ fanunfanun'm be kwlaa bé nuan. I waan be kan kle Izraɛlfuɛ mun, nin Zidafuɛ'm be kɛ be yaci be nzuɛn tɛtɛ mun, nan be fɛ i mmla fanunfanun'm bé su. I mmla sɔ'n, ɔ fa mannin Izraɛlfuɛ'm be nannan mun. I sin ɔ fa wlɛli i nuan ijɔfuɛ bɔ be ti i sufuɛ'n bé nuan kɛ be fa man be kusu be wie.

Jue Mun 106:44

Anannganman tili be kokolɛ bɔ be koko'n, yɛ ɔ wunnin nyrɛnnɛn'n b'ɔ o be su.

Ezipt Lɔ Tulɛ'n 13:14

Sɛ cɛn kun amun mma'm be usa amun kɛ: ‹?Ɔ yo sɛ ti yɛ be yo sa nga-a?› Amun `tɛ bé su kɛ: ‹Anannganman i tinmin bɔ be jrɛn i nyrun-ɔn, ɔ yo-man ye'n ti ɔ fali e Ezipt lɔ bali. Kɛ ɔ ´yo sɔ'n, wuun e o kanga nun.

Ezipt Lɔ Tulɛ'n 13:3

Moiz seli nvlefuɛ'm be kɛ: «Man amún wla kpɛn cɛn nga su, afin cɛn sɔ'n nun yɛ Anannganman i tinmin dan bɔ sran fi kwla jrɛn-mɛn i nyrun'n ti ɔ fali amun Ezipt lɔ bali nin-ɔn. Kɛ ɔ ´yo sɔ'n, wuun amun tɛ o kanga'n nun. Kɛ amun ´di cɛn sɔ'n, nán amun di kpaun bɔ kpaun ayre o nun'n.

Jɔlɛ Difuɛ Mun 6:7

Izraɛlfuɛ'm be kpan flɛli Anannganman kɛ ɔ de be Madianfuɛ'm be sa nun,

Jɔlɛ Difuɛ Mun 6:9

N deli amun Eziptfuɛ mun, ɔ nin be nga be kle amun yalɛ'n bé sa nun. N fuannin be amun nyrun m mannin amun, n fali be mɛn'n m mannin amun.

1 Samiɛl 10:18

Ɔ seli be kɛ: «Anannganman b'ɔ ti Izraɛl Nyanmiɛn'n i waan: ‹N fali Izraɛl nvle'n Ezipt lɔ m bali. N deli amun Eziptfuɛ nin nvle nga be kleli amun yalɛ'n be kwlakwla bé sa nun.›