Jɔlɛ Difuɛ Mun 4:17 - NYANMIƐN NDƐ'N 1998

¹⁷ Kɛ ɔ ´yo sɔ'n, wuun Sizɛra ɔ ´wanndi i ja nun ´kɔ. Ɔ ko fiali Ebɛr b'ɔ ti Kenfuɛ'n i yi Zaɛl, i tannin sua'n i bo lɔ, afin Zabɛn b'ɔ ti Azɔr famiɛn'n ɔ nin Ebɛr b'ɔ ti Kenfuɛ'n i awlofuɛ'm be di anuansɛ.

Jɔlɛ Difuɛ Mun 4:17 ပူးပေါင်းရင်းမြစ်များ

Jue Mun 107:40

Nyanmiɛn'n kuakua be wlengbi mun. Ɔ yo man be wlan aawlɛ flɛnnɛn bɔ atin nun-man nun'n i nun sa daan.

Jue Mun 69:22

Be gua min aliɛ'n nun duwlɛ. Sɛ nzue we kun min'n, vinɛgri yɛ be fa man min-ɔn .

Nyanndra Mun 29:23

Wun tulɛ'n ɔ gua bé nyin ase. Sanngɛ sran ng'ɔ kɛn i wun ase'n ɔ nyan nyrun.

Ezai 57:21

Anannganman waan: «Be nga be bu-man min nin min ndɛ'n like fi'n, bé wun jɔ-man be le.»

Amɔs 2:16

I sɔ cɛn'n nun'n, sonja'm be nun yakpafuɛ'n bɔbɔ, ɔ ´guɛ i alɛ ninnge'm be ase ´wanndi.» Anannganman'n yɛ ɔ kɛn i sɔ kle amun-ɔn.

Jɔlɛ Difuɛ Mun 4:16

Barak suli kakaklolo nin alɛ kunfuɛ'm be su lele juli Arɔsɛt-Gɔim. Kɛ be ´ju lɛ'n, wuun b'a wie Sizɛra i alɛ kunfuɛ'm be kwlaa be kun. Be nun kun sa a ka-man lɛ.

Jɔlɛ Difuɛ Mun 4:18

Yɛ Zaɛl fiteli-ɔ, ɔ ɔli Sizɛra i atin kpalɛ nan ɔ'a se i kɛ: «Min min bian, bla e sie like, bla wa sike min awlo wa. Nán ɔ klun ti wɔ kaan sa.» Ɔ sikeli bla'n i sua lɔ, nan bla'n ɔ'a fa kondro kun ɔ'a fa kɛtɛ i su.

Jɔlɛ Difuɛ Mun 5:24

Ebɛr b'ɔ ti Kenfuɛ'n, i yi Zaɛl i liɛ su ti ye bla'm be nun! Bla nga be tran tannin sua'm be bo'n, Zaɛl i liɛ su ti ye be nun!

Jɔlɛ Difuɛ Mun 5:6

Anat i wa Samgar i blɛ su'n, yɛ Zaɛl i blɛ su'n, be nga be sua ninnge'm be sin'n, be kunndɛ be-ɔ, be wu-man be. Lika kɔfuɛ'm be tɔ blo yɛ be kɔ-ɔ.