Jacques 3:15 - NYANMIƐN NDƐ'N 1998

¹⁵ I sɔ ngwlɛlɛ liɛ'n fin-man nyanmiɛn su, ɔ ti asiɛ'n su wa liɛ, ɔ ti klɔ sran liɛ, ɔ fin mmusu'm bé si Satan.

Nyanmien nde Ufle

¹⁵ I so ngwlele lie'n fi'an nyanmien su, o ti asie'n su wa lie, o ti klo swran lie, o fin mmusu'm bé si Satan.

Jacques 3:15 ပူးပေါင်းရင်းမြစ်များ

2 Samiɛl 13:3

Amnɔn lɛ i janvuɛ kun, David i niaan Simea i wa-a. Be flɛ i kɛ Zɔnadab, ɔ si gblɛ kpɛ kpa.

2 Samiɛl 15:31

Be wa seli David kɛ: «Asitɔfɛl o Absalɔm sin, ɔ o be nga be jaso ɔ wun be nun.» Yɛ David waan: «Anannganman n ´srɛ wɔ, nán man Asitɔfɛl i afɔtuɛ'n ng'ɔ ´man be'n be yo ye.»

2 Samiɛl 16:23

I blɛ sɔ nun'n, afɔtuɛ kwlaa nga Asitɔfɛl man'n, be nian su be yo i kɛ Nyanmiɛn yɛ ɔ'a kan sa. I David o, i Absalɔm o, kɛ be nian Asitɔfɛl i afɔtuɛ'n be su sɔ-ɔ.

Zeremi 4:22

«Ee! Min nvlefuɛ'm be ti sinnzin o. Be si-man min. Be lɛ-man akunndan, be si-man ngwlɛlɛ. Sɛ ɔ ti sa tɛ yolɛ liɛ'n, be si i wun ngwlɛlɛ, sanngɛ sa kpa'n liɛ'n, be si-mɛn i yo.»

JÉSUS-CHRIST I DYASIN FE'N BO LUC KLELI'N 16:8

Ninnge sunianfuɛ sɔ'n b'ɔ yo-man sa i nuan su'n, i min'n yoli i mo i ngwlɛlɛ bɔ wunnin i'n ti, afin ajulisufuɛ nga'm be si be wiengu wun sa yo kpa tra be bɔ Nyanmiɛn man be wun ase'n.

Jean 3:17

Afin Nyanmiɛn ɔ'a sunmɛn-mɛn i Wa'n mɛn'n nun kɛ ɔ wa di jɔlɛ, sanngɛ ɔ sunmɛnnin i kɛ ɔ bla nan mɛnfuɛ'm be ´nyan bé ti.

Jean 8:44

Amún si'n yɛlɛ mmusu'm bé si Satan'n, yɛ an klo kɛ amun ´yo amún si sɔ'n i klun sa. Kɛ ɔ fin i bo bolɛ nun'n, ɔ ti sran kunfuɛ, ɔ di-man nanwlɛ mlɔnmlɔn, afin ɔ si-man nanwlɛ'n. Ɔ bua ato, afin ato'n ti i nzuɛn, ato'n ti i junman, i yɛ ɔ ti ato buafuɛ'm be si nin-ɔn.

Sa nga bé yôli'n 13:10

ɔ seli kɛ: «Asiɛ usu'm bé si Satan wa, gblɛ'n nin ndrunmun'n ɔ'a kun wɔ kpo! Like kwlaa ng'ɔ ti kpa'n a klo-mɛn i. ?A yaci-man e Min Nyanmiɛn'n i ndɛ nanwlɛ'n i nun ato bualɛ'n ?

Rɔmfuɛ Mun 1:22

Be bu bé wun ngwlɛlɛfuɛ, ɔ man be kacili sinnglinfuɛ.

1 Korɛntfuɛ Mun 1:27

Afin like nga sran'm be bu-man be like'n, be yɛ Nyanmiɛn fa gua ngwlɛlɛfuɛ'm bé nyin ase-ɔ. Like nga sran'm be bu i kɛ be kwla fa yo-man like fi'n, be yɛ Nyanmiɛn fa gua keklefuɛ'm bé nyin ase-ɔ.

1 Korɛntfuɛ Mun 2:14

Klɔ Sran'n b'ɔ o sa'n, ɔ fa-man Nyanmiɛn Wawɛ ninnge'm bé su, afin be ti i nyrun sinnzin like, ɔ kwla wun-man be wlɛ mlɔnmlɔn, afin san Nyanmiɛn Wawɛ'n yɛ ɔ kle sran yɛ man ɔ wun be wafa'n i wlɛ-ɔ.

1 Korɛntfuɛ Mun 3:19

Afin sran'm be ngwlɛlɛ'n bɔ be waan be si i'n, ɔ ti sinnzin Nyanmiɛn nyrun. Afin be klɛli i kɛ: «Ngwlɛlɛfuɛ'm be bɔbɔ be gblɛ bɔ be kpɛ'n yɛ Nyanmiɛn fa tra be-ɔ .»

1 Korɛntfuɛ Mun 3:3

afin an tɛ yo kɛ sran bɔ be ti-man Kristfuɛ sa. ?Kɛ amún nyin ci amun wiengu bɔ utre wo amun afiɛn'n, an ti-man kɛ sran bɔ be ti-man Kristfuɛ sa? ?Yɛ nán sa nga klɔ sran yo'n yɛ an yo-ɔ?

2 Korɛntfuɛ Mun 1:12

Sa nga ti yɛ e di é nuan'n yɛ: e si e klun lɔ kpa kɛ nantilɛ wafa nga e fa nanti mɛn nun'n, e nanti i sɔ kpa amun nyrun tra su. E nuan nun ti-man nnyɔn-nnyɔn, Nyanmiɛn man e di nanwlɛ. Nán klɔ sran ngwlɛlɛ bɔ e si'n ti yɛ man e yo sɔ-ɔ, sanngɛ Nyanmiɛn yɛ ɔ jran é sin yɛ man e yo sɔ-ɔ.

2 Korɛntfuɛ Mun 11:3

Srɛ kun min kɛ nan man be wa saci amún ti nun b'ɔ man an su fa-man amún wla'n kwlaa guɛ-mɛn i Krist su kun, ɔ ´yo kɛ kɛ wuo i gblɛ'n ti ɔ laka Ɛv b'ɔ nyɛnnin i'n sa .

Filipfuɛ Mun 3:19

Be agualiɛ yɛlɛ be mlinlɛ, be Nyanmiɛn'n yɛlɛ be ku'n. Like nga sran yo-ɔ ɔ guɛ i nyin ase'n yɛ be fa di bé nuan-an. Mɛn'n nun ninnge'n yɛ ɔ lo be-ɔ.

2 Tɛsalonikfuɛ Mun 2:9

Satan yɛ ɔ ´tin bian b'ɔ di-man mmla'n su sɔ'n yɛ ɔ ´ba-a, ɔ man ɔ wa yo sa kekleekle'n kwlaa, ɔ ´yi atrɛ, yɛ ɔ ´yo abonuan sa gblɛ nun .

1 Timote 4:1

Nyanmiɛn Wawɛ'n kɛn i weiin kɛ, cɛn wie lele kɛ mɛn'n ´kɔ i bue nuan'n, sran wie'm be su lafi-man Nyanmiɛn su kun, be ´fa like nga mmusu bɔ be laka sran'n be kle'n su.

Jacques 1:17

Like kpa kwlaa nga be fa man sran'n, ɔ nin like kpa kwlaa nga be nyɛn i'n, be fin e Si b'ɔ o nglo lɔ b'ɔ yili anglo'n, nin nzraama, ɔ nin wia'n bɔ be kpaja'n. I liɛ'n ɔ kaci-man mlɔnmlɔn, yɛ ɔ kpɛ-mɛn i wun kɛ lolɛ b'ɔ kpɛ i wun'n sa.

Jacques 1:5

Sɛ ngwlɛlɛ'n w'a ti-man amun nun wie kpa'n, man ɔ kan kle Nyanmiɛn bɔ i sa ti-man tankaan'n, b'ɔ fa like man sran'm be kwlaa ɔ ijɔ-mɛn i sin'n. Ɔ man sran sɔ'n ɔ ´wun sa wlɛ.

Jacques 3:17

Ngwlɛlɛ b'ɔ fin nyanmiɛn su'n, sɛ ɔ ti sran'n, wuun e ´se kɛ sa tɛ kaan sa nun-mɛn i wun. Ɔ klo-man ndɛnngan, ɔ ti wɛtɛfuɛ, be nin i kwla koko yalɛ, ɔ si aunnvuɛ dan, ɔ yo sa kpa, ɔ bu-man sran'n wie kpa tra-man wie, yɛ ɔ klo-man dunman.

Jude 1:19

Sran sɔ'm be yɛ man sran nin sran be bu nin-ɔn. Be ti klɔ sran, Nyanmiɛn Wawɛ'n sie-man be.

Sa nglô yile 12:9

Be kannin dragɔn sroesroe dan sɔ'n nin i anz'm be bo guali be asiɛ'n su wa. I yɛ be flɛ i wuo lalaa, nin mmusu'm be si, nin Satan nin-ɔn, i yɛ ɔ laka mɛn wunmuan nunfuɛ'm be kwlaa nin-ɔn .

Sa nglô yile 2:24

Sanngɛ amun Tiatir asɔnunfuɛ nga mun bɔ amu'an fa-man like ng'ɔ kleli su'n, bɔ an si-man like nga sran wie'm be flɛ i Satan'n i bo ndɛ'n, n se amun kɛ yoo: N su fa-man trɔ uflɛ jin-man amún ti su.

Sa nglô yile 9:11

Be lɛ be famiɛn kun, be famiɛn sɔ'n yɛlɛ kunman dan bɔ be si-mɛn i bo'n i anz'n. Be flɛ i Ebre nun Abadɔn, yɛ Grɛk nun be flɛ i Apoliɔn, i bo yɛlɛ Abɔlɛfuɛ.