Ndɛ Nga Nyanmiɛn I Nuan Ijɔfuɛ Oze Kannin'n 14:7 - NYANMIƐN NDƐ'N 1998

⁷ Izraɛlfuɛ'm be wa yo mlanmlan, be ´yo klanman kɛ olivie sa, sɛ n ´kwla se'n, be ´bɔn fannin kɛ Liban bo'n fa bɔn fannin'n sa.

Ndɛ Nga Nyanmiɛn I Nuan Ijɔfuɛ Oze Kannin'n 14:7 ပူးပေါင်းရင်းမြစ်များ

Jue Mun 138:7

Sɛ bɔ nyrɛnnɛn tɔ mín su sɛ'n, wɔ man n ka nguan nun. Ya nga min kpɔfuɛ'm be fɛ i mín wun'n, a kɛn i ase, yɛ a de min.

Jue Mun 85:6

?Nan a ´ka é wun ya falɛ'n su sa tititi? ?A ´fa ɔ ya'n a ´gua akpasua nga be ´jaso su'n be su?

Jue Mun 91:1

Sran ng'ɔ ko fia Nyanmiɛn bɔ like fi nun-mɛn i sin'n i sin'n, wuun ɔ'a tran Nyanmiɛn b'ɔ kwla like kwlaa yo'n i fɔnvɔ'n nun.

Ngɔjue Fɛfɛ Kpa'n 2:3

Kɛ a wun min janvuɛ'n gbanflɛn kun nga'm be afiɛn'n, ɔ waan pɔmun waka wie yɛ ɔ o bo'n nun waka'm be afiɛn sa. Sɛ ɔ ti waka'n, wuun n ´se kɛ i fɔnvɔ'n i bo tranlɛ yo min fɛ kpa, i mma'm be yo fɛ kpa min nuan nun.

Ngɔjue Fɛfɛ Kpa'n 4:11

Min yi, ɔ nuan bui'm be su ti nɛnkɛn-nɛnkɛn kɛ awɛma nzue sa. Ɔ taaman'n i bo ti awɛma nzue nin nɔnnɔn ngunmin. Ɔ tralɛ'm be bɔn klanman kɛ Liban waka mun sa.

Ngɔjue Fɛfɛ Kpa'n 6:11

N wɔli nuaye fie'n nun lɔ. N wɔli kongo'n nun lɔ. N wɔli waka mma bɔ be su fifi'n be nianlɛ. Min waan n ´ko nian sɛ vinyi'm be su fifi o! Min waan n ´ko nian sɛ grenadie'm be su bo nnyrɛ o!

Ezai 61:11

Kɛ ijre'n nin waka mma'm be fa fifi asiɛ wun'n, yɛ kɛ ninnge nga be lua be'n be fa fifi fie'm be su'n sa'n, i kunngba nin-ɔn, sɛ sa nga be yo i nuan su'n nin Nyanmiɛn manmanlɛ'n be ti ijre annzɛ waka mma'n, wuun n ´se kɛ Anannganman Nyanmiɛn'n ɔ ´yo man be ´fifi nvle-nvle'm be nunfuɛ'm be nyrun be ´wun i.

Ezekiɛl 17:23

N ´tɛ i oka nga b'ɔ ti fleiin kpa Izraɛl lɔ'n i su. Ɔ ´nyan sama, yɛ ɔ ´su mma. Ɔ ´yo sɛdri klanman kpa. Anunman wafa'n kwlaa be ´ko trɛn i sama fleiin'm be fɔnvɔ'n bo.

Ndɛ Nga Nyanmiɛn I Nuan Ijɔfuɛ Oze Kannin'n 14:5

«N ´yo man Izraɛlfuɛ'm be ´yaci bé nyin nyɔnnyɔn siesielɛ. N wa klo be klolɛ kpa, n su fa-man bé wun ya tɛ kun.

Ndɛ Nga Nyanmiɛn I Nuan Ijɔfuɛ Oze Kannin'n 2:21

Jalɛ nga n ´ja wɔ yɛ'n, n su yra-man wɔ le. Ɔ ´yo nanwlɛ su. N ´klo wɔ, n ´si wɔ aunnvuɛ.

Ndɛ Nga Nyanmiɛn I Nuan Ijɔfuɛ Oze Kannin'n 2:22

Jalɛ nga n ´ja wɔ'n, min nin wɔ e ´tran lelele kpɛkuun siɛn'n a si min Anannganman.»

Ndɛ Nga Nyanmiɛn I Nuan Ijɔfuɛ Oze Kannin'n 6:2

Wa nin le nnyɔn'n ɔ ´yo man e nyan nguan ekun, e ´tintin é sa ase i fanngan nun. Kpɛkuun i le nsan su'n, ɔ ´man ye su e ´yo juejue, e wa tran nguan nun i nyrun ekun .

Zakari 8:12

N ´yo man sran'm bé wun ´tɔ be fɔuun. Vinyi'm be ´su, fie'm be ´yo kpa, nzue'n ´tɔ. Nɛnnɛn nga n ´fa di Izraɛlfuɛ nga be kali'n, yɛ ɔ o lɛ-ɔ.

Jean 11:25

Jésus seli i kɛ: «Min yɛ n cɛn sran mun-ɔn, m bɔbɔ min yɛ be flɛ min nguan nin-ɔn. Sran kwlaa ng'ɔ lafi n su'n, sɛ ɔ wu'n, ɔ ´nyan nguan ekun.

Jean 12:24

Nanwlɛ, sɛ ble mma kun ɔ'a tɔ-man asiɛ wun ɔ'a saci-man'n, ɔ kɛ i kunngba, sanngɛ sɛ ɔ saci'n, ɔ wlɔ yɛ ɔ yo kpanngban.