Ɛsdras 9:3 - NYANMIƐN NDƐ'N 1998

³ Kɛ n tili ndɛ nga'n, n titili tralɛ nga be wla mín wun'n be nun. N tutuli mín ti ndrɛ'n ɔ nin min akanza'n, yɛ n trannin ase awlaboɛ b'ɔ kunnin min kpo'n ti .

Ɛsdras 9:3 ပူးပေါင်းရင်းမြစ်များ

2 Samiɛl 1:11

Yɛ David sɔli i wun tralɛ'm bé nun yɛ ɔ titi be nun-ɔn. Be nga be o i wun lɛ'n be kusu be titili be liɛ'm be nun.

2 Famiɛn Mun 18:37

Yɛ Ilkiza i wa Eliakim b'ɔ ti famiɛn'n i awlo'n su kpɛn'n nin Sɛbna b'ɔ ti fluwa klɛfuɛ'n, ɔ nin Azaf i wa Zɔas b'ɔ ti famiɛn Ezekias i nuan ijɔfuɛ'n be titili bé wun tralɛ'm be nun-ɔn, nan b'a ko kan ndɛ nga safunyrɛn'n kannin'n b'a kle i.

Neemi 1:4

Kɛ n tili ndɛ sɔ'n, n trannin ase, n sunnin, n trannin awlaboɛ sɔ'n nun n dili le nnyɔn kun. N kpɛli srɛ nun, n srɛli Nyanmiɛn b'ɔ o nglo lɔ'n.

Neemi 13:25

N ijɔli be nan m'an bo be sannzan. N boli sran sɔ'm be nun wie mun, n tutuli be timuɛn mun. N yoli man be tali Nyanmiɛn i nda be seli kɛ be fa-man bé wa bla be man-man aofuɛ'm bé wa yasua mun kun, be ja-man aofuɛ'm bé wa bla mun be man-man bé wa yasua mun kun, yɛ be bɔbɔ be ja-man aofuɛ'm bé wa bla mun kun.

Zɔb I Nyrɛnnɛn Wunlɛ 1:20

Yɛ Zɔb jasoli-ɔ. Ɔ titili i wun tralɛ'm be nun. I sin, ɔ kpuli i ti'n su, yɛ ɔ bubu guali asiɛ wun gblo! Ɔ kotoli,

Jue Mun 119:53

Kɛ n wun kɛ klunwifuɛ'n be kaci bé sin be si ɔ mmla'n, kɛ n wun aeliɛ tɛtɛ nga be yo'n, kɛ min anwlɛn'n ɔ kpɛ min klun sa!

Jue Mun 143:4

Min wla'n ɔ'a bo min wun srɛ b'ɔ kun min'n ti, min anwlɛn'n wanndi min klun.

Jue Mun 66:3

Amun `se i kɛ: «Nanwlɛ, ninnge nga a yo be'n be ti abonuan. Kɛ ɔ kpɔfuɛ'm be wun kɛ a kwla sakpa'n, be kwla tu-man bé wun kun.

Ezai 15:2

Dibɔnfuɛ'm be kɔ amuɛn sua'm be nun be ko sun. Be kɔ sraka yiwlɛ mun bɔ be o kpɔlɛ'm be su'n be nun, be ko sun. Moabfuɛ'm be kɔ Nɛbo oka'n su be ko yi ngwlɛ. Be kɔ Medɛba klɔ lɔ be ko yi ngwlɛ. B'a yi bé ti'm be kwlaa, b'a yi be akanza'n kwlaa.

Zeremi 36:24

Famiɛn'n nin i awlo lɔ sran dandan'm be kwlaa be tili ndɛ sɔ'n i kwlaa weiin, sanngɛ be klun sa ɔ'a ti-man be nan se kɛ be ´titi bé wun tralɛ'm be nun.

Zeremi 7:29

«Zidafuɛ mun, an `kpɛkpɛ amún ti muɛn b'ɔ kle kɛ min liɛ yɛlɛ amun'n, nan an `guɛ i blo. An ´to sɛ jue kpɔlɛ nga be su ti treketreke'n be su. Afin m'an yi amun blo. Yɛlɛ kɛ amun ti akpasua kun bɔ amu'an fɔkɔ mín anwlɛn.»

Ezekiɛl 3:15

N juli Tɛl-Abib, sran nga be trali be lomuɛn ɔli Kɛbar nzue ba'n i nuan lɔ'n bé wun lɛ. N kali bé wun lɛ cɛn ba nso, min nuan boli min wun dan kpa afɛ dan'n ti.

Ezekiɛl 7:18

Be ´wla bajɛ tralɛ, yɛ srɛ'n ´kun be kpo. Be kwlaa be ´wun nyannzuɛn. Be kwlaa be ´yi bé ti'n.

Daniɛl 4:19

Nannan, wɔ yɛ a ti waka sɔ nin-ɔn. W'a yo dan, yɛ w'a nyan wunmiɛn. Ɔ dan'n, sɛ e ´kwla se'n, ɔ'a nyin lele i ti'n ɔ'a to nyanmiɛn b'ɔ la nglo lɔ plaii'n, yɛ ɔ sielɛ'n kusu kɔ lele ju asiɛ'n i awieliɛ.

Daniɛl 8:27

Kɛ ɔ yoli sɔ'n, min Daniɛl, min wunnɛn'n lololi min sa kplɛkɛɛ, yɛ n tɔli tukpacɛ, n dili cɛn kaka. I sin n jasoli nan m'an di famiɛn i junman mun. Srɛ dan kpa kunnin min like nga n wunnin be bɔ n si-man bé bo'n ti.»

Saun Yolɛ 21:5

Sɛ sran wu'n, ɔ fata-man kɛ min nyrun jranfuɛ'm be yi bé ti'n i bue kun, wie kusu-ɔ be yi be srɔ su ndrɛ mun, wie kusu-ɔ be bobo bé wun kannin.

Mise 1:16

Amun mma bɔ amun klo be'n ti, an `yi amún ti mun. Amun `kpu amun ti'm be su, amun `kpu be su treketreke kɛ apɛtɛkuasi liɛ'n sa, afin be su wa tra amun mma mun ´kɔ mɛn wie nun.

Zozie 7:6

Zozie nin Izraɛl kpɛnngbɛn'm be titili be wun tralɛ'm be nun, be fali ndutre guali be ti'n su yɛ be kotoli, be utuli bé nyin ase Anannganman i alaka'n nyrun lele nnɔsua, bé wla b'ɔ boli'n ti.