Ɛsdras 6:14 - NYANMIƐN NDƐ'N 1998

¹⁴ Zuif kpɛnngbɛn'm be kplannin sua'n ɔ wieli weiin. Nyanmiɛn nuan ijɔfuɛ Aze, ɔ nin Ido i wa Zakari be ndɛ nga Nyanmiɛn fa wlali be nuan'n, ɔ wlali be fanngan. Be wieli sua'n kplan kɛ Izraɛl Nyanmiɛn'n kannin'n sa. Be fali Siris nin Dariis, nin Artaksɛrksɛs bɔ be ti Pɛrs famiɛn'n bé nuan ndɛ'n su.

Ɛsdras 6:14 ပူးပေါင်းရင်းမြစ်များ

Ɛsdras 3:8

Kɛ be sali be sin Zerizalɛm bɔ lɛ yɛ Nyanmiɛn i sua'n wo'n, be afuɛ nnyɔn i anglo nnyɔn su'n, Sealtiɛl i wa Zorobabɛl nin Zozadak i wa Zozie, nin be niaan Nyanmiɛn nyrun jranfuɛ mun, ɔ nin Levifuɛ mun, ɔ nin be kwlaa nga be trali be lomuɛn bɔ be sali be sin'n, be boli junman'n bo. Be sieli Levifuɛ nga b'a di afuɛ ablaɔn annzɛ afuɛ ablaɔn ɔ'a tra'n kɛ be nian Anannganman i sua kplanlɛ junman'n su.

Ɛsdras 4:24

Zerizalɛm lɔ Nyanmiɛn sua'n i kplanlɛ'n jrannin. Ɔ jrannin lele juli Dariis b'ɔ ti Pɛrs famiɛn'n i sielɛ'n i afuɛ nnyɔn'n su.

Ɛsdras 4:3

Zorobabɛl nin Zozie nin awlobo kpɛnngbɛn kun nga'm be tɛli be su kɛ: «Kɛ e nin amun e `kplan e Nyanmiɛn i sua'n, ɔ ti-mɛn i su. E kunngba yɛ e ´kplan Anannganman b'ɔ ti Izraɛl Nyanmiɛn'n i sua nin-ɔn. Siris, b'ɔ ti Pɛrs famiɛn'n yɛ i waan e `yo i sɔ-ɔ.»

Ɛsdras 5:1

Yɛ Nyanmiɛn nuan ijɔfuɛ Aze ɔ nin Ido i wa Zakari be kannin Nyanmiɛn nuan su ndɛ kleli Zuif nga be o Zerizalɛm nin Zida lɔ'n.

Ɛsdras 5:13

kpɛkuun afuɛ nga famiɛn Siris boli Babilɔni i sielɛ bo'n, ɔ mannin atin kɛ be kplan Nyanmiɛn sua sɔ'n.

Ɛsdras 5:2

Yɛ Sealtiɛl i wa Zorobabɛl, ɔ nin Zozadak i wa Zozie, bé bo yoli kun nan b'a man Nyanmiɛn i sua'n b'ɔ o Zerizalɛm'n i kplanlɛ'n su ekun. Nyanmiɛn nuan ijɔfuɛ'm be jrannin be sin yɛ be ukali be .

Ɛsdras 6:3

Afuɛ klikli nga famiɛn Siris sieli Pɛrs'n, ɔ kannin Nyanmiɛn sua'n b'ɔ o Zerizalɛm lɔ'n i wun ndɛ ng'ɔ o yɛ'n, i wan yoo: Man be kplan sua'n nan be `yi tɛ nun. Man be kplɛn i kplanwlɛ laa'n nun. Man i bo ase wlalɛ'n ɔ yo kekle kpa. Man i nglo-nglo'n yo mɛtri ablasan, yɛ i tɛtrɛ nun'n yo mɛtri ablasan.

Ɛsdras 6:8

Nga n usa kɛ amun yo be man Zuif'm be kpɛnngbɛn mun nan b'a kwla kplan sua sɔ'n, yɛlɛ kɛ Efrat sin lɔ lapo nga be tua blɛ min'n, i nun yɛ amun `fa ng'ɔ fata'n fa man be-ɔ. Nán junman'n jran.

Ɛsdras 7:1

I sin, Ɛsdras ɔ wa bali Artaksɛrksɛs b'ɔ ti Pɛrs famiɛn'n i blɛ su. Ɛsdras i si'n yɛlɛ Sɛraza, Sɛraza liɛ'n yɛlɛ Azaria, Azaria liɛ'n yɛlɛ Ilkiza,

Ɛsdras 9:9

afin e ti kanga, sanngɛ e Nyanmiɛn, w'a yi-man ye ase e kanga yolɛ'n nun. A fali wɔ aunnvuɛ silɛ'n wlali Pɛrs famiɛn'm be nun kɛ ɔ ´yo nan y'a wu-man, nan y'a kwla kplan wɔ bɔ a ti e Nyanmiɛn'n ɔ sua b'ɔ buli'n, nan y'a nyan fiawlɛ Zerizalɛm klɔ'n, ɔ nin Zida nvle nun'n ti.»

Neemi 6:15

Talɛ'n wieli Elil anglo'n i le ablaɔn-nin-nnun'n su. I kplanlɛ'n dili cɛn ba ablenun-nin-nnyɔn.

Ezai 44:28

N se kɛ: «Siris ti min bua'm be tafuɛ! Ɔ ´yo min klun sa'n kwlaa. Ɔ ´se kɛ be kplan Zerizalɛm klɔ'n i uflɛ, yɛ ɔ ´se kɛ be yo min Nyanmiɛn min sua'n ekun .»

Ndɛ Nga Nyanmiɛn I Nuan Ijɔfuɛ Aze Kannin'n 1:1

Kɛ Dariis trannin famiɛn bia su'n, i afuɛ nnyɔn'n i anglo nsiɛn'n i cɛn klikli'n su'n, Anannganman kannin ndɛ kleli Aze b'ɔ ti i nuan ijɔfuɛ'n. I waan ɔ `se Sealtiɛl wa Zorobabɛl b'ɔ sie Zida'n ɔ nin Zozadak wa Zozie b'ɔ ti Nyanmiɛn nyrun jranfuɛ'm bé su kpɛn'n be kɛ:

Ndɛ Nga Nyanmiɛn I Nuan Ijɔfuɛ Aze Kannin'n 1:8

Amun `fu oka'm be su be `ko kpɛ waka be bla nan amun `wa kplan min sua'n. I liɛ nɛnnɛn nga amun ´di min'n, min klun ´jɔ su. M bɔbɔ min Anannganman'n yɛ n kan sɔ-ɔ.

Zakari 1:1

Kɛ be sieli Dariis famiɛn'n i afuɛ nnyɔn'n i anglo mɔcuɛ'n su'n Anannganman'n kannin ndɛ kleli Zakari, Ido i wa Berekia i wa liɛ'n,

Zakari 1:16

Ɔ man i ti Anannganman'n wan yoo: ‹N ´sa min sin n ´nian Zerizalɛm lika ekun. Be wa kplan mín sua laa'n ekun. Be wa sunnzun Zerizalɛm be ´kplɛn i ekun. Min Anannganman b'ɔ n sie mɛn wunmuan'n yɛ n kan sɔ-ɔ.›

Zakari 4:9

«Zorobabɛl b'ɔ wlali sua nga bo ase'n, i kunngba'n yɛ ɔ ´wie i kplan-an.» Kɛ ɔ ko yo sɔ'n, amun wa wun i wlɛ sakpa-sakpa kɛ Anannganman b'ɔ sie mɛn'n wunmuan'n yɛ ɔ sunmannin min-ɔn.

Zakari 8:9

Anannganman b'ɔ sie mɛn wunmuan'n wan yoo: «Amun nga amun tili ndɛ nga min nuan ijɔfuɛ'm be kannin'n, cɛn nga min bɔ n sie mɛn wunmuan'n min sua'n i kplanlɛ'n ju nan be ´wlɛ i bo ase'n, an `jran kekle.