Ɛsdras 3:12 - NYANMIƐN NDƐ'N 1998

¹² Nyanmiɛn nyrun jranfuɛ, nin Levifuɛ, nin awlobo kpɛnngbɛn bɔ be ti kaklaakla, bɔ be wunnin Nyanmiɛn sua laa liɛ'n, bé sunman be o lɛ, kɛ be wunnin sua'n i bo ase bɔ be su wla'n, be tikeli bé ti be sunnin kekle kpa. Kɛ ɔ ´yo sɔ'n, wuun sran sunman kpa be ´kpan be klun b'ɔ ti jɔwa'n ti.

Ɛsdras 3:12 ပူးပေါင်းရင်းမြစ်များ

Ɛsdras 3:13

Be aklunjuɛ kpanlɛ nin be sunlɛ'n, be lɛ-man ngbaciɛ, i kwlakwla sanngan nun kunngba. Nganniɛn dan b'ɔ Izraɛlfuɛ'm be yoli'n be ti i mmua lɔ.

Zɔb I Nyrɛnnɛn Wunlɛ 8:7

Wafa nga a fa ti laa'n, ɔ su ju-man siɛn liɛ'n i nun mlɔnmlɔn.

Jue Mun 126:6

Sran nga ble'n i gualɛ'n su'n ɔ sun yɛ ɔ kɔ'n, kɛ ɔ'a blo bɔ ɔ'a ko kpɛ'n, b'ɔ ´sɛ i sin ba, bɔ ble'n i sɔlɛ'm be guɛ i kɔmin su'n, ɔ ´bo sro aklunjuɛ'n ti.

Jue Mun 147:1

An `manman Anannganman! Sɛ e bo e flɛ e Nyanmiɛn'n, ɔ ti kpa. Ɔ yo fɛ, i yowlɛ su-ɔ.

Ezai 41:14

Zakɔb osu nunfuɛ mun, amun bɔ amun ti kɛ kakaa kanngan mun sa'n, Izraɛlfuɛ kanngan nga amun kali lɛ'n, nán srɛ kun amun, n su ba amun ukalɛ. Min Anannganman bɔ n ti Izraɛl Nyanmiɛn'n, bɔ n ti amún ti kpɔfuɛ'n, min yɛ n se sɔ-ɔ.

Ezai 60:22

Be nun kaan'n i osu nunfuɛ'm be ´trɛ lele be ´ju sran akpi, be nun kaan kpa'n, i osu'n ɔ kaci nvle dan kpa kun. Sɛ sa sɔ'm be blɛ'n ju'n, m bɔbɔ min Anannganman'n, n ´kan mín wun n ´yo be.

Zeremi 50:4

I sɔ blɛ'n nun yɛ Izraɛlfuɛ mun nin Zidafuɛ mun be ´ba likawlɛ nin-ɔn, be ´ba'n, wuun be ´sun. Be ´kunndɛ Anannganman be Nyanmiɛn'n.» Anannganman'n yɛ ɔ kan sɔ-ɔ.

Ndɛ Nga Nyanmiɛn I Nuan Ijɔfuɛ Aze Kannin'n 2:3

‹?Laa, kɛ Anannganman i sua'n i klanman fa ti ju'n, amun nun'n, wan yɛ ɔ wunnin i bɔ i wla tɛ o su-ɔ? ?Yɛ kɛ amun wun i ndɛ'n, ɔ ti sɛ? ?Kɛ amun nian'n, i klanman'n ɔ'a kpɛ-man su yɛ ɔ o lɛ-ɔ ?

Zakari 4:10

?Sua yɛ'n, kɛ be ´bo i kplanlɛ bo'n, sran wie'm b'a yi-man bé nyin saa, yɛ b'a sri-mɛn i kplanfuɛ mun? Sanngɛ cɛn nga be ´wun kɛ Zorobabɛl su kplan sua sɔ'n ´kɔ'n, be klun ´jɔ. Nan yoo, kannin nso nga a wun i lɛ'n, Anannganman'n i nyinma mun-ɔn. Ɔ fa wlan asiɛ wunmuan'n su .