Ɛsdras 3:10 - NYANMIƐN NDƐ'N 1998

¹⁰ Kɛ sua kplanfuɛ'm be wlali Anannganman i sua'n i bo ase'n, be flɛli Nyanmiɛn nyrun jranfuɛ mun kɛ be wa trɛn i bo. Be ´ba'n, be tralɛ'n wla be wun, be awɛ'n wo bé sa nun. Levifuɛ nga be ti Azaf awlo'n nunfuɛ'm be kusu be jue tolɛ ninnge ng'ɔ ti kɛ ndɛ sa'n wo bé sa nun. Be wa manmannin Anannganman kɛ Famiɛn David kleli kɛ be `yo'n sa.

Ɛsdras 3:10 ပူးပေါင်းရင်းမြစ်များ

1 Be Nyoliɛ 15:24

Be nin Obɛd-Edɔm, nin Zɛsiza yɛ be nian su-ɔ. Sɛbania, nin Zozafat, nin Nɛtaneɛl, nin Amazai, nin Zakari, nin Bɛnaza, ɔ nin Eliezɛr bɔ be ti Nyanmiɛn nyrun jranfuɛ'n be o Nyanmiɛn i alaka'n i nyrun be bo awɛ.

1 Be Nyoliɛ 15:27

David wlali tralɛ dan kun. Be fali lɛn nyanman plili yɛ be wuli-ɔ. Levifuɛ nga be sua alaka'n be kwlaa, ɔ nin jue tofuɛ mun, ɔ nin Kɛnania b'ɔ ti alaka'n suafuɛ nin jue tofuɛ'm be su kpɛn'n, be wlali tralɛ wafa kunngba sɔ'n wie. Nyanmiɛn nyrun jranfuɛ'm be tralɛ'n bɔ be fa lɛn nyanman plili be wu'n, kun wla David wun ekun.

1 Be Nyoliɛ 16:37

David seli Azaf nin i niaan'm be kɛ be ka Anannganman i alaka wun lɛ nan be di junman nga be fa wlali bé sa nun kɛ be di'n. I waan be `nian nga be siesie i cɛn ba kun nun'n su be yo i sɔ titi, nán man ɔ kpɛ.

1 Be Nyoliɛ 16:42

Eman nin Zɛditɛn yɛ be nian awɛ mun nin aaba ndɛ'm be su-ɔ. Be nian ngowa kanlɛ ninnge bɔ be fa to Nyanmiɛn manmanlɛ jue'n be su ekun. Zɛditɛn i mma'm be ti anuan nun jranfuɛ.

1 Be Nyoliɛ 23:5

Ɔ tili akpi nnan kɛ be yo anuan nun jranfuɛ, yɛ be akpi nnan (4.000) kun nga mun'n, i waan be `to jue manman Anannganman ɔ nin ngowa kanlɛ ninnge ng'ɔ yoli'n.

1 Be Nyoliɛ 25:25

I blu-nin-mɔcuɛ su'n yɛlɛ Anani nin i mma mun, ɔ nin i niaan mun. Be ti sran blu-nin-nnyɔn.

2 Be Nyoliɛ 35:14

I sin Levifuɛ'm be tɔnnin ng'ɔ ti be liɛ'n, nin Nyanmiɛn nyrun jranfuɛ'm be liɛ'n, afin Aarɔn osu'n nunfuɛ'm bɔ be ti Nyanmiɛn nyrun jranfuɛ'm be yrali nnɛn nga be yra be kɔlikɔli'n nin nnɛn kun mun be luilui lika mun lele nnɔsua fɔuun. I sɔ'n ti yɛ Levifuɛ'm be tɔnnin ng'ɔ ti be liɛ'n nin Aarɔn osu'n nunfuɛ bɔ be ti Nyanmiɛn nyrun jranfuɛ'm be liɛ nin-ɔn.

2 Be Nyoliɛ 35:15

Azaf osu'n nunfuɛ bɔ be ti jue tofuɛ'n be kali be tranwlɛ'n nun. Be yoli i kɛ mmla bɔ David, nin Azaf, nin Eman, ɔ nin Zɛditɛn bɔ be ti famiɛn i afɔtuɛ manfuɛ'm be mannin'n sa. Be nga be nian anuan'm be su'n, be jranjrannin anuan'm be su. Be wie fi ɔ'a tu-mɛn i bo yɛlɛ kɛ be niaan Levifuɛ'm be tɔnnin be like liɛ'n mannin be.

2 Be Nyoliɛ 5:12

Azaf nin Eman, ɔ nin Zɛditɛn, be nin be mma mun, ɔ nin be osu'n nunfuɛ kun nga mun, be ti Levifuɛ, yɛ be ti jue tofuɛ. Be wlali tralɛ nga be fali lɛn mma plili be wuli'n. Aaba ndɛ, nin jru, nin sanngo'm be o bé sa nun, be jin Nyanmiɛn sɔwlɛ'n i wia afiliɛ lɔ. Nyanmiɛn nyrun jranfuɛ ya-kun-nin-ablaɔn bɔ be bo awɛ'n, be nin be yɛ be o lɛ-ɔ.

Ɛsdras 2:41

Jue tofuɛ mun yɛlɛ Azaf awlo'n nunfuɛ mun. Be ti sran ya sran ablaɔn-nin-mɔcuɛ.

Ɛsdras 5:16

Yɛ Sɛsbazar bali nan ɔ'a bo Zerizalɛm Nyanmiɛn sua'n i kplanlɛ bo. Kɛ ɔ fɛli lɛ'n yɛ e sɔli i kplanlɛ-ɔ, lele ndɛ e nian wie-mɛn i kplan.›

Jue Mun 150:5

An `bo aaba ndɛ ng'ɔ tɛ kpa'n be fa mɛnmɛn i. An `bo aaba ndɛ ng'ɔ tɛ gblaungblaun kpa'n be fa mɛnmɛn i.

Ndɛ Nga Nyanmiɛn I Nuan Ijɔfuɛ Aze Kannin'n 2:15

«Kɛ ɔ fin ndɛ'n, amun `sie amún nyin ase wɛtɛɛ be `nian like ng'ɔ wa ba siɛn'n, nan sɛ amun ´fa yɛbuɛ be ´siesie be wiengu su be bo min sua'n i kplanlɛ bo-ɔ amun a bo.

Zakari 4:10

?Sua yɛ'n, kɛ be ´bo i kplanlɛ bo'n, sran wie'm b'a yi-man bé nyin saa, yɛ b'a sri-mɛn i kplanfuɛ mun? Sanngɛ cɛn nga be ´wun kɛ Zorobabɛl su kplan sua sɔ'n ´kɔ'n, be klun ´jɔ. Nan yoo, kannin nso nga a wun i lɛ'n, Anannganman'n i nyinma mun-ɔn. Ɔ fa wlan asiɛ wunmuan'n su .

Zakari 4:6

Nan ɔ'a yiyi nun ɔ'a kle min. Yɛ ɔ seli min kɛ yoo: «Ndɛ nga Anannganman'n kan kle Zorobabɛl'n yɛ. I waan: ‹Nán kɛ ɔ wue kekle'n ti-ɔ, yɛ nan kɛ ɔ wunmiɛn dan'n ti, yɛ a kwla di junman nin-ɔn, sanngɛ min Wawɛ'n ti yɛ man a kwla di-ɔ.

Zakari 4:7

?Oka dan, a ti nzu Zorobabɛl nyrun? Zorobabɛl ´trɛtrɛ wɔ nun kpɛtɛɛ. Ɔ nun yɛ be yi yɛbuɛ nga be fa sie i Nyanmiɛn i sua'n i ti nun lɔ nin-ɔn. Be ´yi wuun be ´kpan: Ɔ ti klanman o! Ɔ ti klanman o!› »

Zakari 6:12

Nan se i kɛ Anannganman b'ɔ sie mɛn wunmuan'n waan: ‹Sran kun wo wa be flɛ i anyɛn. Ɔ ´fifi kan ɔ tran lɛ'n. I yɛ ɔ wa kplan mín sua nin-ɔn.

Zakari 7:3

Be waan be ´usa Nyanmiɛn nyrun jranfuɛ nin Nyanmiɛn nuan ijɔfuɛ nga be tran Anannganman b'ɔ sie mɛn wunmuan'n i sua'n nun'n be kɛ: «?Sunlɛ nga e sun i anglo nnun'n su'n, ɔ nin nglɛmun nga e ci bɔ e sɔ i yolɛ lele ɔ'a fa ju ndɛ yɛ'n, e ´yo sɔ tititi?»

1 Samiɛl 22:18

Yɛ famiɛn'n seli Dɔɛg kɛ: «Bla wa ko kun Nyanmiɛn nyrun jranfuɛ mun.» Yɛ Dɔɛg b'ɔ ti Edɔmfuɛ'n ɔ kunnin be-ɔ. Ɔ kunnin sran ablaɔcuɛ-nin-nnun le kun sɔ'n nun. Be kwlakwla sɔ'n be wla Nyanmiɛn nyrun jranfuɛ'm be tralɛ wie.