Ezai 9:7 - NYANMIƐN NDƐ'N 1998

⁷ Sa nga Anannganman ´fa wla Zakɔb i osu'n nunfuɛ'm be nun'n, ɔ kan kleli be. Sa sɔ'n ɔ'a tɔ Izraɛlfuɛ'm be su.

Ezai 9:7 ပူးပေါင်းရင်းမြစ်များ

2 Samiɛl 7:16

Wɔ awlo'n nin ɔ sielɛ'n be ´taka a nin wɔ osufuɛ mun amun sa nun tititi, a ´tran famiɛn bia'n su yɛ ɔ sielɛ'n su kan-man ase le .› »

2 Famiɛn Mun 19:31

Sran onga kaan nga be wa ka lɛ'n be ´trɛ Zerizalɛm wa, yɛ be kaan nga be fiteli nun'n, be ´sɔn kaka kpa Siɔn oka'n su. Like nga bɔ Anannganman i klolɛ dan b'ɔ klo amun'n ti ɔ ´yo'n yɛ ɔ o lɛ-ɔ.

Jue Mun 2:8

Sɛ ɔ waan n fa mɛnmɛn mun m `man wɔ'n, sɛ ɔ waan n fa asiɛ'n i lika'n kwlaa n `fa man wɔ'n, kan nan n fa man wɔ, be ´yo ɔ liɛ.

Ezai 11:1

Sran kun ɔ ´jaso su Izai osu'n nun kɛ waka sama'n ɔ fɛfɛ waka'n i bo'n su'n sa. Ɔ wa jaso su kɛ waka nɔnman'n ɔ fɛfɛ waka i olui'n su'n sa .

Ezai 16:5

i blɛ sɔ nun'n, amun klun kpa'n ti, amun famiɛn diwlɛ'n ɔ ´taka kpa. Yɛ jɔlɛ difuɛ kun b'ɔ ti sran kpa'n, ɔ ´tran famiɛn bia'n su David i awlo'n nun. Jɔlɛ difuɛ sɔ'n, ɔ ´yo sa ng'ɔ ti i nuan su'n tititi, ɔ ´nian mmla'n su, ɔ ´fa cici i ti .»

Ezai 2:4

Ɔ wa yo nvle-nvle'm be jɔlɛ difuɛ, yɛ ɔ ´yo sran kpanngban be afiɛn siesiefuɛ. Be wa fa be tokofi mun be ´bo tokpo, yɛ be ´fa be cua mun be ´yo wlɔsɔ. Nvle kun su fa-man alɛ wlɛ-mɛn i nvle uflɛ sin kun. Be su suan-man alɛ dilɛ'n kun.

Ezai 26:11

Anannganman, a man ɔ́ sa'n su nglo fa wlanwlan be, sanngɛ be wun-mɛn i. Be ´wun klolɛ nga a fa klo ɔ nvle'n nunfuɛ mun'n, yɛ nyannzuɛn ´kun be. Yɛ sin ɔ ´yra ɔ kpɔfuɛ mun.

Ezai 37:32

Sran nga be onga kaan be wa ka lɛ'n, yɛ be kaan nga be ´fite nun'n, be ´ka Siɔn oka'n su.» Like nga bɔ Anannganman i klolɛ dan b'ɔ klo amun'n ti ɔ ´yo'n yɛ ɔ o lɛ-ɔ.

Ezai 40:10

Amun `nian, Anannganman min Nyanmiɛn'n ɔ ba yasua su. I yɛ ɔ sie sran mun-ɔn. Amun `nian, sran'm be akatua'm be wo i sa nun, like nga sran'm be yo'n, i nuan like'n wo i sa nun .

Ezai 42:13

Anannganman ba kɛ safunyrɛn sa, ɔ siesie i wun kɛ alɛ kunfuɛ b'ɔ su ko kun alɛ'n sa. Ɔ bo sro, ɔ kpan, ɔ kwlɛ i kpɔfuɛ mun.

Zeremi 23:5

Anannganman wan yoo: «Cɛn wie lele David i anunman kpa nanwlɛ su kun wa jaso i osu. Ɔ ´yo famiɛn kpa kɛ ɔ fata'n sa. Ɔ ´nian mmla'n su ɔ ´di jɔlɛ nanwlɛ mɛn'n nun.

Daniɛl 2:35

Kɛ ɔ yoli sɔ'n, i blalɛ o i aaba o, i jɛtɛ ufue o, i sika ɔkwlɛ o, be kwlaa be fufuli kpɛ kunngba, be kacili ndutre. Aunngban'n mannin be su kɛ ɔ fa man ble ja'n su sa, ɔ fitali be ɔli, b'a wun-man be osu mlɔnmlɔn kun. Sanngɛ yɛbuɛ b'ɔ wa finnin like ng'ɔ ti kɛ waka sran sa'n, ɔ kacili oka dan kpa kun, yɛ ɔ dili asiɛ wunmuan'n .

Daniɛl 2:44

Famiɛn sɔ'm be blɛ su'n, Nyanmiɛn b'ɔ o nglo lɔ'n ɔ ´sie famiɛn diwlɛ kun b'ɔ su saci-man le, yɛ mɛn uflɛ su sie-mɛn i le. Famiɛn diwlɛ sɔ'n ɔ ´nunnun famiɛn diwlɛ kun nga mun, kpɛkuun i bɔbɔ ɔ ´ka lɛ tititi .

Daniɛl 7:14

Be fali kwlalɛ'n be mɛnnin, be mɛnmɛnnin i, yɛ be fali famiɛn diwlɛ'n be wlɛli i sa nun. Nvle-nvle'n kwlaa nin mɛnmɛn'n kwlaa be nunfuɛ mun bɔ be kan aniɛn wafa-wafa'n kwlaa'n, be suli i. I kwlalɛ sɔ'n ɔ ´tran lɛ tititi, i blɛ'n su sin-man le, yɛ i sielɛ'n su nunnun-man le .»

Daniɛl 7:27

Famiɛn diwlɛ nga be wo asiɛ'n su wa'n, be ´fa be nun famiɛn bia mun, yɛ be ´fa kwlalɛ'n nin be anyrunnyan'n be ´man Nyanmiɛn bɔ like fi nun-mɛn i sin'n i nvle'n nunfuɛ mun. Nyanmiɛn i nvle'n nunfuɛ sɔ'm be famiɛn diwlɛ'n ɔ ´tran lɛ tititi. Yɛ mɛn'n nun siefuɛ'm be kwlaa bé nyin ´yi i, yɛ be ´su i.›

Ndɛ Nga Nyanmiɛn I Nuan Ijɔfuɛ Aze Kannin'n 2:9

Ɔ man min sua nga i klanman ´tra klikli liɛ'n. Kpɛkuun m ´man amun fɔundi lika nga nun wa. M bɔbɔ min Anannganman b'ɔ n sie mɛn wunmuan'n, min yɛ n fua kle amun-ɔn.› »

Matthieu 1:23

«An `nian, talua b'ɔ nian si-man bian'n ɔ wa wunnzɛ, ɔ ´wu ba yasua, Be ´tɔn i dunman Emaniɛl,» bɔ i bo'n kle kɛ Nyanmiɛn nin ye o nun .

Jean 12:34

Sran'm be usɛli i kɛ: «E kɛnngɛn i mmla'n nun kɛ Krist su wu-man mlɔnmlɔn. ?Sɛ ɔ ti sɔ'n, ɔ yo sɛ yɛ man a se kɛ san be ´man i b'ɔ kacili Sran'n i su nin-ɔn? ?Sran b'ɔ kacili sɔ'n yɛlɛ wan ?»

Hébreu 1:8

Sanngɛ ɔ kɛnnin i Wa'n i ndɛ kɛ: «Nyanmiɛn, ɔ bia'n wo lɛ tititi,» yɛ: «Sielɛ nga a sie sran mun'n, a sie be kpa.

Hébreu 7:24

sanngɛ Jésus liɛ'n, kɛ ɔ wu-man'n ti'n, i Nyanmiɛn nyrun jranlɛ'n, be su fa man-man sran uflɛ.

Sa nglô yile 19:11

Yɛ n wunnin kɛ nyanmiɛn su lɔ'n ɔ tili muaan, n ´nian-an, nnɛn kpanngɔ ufue kun yɛ. Sran ng'ɔ fu su'n, be flɛ i Sran-bɔ-be-kwla-fa-bé-wla-guɛ-i-su nin Nanwlɛfuɛ. I ndɛ b'ɔ di'n ɔ ti su, yɛ i alɛ b'ɔ kun'n, ɔ kun i i nuan su .