Ezai 61:6 - NYANMIƐN NDƐ'N 1998

⁶ Sanngɛ amun liɛ'n, be ´flɛ amun kɛ Anannganman i Nyrun Jranfuɛ mun. Be ´se kɛ amun liɛ'n, amun ti Nyanmiɛn'n i junman difuɛ mun. Amun ´di nvle-nvle'm be nunfuɛ'm bé bo ninnge'm bé su. Yɛ be nyrun bɔ be lɛ i'n, ɔ ´kaci amun liɛ .

Ezai 61:6 ပူးပေါင်းရင်းမြစ်များ

Ezipt Lɔ Tulɛ'n 19:6

Sanngɛ amun liɛ'n, amun wa yo min nyrun jranfuɛ'm be nvle. Amun nvle sɔ'n ´yo min liɛ klonglo.› Ndɛ nga a wa kan kle Izraɛlfuɛ mun'n yɛ ɔ o lɛ-ɔ .»

Ezai 23:18

Sanngɛ like ng'ɔ ´nyɛn i'n nin sika ng'ɔ ´nyɛn i'n, be ´yo Anannganman liɛ klonglo. Be su tiantian-man bé nuan, be su sie-man be lɛ. Sanngɛ be ´fa man be nga be tran Anannganman nyrun lɛ'n kɛ be `fa wie ta bé wun, yɛ be `fa kpa tralɛ nglanman-nglanman mun be `wla.

Ezai 54:3

Afin amun wa trɛ kɔ fama su nin bɛ su. Amun osu'n nunfuɛ'm be ´fa nvle-nvle mun, yɛ be ´tran klɔ nga be ´ka lɛ ngbɛn'n bé su.

Ezai 56:6

Aofuɛ nga be fa bé wun mantan min'n, bɔ be bu min sran'n, bɔ be klo min'n, bɔ be fa bé wun man kɛ be ´yo min sufuɛ'n, bɔ be sie min wunmiɛn-delɛ-cɛn'n i ngunmin'n, bɔ be nian aenguɛ nga min nin min nvle'n nunfuɛ mun e trali'n i mmla'n su kpa'n,

Ezai 66:12

Afin Anannganman waan: «Sɛ aunjuɛ'n ti nzue ba'n, wuun n ´yo man ɔ ´sonji ba Zerizalɛm. Sɛ nvle-nvle'm be nyrun bɔ be lɛ i'n ti nzue ba bɔ ɔ'a yi a kpa su'n, wuun n ´yo man ɔ ´sonji kpuu ba lɛ wie. N wa nian amun lika kɛ bla ta'n fa nian i wa b'ɔ mɛn i nyɔnflɛn'n i lika'n sa, ɔ fɛ i i sa su, ɔ fɛ i sie i ja su, yɛ ɔ kɛn i nyrun ngowa.

Ezai 66:21

«N ´kpa min nyrun jranfuɛ wie mun, nin Levifuɛ wie mun nvle sɔ'm be nun bɔbɔ.» Anannganman yɛ ɔ se sɔ-ɔ.

Zeremi 33:18

Levifuɛ nga be ti Nyanmiɛn nyrun jranfuɛ'n be kusu be ´nyan sran ´tran be ajalɛ nun titi ɔ ´yi tɛ nga be yra be nnɛn'n kɔlikɔli'n, ɔ ´yra ansans ɔ ´yi bo kun yolɛ i su tɛ mun, ɔ ´yi tɛ aliɛ ba blu-nin-nso nun.› »

Ezekiɛl 14:11

Kɛ ɔ ko yo sɔ'n, i liɛ Izraɛlfuɛ'm be su mlin-man be kɔ-man min wun mmua kun. Be su yo-man bé sa tɛ kpanngban nga be yo be lɛ'n be fa yo-man bé wun fiɛn kun. Be ´yo min nvlefuɛ mun, yɛ n kusu n ´yo be Nyanmiɛn. Min Anannganman Nyanmiɛn'n yɛ n kan sɔ-ɔ.› »

Rɔmfuɛ Mun 12:1

Aniaan mun, aunnvuɛ dan bɔ Nyanmiɛn wunnin ye'n ti, n ´srɛ amun kpa kɛ an fa amun wun mɛn i kɛ sraka bɔ be jrɛ i'n sa, b'ɔ ti i liɛ mlɔnmlɔn bɔ i klun jɔ su, i yɛ ɔ ti i sɔlɛ wafa b'ɔ ti su-ɔ.

1 Korɛntfuɛ Mun 3:5

?Wan yɛlɛ Apolɔs? ?Wan yɛlɛ m Pɔl kusu? E ti junman difuɛ bɔ e ndɛ bɔ e kannin'n ti yɛ an lafili Jésus su-ɔ.

1 Korɛntfuɛ Mun 4:1

I sɔ'n ti, man sran'm be si kɛ e ti Krist i ukafuɛ bɔ e nian like nga Nyanmiɛn fiɛli i sran'm be nyrun'n be su.

2 Korɛntfuɛ Mun 11:23

M ´ma kan ndɛ kɛ m'an jinmin sa: Sɛ be ti Krist junman difuɛ'n, n kusu n ti i junman difuɛ'n wie dan. N di junman trali be, be wlali min bisua trali be, be boli min trali su. Cɛn kwlaa n trannin wie'n i nuan,

2 Korɛntfuɛ Mun 6:4

Sanngɛ sa kwlaa nun e fa é wun kle kɛ e ti Nyanmiɛn junman difuɛ. Sɛ afɛ wo e su o, sɛ é sa mian o, sɛ e wun nyrɛnnɛn o, sa sɔ'n kwlaa nun, e tra ye anwlɛn.

Mmla'n 18:2

Be su nyan-man asiɛ'n wie Izraɛlfuɛ'm be nun. Be like liɛ bɔ be lɛ i'n, yɛlɛ Anannganman i sulɛ kɛ ɔ fa kan kleli be'n sa.

1 Piɛr 2:5

Amun kusu an ti kɛ yɛbuɛ b'ɔ o lɛ tititi'n sa, man be fa amun wla Nyanmiɛn sua bɔ i Wawɛ'n kplan'n nun wie, yɛ amun ´kaci Nyanmiɛn nyrun jranfuɛ mun bɔ i Wawɛ'n man amun ´sɔ i wafa uflɛ su. Jésus-Krist ti, i sɔlɛ sɔ'n ɔ ´jɔ i klun.

1 Piɛr 2:9

Sanngɛ amun liɛ'n, an ti sran bɔ Nyanmiɛn fali amun, an ti Famiɛn Nyanmiɛn'n i nyrun jranfuɛ mun, an ti Nyanmiɛn i nvle'n nun sran mun, yɛ an ti i liɛ mlɔnmlɔn. Ɔ fali amun kɛ an yi i b'ɔ flɛli amun kɛ an jao aosin nun, an bla lika ng'ɔ kpaja kpa nun'n i ayɛ .

Sa nglô yile 1:6

yɛ ɔ man y'a kaci e Si Nyanmiɛn i awlo sran bɔ e trɛn i nyrun. Man e yi i ayɛ, man e se kɛ ɔ ti kpli tititi! Man ɔ yo sɔ !

Sa nglô yile 20:6

Be nga be ko cɛn klikli sɔ'n wie'n, be liɛ su ti ye, be ti Nyanmiɛn liɛ sakpa! Wie i nnyɔn su'n su kwla-man be, be ´yo Nyanmiɛn nin Krist be nyrun jranfuɛ, be nin Krist yɛ be ´di famiɛn afuɛ akpi nin-ɔn.

Sa nglô yile 5:10

Ɔ man b'a kaci e Nyanmiɛn'n i awlo sran bɔ be trɛn i nyrun. Be yɛ be ´sie sran mun asiɛ'n su wa-a .»