Ezai 61:3 - NYANMIƐN NDƐ'N 1998

³ I waan nán Siɔnfuɛ bɔ be o sɛ nun'n be fa nzuɛn gua bé ti'n su kun. I ti i waan m blɛ be kle klanman. I waan nán be tran aunnvuɛ-aunnvuɛ kun. I ti i waan m blɛ be ngo fannin. I waan nán bé wla bo kun. I ti i waan m blɛ be cɛn dilɛ tralɛ. I liɛ'n, be ´flɛ be kɛ Sɛsɛ Yolɛ Waka Mun. Yɛ be ´flɛ be ekun kɛ Fie B'ɔ Yi Anannganman i Nyrun Nyannyan'n i Nglo.

Ezai 61:3 ပူးပေါင်းရင်းမြစ်များ

Ɛstɛr 8:15

Kɛ Mardose ´fin famiɛn'n i awlo lɔ ´fite'n, famiɛn tralɛ o i wun. I bue ti ɔkwlɛ srosrowa yɛ i bue ti ufue. Tralɛ dan ng'ɔ o su'n ti ɔkwlɛ kankankan, lɛn tralɛ-ɔ. Sika ɔkwlɛ kle dan kun wlɛ i ti. Siz klɔ wunmuan'n kejeli sa yikiyikiyiki sran'm be ´kpan'n, wuun be ´si able afin be klun ti jɔwa.

Ɛstɛr 9:22

Cɛn dilɛ sɔ'n ´kpɛn be wla kɛ cɛn sɔ'n nun yɛ be nyannin alaje be kpɔfuɛ'm be sa nun-ɔn. Anglo'n kusu ´kpɛn bé wla kɛ i nun yɛ bé sa yalɛ'n kacili be cenjele sa nin-ɔn. Nan i ti, be `fa yo cɛn be `di nan be klun `jɔ, be `man be wiengu'm be like, be `cɛ yalɛfuɛ'm be like.

Jue Mun 104:15

Wɔ man be nyan nzan b'ɔ man bé wun nyrɛn be nin-ɔn. A man be nyanngo b'ɔ man be nyrun'n yo mlanmlan nin-ɔn, ɔ nin aliɛ bɔ be fa tra be anwlɛn nin-ɔn.

Jue Mun 149:4

Afin Anannganman i nvlefuɛ'm bé ti, i klun ti jɔwa. Ɔ bu be nga be kan bé wun ase'n be sran, i ti ɔ de be.

Jue Mun 23:5

A man min aliɛ n di, min kpɔfuɛ'm be si sɔ. A gua mín ti su ngo fanninfannin . Min klowa'n kusu yi lele bu gua.

Jue Mun 30:11

Anannganman, sie ɔ su. Si min aunnvuɛ. Anannganman, de min.

Jue Mun 30:12

Mín wla b'ɔ boli min wun'n, wɔ ti man n su si able siɛn'n. W'a yi mín wun sɛ tralɛ'n, ɔ man min klun ɔ'a jɔ.

Jue Mun 45:7

Ee Nyanmiɛn, ɔ famiɛn bia'n wo lɛ tititi. Sielɛ nga a sie sran mun'n, a sie be kpa.

Akunndanfuɛ'n 9:8

Blɛ'n kwlaa nun'n, man ɔ́ wun tralɛ'm be ´yo ufue, kpɛkuun nán ngo tu ɔ́ ti'n su.

Ezai 12:1

Amun nga amun nyannin amun ti'n, amun `kɛn i cɛn nga amun nyannin amun ti'n i nun kɛ: «Anannganman, e ´manman wɔ. Kannzɛ a fali é wun ya'n, ɔ ya'n ɔ jɔli, yɛ a fɔnvɔli ye.

Ezai 26:2

Amun `tike anuan mun man nvle nga be nunfuɛ'm be yo sa i nuan su'n, bɔ be ti nanwlɛfuɛ'n, be wlu.

Ezai 44:23

Nglo lɔ lika mun, amun `bo ndɛ! Afin min Anannganman m'an di junman. Asiɛ'n bo lɔ lika mun, amun `bo sro. Oka mun, amun `bo ndɛ. Bo mun, amun nin amun nun waka mun, amun kusu, amun `bo ndɛ. Afin min Anannganman m'an kpɔ Zakɔb osu'n nunfuɛ'm be ti, yɛ m'an yi Zakɔb i nyrun b'ɔ lɛ i'n i nglo Izraɛl mɛn'n nun.»

Ezai 46:13

N su wa di nanwlɛ'n, n su cɛ-man kun. Sran'm bɔ min waan n `de be'n, bé ti nyanlɛ blɛ'n ɔ'a mantan. N ´de Siɔnfuɛ mun, yɛ n ´yo man Izraɛlfuɛ'm be ´nyan nyrun.

Ezai 52:1

Amun `tinnge! Amun `tinnge! Siɔnfuɛ mun, amun `jran kekle! Zerizalɛmfuɛ mun, amun bɔ amun tran Nyanmiɛn i klɔ'n su'n, amun `wla amun cɛn dilɛ tralɛ mun! Afin be bɔ be wla-man klɛn'n, bɔ be ti fiɛn'n, be su wlu-man wa kun .

Ezai 61:10

N klun'n ɔ jɔ dan Anannganman ti, mín wun'n ɔ blibli min kpa min Nyanmiɛn'n ti. Afin sɛ sran'm be delɛ'n ti tannin'n, wuun n ´se kɛ ɔ fa katali mín wun. Yɛ sɛ sa nga be yo i nuan su'n ti tralɛ'n, wuun n ´se kɛ ɔ fa wlali min wun. M'an yo kɛ atɔnvlɛ yasua b'ɔ wla kle klanman'n sa. M'an yo kɛ atɔnvlɛ bla b'ɔ wlawla i afle kpakpa mun'n sa.

Zeremi 31:13

Kpɛkuun siɛn'n, talua'm be klun wa jɔ, be ´si able. Gbanflɛn mun nin kpɛnngbɛn'm be ´si able wie. Afin n ´yo man be awlaboɛ'n kaci aklunjuɛ. N fɔnvɔ be man be klunngbɔ'n wie, yɛ be klun ´jɔ.

Ezekiɛl 34:29

M ´man be asiɛ nga b'ɔ ti kpa'n, awe sa su kun-man be bé mɛn'n nun kun. Yɛ nvle kun nga'm be ´yaci be finfin'n yolɛ'n.

Ezekiɛl 47:7

Kɛ ɔ fali min sɛli i sin'n, n wunnin kɛ waka kaka'm be o nzue'n i nuan i bue nnyɔn'n su.

Zakari 3:5

Ɔ seli be ekun kɛ: «An `fa tannin tanmue yɛiin kun be `blɛ i ti'n bo.» Yɛ be ´fa tannin tanmue'n be ´cici i ti'n bo yɛ be ´wlɛ i wun tralɛ saun kun Anannganman i anz'n nyrun lɛ-ɔ.

Matthieu 15:13

Ɔ seli be kɛ: «Waka kwlaa bɔ nán min Si b'ɔ o nyanmiɛn su lɔ'n yɛ ɔ tali'n, be ´tu i bo .

Matthieu 5:16

I kunngba nin-ɔn, an `yo kɛ kannin sa sran'm be nyrun, man be wun amun nyoliɛ kpa'n nan be manman amun Si b'ɔ o nyanmiɛn su lɔ'n .»

JÉSUS-CHRIST I DYASIN FE'N BO LUC KLELI'N 15:22

Sanngɛ i si seli i sran'm be kɛ: ‹An `fa tralɛ klanman kpafuɛ'n bla ndɛndɛ fa wlɛ i wun, an `fa sama ti nga kun wlɛ i sa, yɛ an `wlɛ i ngbabua .

Jean 15:8

Sɛ an yo kɛ waka sama b'ɔ su kpanngban sa'n, b'ɔ man be wun kɛ an ti n sɔnnzɔnfuɛ'n, i sɔ'n nun yɛ n Si'n ´nyan kɔmin-ɔn.

Jean 16:20

Nanwlɛ, amun ´bo awuyomo, yɛ amun ´sun, sanngɛ mɛn nunfuɛ'm be klun ´jɔ, amún wla'n ´bo, sanngɛ awlaboɛ sɔ'n ɔ ´kaci aklunjuɛ.

1 Korɛntfuɛ Mun 3:9

Afin e nin Nyanmiɛn yɛ e di junman nin-ɔn. An ti kɛ Nyanmiɛn i fie sa, yɛ an ti kɛ i sua b'ɔ su kplan sa .

1 Korɛntfuɛ Mun 6:20

Afin ɔ toli amun gua kpan, i sɔ'n ti, like kwlaa nga amun ´yo'n, an `yo man ɔ bɛ i nyrunnyan.

Filipfuɛ Mun 1:11

Yɛ Jésus-Krist man amun ´yo sa kpakpa Nyanmiɛn manmanlɛ nin i kɔmin su manlɛ'n ti.

2 Tɛsalonikfuɛ Mun 1:10

Kɛ ɔ ´ba bɔ be nga be ti i liɛ'm be ´mɛnmɛn i'n b'ɔ be nga be ko lafi i su'n be yi i ayɛ'n, amun nga an lafili ndɛ nga e kannin'n su'n, amun ´tran be nun wie. Cɛn sɔ'n nun yɛ ɔ ´tu be fɔ sɔ nin-ɔn.

Hébreu 1:9

A klo sa ng'ɔ ti kpa'n, a klo-man sa tɛ'n mlɔnmlɔn. I sɔ'n ti yɛ min Nyanmiɛn b'ɔ ti ɔ Nyanmiɛn'n fali wɔ b'ɔ guali be klun jɔlɛ ngo ɔ su nin-ɔn. Ɔ yacili ɔ wiengu'm be lɛ ɔ fali wɔ .»

1 Piɛr 2:9

Sanngɛ amun liɛ'n, an ti sran bɔ Nyanmiɛn fali amun, an ti Famiɛn Nyanmiɛn'n i nyrun jranfuɛ mun, an ti Nyanmiɛn i nvle'n nun sran mun, yɛ an ti i liɛ mlɔnmlɔn. Ɔ fali amun kɛ an yi i b'ɔ flɛli amun kɛ an jao aosin nun, an bla lika ng'ɔ kpaja kpa nun'n i ayɛ .

1 Piɛr 4:14

Sɛ be kpɛ amun nzowa Krist dunman b'ɔ o amun su'n ti'n, amun liɛ su ti ye, afin Nyanmiɛn Wawɛ'n b'ɔ lɛ nyrun'n ɔ nin amun wo nun !