Ezai 51:3 - NYANMIƐN NDƐ'N 1998

³ Anannganman wa fɔnvɔ Siɔnfuɛ mun, be lika'm bɔ be bubuli'n ti be ´yo i annvɔ. Ɔ ´yo man be lika nga ɔ'a kaci kɛ aawlɛ flɛnnɛn sa'n, ɔ ´yo kɛ Edɛni lika'n sa. Yɛ ɔ ´yo man lika kee sɔ'n ɔ ´kaci kɛ i bɔbɔ Anannganman i fie'n sa. Siɔnfuɛ'm be ´bo sro, be klun ´jɔ. Be ´to Nyanmiɛn manmanlɛ jue mun, yɛ be ´bo ninnge nga be tɛ mun be ´fa yi Nyanmiɛn i ayɛ.

Ezai 51:3 ပူးပေါင်းရင်းမြစ်များ

Bo Bolɛ 13:10

Lɔt mɛnnin i nyin'n su. Ɔ wunnin kɛ Zurdɛn lika kpɛkplɛkpɛ'n ɔ ti nzue bo lika. Kɛ ɔ ´yo sɔ'n, wuun Anannganman nian nunnun-man Sodɔm nin Gomɔr. Kɛ ɔ fɛ i lika sɔ'n nun lele b'ɔ fa ju Zɔar'n, lika'n ti klanman kɛ Anannganman i fie wie sa, i kunngba'n ɔ ti kɛ Ezipt lika'n sa.

Jue Mun 85:8

Anannganman, yi ɔ klun-ufue'n i nglo kle ye, yɛ de ye.

Ezai 12:1

Amun nga amun nyannin amun ti'n, amun `kɛn i cɛn nga amun nyannin amun ti'n i nun kɛ: «Anannganman, e ´manman wɔ. Kannzɛ a fali é wun ya'n, ɔ ya'n ɔ jɔli, yɛ a fɔnvɔli ye.

Ezai 25:9

I cɛn sɔ nun'n, be ´se kɛ: «I yɛ ɔ ti e Nyanmiɛn nin-ɔn. E lafili i su yɛ ɔ deli ye, Anannganman yɛ e fali é wla guɛli i su-ɔ. Man é wun blibli ye. Man e klun jɔ delɛ b'ɔ deli ye'n ti.

Ezai 35:6

Blɛ sɔ nun'n, cɛcɛwafuɛ'm be ´tu kpɛn kɛ flete mun sa. Yɛ aklunjuɛ'n ti bobofuɛ'm be ´kpan. Afin nzue wa nyrɛn aawlɛ flɛnnɛn'n nun, yɛ nzue ba'm be wa sonji mɛn kee'n nun .

Ezai 41:16

sɛ n ´kwla se'n, amun wa kpaja be nun kɛ awie sa, seke kun wa sanndi-sanndi be nun, yɛ aunngban'n ´fa be kɔ. Sanngɛ amun liɛ'n, amun klun wa jɔ Anannganman ti, amun wa fa Izraɛl Nyanmiɛn'n ´di amun nuan.

Ezai 43:19

Amun `nian, n wa yo sa uflɛ kun, be su wun i bue nuan bɔbɔ. ?Amun su ´wun-mɛn i wlɛ? N wa tike atin kun aawlɛ flɛnnɛn'n nun, yɛ n wa yo man nzue ba'm be ´sonji asiɛ kee'n nun.

Ezai 44:26

Ndɛ nga min sufuɛ'm be kan'n, n jran su. Yɛ sa nga min sunmanfuɛ'm be jaja'n, n yiɛ i nuan.» N se kɛ: «Sran'm be ´tran Zerizalɛm klɔ'n nun ekun.» Yɛ n se ekun kɛ: «Zida klɔ'm be kusu, be ´kplan be uflɛ.» M ´man be talɛ nga be bubuli'n be su ekun.

Ezai 49:13

Nyanmiɛn su lɔ lika, bo ndɛ, asiɛ, bo sro, oka mun, amun `to jue. Afin min Anannganman n fɔnvɔ min nvle nunfuɛ mun, n si be nga be ti nyrɛnnɛnfuɛ'm be aunnvuɛ.»

Ezai 49:19

Amun lika bɔ b'a bubu'n, amun klɔ'n bɔ ɔ'a bo'n, amun mɛn'n bɔ ɔ'a saci'n, ɔ cɛ kaan-an, i nunfuɛ'm be su sɔn-man nun kun, yɛ be nga be yo bɔ amun nunnun'n, be ´kɔ mmua.

Ezai 49:8

Ndɛ nga Anannganman ɔ kan'n yɛ. I waan: «N tili ndɛ nga amun kɛnnin i blɛ ng'ɔ ti kpa'n i nun'n, yɛ i nun bɔ n deli sran mun, n jrannin amún sin. N sasali amun. N fali amun kɛ amun `yo aenguɛ bɔ e nin sran mun e tra'n i nun aowa. N wa yo man mɛn'n ɔ ´nyan nyrun ekun, yɛ n wa cɛcɛ min asiɛ bɔ ɔ'a saci ndɛ yɛ'n i nun .

Ezai 51:12

M bɔbɔ min yɛ n fɔnvɔ amun-ɔn. ?Min nvle'n nunfuɛ mun, nguɛ ti yɛ amun sro sran nin-ɔn? Ɔ ti wie'n i nnɛn, ɔ ti klɔ sran, bɔ i agualiɛ'n ɔ wa guɛ i kɛ ijre'n i liɛ sa.

Ezai 52:9

Amun Zerizalɛmfuɛ kanngan nga amun ka lɛ'n, amun `bo sro likawlɛ! Afin Anannganman ɔ'a fɔnvɔ i nvle'n nunfuɛ mun, ɔ'a kpɔ Zerizalɛmfuɛ'm bé ti.

Ezai 61:10

N klun'n ɔ jɔ dan Anannganman ti, mín wun'n ɔ blibli min kpa min Nyanmiɛn'n ti. Afin sɛ sran'm be delɛ'n ti tannin'n, wuun n ´se kɛ ɔ fa katali mín wun. Yɛ sɛ sa nga be yo i nuan su'n ti tralɛ'n, wuun n ´se kɛ ɔ fa wlali min wun. M'an yo kɛ atɔnvlɛ yasua b'ɔ wla kle klanman'n sa. M'an yo kɛ atɔnvlɛ bla b'ɔ wlawla i afle kpakpa mun'n sa.

Ezai 65:18

Man amun klun jɔ, yɛ man amún wun blibli amun cɛn'n kwlakwla like nga n wa yi be'n be ti. N wa yi Zerizalɛm kun bɔ i nun ɔ ´yo fɛ, yɛ n wa yi nvle kun bɔ i nun sran nga be ´tran lɔ'n, be klun wa jɔ.

Zeremi 31:25

Afin be kwlaa nga b'a fɛ'n, n ´gua be anwlɛn su nzue. Be kwlaa nga be fɛfɛ'n, n ´fa like ng'ɔ fata'n m ´man be.»

Ezekiɛl 28:13

A trannin Edɛni b'ɔ ti Nyanmiɛn i fie'n i nun, yɛ yɛbuɛ kpakpa'n kwlaa sin yiali wɔ: ribi, topaz, diaman, krizoliti, kornalin, zasp, safir, grenat, emɛrɔd. Like nga a wlali be'n be ti sika ɔkwlɛ. Kɛ be yili wɔ cɛ'n yɛ be siesieli be-ɔ .

Ezekiɛl 36:11

Lika'n kwlaa, sran nin nnɛn'm be wa trɛ. Amun wa sɔn kpanngban kpa, yɛ amun nin amun osu nunfuɛ'm be ´sɔn. Mɛn'n i nun sran'm be wa sɔn tra laa'n. Yɛ n wa yo amun kpa n tra laa'n. Yɛ amun wa si jrɛiin kɛ min yɛ n ti Anannganman nin-ɔn.

Ezekiɛl 36:35

Be ´se kɛ: ‹Mɛn ng'ɔ sacili mlɔnmlɔn'n ɔ'a kaci kɛ Edɛni fie'n sa, yɛ i klɔ nga be sacili bɔ be tɔli srolo'n, bɔ be bubuli'n, b'a si bé wun yɛ b'a tran nun.›

Zoɛl 2:3

Like kwlaa nga be to i'n, be saci i, kpɛkuun bé sin wa lika wlolo'n ngbɛn yɛ ɔ ka lɛ kɛ sin wie bɔ ɔ'a yra lika ɔ'a sin'n sa. I blɛ nga bɔ be nian sin-man'n, asiɛ'n su lika'n ɔ ti bo kɛ Edɛni liɛ'n sa. Sanngɛ kɛ be sinnin'n, be sin wa'n ɔ yoli nyrɛnnɛn ngbɛn. Afin lika ng'ɔ kali bé sin, ɔ yoli kɛ aawlɛ flɛnnɛnnɛn sa. B'a yaci-man like fi lɛ.

1 Piɛr 1:8

Amu'an wun-mɛn i le, sanngɛ an klo i. Kannzɛ an nian wun-mɛn i'n, an lafi i su, ɔ man amun klun jɔ dan kpa, ɔ man an wun-man ndɛ nga an kan-an.