Ezai 50:2 - NYANMIƐN NDƐ'N 1998

² ?Kɛ m bali'n, ɔ yo sɛ ti yɛ m'an to-man sran fi-ɔ? ?Kɛ n flɛli amun'n, nguɛ ti yɛ sran fi ɔ'a tɛ-man mín su-ɔ? ?N sa'n ti tika nan se kɛ n kwla fa de-man amun? ?N lɛ-man wunmiɛn n kwla yo-man nan amun fite-man nun? Kɛ n kan ndɛ kle jenvie'n, kpɛkuun i nun nzue'n ɔ'a wie nun. Sɛ n kan ndɛ kle nzue ba mun'n, be wu kee. Yɛ nzue b'ɔ nun-man lɛ'n ti'n, jue'm be wu, yɛ be kplɔ.

Ezai 50:2 ပူးပေါင်းရင်းမြစ်များ

Bo Bolɛ 18:14

?Like kun wo lɛ bɔ i yolɛ ti kekle man Anannganman nin-ɔn? N se kɛ afuɛ ng'ɔ ´ba lɔ bikisa'n, kɛ m ´ba'n, wuun Sara ɔ'a wu ba yasua kun .»

2 Be Nyoliɛ 32:15

I sɔ'n ti, nán amun yaci Ezekias lɛ man ɔ laka amun, nán man ɔ to amun gblɛ. Nán amun fa amun wla guɛ i su, afin nvle nin mɛn wie fi be nun amuɛn'm b'a kwla de-man be nunfuɛ mun mín sa nun annzɛ min nannan'm bé sa nun. Ɔ man Nyanmiɛn'n su kwla de-man amun mín sa nun kusu.› »

Jue Mun 106:9

Kɛ ɔ kpannin Ndɛma jenvie'n su sa'n, kpɛkuun ɔ kali lɛ wuli kee. Ɔ man be nantili jenvie'n i bo lɔ aunnyan'n su kɛ aawlɛ flɛnnɛn'n nun sa.

Jue Mun 107:33

Ɔ yo man nzue ba'm be wu kee, Ɔ yo man nzue ti'm be wie nun klelelele.

Ezipt Lɔ Tulɛ'n 14:21

Moiz tinngɛli i sa'n jenvie'n su. Anannganman yoli man aunngban dan kun b'ɔ fin wia afiliɛ lɔ'n fitali kɔnguɛ wunmuan'n nun. Ɔ suli nzue'n ɔli wa, ɔ suli ɔli wa, nan nzue'n i nun ɔ'a kpɛ, kpɛkuun i osu'n yoli wisiwisi.

Ezipt Lɔ Tulɛ'n 14:29

Sanngɛ Izraɛlfuɛ'm be liɛ be kpɛli jenvie'n bé ja nun. Be sinnin nzue ng'ɔ jrannin kɛ talɛ sa bé sa fama su nin bé sa bɛ su'n i afiɛn.

Ezipt Lɔ Tulɛ'n 7:18

Kpatra nga be o nzue'n nun'n be ´wu, yɛ nzue'n i sacilɛ b'ɔ wa saci'n ti Eziptfuɛ'm be su kwlɛ-mɛn i nɔn kun.› »

Ezipt Lɔ Tulɛ'n 7:21

Kpatra'm be wuli. Nzue'n sacili, Eziptfuɛ'm b'a kwla nɔn-mɛn i kun. Mɛn wunmuan'n i nun ti mmoja'n ngunmin.

Nyanndra Mun 1:24

Sanngɛ n kpan flɛ amun, an ba-man. N fa mín sa'n n flɛ amun amu'an tɛ-man su. Amun waan nán amun yɛ an ko sɔ n sa sɔ nun-ɔn.

Ezai 11:15

Anannganman ´yo man Ezipt jenvie'n ɔ `wie nun. Ɔ ´tinngɛ i sa Efrata nzue ba'n su. Ɔ ´fita su kekle kpa fuu, Ɔ ´kpacikpaci nzue ba sɔ'n nun nso, kpɛkuun sran'm be ´nanti be ja be ´kpɛ.

Ezai 19:5

Jenvie'n i nzue'n ɔ ´wie nun, nzue ba'n ɔ ´wie nun, ɔ ´wu kee.

Ezai 23:11

Anannganman mɛnnin i sa'n su jenvie'n su. Ɔ yoli man nvle-nvle'm be kejeli. Ɔ seli Kanaanfuɛ'm be kɛ be `saci be lika kpakpa nga be fia nun mun.

Ezai 36:20

?Amuɛn sɔ mun'n, be nun onin cɛ yɛ ɔ kwla deli i mɛn'n mín sa nun-ɔn? ?Yɛ Anannganman'n ɔ ´yo i sɛ yɛ ɔ kwla de Zerizalɛm min sa nun-ɔn?› »

Ezai 41:28

Kɛ n niannin be lele'n, m'an wun-man sran fi be nun b'ɔ kwla kɛn i klun ndɛ-ɔ. Sran fi nun-man lɛ b'ɔ kwla tɛ sa nga be usa'n be su-ɔ.

Ezai 42:15

N ´saci oka mun nin kpɔlɛ mun, n ´yo man bé su ijre nin waka'm be kwlaa be ´wu kee. N ´yo man nzue ba'm be ´wie nun, yɛ fɛtɛ'm be ´wu kee.

Ezai 43:16

Laa, Anannganman tikeli atin kun jenvie'n nun, ɔ yili atin nzue kploun'n nun.

Ezai 44:27

N se jenvie dan'n kɛ: «Wu kee, man ɔ nzue'n wie nun.»

Ezai 51:10

?Nán wɔ yɛ a yoli man jenvie dan sɔ'n i nun nzue'n wieli nun wein nin-ɔn? ?Nán wɔ ekun yɛ a yili atin kun jenvie i bo lɔ kploun nun, bɔ be nga a kpɔli bé ti'n be sinnin nun nin-ɔn?

Ezai 54:6

Anannganman ɔ'a fa amun ekun kɛ bla bɔ be yacili i, bɔ i wla ti bowa, kpɛkuun be fɛ i kɛ be ´jɛ i ekun'n sa. Amun Nyanmiɛn'n usa kɛ yoo: «?Be gbanflɛn nun bla'n, be yaci i-ɔ ɔ yo ye?

Ezai 59:1

Nanwlɛ, Anannganman i sa'n ɔ ti-man tika b'ɔ kwla fa de-man amun-ɔn, yɛ i su'n ti-man tre b'ɔ kwla ti-man ndɛ nga amun kan kle i nin-ɔn.

Ezai 59:16

Ɔ wunnin kɛ sran fi nian-man ndɛ sɔ'n nun kan-man, kɛ bɔ sran fi bua-man nun'n, i sɔ'n ɔ boli i wla. Yɛ i bɔbɔ fɛli i sa wlali nun-ɔn, kpɛkuun kɛ b'ɔ ti nanwlɛfuɛ'n ti, ɔ nyannin i su wunmiɛn yoli .

Ezai 63:13

Ɔ fali be sinnin jenvie'n i bo kploun'n nun kɛ nnɛn kpanngɔ su wanndi aawlɛ flɛnnɛn nun'n sa, b'a bo-man nvaka.

Ezai 64:6

Sran fi kpan flɛ-man wɔ kun, ɔ kpɛn-man sran fi klun kɛ ɔ `fɛ i wun mantan wɔ, afin a kaci ɔ́ sin si ye, yɛ a yaci e lɛ man e sa tɛ'm be tin e su.

Ezai 65:12

n ´yo man amun ´wu tɛ kpa. Amun ´koto amún ja bue su klo yɛ be ´kpɛ amun kɔmin-ɔn. Afin n flɛli amun amu'an tɛ-man min su. Sa nga min waan be ti tɛ'n, be cɛ yɛ amun yo be-ɔ, sa nga n klo-man be'n, yɛ amun yo be-ɔ.

Ezai 66:4

n kusu'n, be like tɛtɛ nga be yo'n i su sa yɛ n ´fa yo be-ɔ. Sa kekle'm bɔ be sro be'n, n ´fɛ i kwlakwla n ´yi bé su. Afin kɛ n flɛli be'n, be nun kun sa ɔ'a tɛ-man min su, n kannin ndɛ n kleli be, sanngɛ b'a tie-man. Sa ng'ɔ ti min nyrun sa tɛ'n, yɛ be yoli-ɔ. Like nga n klo-mɛn i'n, yɛ be yoli-ɔ.»

Zeremi 14:9

?Ɔ yo sɛ ti yɛ a yo kɛ sran b'ɔ kwlɛ-mɛn i wun kan sa sɔ-ɔ? ?Ɔ yo sɛ ti yɛ a yo kɛ sonja b'ɔ de sran-an ɔ yo-man ye sa nin-ɔn? Kusu wuun a nin ye yɛ e o wa-a, Anannganman. E o ɔ dunman nun. Nán yi ye ase.»

Zeremi 35:14

«An `nian, ndɛ nga Zɔnadab b'ɔ ti Rekabfuɛ'n kan kleli i mma'm be kɛ nán be nɔn nzan'n, lele ndɛ be nɔn-man. Nga be nannan'n kan kleli be'n, be fali su. Sanngɛ min liɛ'n, m'an kan ndɛ m'an kle amun lele ngbɛn, nɛ́n i su yɛ an ko fa-a.

Zeremi 35:15

N sunmannin min sufuɛ bɔ be ti min nuan ijɔfuɛ mun, nán andɛ yɛ m boli be sunmanlɛ bo-ɔ. N waan be `se amun kɛ: ‹Amun kwlaa an `yaci amun nzuɛn tɛ'n nan amun kaci ajalɛ'n. Nán an ko tu amuɛn, nán an sɔ be, i liɛ amun ´ka lika nga n fa mannin amun nin amun nannan mun'n i nun, sanngɛ n kleli mín nuan yalɛ ngbɛn, amu'an sie-man amún su nan se kɛ amun ´fa su.

Zeremi 5:1

Anannganman waan: «An `wlan-wlan Zerizalɛm akpɔ'm be su. An `nian-nian, an `usa usa. An `nian anyia lika'm be nun. Sɛ amun wun sran wie b'ɔ fa mmla su bɔ nanwlɛ atin'n yɛ ɔ kunndɛ fa'n, n ´yaci Zerizalɛm i wun sa'n n cɛ i .»

Zeremi 7:13

Amun kusu, sa nga amun yoli i lɛ'n ti'n, m boli amun ndɛ kan klelɛ'n bo nglɛmun nun. N kan n flannin nun lelele, nán tielɛ yɛ an ko tie-ɔ. N flɛli amun lelele, nán min su yɛ an ko tɛ-ɔ.

Zeremi 7:27

«Zeremi, a kan ng'ɔ o lɛ'n kle be-ɔ, be su fa-man bé ti de-man. A flɛ be-ɔ, be su tɛ-man wɔ su.

Zeremi 8:6

N sie mín su kpa n ti nga be kan'n. N wun kɛ ɔ ti-mɛn i su. Be nun kun sa koko-mɛn i sa tɛ'n ti, ɔ se-man kɛ: ?Nguɛ sa yɛ n yo i sɔ-ɔ? Be kwlaa be wanndi kɔ be nyrun ndɛnman su kɛ nnɛn kpanngɔ wie b'ɔ su wanndi kɔ alɛ kunlɛ sa.

Daniɛl 3:15

Siɛn'n, sɛ amun ti awɛ i bolɛ'n, nin blo nin sanngo'm be bolɛ'n, nin aluku nin kote'm be bolɛ'n, nin sɛkɛsɛkɛ nin ngowa ninnge uflɛ wie'm be tɛlɛ cɛ'n, amun `koto yɛ amun `utu amun nyin ase sika ɔkwlɛ sran bɔ n yoli'n i bo, nan amun `su i. Sɛ amu'an su-mɛn i'n, bé ja nun lɛ be ´fa amun to yi sin dan kpa kun nun. ?Amuɛn onin yɛ ɔ kwla de amun mín sa nun-ɔn?»

Daniɛl 3:29

I sɔ'n ti, mmla nga m ´mɛn i siɛn'n yɛlɛ nga. Sɛ sran kun, sɛ i nvle ng'ɔ fin nun'n ɔ ti sɛ o, sɛ i mɛn'n ɔ ti sɛ o, sɛ aniɛn ng'ɔ kan'n ɔ ti sɛ o, sɛ ɔ fa Sadrak, nin Mesak, ɔ nin Abɛd-Nego be Nyanmiɛn'n kan ngowa'n, man be kpɛkpɛ i sɔfuɛ'n i nun kpokpokpo, yɛ man i sua'n ɔ kaci sua nvuɛn. Afin amuɛn wie fi kwla de-man sran kɛ be Nyanmiɛn liɛ'n sa.»

Daniɛl 6:20

Nglɛmun ndɛ kɛ wia'n ɔ ´tu i bo'n, famiɛn'n jasoli, ɔ ɔli asɔmɔli'm bé kunman'n su lɔ ndɛndɛ.

Daniɛl 6:27

M bɔbɔ m'an man mmla kɛ, kɛ ɔ fin ndɛ'n, man sran nga bɔ n sie be'n be kwlakwla be `sro Daniɛl i Nyanmiɛn'n kpa, yɛ bé nyin `yi i. Afin ɔ ti Nyanmiɛn kun b'ɔ lafi-man. Ɔ o lɛ tititi, i famiɛn diwlɛ'n ɔ lɛ-man saciwlɛ, i kwlalɛ'n ɔ lɛ-man awieliɛ.

Ndɛ Nga Nyanmiɛn I Nuan Ijɔfuɛ Oze Kannin'n 11:2

Sanngɛ kɛ ɔ ´ju kɔ siɛn'n i yɛ'n, kɛ n flɛ i kpa'n, wuun blɛ li yɛ b'a se i kɛ ɔ ´wanndi min-ɔn. Ɔliɛ Baal mun yɛ be yi tɛ be man be-ɔ. Amuɛn mun yɛ be yra ansans be man be-ɔ.

Ndɛ Nga Nyanmiɛn I Nuan Ijɔfuɛ Oze Kannin'n 11:7

Gblɛ kpɛlɛ'n yɛ min sran'm be fa cici bé ti-ɔ, be flɛ be kɛ be jaso, sanngɛ ngbɛn-ɔn.

Naɔm 1:4

Kɛ ɔ kpan jenvie'n su'n, kpɛkuun jenvie'n ɔ'a wie nun. Ɔ yo man nzue ba dandan'm be wie nun, kpɛkuun Bazan nin Karmɛl lɔ nnya nin ijre'm be glɔ, yɛ Liban lɔ waka nnyrɛ'm be glɔ wie.

Abakik 3:8

?Nzue ba dandan'm be yɛ be kun wɔ ya-a, Anannganman? ?Nzue ba dandan mun-ɔn? ?Jenvie'n wun yɛ a fa ya dan nga-a? A fu nyanmiɛn ble'n su kɛ kakaklolo bɔ i nnɛn kpanngɔ'm be su fɛ i kɔ alɛ kunlɛ nan ɔ nyan kwlalɛ'n sa.

Kalɛ 11:23

Anannganman tɛli i su kɛ: «?A bu i kɛ wuun n su kwla-man ndɛ nga n kannin'n i yo? Tran lɛ nian, sɛ nga n kɛn i lɛ'n ɔ ´yo su o, sɛ kusu ɔ su yo-man su o .»

Marc 4:39

Ɔ tinngeli nan ɔ'a ijɔ aunngban'n, yɛ ɔ seli nzue'n kɛ: «Yaci bolɛ'n, jran diin!» Kpɛkuun kpe yɛ aunngban'n kpɛli-ɔ, nan lika'n ɔ'a tɔ bliin.

Jean 1:11

Ɔ bɛli i bɔbɔ nvle'n nun, b'a sɔ-mɛn i nun.

Jean 3:19

An `nian sa ti yɛ ɔ bu be fɔ sɔ'n yɛ: i b'ɔ ti kɛ wia sa'n, ɔ bali mɛn'n nun, sanngɛ sran'm be kloli aosin'n trali wia'n be nzuɛn tɛtɛ'n ti .

Zozie 3:16

nzue'n i bue ng'ɔ fin nglo lɔ'n, ɔ jrannin, ɔ boli kofie kunndunngluun'n mmua lɔ, klɔ nga be flɛ i Adam b'ɔ mantan Zartan'n i kokolɛ'n i ndɛnman. Kpɛkuun i bue ng'ɔ sonji kɔ jenvie b'ɔ ti njin nzue klakla'n nun lɔ'n, ɔ wieli nun weiin, nan Izraɛlfuɛ'm b'a kpɛ i be ja nun Zeriko ndɛnman lɛ .