Ezai 32:2 - NYANMIƐN NDƐ'N 1998

² Be ngba be wa yo kɛ like bɔ be fiɛ i bo bɔ kɛ aunngban'n ɔ ´fita'n ɔ nyan-man be'n sa. Be ´yo kɛ lika bɔ be fia nun, bɔ kɛ aunngban dan'n ɔ ´tu'n, ɔ kan-man be'n sa. Be ´yo kɛ nzue ba b'ɔ sonji lika kee nun'n sa. Be ´yo kɛ yɛbuɛ dan wie b'ɔ man fɔnvɔ lika bɔ waka fi fifi-man lɛ'n sa.

Ezai 32:2 ပူးပေါင်းရင်းမြစ်များ

Jue Mun 143:9

Anannganman de min min kpɔfuɛ'm bé sa nun! Wɔ nun yɛ n fia-a.

Jue Mun 32:7

A ti min fiawlɛ, a sasa min, ɔ man nyrɛnnɛn tɔ-man min su. Kɛ a de min'n, n klun ti jɔwa, yɛ wɔ man jue ngunmin yɛ n sro-ɔ.

Jue Mun 63:1

Jue nga ti David liɛ. Ɔ kan blɛ nga David o Zida aawlɛ flɛnnɛn'n nun lɔ'n i ndɛ . I waan:

Jue Mun 91:1

Sran ng'ɔ ko fia Nyanmiɛn bɔ like fi nun-mɛn i sin'n i sin'n, wuun ɔ'a tran Nyanmiɛn b'ɔ kwla like kwlaa yo'n i fɔnvɔ'n nun.

Ezai 12:2

Amun `nian, e Nyanmiɛn b'ɔ de ye'n yɛ, e lafi i su, ɔ man srɛ kun-man ye. Afin Anannganman yɛ ɔ man ye wunmiɛn-ɔn. I yɛ man e klun jɔ-ɔ, ɔ'a yo e defuɛ.»

Ezai 16:3

Moab bla'm be se Zerizalɛmfuɛ'm be kɛ: «E waan amun man ye afɔtuɛ. Amun `yo sa wie man ye. Wia klengle kpa nun'n, amun `kata e su kɛ lika tuun'n ɔ kata ninnge'm be su kɔnguɛ'n sa. Be nga mianlɛ ti be su kunndɛ sikewlɛ'n, be nga be su wanndi be kunndɛ fiawlɛ'n, nán amun yi be man.

Ezai 25:4

Afin a sasali be nga be lɛ-man wunmiɛn'n, a sasali yalɛfuɛ bɔ be o nyrɛnnɛn nun'n. A yoli kɛ lika bɔ be kata su'n, bɔ kɛ nzue'n ɔ tɔ dan'n, be fiɛ i bo'n sa. A yoli kɛ fɔnvɔ bɔ kɛ wia'n ɔ bo'n be trɛn i bo'n sa. Afin be nga be sie sran mun, bɔ be tin be su'n, be ya bɔ be fa'n ɔ ti kɛ nzue dan b'ɔ tɔ fin talɛ kun'n sa.

Ezai 28:17

Sɛ n kwla ´se'n, min nyanman nga n ´fa sunnzun like'n yɛlɛ sa i nuan su yolɛ'n, yɛ min nyanman bɔ sunmun wo i nuan, bɔ n nian su bɔ man kɛ n ´kplan talɛ'n ɔ yo seiin'n, yɛlɛ mmla'n.» Sɛ e fa ato'n e sunnzun fiawlɛ'n e `se kɛ nzraama bɔ kɛ nzue ´tɔ'n ɔ gua'n, ɔ ´saci i. Sɛ e fa gblɛ'n e sunnzun sua'n, e se kɛ nzue'n ɔ sonji wlu nun'n, ɔ ´yi.

Ezai 41:18

N ´yo man nzue ´fin kpɔlɛ kplekekpleke'm be nun ɔ ´nyrɛn. N ´yo man nzue ti'm be ´nyrɛn kongo'm be nun, aawlɛ flɛnnɛn'n ɔ ´kaci fɛtɛ, yɛ asiɛ kee'n ɔ ´kaci nzue lika.

Ezai 43:19

Amun `nian, n wa yo sa uflɛ kun, be su wun i bue nuan bɔbɔ. ?Amun su ´wun-mɛn i wlɛ? N wa tike atin kun aawlɛ flɛnnɛn'n nun, yɛ n wa yo man nzue ba'm be ´sonji asiɛ kee'n nun.

Ezai 43:20

Blo nnɛn mun o, nsoso mun o, klɔnsoklo mun o, be ´manman min, afin n ´yo man nzue ´tran aawlɛ flɛnnɛn'n nun, yɛ nzue ba'm be ´sonji asiɛ kee'n nun nan min nvle'n nunfuɛ mun bɔ n kpali be'n be `nyan nzue be `nɔn.

Ezai 44:3

Afin n wa yo man nzue ´tran mɛn nga nzue we kun i nun sran mun'n i nun. Yɛ n wa yo man nzue ba'm be ´sonji asiɛ kee'n nun. N ´fa min wawɛ'n m ´man amun osu'n nunfuɛ mun, yɛ n ´yo amun mma'm be ye .

Ezai 7:14

I sɔ'n ti Anannganman bɔbɔ ɔ wa man amun nzɔliɛ kun. Amun `nian, talua'n bɔ si-man bian'n ɔ wa wunnzɛ, ɔ wa wu ba yasua kun. Ɔ ´tɔn i dunman Emaniɛl .

Ezai 9:6

Ɔ ´yo man i sielɛ'n ɔ ´trɛ, yɛ ɔ man fɔundi'n ´tran lɛ tititi. Ɔ ´yo man David i sielɛ'n nin i famiɛn diwlɛ'n be ´yo kpa, yɛ be ´taka. Mmla'n i su falɛ'n nin sa nuan su yolɛ'n, be yo sielɛ sɔ'n nin famiɛn diwlɛ sɔ'n bé bo bia lele yɛ ɔ ´yo kɛ ɔ ´fa yo nin-ɔn. Anannganman b'ɔ sie mɛn wunmuan'n i klolɛ'n ti sa ng'ɔ wa yo'n yɛ ɔ o lɛ-ɔ .

Zeremi 33:14

«Anannganman waan: ‹Cɛn wie lele Izraɛl osu'n nin Zida osu'm bé wun ndɛ fɛ nga n kannin'n, n ´yiɛ i nuan.

Ngwlɛ Yilɛ 4:20

Sran nga Anannganman guɛli i ti su ngo b'ɔ fɛ i sieli é su'n, i b'ɔ man e wla'n gua ase'n, e seli e klun lɔ kɛ: «Bian nga, sɛ ɔ tran e su'n, e ´nyan tranwlɛ'n wie be nga'm be afiɛn!» I sɔ sran liɛ'n, ɔ'a tɔ e kpɔfuɛ'm be kunman'n nun .

Zakari 13:7

Anannganman b'ɔ sie mɛn wunmuan, ɔ kan ndɛ kle tokofi'n kɛ sran sa. I waan: «Tokofi, jaso, a nin min nnɛn kankanfuɛ'n be `yia nun, min nnɛn kankanfuɛ bɔ n fɛli i n yoli min mantanfuɛ'n, a nin i be `yia nun. Kun nnɛn kankanfuɛ'n yɛ bua'm be ´bo sanndi nan e nin nnɛn kanngan'm e ´yia nun .»

Jean 7:37

Bé cɛn dilɛ'n i cɛn kasiɛn b'ɔ ti bé cɛn dilɛ sɔ'n i nun dan'n, Jésus jrannin be afiɛn lɛ nan ɔ'a kpan ɔ'a se kɛ: «Sran kwlaa nga nzue we kun i'n, ɔ bla ń sin wa nɔn.

1 Timote 3:16

Nanwlɛ, e kwlaa e si kɛ kɛ ɔ yoli bɔ e yoli Nyanmiɛn liɛ'n, ɔ ti abonuan dan, sran wun-mɛn i wlɛ. Ɔ yoli i wun sran'n, ɔ yili i wun nglo, Nyanmiɛn Wawɛ'n kle kɛ ɔ ti sran kpa, anz'm be wunnin i. Be kɛnnin i ndɛ nvle'm be nun. Be lafili i su mɛn wunmuan'n nun. Be mɛnnin i su ɔli nyanmiɛn su lɔ, ɔ nyannin nyrun dan.

Sa nglô yile 22:1

Ɔ kleli min nzue ba bɔ i nun nzue'n man nguan'n, ɔ ti nyannyannyan kɛ laglasi sa. Ɔ fin Nyanmiɛn nin Bua Gbanflɛn'n be bia'n nun yɛ ɔ fite-ɔ.