Ezai 27:9 - NYANMIƐN NDƐ'N 1998

⁹ Sanngɛ siɛn'n, wafa nga be ´yaci Izraɛlfuɛ'm bé wun sa'n cɛ be'n, yɛ wafa nga be ´nunnun bé sa tɛ'n su'n yɛ: be wa bubu sraka yiwlɛ lika'm be yɛbuɛ'm be nun, be ´nunkun be kɛ like pɔpɔ wie sa, be ´yo kɛ ndutre sa. Be su taka-man yɛbuɛ nga be sɔ be'n kun, be su kplan-man sraka yiwlɛ nga be yra ansans su'n mun kun.

Ezai 27:9 ပူးပေါင်းရင်းမြစ်များ

2 Famiɛn Mun 10:26

Waka nga be o Baal i sua'n nun'n be yili be fiteli, nan b'a wɔ be nun.

2 Famiɛn Mun 23:14

Ɔ bubuli yɛbuɛ nga be takali'n be nun, ɔ kpɛkpɛli waka nga be takali be bɔ be sɔ be'n be nun. Yɛ ɔ fali sran owie tiantiannin be osu lɛ.

2 Famiɛn Mun 25:9

Ɔ wɔli Anannganman i sua'n nin famiɛn sua'n, ɔ nin Zerizalɛm sua'm be ngba be nun. Ɔ'a yaci-man sran kpakpa'm bé sua'n wie fi lɛ.

2 Be Nyoliɛ 14:5

I afuɛ sɔ'm be nun'n, sran fi nin i b'a kun-man alɛ, yɛlɛ kɛ Anannganman bɔbɔ man i wun jɔli i fɔuun. Ɔ fali aunjuɛ blɛ sɔ'n fa sisili Zida klɔ kpanngban bé wun.

2 Be Nyoliɛ 34:4

Be bubuli amuɛn nga be flɛ be Baal'n be sɔwlɛ mun i bɔbɔ nyrun lɛ. Yɛ ɔ bubuli ansans yrawlɛ mun nin waka nga be kplan be bɔ be sɔ be'n, ɔ nin amuɛn wafa-wafa'n kwlaa. Ɔ fufuli i kwlaa sɔ nun ɔ yoli sanmlɛn. Be nga be yili sraka mannin amuɛn sɔ mun'n, ɔ fali sanmlɛn sɔ'n ko guali be ndia'n su.

2 Be Nyoliɛ 36:19

Babilɔnifuɛ'm be wɔli Nyanmiɛn i sua'n nun. Be bubuli Zerizalɛm klɔ'n wun talɛ'n. Be wɔli famiɛn i sua'm be kwlaa be nun, yɛ be sacili klɔ'n nun ninnge kpakpa'm be kwlaa kpan.

Jue Mun 119:67

Laa bɔ a nian bu-man min fɔ'n, m mlinnin. Sanngɛ siɛn liɛ'n, n ´tu n klun n fa ɔ ndɛ'n su.

Jue Mun 119:71

Kɛ a buli min fɔ'n, ɔ ti kpa man min, afin i liɛ'n, n wun ɔ klun sa'n i wlɛ.

Ezipt Lɔ Tulɛ'n 34:13

Amun `bubu be amuɛn sɔwlɛ mun. Amun `bubu be yɛbuɛ nga be takali be'n, ɔ nin be waka nga be sɔ be'n.

Nyanndra Mun 20:30

Kɛ like yaya'n ɔ yo klunwifuɛ'n, ɔ ti kɛ ayre yɛ b'a yo i sa. Ngble'n wie wluwlu ɔ́ wun kpɛkuun ɔ yo sa ye.

Ezai 1:29

Waka dandan bɔ amun klo be sɔlɛ'n, amún sa sin wa bubu amun be ti. Amuɛn bo bɔ amun kpɛ be'n, nyannzuɛn wa kun amun be dunman nun.

Ezai 17:8

Ɔ su kpɛ-mɛn i nyin amuɛn sɔwlɛ nga i bɔbɔ yoli'n be su. Amuɛn b'ɔ fɛli i bɔbɔ sa yoli be'n nin waka b'ɔ takali be'n, ɔ nin ansans yrawlɛ mun, ɔ su fɛ-mɛn i nyin sie-man be su kun.

Ezai 30:22

Amun amuɛn mun bɔ amun klo jɛtɛ ufue annzɛ sika ɔkwlɛ gua be wun'n, amun `bu be like fiɛnfiɛn. Amun `gua be blo kɛ be gua like tɛtɛ'm be blo'n sa. Amun `se be kɛ: «Amun `fɛ li sɔ'n be fite lɔ.»

Ezai 4:4

Kɛ Anannganman ko salo Siɔn lɔ bla'm bé wun fiɛn'n kɔ wie'n, kɛ ɔ ko salo Zerizalɛmfuɛ'm bé sran bɔ be kun be'n be mmoja'n ko wie'n, kɛ ɔ ko di jɔlɛ'n ko wie'n, kɛ ɔ ko nunnun sa tɛ'n ko wie'n,

Ezai 40:2

Amun `gua Zerizalɛmfuɛ'm be anwlɛn su nzue, yɛ amun `kpan kekle se be kɛ be alɛ'n ɔ'a wie. Amun `se be kɛ b'a yaci bé wun sa'n b'a cɛ be, afin be sa tɛ nga be yoli'n b'a nyɛn i su akatua sɔ kpɛ nnyɔn Anannganman i sa nun.»

Ezai 48:10

M'an fa-man sin yɛ n yili amun nun fiɛn'n kɛ be fa sin be yi jɛtɛ ufue'n i nun fiɛn'n sa-a, sanngɛ nyrɛnnɛn yɛ n fa sali amun n niannin-ɔn.

Ezekiɛl 11:18

Lɛ yɛ amun ´ba-a, an ´yiyi i nun tete sa'm be kwlakwla nin amuɛn sɔlɛ wafa-wafa'n kwlaa.

Ezekiɛl 20:38

N ´yi nyin keklefuɛ nga be o amun nun'n nin be nga be jasoli mín wun'n. Mɛn nga be ɔli nun'n, n ´fa be n ´jaso lɛ, sanngɛ be su sa-man bé sin Izraɛl asiɛ'n su kun. Yɛ amun wa si jrɛiin kɛ min yɛ n ti Anannganman nin-ɔn .

Ezekiɛl 6:4

Amun sraka yiwlɛ'm be wa tɔ srolo, amun ansans yrawlɛ'm be ´bubu, n ´yo man amun nun sran kpanngban kpa be ´wu amun amuɛn'm be nyrun lɛ .

Daniɛl 11:35

Be ´kun ngwlɛlɛfuɛ'm be nun sran kpanngban. Be wulɛ'n ɔ ´yo nvle nunfuɛ'm be saun, ɔ ´yo be jrɛiin, yɛ ɔ ´yo be weiin, lele awieliɛ'n ´fa ju. Afin kɛ ɔ ´yo sɔ'n, wuun awieliɛ'n nian ju-man.

Ndɛ Nga Nyanmiɛn I Nuan Ijɔfuɛ Oze Kannin'n 14:8

Be nga be ti min liɛ'n, sɛ n ´kwla se'n be wa tran min fɔnvɔ'n bo, be wa lua ble mma, be ´nyin kɛ vinyi sa, be dunman'n ´fu kɛ Liban nzan'n sa.

Saun Yolɛ 26:30

Amún wun tɛ bɔ ´yo min'n ti'n, n ´saci amun sraka yiwlɛ lika bɔ be o kpɔlɛ'm be su'n, m ´bubu amun ansans yrawlɛ mun, kpɛkuun sran nga be wu'n be fuɛn'n, n ´fa be n ko tian amun amuɛn'm bé su.

Mise 5:11

N ´saci amun wunnzue yilɛ ninnge mun, kɔmiɛnfuɛ su tran-man amun lɔ kun.

Zakari 13:2

«I sɔ blɛ nun'n, n ´yo man amuɛn'm be dunman'n ´nunnun mɛn'n nun, ɔ man be su bo-man be dunman be di-man jɔlɛ kun. Be nga be tɔn bé wun suɛn kɛ be ti min nuan ijɔfuɛ'n, n ´nunnun be. Kpɛkuun amuɛn'm be akunndan bulɛ'n, n ´yi i sran'm bé ti nun.» Anannganman b'ɔ sie mɛn wunmuan'n yɛ ɔ kan sɔ-ɔ.

Rɔmfuɛ Mun 11:27

Amun nian aenguɛ nga e nin be e wa tra cɛn nga n ´yaci sa nga be yoli min'n n ´cɛ be'n yɛ .»

1 Korɛntfuɛ Mun 11:32

Sanngɛ kɛ ɔ ´yo nan ɔ'a bu-man e nin mɛn'n nunfuɛ mun e fɔ kunngba'n, sɛ ɔ wun fɔ é wun'n, ɔ tu e fɔ.

Mmla'n 12:3

Amun `bubu be amuɛn sɔwlɛ mun, amun `bubu be yɛbuɛ nga be takali be mun, amun `yra be waka nga be sɔ be'n, amun `bubu be amuɛn nga be yoli be mun, yɛ amun `nunnun be dunman'n lika nga be o nun lɛ'n be nun.

Hébreu 12:6

Afin e Min'n tu be nga ɔ klo be'm be fɔ, yɛ be nga ɔ bu be i wa'n, ɔ fa nyantiaan bo be .»