Ezai 17:3 - NYANMIƐN NDƐ'N 1998

³ Klɔ nga be si bé wun'n, wie fi su tran-man Efraim akpasua'n su kun. Damas su yo-man famiɛn diwlɛ'n i klɔ dan'n kun. Yɛ Siri mɛn'n i bue ng'ɔ ka lɛ'n, ɔ su nyan-man nyrun kun, ɔ ´yo kɛ Izraɛlfuɛ'm be anyrunnyan b'ɔ wieli'n sa. Ndɛ nga Anannganman b'ɔ sie mɛn wunmuan'n ɔ kan'n yɛ ɔ o lɛ-ɔ.

Ezai 17:3 ပူးပေါင်းရင်းမြစ်များ

2 Famiɛn Mun 16:9

Asiri famiɛn'n kplinnin flɛlɛ bɔ Akaz flɛli i'n su. Ɔ ɔli Damas. Ɔ ko fali alɛ wlali lɔfuɛ'm be sin, ɔ kwlali be, yɛ ɔ trali be lomuɛn ɔli Kir, kpɛkuun ɔ kunnin Rɛzɛn.

2 Famiɛn Mun 17:6

Kɛ Oze yoli famiɛn'n, i afuɛ ngwlan'n su yɛ Salmanazar fali Samari klɔ nin-ɔn. Ɔ fali Izraɛlfuɛ mun ɔli Asiri. Ɔ man be trannin Ala. Klɔ sɔ'n wo Gɔzan lɔ nzue ba bɔ be flɛ i Kabɔr'n i nuan. Yɛ ɔ man wie'm be trannin Medifuɛ'm be klɔ'm bé su.

Ezai 10:9

?Sa kunngba nga e fa yoli Kalne'n, nɛ́n i kunngba'n yɛ e fa yoli Karkemis-ɔ? ?Nga e fa yoli Amat'n, nɛ́n i yɛ e fa yoli Arpad-ɔ? ?Nán sa kunngba'n yɛ e fa yoli Samari nin Damas-ɔ?

Ezai 16:14

Siɛn'n Anannganman wan yoo: «Kannzɛ Moabfuɛ'm be sɔnnin bɔbɔ'n, ɔ'a ka afuɛ nsan sɛsɛsɛ be anyrunnyan'n ɔ ´wie. Be ´yo sran kaan nga be ´ka lɛ'n be finfin, be nyrun'n ɔ ´wie.»

Ezai 17:4

I cɛn sɔ nun'n, sɛ Izraɛl mɛn'n ti sran'n, wuun e ´se kɛ i nɔnnin'n i su ´kpɛ, yɛ ɔ ´yo koklo.

Ezai 25:2

Afin wɔ man klɔ'n ɔ'a yo kɛ yɛbuɛ kwle bɔ i nun yɛbuɛ'm be tian be wiengu su'n sa, klɔ'n bɔ i wun ti siwa'n ɔ'a saci. Be wun-man aofuɛ'm be sua kpakpa mun klɔ'n nun kun. Be su kplan-man klɔ sɔ'n i uflɛ kun.

Ezai 7:16

I sin ka nan ɔ'a si like ng'ɔ ti-man kpa'n nin ng'ɔ ti kpa'n be ngbaciɛ'n, sran'm be ´jaso famiɛn nnyɔn nga be kle wɔ yalɛ'n be mɛn'n nun.

Ezai 7:8

afin Damas yɛ ɔ ti Siri i klɔ dan nin-ɔn, yɛ Rɛzɛn yɛ ɔ ti Damas i su kpɛn nin-ɔn. Ɔ'a ka afuɛ ablesiɛn-nin-nnun Efraim ´bubu, ɔ su yo-man nvle kun.

Ezai 8:4

Afin kwlaa nan bakan ɔ'a si baba nin manmin flɛ'n, be ´fa Damas lɔ anyanbeun'n nin Samari lɔ ninnge mun ko man Asiri famiɛn'n.»

Ndɛ Nga Nyanmiɛn I Nuan Ijɔfuɛ Oze Kannin'n 1:4

Anannganman seli Oze kɛ: «Flɛ i kɛ Zizreɛl, afin sɛ ɔ di le nnyɔn kun'n, n wa kle Zei anunman'm be nun, sran nga be kunnin be Zizreɛl lɔ'n ti. Kpɛkuun n wa yo man Izraɛl mɛn'n nun sran fi su yo-man famiɛn kun .

Ndɛ Nga Nyanmiɛn I Nuan Ijɔfuɛ Oze Kannin'n 1:6

Gɔmɛr wunnzɛli ekun, ɔ wuli ba bla kun. Yɛ Anannganman'n seli Oze kɛ: «Flɛ i kɛ Nsi-man-be-aunnvuɛ, yɛlɛ kɛ n su si-man Izraɛlfuɛ'm be aunnvuɛ kun, n su yaci-man bé wun sa n cɛ-man be kun.

Ndɛ Nga Nyanmiɛn I Nuan Ijɔfuɛ Oze Kannin'n 10:14

I sɔ'n ti, alɛ nganniɛn ɔ wa kpla amun nvle nun, amun klɔ nga be sili bé wun'n, be ´bubu flɛnnɛnnɛn. Be wa yo kɛ Bɛt-Arbɛl bɔ famiɛn Salman nunnunnin i'n sa, ɔ nunnunnin niɛn mun nin bé bo mma mun'n .

Ndɛ Nga Nyanmiɛn I Nuan Ijɔfuɛ Oze Kannin'n 3:4

Afin Izraɛlfuɛ'm be wa ka sa lele be su nyan-man famiɛn kun, be su nyan-man famiɛn i awlo sran dan kun, be su yi-man tɛ kun, be su sɔ-man yɛbuɛ kun. Kpɛkuun ninnge nga be fa si Nyanmiɛn i klun sa'n, be su nyɛn-mɛn i kun.

Ndɛ Nga Nyanmiɛn I Nuan Ijɔfuɛ Oze Kannin'n 8:8

Izraɛl bɔbɔ yɛ man be mlinnin be wun-ɔn. Siɛn'n, be o nvle-nvle'm be afiɛn kɛ talie wie b'ɔ lɛ-man nyrun'n sa.

Ndɛ Nga Nyanmiɛn I Nuan Ijɔfuɛ Oze Kannin'n 9:11

Efraimfuɛ'm be nyrun bɔ be lɛ i'n ɔ wa tu kɛ anunman fa tu'n sa: be su fa-man kuɛ kun, be su wunnzɛ-man kun, be su wu-man ba kun.

Amɔs 8:14

Kpɛkuun be nga bɔ be fa Samari amuɛn'm be fa ta nda'n, ɔ nin be nga be di amuɛn be se kɛ: ‹N kan Dan lɔ amuɛn'n ti'n!› annzɛ kusu: ‹N kan Beɛr-Seba amuɛn'n ti'n,› be kwlakwla sɔ'm be ´tɔ. Be tɔ kusu-ɔ be su kwla jaso-man kun.»