Ezai 10:6 - NYANMIƐN NDƐ'N 1998

⁶ Min waan be wɔ nan be ko kle sran nga be bu-man min like fi'n, be nyrɛnnɛn. Min waan be `ko tɔ sran nga be fɔkɔ min anwlɛn'n be su nan be `fɛn bé bo ninnge'n be `fa. Min waan be tiatia be su kɛ be tiatia atin nun nnɔtiɛ'n nun'n sa.

Ezai 10:6 ပူးပေါင်းရင်းမြစ်များ

2 Samiɛl 22:43

N nunkun be man be yo kɛ asiɛ wun ndutre sa. N tiatia bé su kɛ atin nun nnɔtiɛ'n sa.

2 Famiɛn Mun 18:25

Sɛ nán Anannganman bɔbɔ fanngan nun yɛ min min'n ba mɛn nga i nunnunlɛ'n, wuun ɔ wa yo nzu wa? Anannganman seli i kɛ: A nin be `ko kun, ko nunnun be.› »

Ezai 19:17

Zida mɛn'n ɔ ´yo Eziptfuɛ'm be ndawlɛ. Blɛ'n kwlaa bɔ be ´bo i dunman'n be nyrun'n, srɛ ´kun be, yɛlɛ kɛ Anannganman b'ɔ sie mɛn wunmuan'n ɔ guguli kɛ ɔ ´yo be like.

Ezai 22:5

Afin ndɛkɛn Anannganman b'ɔ sie mɛn wunmuan'n, ɔ'a fa sannganlɛ nin nyrɛnnɛn, ɔ nin nyannzuɛn ɔ'a yi e su.» Kongo nga be wun aolia nun ninnge'm be lɔ'n, be su bubu talɛ'n i nun lɔ, yɛ sran'm be kpan lɔ, be kpanlɛ'n ɔ kɔ lele ju oka'n i wun lɔ.

Ezai 24:5

Sran nga be o asiɛ'n su'n be sacili i yɛlɛ kɛ be tɔnnin mmla'n, be kpɛli ndɛ nga be kan kleli be'n i wun, aenguɛ nga Anannganman nin be trali'n, b'ɔ ti blɛ'n kwlaa nun liɛ'n, b'a fɛ-mɛn i mmla'n su .

Ezai 29:13

Anannganman waan: «Sran nga be mantan min'n, be nuan ngbɛn yɛ be fa manman min-ɔn, be yo i bé nuan bui su ngbɛn, be anwlɛn'n ɔ nun-man min su. Yɛ bé nyin bɔ be waan ɔ yi min'n, ɔ ti kɛ like yɛ sran'm be kleli yɛ be nian su be yo sa.

Ezai 32:6

Sinnglinfuɛ'n i nuan nun ndɛ'n ti tɛtɛ ngunmin. Sa tɛ'n i yolɛ'n yɛ ɔ o i akunndan'n nun-ɔn. Ɔ kpɔ Nyanmiɛn. Ndɛ nga be saci i wun'n yɛ ɔ kan be-ɔ. Sran nga awe kun i'n, ɔ mɛn-mɛn like ɔ di-man. Yɛ nga nzue we kun i'n, ɔ mɛn-mɛn i nzue ɔ nɔn-man.

Ezai 33:1

Ɔ bɔ a saci like'n bɔ be nian saci-man wɔ wie'n, ɔ yako! Ɔ bɔ a laka ɔ wiengu mun'n bɔ be nian laka-man wɔ wie'n, ɔ yako! Kɛ a ko wie ninnge'm be saci'n, be ´saci wɔ wie kusu. Kɛ a ko wie ɔ wiengu be laka'n, be ´laka wɔ be ´nyan wɔ wie kusu.

Ezai 33:14

Siɔn lɔ be nga be yo sa tɛ'n, srɛ kun be. Be nga be nyin yi-man Nyanmiɛn'n, be usu. Be usa kɛ: «Wan yɛ ɔ wo e nun b'ɔ kwla jran sin dan nga i nyrun-ɔn? ?Wan yɛ ɔ wo e nun b'ɔ kwla jran sin kpli ng'ɔ nuan-man mlɔnmlɔn yɛ'n i wun koko-ɔ?»

Ezai 41:25

N ko tuli sran kun bo mɛn'n i nglo lɔ, ɔ fin wia afiliɛ lɔ bali, ɔ bo min dunman. Ɔ tiatia siefuɛ'm be su kɛ be tiatia nnɔtiɛ'n nun'n sa. Ɔ tiatia be su kɛ sɛ wufuɛ ɔ tiatia i ufa'n su sa .

Ezai 49:17

Amun mma nga be wa kplan amun klɔ'n i uflɛ'n, be kan be wun be ba ndɛndɛ. Be nga kusu bɔ be sacili i'n, b'ɔ man ɔ kacili kɛ aawlɛ flɛnnɛn sa'n, be su wanndi amun kɔ.

Ezai 49:25

Ɛɛn, sran nga safunyrɛn'n trɛli i'n, ɔ ´flo i sa nun, like nga be bɔ be sie sran mun kekle su'n be fali'n, be ´de bé sa nun. E nin amun kpɔfuɛ mun e ´kun, yɛ n ´de amun mma mun, Anannganman yɛ ɔ kan sɔ-ɔ.

Ezai 5:25

I sɔ'n ti Anannganman fali ya i sran'm bé wun. I sa kannin be. Oka'm be kejeli, sran'm be saka'm be tru klɔ'n nun atin'm be nun kɛ wla sa. Sanngɛ ɔ nin i sɔ'n ngba'n, Anannganman i ya'n ɔ'a jɔ-man, ɔ nin be tɛ nyɛn i tititi.

Ezai 5:29

Be kpanlɛ nga be kpan'n, ɔ ti kɛ asɔmɔli bla'm be liɛ'n sa, be kpan kɛ asɔmɔli ba mun sa. Be kpan, be tra be nnɛn'n, be fa kɔ, sran fi kwla de-mɛn i be sa nun.

Ezai 5:5

Ɔ man yoo, n wa kle amun like nga n wa fa yo min vinyi fie'n. M ´bubu i wun talɛ'n, yɛ nnɛn'm be wa di vinyi nga n tali'n. N ´saci awa ng'ɔ si i wun'n, yɛ be nga be ´sin'n be ´tiatia vinyi'n su.

Ezai 63:3

Min ngunmin yɛ n dili junman vinyi mma nzue yiwlɛ lɔ-ɔ, nvle'm be nun sran ba kun sa a uka-man min. Kɛ n fali ya'n, n tiatiali be su, n wɛtɛli be. Be mmoja'n, ɔ nyrɛn guali mín wun tralɛ'm be nun, i ti yɛ man be yoli fiɛn nin-ɔn.

Ezai 63:6

Kɛ n fali ya'n, n wɛtɛli sran wie mun. N fali ya dan, i ti n yoli man be kacili kɛ sran bɔ nzan ɔ'a bo be sa. Yɛ n guali be mmoja'n i ase.»

Ezai 7:17

Anannganman man sa tɛ kpa wie ɔ wa ba wɔ nin ɔ nvle'n nunfuɛ'm be su, ɔ ´ba ɔ́ si i awlo'n su. Kɛ ɔ fin cɛn bɔ Efraimfuɛ'm be cuɛnnin bé wun Zidafuɛ'm be lika'n, sa sɔ'n i wunsu nian ju-man le.» Asiri famiɛn'n b'ɔ wa ba'n, i ndɛ yɛ Ezai kan-an.

Ezai 8:4

Afin kwlaa nan bakan ɔ'a si baba nin manmin flɛ'n, be ´fa Damas lɔ anyanbeun'n nin Samari lɔ ninnge mun ko man Asiri famiɛn'n.»

Ezai 8:8

Ɔ ´kata Zida mɛn'n i su, ɔ ´yi lele ɔ di lika'n, ɔ ´ju be kɔmin nun. Ee! Emaniɛl, be su wun-man nzue'n i cenje'n kun, nzue'n ɔ ´di ɔ mɛn'n wunmuan'n.»

Ezai 9:17

Afin sa tɛ'n ɔ jue kɛ sin b'ɔ yra susrɛ mun nin owie mun'n sa. Sin sɔ'n, ɔ man bo'm be sɔ, yɛ sin wɛnsrɛn'n ɔ ´fu nyanmiɛn su lɔ lukuu.

Ezai 9:19

Sɛ be tɔ fama su-ɔ, be kpɛ be di, sanngɛ awe yaci-man be kunlɛ. Sɛ be nyɛn i bɛ su lɔ-ɔ, be su di, sanngɛ be ku yi-man. Sran kun nyɛn i bɔbɔ i sa nin-ɔn, ɔ su di i nnɛn'n.

Zeremi 25:9

n wa ko yia amun mɛn'n i nglo lɔ nvle'm be kwlakwla, yɛ n ´yia min sufuɛ Nɛbikadnɛzar b'ɔ ti Babilɔni famiɛn'n. N ´fa be m ´ba kɛ be nin mɛn nga nunfuɛ mun nin mɛn nga be mantan wa'n be nunfuɛ mun be wa kun nan be `bo wa mɛn'n. Ɔ man kɛ sran'm be wa wun amun'n, amun ´yo be sro, be ´fa amun di flɛn, yɛ be ´nunnun amun mlɔnmlɔn.

Zeremi 3:10

Sanngɛ ɔ nin i sɔ'n ngba'n i niaan bla Zida b'ɔ kunndɛ bian min bo'n, ɔ'a sɛ-mɛn i sin mín wun nanwlɛ su, ɔ kpɛli min gblɛ .» Anannganman'n yɛ ɔ kan sɔ-ɔ.

Zeremi 34:22

N wa ijɔ n ´kle sonja sɔ mun, n ´yo man be sa bé sin be ba klɔ nga su. Be nin i sufuɛ mun be wa kun, be ´fa klɔ'n, be ´fa sin ´yi nun. N ´yo man Zida klɔ'm be ´tɔ srololo, sran fi su ijɔ-man su kun.› »

Zeremi 4:14

«Zerizalɛm, sɛ a klo kɛ a ´fite nun'n, yo wɔ anwlɛn'n saun. ?Cɛn onin ko nan w'a yaci akunndan tɛtɛ bulɛ'n?

Ezekiɛl 29:20

I junman ng'ɔ dili'n, i kalɛ bɔ n fa tuɛ i'n yɛlɛ Ezipt mɛn'n bɔ n ´fa mɛn i'n. Afin junman nga i sonja'm be dili lɛ'n, m bɔbɔ min yɛ be dili be mannin min-ɔn. Min Anannganman Nyanmiɛn yɛ kan sɔ-ɔ.

Ezekiɛl 38:12

N ´ko fɛn bé bo ninnge nan n ´nyan min like liɛ.› Be nga be wa tran klɔ bɔ be sacili laa'n be nun ekun'n, a ´fɛn be bo ninnge'n, a ´saci be klɔ sɔ mun yɛ a nin sran sɔ mun be ´nyɛn i. Be sɔfuɛ'm be ´fin nvle'm be nun yɛ be ´kan bo nun-ɔn, be ´nyan nnɛn nin anyanbeun, be ´tran mɛn'n i afiɛn sɛsɛ.

Ezekiɛl 38:13

Sebafuɛ mun, nin Dɛdanfuɛ mun nin Tarsis aata difuɛ mun, ɔ nin be nga be mantan Tarsisfuɛ mun'n be ´usa wɔ kɛ: ‹?E bo ninnge fɛnlɛ nin like sacilɛ ti yɛ a fali wɔ alɛ kunfuɛ mun bali-ɔ? ?A bali jɛtɛ ufue nin sika ɔkwlɛ, nin nannin, nin anyanbeun falɛ nan a ´fa kɔ?›

Mise 7:10

Kɛ e kpɔfuɛ'm be wun i sɔ'n, be ´wun nyannzuɛn afin be usali kɛ: «?Ai! Anannganman amun Nyanmiɛn kpa'n, nguɛ yɛ ɔ o lɛ yo-ɔ? Kɛ be wa nanti be su kɛ akpɔ su fa sa'n, wuun e ´nian be e ´sri.»

Abakik 1:12

Anannganman, kɛ ɔ fin adudua'n, wɔ yɛ a ti Nyanmiɛn titi-ɔ. A ti min Nyanmiɛn, ɔ nzuɛn nin klɔ sran liɛ'n ti-man kun, a wu-man le. Anannganman, a kpali e kpɔfuɛ sɔ mun kɛ be di e jɔlɛ. Wɔ bɔ a ti kɛ yɛbuɛ sa'n, a tinnin be kɛ be tu e fɔ ɔ dunman nun.

Zakari 10:5

Be wa yo safunyrɛn, be ´tiatia be kpɔfuɛ'm be su kɛ be tiatia klɔ nun akpɔ'n nun aunnyan'n su'n sa. Be ´kun alɛ'n kɛ ng'ɔ o lɛ'n sa, afin m bɔbɔ min Anannganman'n n jin bé sin.

Matthieu 15:7

Dunman klofuɛ mun, amún wun ndɛ bɔ Ezai kannin'n ti nanwlɛ. Ɔ seli kɛ: