Be wa yi wɔ awlo'n sa piɛ. Be ´yi ɔ mantanfuɛ mun nin Eziptfuɛ'm be kwlaa bé sua mun sa piɛ. Kɛ ɔ fɛ i ɔ nannan'm be blɛ su lele b'ɔ fa ju ndɛ yɛ'n, be nian wun-mɛn i sɔ nyrɛnnɛn kɛ nga sa le.› » Moiz jasoli famiɛn'n wun lɛ, yɛ ɔ ɔli-ɔ.
Anannganman yoli i kɛ ɔ fa kannin'n sa. Ngɔnsiɛn bɔ be nuan yo ya'n be bali kaka kpa, be fali Ezipt mɛn wunmuan'n, be wluli famiɛn'n i sua'n nun lɔ, ɔ nin i mantanfuɛ'm be liɛ'm be nun. Ngɔnsiɛn sɔ'm be sacili Ezipt mɛn'n.
Moiz tɛli i su kɛ: «Cɛcɛ, e kwla yo-mɛn i sɔ, afin nnɛn nga bɔ e fa yi tɛ man e Nyanmiɛn'n ti tete like Eziptfuɛ'm be nyrun. ?Yɛ sɛ e yi i sɔ tɛ ng'ɔ ti be nyrun tete like'n be nyrun wa'n, be su to-man e yɛbuɛ?
Ezipt famiɛn'n waan: «M'an ti, n wa yaci amun nun amun ko yi tɛ'n be man amun Nyanmiɛn'n aawlɛ flɛnnɛn'n nun lɔ, sanngɛ nán amun wɔ mmua ngboko. Amun `srɛ Nyanmiɛn kusu be man min.»