Ezipt Lɔ Tulɛ'n 20:4 - NYANMIƐN NDƐ'N 1998

⁴ Nán yo amuɛn fi, nán yo like wie fi b'ɔ fa nglo lɔ like, annzɛ asiɛ'n su wa like, annzɛ b'ɔ fa nzue b'ɔ o asiɛ'n i bo lɔ'n i nun like.

Ezipt Lɔ Tulɛ'n 20:4 ပူးပေါင်းရင်းမြစ်များ

1 Famiɛn Mun 12:28

Famiɛn'n fali akunndan kun. Ɔ fali sika ɔkwlɛ fa yoli nannin ba nnyɔn yɛ ɔ seli nvle nunfuɛ'm be kɛ: «Izraɛlfuɛ mun, amu'an ɔ Zerizalɛm wie ala! Amun ninnge nga be ko fali amun Ezipt lɔ bali'n be yɛ be o yɛ .»

2 Famiɛn Mun 17:12

Be suli amuɛn mun, sanngɛ Anannganman dun mmua seli be kɛ nán be yo i sɔ ninnge mun.

2 Be Nyoliɛ 33:7

Ɔ yoli amuɛn kun fa sieli Nyanmiɛn i sua'n nun. Sanngɛ Anannganman dun mmua seli David nin i wa Salomɔn be laa kɛ: «Sua nga yɛ n niannin n fali-ɔ. Zerizalɛm klɔ'n yɛ n fɛli i Izraɛl nvle'n kwlaa nun kɛ n ´yi mín wun nglo lɛ tititi-ɔ.

Jue Mun 78:58

Be klɔklɔli Nyanmiɛn, yɛlɛ kɛ be fali be bɔ be si-man Nyanmiɛn'n be amuɛn sɔwlɛ mun yɛ be yili be sraka'm be nun-ɔn. Be sɔli waka sran mun be fa fɔkɔli i anwlɛn.

Jue Mun 97:7

Be nga waka sran mun yɛ be sɔ be'n, bɔ be manman ninnge finfin mun'n, be ´wun nyannzuɛn. Ɔ lɛ-man amuɛn kun b'ɔ bu-man Nyanmiɛn like-ɔ.

Ezipt Lɔ Tulɛ'n 20:23

Nán amun yo jɛtɛ ufue annzɛ sika ɔkwlɛ amuɛn kɛ amun su i be ´fa uka min su.

Ezipt Lɔ Tulɛ'n 32:1

Kɛ nvlefuɛ'm be wunnin i kɛ Moiz su cɛ oka'n su lɔ ngboko'n, be ko sin yiali Aarɔn nan b'a se i kɛ: «Jaso, yo amuɛn kun man ye, man ɔ dun mmua e nyrun. Afin Moiz'n, bian sɔ'n b'ɔ fali ye Ezipt lɔ bali'n, e si-man like nga ɔ'a yo i-ɔ.»

Ezipt Lɔ Tulɛ'n 32:23

Be wa toli min, yɛ be seli min kɛ: ‹Yo ye amuɛn kun man ɔ dun mmua e nyrun. Afin Moiz'n, bian sɔ'n b'ɔ fali ye Ezipt lɔ bali'n, e si-man sa nga ɔ'a ju i su'n.›

Ezipt Lɔ Tulɛ'n 32:4

Kɛ be fali asunmanndi sɔ'm bɔ be ti sika ɔkwlɛ be mɛnnin i'n, ɔ kloli be yɛ ɔ fa guali like wie nun, nan ɔ'a fa yi sika ɔkwlɛ nannin ba kun. Kpɛkuun nvlefuɛ'm be waan: «Izraɛlfuɛ mun, amun like ng'ɔ fali amun Ezipt lɔ bali'n yɛ!»

Ezipt Lɔ Tulɛ'n 32:8

B'a yaci atin nga n kleli be'n lɛ lalaa, b'a klo sika ɔkwlɛ b'a yo nannin ba kun, b'a koto i bo, b'a yi sraka mun b'a mɛn i, kpɛkuun be seli kɛ: ‹Izraɛlfuɛ mun, amun like ng'ɔ fa amun Ezipt lɔ bali'n yɛ.› »

Ezipt Lɔ Tulɛ'n 34:17

Nán amun klo like kɛ jɛtɛ ufue, annzɛ sika ɔkwlɛ, annzɛ aaba fa kaci amun amuɛn.

Ezai 42:17

Be nga bɔ be fa bé wun wla amuɛn'm be sa nun'n, be nga be se like nga be klo be sin nun be fa yo amuɛn ba'm be kɛ: «Amun ti e Nyanmiɛn'n,» be sɔfuɛ'm be ´su siɛn, yɛ nyannzuɛn'n ´kun be kpo.

Ezai 42:8

N ti Anannganman, min dunman'n yɛ o lɛ-ɔ. N fa-man min nyrun bɔ n lɛ i'n m man-man sran, n fa man-man amuɛn mun.

Ezai 45:16

Be nga be yo amuɛn mun'n, nyannzuɛn'n ɔ'a kun be kpo, bé nyin'n ɔ'a gua ase, be kan bé ti ase yɛ be kɔ-ɔ.

Ezekiɛl 20:7

N seli be kɛ: Amun kwlaa amun `yi tete sa nga amún nyin blo su'n be ase, nán amun sɔ Eziptfuɛ'm be amuɛn mun, nán amun yo amun wun fiɛn. N ti Anannganman amun Nyanmiɛn.

Ezekiɛl 8:10

N wluli lɔ nan m'an nian lɔ. N ´nian-an, nnɛn nga be cuɛn bé wun ase'n nin nnɛn nga be ti tete ninnge'n, ɔ nin Izraɛlfuɛ'm be amuɛn mun yɛ b'a yi be nzɔliɛ talɛ ng'ɔ sin yia min'n su sa sɛsɛsɛ yɛ.

Ezekiɛl 8:3

Ɔ fɛ i sa sɔli mín ti ndrɛ'n. Kpɛkuun aolia nun like nga Nyanmiɛn yili i nglo kleli min sɔ'n i nun'n, n wunnin i kɛ i Wawɛ'n ɔ'a man mín su. Yɛ ɔ fali min ɔli Zerizalɛm. N ´wun mín wun-ɔn, n wo sua'n i klun lɔ anuan ng'ɔ o klɔ'n i nglo lɔ lika liɛ'n nun'n i nyrun lɛ lika nga be takali waka sran lɛ'n. Waka sran bɔ be sieli i lɛ sɔ'n ɔ ti kɛ nzowa yɛ be kpɛli Nyanmiɛn sa .

Saun Yolɛ 19:4

Nán amun su amuɛn'm be kun. Amun `yaci amuɛn nga be fa blalɛ annzɛ like ng'ɔ ti kɛ blalɛ sa be yo be mun. Min yɛ n ti Anannganman amun Nyanmiɛn nin-ɔn.

Saun Yolɛ 26:1

«Nán amun kpɛ amuɛn ba. Waka sran nga be taka'n, ɔ nin yɛbuɛ amuɛn nga be taka'n, nán amun yo wie. Nán amun fa yɛbuɛ be sɛ amuɛn be klɛ i wun wɛnkɛɛn kɛ amun ´fa sie amun mɛn'n nun wa nan amun sɔ i. Afin min yɛ n ti Anannganman amun Nyanmiɛn nin-ɔn.

Kalɛ 12:8

N kan min ndɛ mun weiin n kle i. N yi mín wun nglo weiin n kle i, n yo-mɛn i nyanndra nun, ɔ wun wafa nga n fa ti'n. ?Yɛ ɔ yo sɛ ti yɛ an kan min sufuɛ sɔ'n i wun ndɛ tɛtɛ bɔ srɛ kaan sa kun-man amun nin-ɔn?»

Sa nga bé yôli'n 17:29

Ɔ man sɛ e ti Nyanmiɛn mma mun'n, nán man e bu i kɛ Nyanmiɛn nin like nga sran'm be bɔbɔ be fa be akunndan be yo'n, sika ɔkwlɛ nin jɛtɛ ufue bɔ be tɔn'n, ɔ nin yɛbuɛ bɔ be sɛ'n, be ti kun.

Rɔmfuɛ Mun 1:23

Be yaci Nyanmiɛn b'ɔ ti anannganman b'ɔ lɛ nyrun lɛ be yo ninnge mun, kɛ sran sa, wie'm be ti kɛ nnɛn sa, wie'm be kusu be ti kɛ anunman sa, yɛ wie'm be ti kɛ wuo sa, be taka be, yɛ be sɔ be .

Mmla'n 16:22

Nán amun taka amuɛn wie i yɛbuɛ. Anannganman amun Nyanmiɛn'n klo-mɛn i sɔ like'n mlɔnmlɔnmlɔn.

Mmla'n 27:15

«Sran ng'ɔ yo waka sran, annzɛ ɔ klo blalɛ fa yi like wie, nan ɔ fa fia lika wie nan ɔ su i'n, nán man ɔ wun ye le. Afin like sɔ bɔ ajuin difuɛ'm be yo'n, Anannganman nyin ci i.» Kpɛkuun man Izraɛlfuɛ'm be kwlakwla be tɛ su kɛ: «Man ɔ yo sɔ!»

Mmla'n 5:8

Nán yo amuɛn fi nin like wie fi b'ɔ fa nglo lɔ like, annzɛ b'ɔ fa asiɛ'n su wa like, annzɛ b'ɔ fa nzue b'ɔ o asiɛ'n i bo lɔ nun like.

Sa nglô yile 16:2

Anz'n kun ko utuli i klowa'n nun ninnge liɛ'n asiɛ'n su. Be nga nnɛn'n i nzɔliɛ'n wo bé wun'n, nin be nga be kotoli i wunsu bɔ be yoli'n i bo'n, kannin yaya kpa bɔ i nyrun'n ti tɛtɛ kpa'n ɔ tru guali bé wun .

Sa nglô yile 9:20

Sran nga like sroesroe sɔ'm b'a kun-man be'n, b'a kaci-man be nzuɛn'n, yɛ b'a yaci-man like nga be bɔbɔ be yoli'n be sɔlɛ. Be sɔ mmusu mun, nin amuɛn bɔ be fa sika ɔkwlɛ, nin jɛtɛ ufue, nin aaba, nin yɛbuɛ, nin waka be fa yo be'n. Ninnge nga be yo be sɔ'n be wun-man ase, be ti-man sa, yɛ be kwla nanti-man .

Jɔlɛ Difuɛ Mun 17:3

Ɔ yili jɛtɛ ufue mma akpi kun'n nin ya'n mɛnnin i nin, yɛ i nin seli i kɛ: «Min wa, n waan n ´fa sika nga n wlɛ i Anannganman i sa nun ɔ dunman su. Fa man be fa yo waka sran nan be klo aaba guɛ i wun. I ti'n, de, n su fa man wɔ.»