Ezipt Lɔ Tulɛ'n 20:10 - NYANMIƐN NDƐ'N 1998

¹⁰ Sanngɛ cɛn ba'n i nso'n su fuɛ'n, ɔ ti min Anannganman bɔ n ti ɔ Nyanmiɛn'n min wunmiɛn-delɛ-cɛn. Nán di junman fi cɛn sɔ'n nun. Sɛ wɔ bɔbɔ o, sɛ ɔ́ wa bla o, ɔ́ wa yasua o, ɔ́ sa nun junman difuɛ bla o, ɔ́ sa nun junman difuɛ yasua o, ɔ nnɛn o, aofuɛ ng'ɔ tran wɔ awlo o, nán amun wie fi di junman cɛn sɔ'n nun mlɔnmlɔn .

Ezipt Lɔ Tulɛ'n 20:10 ပူးပေါင်းရင်းမြစ်များ

Neemi 10:31

E tali nda ekun kɛ e fa-man é wa bla mun e man-man aja nvle uflɛ nun, nan e ja-man nvle uflɛ nun bla e man-man é mma mun.

Ezipt Lɔ Tulɛ'n 16:26

Amun `fa cɛn ba nsiɛn be isa aliɛ sɔ'n, sanngɛ cɛn'n i nso su'n ti wunmiɛn-delɛ-cɛn, amun su nyan-man wie.»

Ezipt Lɔ Tulɛ'n 31:13

«Kan kle Izraɛlfuɛ'm be kɛ yoo: Amun `bu wunmiɛn-delɛ-cɛn i akunndan nan amun `nian su. Afin blɛ kwlaa nun'n, wunmiɛn-delɛ-cɛn sɔ'n yɛ ɔ wa yo aenguɛ nga e nin amun nin amun osu'n nunfuɛ mun e trali'n i nzɔliɛ-ɔ. I sɔ nun'n sran'm be ´si kɛ min Anannganman yɛ n fali amun kɛ amun `yo min nvle-ɔ.

Ezipt Lɔ Tulɛ'n 34:21

Amun `di junman cɛn ba nsiɛn, sanngɛ amun `fa cɛn nso su'n de wunmiɛn. Kannzɛ junman dilɛ blɛ o, sɛ kacɛ tulɛ blɛ o, sɛ ble kpɛlɛ blɛ o, amun `yo i sɔ.

Ezipt Lɔ Tulɛ'n 35:2

Amun `fa cɛn ba nsiɛn fa di junman, sanngɛ cɛn ba'n i nso su'n liɛ'n, ɔ ti Nyanmiɛn cɛn klonglo, be `de wunmiɛn. Sran kwlaa ng'ɔ di junman cɛn sɔ'n nun'n, man be kun i.

Ezekiɛl 14:7

Afin Izraɛlfuɛ kwlaa annzɛ aofuɛ kwlaa ng'ɔ tran Izraɛl mɛn'n nun, b'ɔ fɛ i wun wla amuɛn sɔlɛ nun'n, b'ɔ kpɛ i nyin like ng'ɔ fa be yili sa tɛ nun'n i su'n, sɛ ɔ ba mín nuan ijɔfuɛ'n i sin kɛ ɔ kan ndɛ kle i'n, m bɔbɔ min Anannganman'n yɛ n ´tɛ i su-ɔ.

Saun Yolɛ 23:3

Le mɔcuɛ kun nun amun `fa cɛn ba nsiɛn be `di junman. I cɛn ba nso'n su'n, ɔ ti wunmiɛn-delɛ-cɛn, amun fa be `yia min dunman nun. Kan kwlaa bɔ amun wo'n, i sɔ wunmiɛn-delɛ-cɛn liɛ nun'n, nán man amun di junman, amun `fɛ i sɔ cɛn liɛ'n be man min.»

JÉSUS-CHRIST I DYASIN FE'N BO LUC KLELI'N 23:56

Kɛ be sali bé sin'n, be ko yoli ayre fannin nin nyanngo. Yɛ wunmiɛn-delɛ-cɛn nun'n, be trannin ase deli wunmiɛn, afin kɛ ɔ ti sɔ be mmla'n nun-ɔn .