Daniɛl 8:22 - NYANMIƐN NDƐ'N 1998

²² Kɛ i wɛ sɔ'n buli'n, wɛ nnan uflɛ be fifili i osu'n nun, wɛ nnan sɔ'm be ti famiɛn diwlɛ nnan'm be nzɔliɛ, be wa sin klikli liɛ'n i osu'n nun. Sanngɛ be tinmin'n su ju-man kɛ i liɛ'n sa.

Daniɛl 8:22 ပူးပေါင်းရင်းမြစ်များ

Daniɛl 11:4

Ɔ nin i sɔ'n kwlaa'n, kɛ ɔ ko nyan manndran'n, i kwlalɛ b'ɔ kwla'n ɔ ´wie, i famiɛn diwlɛ'n i nun wa bubu nnan. Nɛ́n i osu'n nun sran yɛ ɔ ´trɛn i ja nun-ɔn. Sran ngbɛn mun yɛ be wa fa lika nin-ɔn. Sanngɛ be wunmiɛn liɛ'n su ju-man kɛ i liɛ'n sa.

Daniɛl 7:6

Kɛ i sɔ liɛ'n sinnin'n, n ´nian-an nnɛn kun ekun yɛ, ɔ fa kangale. Ndɛwa o i wia sin kɛ anunman wie sa, i ndɛwa sɔ'm be ti nnan. Ɔ lɛ ti nnan. Be mɛnnin i kwlalɛ kɛ ɔ `sie ninnge'n kwlaa.

Daniɛl 7:7

N tɛ wun ninnge mun kɔnguɛ sɔ'n. N ´nian-an, nnɛn'n i nnan su'n yɛ ɔ o yɛ. I sroesroe liɛ'n, ɔ kun srɛ dan, yɛ i fanngan b'ɔ lɛ i'n, be wun-man like bɔ be fa sunnzun i-ɔ. I je'm be ti kɛ blalɛ sa, be ti sa glaunglaun, yɛ ɔ fa titi ninnge'm be nun-ɔn. Kpɛkuun ɔ di be yɛ ɔ tiatia i onga'n su. Ɔ nin nnɛn klikli nsan'm be wafa ti-man kun mlɔnmlɔn. I wɛ liɛ'm be ti blu.

Daniɛl 8:21

Boli kpakpuɛ'n ɔ ti Grɛk famiɛn diwlɛ'n i nzɔliɛ, i wɛ tɛnndɛn ng'ɔ jin i nyinma nnyɔn'm be afiɛn'n, ɔ ti famiɛn diwlɛ sɔ'n i famiɛn klikli'n i nzɔliɛ.

Daniɛl 8:23

Kɛ famiɛn diwlɛ sɔ'n be ko sin ko wie, bɔ sran'm be sa tɛ yolɛ'n ɔ'a yo dan ɔ'a tratra su'n, famiɛn tutrefuɛ kun b'ɔ ti gblɛ kpɛfuɛ dan kpa'n ɔ wa ba.

Daniɛl 8:3

M ´man mín nyin'n su n ´nian-an, bua nene kun yɛ ɔ jin nzue ba i nuan yɛ. I wɛ'm be ti nnyɔn. I wɛ sɔ'm be ti fleiinfleiin kpa, sanngɛ kun ti tɛnndɛn tra kun. Tɛnndɛn kpafuɛ sɔ'n, ɔ fili kasiɛn.

Daniɛl 8:8

Boli kpakpuɛ'n ɔ nyannin wunmiɛn dan kpa. Sanngɛ kɛ ɔ nyannin fanngan juli i juwlɛ'n, kpɛkuun i wɛ dan'n buli. I wɛ nnan uflɛ be fifili klikli'n i osu'n nun. I wɛ sɔ'm be ti sroesroe, bé nyin kpɛ mɛn i bue nnan'm be su.

Zakari 6:1

Kɛ n ´to mín nyin ekun n ´nian-an, kakaklolo nnan be fin oka nnyɔn be afiɛn b'a fite. Oka sɔ'm be ti aaba oka.