Kolɔsfuɛ Mun 1:10 - NYANMIƐN NDƐ'N 1998

¹⁰ I sɔ'n nun'n, amun nyoliɛ'n ɔ ´man e Min'n i kɔmin su yɛ sa nga amun ´yo'n, i kwlaa ´jɔ i klun, yɛ amun ´yo sa kpakpa'n kwlaa, yɛ silɛ nga an si Nyanmiɛn'n ɔ ´yo dan.

Nyanmien nde Ufle

¹⁰ I so'n nun, amun nyôlie'n manh é Min'n i komin su, ye sa kwlaa nga amunh yôh'n, oh dyoh i klun, ye amunh yôh sa kpakpa'n kwlaa, ye sile nga an si Nyanmien'n, oh yôh dan.

Kolɔsfuɛ Mun 1:10 ပူးပေါင်းရင်းမြစ်များ

Nyanndra Mun 16:7

Sɛ Anannganman klo sran kun nantilɛ'n, sɛ ɔ wie i kpɔfuɛ mun bɔbɔ o, ɔ siesie i nin be be afiɛn.

Ezai 53:11

Sɛ ɔ ko wun i nyrun ko wie'n, i klun wa jɔ kpa i kasiɛn'n nun. Sɛ sran'm be si n sran kpa sɔ'n kɛ ɔ fata'n sa'n, ɔ wa yo man be nun kpanngban be ´yo kpa, yɛ ɔ ´fa bé wun sa'n.

Daniɛl 12:4

Wɔ Daniɛl, fa ndɛ nga sie ɔ klun, nán yi fluwa nga i nun ndɛ'n i nglo kle sran fi ka nan awieliɛ blɛ'n ɔ'a ju. Blɛ sɔ nun'n, sran kpanngban kpa be ´kanngan nun, yɛ be silɛ'n ɔ ´uka su .»

Mise 4:5

Like nga nvle kun nga'm be ko yo nan ɔ'a jɔ be amuɛn'm be klun'n, yɛ be yo-ɔ. E kusu e liɛ nga e ko yo nan ɔ ko jɔ Anannganman e Nyanmiɛn'n i klun titi'n yɛ e yo-ɔ.

Abakik 2:14

Sran'm be kwlaa be ´wun kɛ Anannganman lɛ nyrun. Afin i anyrunnyan sɔ'n, ɔ wa yi mɛn wunmuan'n kɛ jenvie'n fa yi'n b'ɔ ɔ kɛtɛ i bo lɔ'n su sa .

Jean 15:16

Nán amun yɛ an fali min-ɔn, sanngɛ min yɛ n fali amun-ɔn. N fali amun kɛ an wɔ nan an ko yo kɛ waka sama b'ɔ su'n sa. N waan mma nga an su i sɔ'n ɔ ´ka lɛ titi nan like kwlaa nga an fa n dunman srɛ e Si'n, ɔ `man amun.

Jean 15:8

Sɛ an yo kɛ waka sama b'ɔ su kpanngban sa'n, b'ɔ man be wun kɛ an ti n sɔnnzɔnfuɛ'n, i sɔ'n nun yɛ n Si'n ´nyan kɔmin-ɔn.

Jean 17:3

Kɛ be se kɛ be ´nyan anannganman nguan'n, i bo'n yɛlɛ kɛ be ´si wɔ bɔ ɔ kunngba cɛ yɛ a ti Nyanmiɛn'n nin Jésus-Krist bɔ a sunmɛnnin i'n.

Rɔmfuɛ Mun 1:13

Aniaan mun, m bu amun wun lɔ kɔlɛ'n i akunndan tititi, min waan m ´ba nan n ´nyan n junman'n i nuan like amun wun lɔ kɛ nyɛn i nvle kun'm be nun'n sa, sanngɛ lele ndɛ n nian nyan-man ń ti .

Rɔmfuɛ Mun 4:12

Yɛ be nga be wlali klɛn bɔ be lafi-man be klɛn wlalɛ'n ngunmin su'n, bɔ sanngɛ be nanti ajalɛ kunngba nga Abraam nantili su'n kɛ ɔ nian wla-man klɛn'n ɔ lafi Nyanmiɛn su'n i su wie'n, ɔ ti bé si wie kusu.

Rɔmfuɛ Mun 6:4

I sɔ'n ti'n, kɛ e nin Krist e wuli e batɛm yolɛ sɔ'n nun bɔ be sieli ye nin i'n, ɔ man kɛ e Si Nyanmiɛn cɛnnin i'n, e kusu e ´cɛn e ´nanti ajalɛ uflɛ su .

2 Korɛntfuɛ Mun 2:14

Nyanmiɛn i kwla o! Afin kɛ e nin Krist y'a kaci sran wunmuan'n ti'n, ɔ fa e yi i kwlalɛ'n nglo tititi. Yɛ ɔ fa e kɛ e yo man be si Krist lika'n kwlaa kɛ like b'ɔ bɔn fannin kpa'n sa.

2 Korɛntfuɛ Mun 4:6

Nyanmiɛn b'ɔ seli kɛ: «Man lika'n kpaja'n,» i kunngba'n yɛ man e wun sa wlɛ weiin-ɔn. Ɔ man kɛ e nian Krist'n, e wun wafa nga Nyanmiɛn ti'n i kwlaa, afin i yɛ man e sili i-ɔ .

2 Korɛntfuɛ Mun 5:9

Ɔ man sɛ e ´tran wa o, sɛ e ´kɔ o, e mian é nyin kɛ like nga e yo'n, i kwlaa ɔ yo e Min'n i fɛ.

2 Korɛntfuɛ Mun 9:8

Nyanmiɛn kwla man amun like kpakpa'n kwlaa lele bé ti sin yia amun. Ɔ man cɛn kwlaa amun ´nyan like ng'ɔ mian amún sa'n i kwlaa, yɛ amun ´nyan wie kpanngban amun ´fa yo aklunye,

Efɛzfuɛ Mun 1:17

Yɛ n srɛ e Min Jésus-Krist i Nyanmiɛn b'ɔ ti e Si b'ɔ lɛ nyrun'n kɛ ɔ fɛ i Wawɛ'n man amun man an si ngwlɛlɛ. Yɛ n srɛ i kɛ ɔ `yi i wun nglo nan an si i kpa.

Efɛzfuɛ Mun 2:10

Afin e ti i sa nuan like, kɛ e nin Krist-Jésus e yoli sran wunmuan'n, Nyanmiɛn boli ye uflɛ nan e `yo nyoliɛ kpakpa ng'ɔ dun mmua sieli ye kɛ e `yo'n.

Efɛzfuɛ Mun 4:1

I sɔ'n ti'n, m bɔ e Min'n ti yɛ n ti bisuafuɛ'n, n srɛ i kpa kɛ an bu flɛlɛ nga Nyanmiɛn flɛli amun'n i akunndan nan an yo sa ng'ɔ ti i nuan su'n.

Efɛzfuɛ Mun 4:13

Ɔ man e ´yo sran lele e kwlaa e ´yo kun Nyanmiɛn Wa'n i su bɔ e lafi'n nin i silɛ bɔ e si i kpa'n ti, yɛ e ´yo sran lele be ´kwla fa ye sunnzun wafa nga Krist ti'n i kwlaa.

Efɛzfuɛ Mun 5:10

An `mian amún nyin an ´yo sa ng'ɔ yo e Min'n i fɛ'n.

Efɛzfuɛ Mun 5:15

I sɔ'n ti'n, an `nian amun nantilɛ bɔ an fa nanti'n i su kpa. Nán an yo kɛ sran b'ɔ wun-man sa wlɛ'n sa, sanngɛ an `yo ngwlɛlɛfuɛ.

Efɛzfuɛ Mun 5:2

Sa kwlaa nga amun ´yo'n, an `yo i sran klolɛ'n ti kɛ Krist kusu kloli ye b'ɔ fɛ i wun mannin Nyanmiɛn e ti kɛ tɛ nnɛn bɔ be yrɛ i b'ɔ bɔn fannin Nyanmiɛn bue nun'n sa .

Filipfuɛ Mun 1:11

Yɛ Jésus-Krist man amun ´yo sa kpakpa Nyanmiɛn manmanlɛ nin i kɔmin su manlɛ'n ti.

Filipfuɛ Mun 1:27

Sa'n kwlaa nun'n, an `yo sa ng'ɔ nin Krist jasin fɛ'n ti kun'n nan sɛ m ba amún wun wunlɛ o, sɛ m ba-man o, m'an ti amun ngan kɛ amun kwlaa amún bo ti kun kpa amun jran kekle, yɛ amun akunndan'n ti kun, yɛ an mian amún nyin jasin fɛ'n bɔ an lafi su'n ti.

Filipfuɛ Mun 4:18

Like nga an fa blɛli min'n, n nyɛnnin i kwlaa'n, ɔ ju min tra su. Kɛ Epafroditi fali like sɔ'n bɔ an fa mɛnnin i kɛ ɔ fa blɛ min'n blɛli min'n, ɔ man like'n kwlaa ti a sin a yia min. Like sɔ'm be ti kɛ like b'ɔ bɔn fannin bɔ be fa man Nyanmiɛn b'ɔ sɔ nun ɔ jɔ i klun'n sa .

Kolɔsfuɛ Mun 2:19

Ɔ fɛ-mɛn i wun mantan-man Krist b'ɔ ti bé ti'n i kpa kun. Krist yɛ man be akpɔlɛ akpɔlɛ nin be ndin'm be sasa su-ɔ, i yɛ man be wunnɛn wunmuan'n yo kpa yɛ ɔ nyin kɛ Nyanmiɛn klo kɛ ɔ nyin'n sa-a.

Kolɔsfuɛ Mun 2:6

I sɔ'n ti'n kɛ an kplinnin su kɛ Krist-Jésus `yo amun Min'n, man amun nyoliɛ'n kle kɛ amun nin i a kaci sran wunmuan,

Kolɔsfuɛ Mun 3:20

Ba kanngan mun, man amún nyin yi amún si nin amun nin sa'n kwlaa nun, afin sɛ an yo sɔ-ɔ, ɔ yo e Min'n i fɛ.

Kolɔsfuɛ Mun 4:5

Like nga an yo man be bɔ be ti-man Kristfuɛ'n, an `fa ngwlɛlɛ yo. Kɛ amu'an nyan amun ti'n, nán an tran lɛ ngbɛn, an `yo like ng'ɔ yo sa ye'n.

1 Tɛsalonikfuɛ Mun 2:12

afin e mannin amun afɔtuɛ, e wlali amun fanngan, yɛ e kan kleli amun kɛ an yo sa ng'ɔ ti Nyanmiɛn b'ɔ flɛli amun kɛ an di i famiɛn'n wie nan an nyan nyrun kɛ i liɛ'n sa'n, i klun sa.

1 Tɛsalonikfuɛ Mun 4:1

Aniaan mun, min ndɛ'n i atabo'n yɛ: sa nga an yo-ɔ ɔ yo Nyanmiɛn fɛ'n, e kleli amun, an fali su yɛ an wo i yolɛ su, sanngɛ sran wunmuan bɔ e nin e Min Jésus ti'n ti, e ´srɛ amun yɛ e ´kan kle amun kpa kɛ an yo i sɔ tra laa'n.

2 Timote 2:4

Sonja ng'ɔ ti sonja kpa bɔ i waan ɔ ´yo sa ng'ɔ ti i su kpɛn'n i klun su'n, ɔ fɛ-mɛn i wun wla-man like nga sran kun'm be yo'n nun.

Tite 3:1

Kpɛn bé wla kɛ be bu be nga be sie be'n nin be nga be jran bé ja nun'n be sran, man bé nyin yi be, sa kpa kwlaa nga be se be kɛ be yo'n, man be yo.

Tite 3:14

Kle e minniɛn'm be kusu kɛ be `di junman klanman nan b'a nyan like nga bé sa miɛn i wun'n, nán man be bubu bé sa nin bé ja tran su.

Hébreu 11:5

Nyanmiɛn su bɔ Enɔk lafi'n ti yɛ ɔ fɛ ɔli i wun lɔ bɔ ɔ'a wu-man nin-ɔn. B'a wun-mɛn i kun afin Nyanmiɛn mɛnnin i su. Be klɛli kɛ Nyanmiɛn klun jɔli i wun nan ɔ'a mɛn i su .

Hébreu 13:16

Nán an yaci sa kpa nin sran ye yolɛ'n, afin i sɔ like'n yɛ be yo-ɔ ɔ jɔ Nyanmiɛn klun-ɔn.

Hébreu 13:21

ɔ man amun fanngan sa'n kwlaa nun nan an yo i klun sa. Jésus-Krist ti, man ɔ fa e yo like ng'ɔ klo'n. Man e la Krist ase tititi! Man ɔ yo sɔ!

2 Piɛr 1:8

Nanwlɛ, sɛ an nian sa sɔ'm be su bɔ an yo be titi'n, kɛ an kunndɛ kɛ amun ´si e Min Jésus-Krist, san amun ´si i, afin an su tran-man lɛ ngbɛn, yɛ like nga an yo'n ɔ ´yo ye.

2 Piɛr 3:18

Ye bɔ e Min'n b'ɔ ti e Defuɛ'n yo amun'n ti'n, man be wun kɛ amu'an yo sran, yɛ man be wun kɛ amun nin i tran nan amu'an si i kpa. Kɛ ɔ fin ndɛ'n, man be yi i ayɛ tititi. Man ɔ yo sɔ!

1 Jean 3:22

Like kwlaa nga e srɛ i'n, ɔ ´fa man e yɛlɛ kɛ e fɛ i ndɛ'n su, yɛ e yo sa ng'ɔ jɔ i klun'n.

1 Jean 5:20

E si kusu kɛ Nyanmiɛn Wa'n bali yɛ ɔ kle ye ngwlɛlɛ nan e si Nanwlɛfuɛ'n. E nin Nanwlɛfuɛ sɔ'n y'a yo kun i wa Jésus-Krist ti. I yɛ ɔ ti Nyanmiɛn nin-ɔn, i yɛ be flɛ i nguan nin-ɔn.

3 Jean 1:6

Be kan ye nga a yoli be'n i ndɛ kle asɔnunfuɛ mun. N ´srɛ wɔ kɛ a gua be atin klanman i wafa nga a yo-ɔ ɔ ´jɔ Nyanmiɛn klun'n.