Bo Bolɛ 12:2 - NYANMIƐN NDƐ'N 1998

² N ´yo man ɔ osu'n wa yo nvle dan kun, n ´yo wɔ ye, n ´yo man ɔ dunman'n ´fu. Ɔ dunman nun ti n ´yo sran'm be ye.

Bo Bolɛ 12:2 ပူးပေါင်းရင်းမြစ်များ

Bo Bolɛ 13:16

N ´yo man wɔ anunman'm be ´sɔn kaka kpa kɛ asiɛ wun ndutre sa. Be ka be-ɔ ɔ su yo-man ye.

Bo Bolɛ 15:5

Yɛ ɔ fɛ i fiteli nan ɔ'a se i kɛ: «Man ɔ nyin'n su nian nglo lɔ. Sɛ a kwla ka nzraama mun'n, ka be man n nian. Kɛ wɔ anunman'm be wa sɔn kpanngban sɔ-ɔ.»

Bo Bolɛ 17:20

Ismaɛl liɛ nga a usali'n, n tili. M ´mɛn i muae, m ´mɛn i ba kpanngban, i osu'n ´trɛ lele tratra su, ɔ ´wu wlengbi blu-nin-nnyɔn . I osu'n ´kaci nvle dan kpa.

Bo Bolɛ 18:18

Afin i osu'n ɔ wa trɛ dan yɛ ɔ ´nyan kwlalɛ. Abraam dunman nun yɛ n ´yo asiɛ'n su nvle'm be kwlaa be ye-ɔ.

Bo Bolɛ 18:19

M'an kpɛ i kɛ ɔ kan kle i mma mun nin be anunman nga be ´wu be'n be kɛ be `fa min atin'n su be nanti sɛsɛ, nan m'an yo like nga n kan kleli i kɛ n ´yo'n.»

Bo Bolɛ 19:29

Kɛ Nyanmiɛn ´nunnun lika sɔ'm be nun klɔ mun'n, i nyin ɔ'a tra-man Abraam su. Ɔ yili Lɔt klɔ sɔ bɔ i waan ɔ ´nunnun be'n be nun fiteli.

Bo Bolɛ 24:1

Abraam yoli oke kɛsɛkɛsɛkɛsɛ. Anannganman man i sa nun ninnge'n kwlaa yoli ye.

Bo Bolɛ 24:35

Anannganman yoli man min min sɔ'n ɔ'a yo anyanbeunfuɛ. Ɔ mɛnnin i bua nin boli nin nannin, nin sika nin sika ɔkwlɛ, nin sran mun, yasua mun o, bla mun o, nin nyɔnngɔnmɛn mun, ɔ nin aflunmun mun.

Bo Bolɛ 25:11

Kɛ Abraam wuli'n, Nyanmiɛn yoli i wa Izaak i kpa. Izaak trannin Lasai-Rɔi gbo'n wun lɛ.

Bo Bolɛ 26:3

Tran mɛn sɔ'n nun lɔ, n ´jran ɔ sin, n ´yo wɔ kpa. N ´fa lika nga kwlaa m man wɔ nin wɔ anunman mun. Nda nga n tali ɔ́ si Abraam'n, n ´yiɛ i nuan.

Bo Bolɛ 26:4

N ´yo man ɔ osu nunfuɛ'm be ´sɔn kpanngban kɛ nglo lɔ nzraama mun sa. Kpɛkuun n ´fa lika nga kwlaa m ´man be. Be ti yɛ n ´yo asiɛ'n su nvle-nvle'm be kwlaa be ye-ɔ.

Bo Bolɛ 27:29

Man nvle wie'm be nunfuɛ'm be su wɔ, man mɛn wie'm be nunfuɛ'm be koto ɔ bo. Sie ɔ niaan mun. Man ɔ́ nin i mma'm be koto ɔ bo. Sran ng'ɔ bo wɔ sannzan'n, man nyrɛnnɛn tɔ i su. Sran ng'ɔ yra wɔ nguan'n, Nyanmiɛn man i wun sa `yo ye.

Bo Bolɛ 28:14

Ɔ osu'n nunfuɛ'm be wa sɔn kpanngban kɛ asiɛ'n su ndutre'n sa. Be wa trɛ kɔ wia atɔliɛ bue liɛ'n su lɔ nin wia afiliɛ bue liɛ'n su lɔ, be ´trɛ kɔ mɛn ng'ɔ o yɛ'n i nglo lɔ nin i ngua lɔ. Wɔ nin ɔ osu'n amun ti yɛ n ´yo mɛn i wunmuan i nun nvle-nvle'n kwlaa be ye-ɔ.

Bo Bolɛ 35:11

Nyanmiɛn seli i kɛ: «Nyanmiɛn b'ɔ kwla like kwlaa yo'n yɛlɛ min. Wu ba kaka man ɔ osu'n ɔ trɛ ɔ kaci nvle wunmuan kun. I kpa'n ɔ ´kaci nvle sunman. Wɔ anunman sɔ'm be wie ´yo famiɛn.

Bo Bolɛ 46:3

Yɛ Nyanmiɛn seli kɛ: «Nyanmiɛn'n yɛlɛ min. Ɔ si i Nyanmiɛn'n yɛlɛ min. Nán srɛ kun wɔ Ezipt kɔlɛ nun. Lɔ yɛ n ´yo man ɔ osu'n ´kaci nvle dan-an.

2 Samiɛl 7:9

Like kwlaa nga a ´yo'n, e nin wɔ-ɔ. N nunnunnin ɔ kpɔfuɛ'm be kwlaa ɔ nyrun. N yoli man ɔ dunman'n ɔ'a fu kɛ asiɛ'n su sran dandan'm be liɛ'n sa.

1 Famiɛn Mun 1:47

kpɛkuun famiɛn David i sran dandan'm be wa yrali famiɛn David i nguan. Be waan: ‹Man ɔ Nyanmiɛn'n i fanngan nun, Salomɔn i dunman liɛ'n fu tra ɔ liɛ'n. Man i sielɛ'n ɔ tra ɔ liɛ'n!› Kpɛkuun famiɛn'n kotoli i bɛ'n su.

Zɔb I Nyrɛnnɛn Wunlɛ 35:8

Sa tɛ nga a yo'n, ɔ wiengu mun yɛ a yo be-ɔ. Kpa nga a yo'n, a yo man sran mun.

Jue Mun 107:38

Nyanmiɛn yo be ye, be wu ba kpanngban kpa, bé sa nun nnɛn'm be trɛ.

Ezipt Lɔ Tulɛ'n 1:7

Sanngɛ Izraɛlfuɛ'm be wuli ba mun kaka kpa nan b'a trɛ trɛlɛ kpa. I sɔ'n ti, be nyannin wunmiɛn kpa, be trannin Ezipt mɛn'n i lika'n kwlaa.

Ezipt Lɔ Tulɛ'n 32:10

Siɛn liɛ'n, yaci min nun man n yo sa wie. Min ya'n wa jue bé su kɛ sin sa, yɛ n ´nunnun be mlɔnmlɔn. Sanngɛ ɔ liɛ'n, wɔ osu'n wa trɛ, ɔ ´yo nvle dan kun.»

Ezai 51:2

Amun `nian Abraam b'ɔ ti amún si'n nin Sara b'ɔ wuli amun'n. Afin kɛ n ´flɛ Abraam'n, wuun ɔ lɛ-man ba. N yoli i ye, yɛ n yoli man i osu'n ɔ trɛli.

Ezekiɛl 34:26

N ´yaci be lɛ be ´tran min oka'n i wun lɛ. N ´yo man nzue'n ɔ ´tɔ i tɔlɛ blɛ'n nun, yɛ ɔ wa yo be muae like.

Mise 7:20

A nin Zakɔb osu nunfuɛ mun amun ´tran klanman, a ´yi ɔ klun-ufue'n i nglo ´kle Abraam i osu'n nunfuɛ mun. A ´yi kle be kɛ a fua kleli e nannan mun lalafuɛ nun'n sa .

Zakari 8:13

Zidafuɛ mun nin Izraɛlfuɛ mun, kɛ laa an bo sanndili nvle'm be nun bɔ be fa wunnin kɛ sannzan o amun su'n, kɛ n wa de amun, siɛn'n, be ´wun kɛ an ti muaefuɛ. Nán srɛ kun amun, an `tra amun anwlɛn !»

Kalɛ 14:12

N wa fa tukpacɛ b'ɔ sa ndɛndɛ kun n ´fa nunnun be kwlaa, i sin n wa yo man ɔ osu liɛ'n ´kaci nvle dan kun b'ɔ ´nyan wunmiɛn tra nvle nga.»

Kalɛ 22:12

Nyanmiɛn seli Balaam kɛ: «Nán a nin be wɔ. Nán bo nvle sɔ'n i sannzan afin m'an dun mmua m'an yo i nunfuɛ'm be ye.»

Kalɛ 23:20

Nian, Nyanmiɛn waan n `yra Izraɛlfuɛ'm be nguan. Kɛ bɔ Nyanmiɛn mannin be muae klanman'n ti, n kusu n kan-man ndɛ uflɛ.

Rɔmfuɛ Mun 4:11

Nyanmiɛn dun mmua buli i sran kpa i su b'ɔ lafi'n ti, i sin yɛ be wlɛli i klɛn-ɔn. Ɔ fa klɛn wlalɛ sɔ'n sieli Abraam nzɔliɛ b'ɔ ti like nga ɔ'a dun mmua yo i'n i lalofuɛ. Be kwlaa nga kannzɛ b'a wla-man be klɛn'n, ɔ bu be kusu be sran kpa wie'n, i su bɔ be lafi'n ti'n, ɔ yoli sɔ nan Abraam yo bé si.

Galasifuɛ Mun 3:14

Ɔ yoli sɔ nan ye nga Nyanmiɛn seli Abraam kɛ ɔ ´yo i'n Jésus-Krist ti, ɔ ´yo man be nga be ti-man Zuif'n, nan e kusu e ´nyan Nyanmiɛn Wawɛ'n bɔ i waan ɔ ´fa man ye'n i su bɔ e lafi'n ti.

Galasifuɛ Mun 3:7

I sɔ'n ti'n, be nga be lafi Nyanmiɛn su'n, be ti Abraam wa .

Mmla'n 26:5

Kpɛkuun man sran'n ɔ jran Anannganman amun Nyanmiɛn'n i nyrun lɛ, nan ɔ `se kɛ: «Min nannan'n ɔ ti Aramfuɛ, ɔ wlan-wlannin lika'm be nun, ɔ tu tran wa, ɔ tu tran wa. Ɔ wa ɔli Ezipt mɛn'n nun lɔ ɔ nin i sran mun. Kɛ be ´kɔ'n, be ti sran ba nnyɔn kun cɛ, b'a sɔn-man. Be ko trannin lɔ, be trɛli, be yoli nvle dan kun b'ɔ lɛ wunmiɛn.