Amɔs 9:10 - NYANMIƐN NDƐ'N 1998

¹⁰ Sran nga be yoli sa tɛ min nvle'n nun'n be kwlaa, ɔ nin be nga be se kɛ: ‹Sa yalɛ nga a kɛn i ndɛ kɛ ɔ'a mantan ye lɛ'n, ɔ su tɔ-man e su'n,› alɛ'n ´di be sɔfuɛ mun!»

Amɔs 9:10 ပူးပေါင်းရင်းမြစ်များ

Jue Mun 10:11

Ɔ se i anwlɛn'n nun kɛ: «Nyanmiɛn i wla fi ninnge mun. Nyanmiɛn kɛtɛ i nyin, ɔ wun-man like fi mlɔnmlɔn!»

Akunndanfuɛ'n 8:11

Kɛ be ka-man bé ja nun lɛ be tu-man sran ng'ɔ yo sa tɛ'n i fɔ kɛ ɔ nin i fata'n sa'n, i ti yɛ sa tɛ yolɛ'n i akunndan'n wo sran'm be anwlɛn'n nun b'ɔ wie-man le nin-ɔn.

Ezai 33:14

Siɔn lɔ be nga be yo sa tɛ'n, srɛ kun be. Be nga be nyin yi-man Nyanmiɛn'n, be usu. Be usa kɛ: «Wan yɛ ɔ wo e nun b'ɔ kwla jran sin dan nga i nyrun-ɔn? ?Wan yɛ ɔ wo e nun b'ɔ kwla jran sin kpli ng'ɔ nuan-man mlɔnmlɔn yɛ'n i wun koko-ɔ?»

Ezai 5:19

Be se kɛ: «Man Anannganman ɔ kɛn i wun yo i junman'n ndɛndɛ nan e ´wun i. Man Izraɛl Nyanmiɛn'n i sa b'ɔ jaja be'n, ɔ yia be nuan nan e ´wun be!»

Ezai 56:12

Be se kɛ: «Man e wɔ e ko kunndɛ nzan, man e nɔn nzan kekle mun nan ɔ `ti ye! Ainman'n, e ´yo kɛ ndɛkɛn sa'n ekun. Ng'ɔ ka lɛ bɔ e ´nɔn'n tɛ sɔn.»

Zeremi 18:18

Be wie'm be se kɛ: «An man e cici Zeremi i wun ndɛ, afin i kunngba'n ti man Nyanmiɛn nyrun jranfuɛ'n su wie-man nan se kɛ mmla'n ´ka lɛ mlin. Ngwlɛlɛfuɛ'm be kusu be su wie-man nan se kɛ e su nyan-man afɔtuɛ manfuɛ kun. Nyanmiɛn nuan ijɔfuɛ'm be su wie-man nan se kɛ e su ti-man Nyanmiɛn nuan ndɛ'n kun. Man e saci i wun. Sɛ ɔ kan ndɛ siɛn'n, nán e sie é su kun.»

Zeremi 23:17

Be se be bɔ be bu-man min like fi'n be kɛ: ‹Anannganman waan: Amun ´di alaje.› Be se be bɔ be klun sa'n cɛ yɛ be waan be ´yo'n, bɔ be su mlin'n be kɛ yoo: ‹Sa su nyan-man amun.›

Zeremi 29:32

Anannganman'n wan yoo: «E nin Sɛmaɛza b'ɔ ti Neselamfuɛ nin i osu'n y'a nyɛn i. I fuɛ'm be nun kun sa i nyin su tran-man su nan se kɛ nɛnnɛn nga n ´di min nvlefuɛ mun'n ɔ ´wun nun. Sa ti b'ɔ ´yo sɔ'n yɛlɛ kɛ ɔ su sran'm be bo kɛ nán be nyin yi min.»

Ezekiɛl 20:38

N ´yi nyin keklefuɛ nga be o amun nun'n nin be nga be jasoli mín wun'n. Mɛn nga be ɔli nun'n, n ´fa be n ´jaso lɛ, sanngɛ be su sa-man bé sin Izraɛl asiɛ'n su kun. Yɛ amun wa si jrɛiin kɛ min yɛ n ti Anannganman nin-ɔn .

Amɔs 6:1

Amun bɔ an ti Siɔn lɔ be ´di pɔɔ'n, bɔ an gua Samari kpɔlɛ'n su lɔ bɔ an bu i kɛ amu'an nyan amun ti'n, an yako lele! Be blɔ kɛ mɛn'n nun be nga be lɛ nyrun'n, amun yɛ be ti be klikli nin-ɔn, yɛ Izraɛlfuɛ'm be kɔ amun sin-ɔn .

Amɔs 6:3

An bu i kɛ an ´yo sɔ nan nyrɛnnɛn cɛn'n ɔ ´cuɛn kɔ i sin, sanngɛ kusu wuun sa kekle blɛ'n yɛ amun su mɛntɛn i-ɔ.

Amɔs 9:8

Anannganman Nyanmiɛn b'ɔ sie mɛn wunmuan'n i nyin ta Izraɛl famiɛn'm be kwlaa bɔ sa tɛ'n yɛ ɔ ti be like yɛ be yo'n, ɔ ´nunnun be asiɛ'n su. Sanngɛ ɔ'a se-man kɛ ɔ ´nunnun Zakɔb anunman'm be ngba.

Mise 3:11

sa ti bɔ n flɛ amun'n yɛlɛ kɛ klɔ'n su jɔlɛ difuɛ mun'n, sran ng'ɔ cɛ be like'n, i yɛ be bu i ndɛ'n klanman-an. Nyanmiɛn nyrun jranfuɛ'm be kusu be tannin be kalɛ nan b'a kle Nyanmiɛn i mmla mun. Nyanmiɛn nuan ijɔfuɛ'm be kusu, sɛ be ´kan Anannganman i nuan su ndɛ'n, san b'a tannin be kalɛ. Sanngɛ be yo bé wun kɛ Anannganman su yɛ be lafi sa. Be ko se kɛ: «?Anannganman nin ye o nun kwlaa nin-ɔn, nguɛ sa cɛ yɛ ɔ kwla nyan ye-ɔ ?»

Zakari 1:6

Sanngɛ ndɛ nin mmla nga n fa wlali min sufuɛ nga be ijɔ min nuan'n bé sa nun, kɛ be `fa man amun nannan mun'n, amun nannan'm be wunnin i yɛ be seli kɛ: ‹Sa nga Anannganman b'ɔ sie mɛn wunmuan'n waan sɛ e yo tɛ nan sɛ y'a yaci-man ye aeliɛ tɛtɛ'n ɔ ´fa yo ye'n, yɛ ɔ'a yo i yɛ.› »

Malasi 3:15

Y'a wun kɛ be nga be yo bé wun dandan'n be yɛ be di ye-ɔ, sa tɛ yofuɛ'm bé wun fɔuun. Kannzɛ be klɔklɔli Nyanmiɛn o, be o be olɛ lɛ cɛ, ndɛ fi nyan-man be.› »