Amɔs 6:10 - NYANMIƐN NDƐ'N 1998

¹⁰ Sɛ sran kun ba i osufuɛ nga be wuli'n be fuɛn'n falɛ kɛ ɔ ´ko wɔ be nun nan sɛ sua sɔ'n nun lɛ sran wie ɔ'a wu-man wie, nan ɔ o sua ba kasiɛn nun lɔ'n, ɔ ´usa kɛ: «?Sran wie o ɔ wun lɛ ekun?» Kpɛkuun ɔ ´se kɛ: «Cɛcɛ! Sran nun-man wa kun. Sanngɛ nán ijɔ kun, nán bo Anannganman'n i dunman ka .»

Amɔs 6:10 ပူးပေါင်းရင်းမြစ်များ

2 Famiɛn Mun 23:16

Kɛ Zozias kpɛli i nyin'n, ɔ wunnin asieliɛ ng'ɔ o oka'n su'n. Ɔ seli sran'm be kɛ be yi ndia'm be nun owie mun. Be yili, nan ɔ'a ko yra be sraka yiwlɛ'n su. Sraka yiwlɛ'n yoli fiɛn. Ɔ man Anannganman i ndɛ ng'ɔ fa wlɛli i sran'n i nuan b'ɔ kannin'n, ɔ kpɛnnin su .

2 Famiɛn Mun 6:33

Elize nuan'n ɔ'a tɔ-man, be ´nian-an, sunmanfuɛ'n yɛ ɔ'a ba yɛ, kpɛkuun sunmanfuɛ sɔ'n waan: «Anannganman bɔbɔ yɛ ɔ man nyrɛnnɛn nga tɔ é su-ɔ. ?Ɔ man nguɛ like uflɛ yɛ n ´usɛ i kɛ ɔ yo man min-ɔn?»

Zeremi 16:6

«I kpɛnngbɛn o, i bakan o, be wa wu mɛn nga nun. Be su sie-man be, be su bobo-man bé wun kannin yɛ be su yi-man bé ti be dunman nun.

Zeremi 44:26

Ndɛ nga Anannganman'n kusu kan'n yɛ ɔ o yɛ. Amun kwlaa amun `sie amún su tie. I waan: N kan m bɔbɔ min Nyanmiɛn kpli'n min ti kɛ yoo: amun Zidafuɛ nga amun wo Ezipt wa yɛ'n, nán amun fa min dunman be ta nda kɛ n kan Anannganman Nyanmiɛn kpli'n kun.

Zeremi 9:21

«Zeremi, se kɛ Anannganman'n wan yoo: ‹Fuɛn'm be ´gua asiɛ wun kɛ asiɛ'n i ye yolɛ like yɛ b'a guɛ i fie'n su sa. Be ´gua kɛ be su kpɛ ble nan be nyan-man sran isɛ-mɛn i ja mun nan ɔ tru bé sin'n sa.› »

Ezekiɛl 20:39

Yɛ amun Izraɛlfuɛ mun, min Anannganman Nyanmiɛn n waan yoo: Amun `wɔ nan sran kun ko sɔ i amuɛn mun, sanngɛ i sin'n amun lɛ-man atin kɛ amún nyin su yi-man min. Amun ´yaci amuɛn'm be like manlɛ bɔ amun fa saci min dunman'n.

Ezekiɛl 24:21

‹Se Izraɛlfuɛ'm be kɛ: Anannganman seli min kɛ: Min tranwlɛ bɔ amun fa di amun nuan'n, bɔ amun wun i-ɔ, amun klun jɔ'n, bɔ amún wla o su'n n wa yo man ɔ yo fiɛn. Amun mma yasua mun nin amun mma bla nga be kali Zerizalɛm lɔ'n, be ´kun be.

Amɔs 5:13

Blɛ'n ɔ'a yo kekle. I sɔ'n ti, be nga be si ngwlɛlɛ'n, be wun ndɛ-ɔ be kwla kan-man.

Amɔs 8:3

Anannganman Nyanmiɛn wan yoo: «Min jɔlɛ dilɛ cɛn sɔ nun'n, famiɛn sua'n nun jue tofuɛ'm be ´yaci jue tolɛ be ´sun. Fuɛn'm be ´tru lika'n nun sa trutrɛɛ, kpɛkuun lika'n ´tɔ sa bliin.»

Kalɛ 17:12

Aarɔn fali sɛnmlɛn guawlɛ'n kɛ Moiz seli i'n sa, yɛ ɔ wanndi ɔli sran'm be afiɛn lɔ-ɔ. Ɔ ´ju lɔ o, sakpa nyrɛnnɛn'n ɔ'a bo i bo nvlefuɛ'm be afiɛn. Ɔ yili ansans sraka'n, yɛ ɔ yoli like ng'ɔ fata kɛ ɔ yo'n nan Nyanmiɛn ɔ'a yaci bé wun sa tɛ'n ɔ'a cɛ be'n.

1 Samiɛl 31:12

Yɛ be nun yakpafuɛ'm be kwlaa be ɔli Bɛt-Sean kɔnguɛ afiɛn. Be ko yili Sail nin i mma'm be fuɛn'm bɔ be sende-sende be klɔ i talɛ'n wun'n. Be fa bali Zabɛs nan b'a yra be.