Amɔs 5:16 - NYANMIƐN NDƐ'N 1998

¹⁶ I sɔ'n ti min Anannganman bɔ n sie mɛn wunmuan'n n wan yoo: «Gua'n su, ɔ ti fɛfɛlɛ'n cɛ yɛ be fɛfɛ-ɔ. Klɔ nun akpɔ'm be nun'n, sran'm be ´kpankpan be ´se kɛ: ‹Ɔo! ?Nguɛ nyrɛnnɛn ndɛ liɛ yɛlɛ nga?› Be ´flɛ fie su junman difuɛ mun sɛ bo. Kpɛkuun be nga be si ngwlɛ yi kpa'n, be ´ko flɛ be kɛ be wa sun.

Amɔs 5:16 ပူးပေါင်းရင်းမြစ်များ

2 Be Nyoliɛ 35:25

Zeremi b'ɔ ti Nyanmiɛn nuan ijɔfuɛ'n kpɛli Zozias wulɛ'n su jue. Jue tofuɛ yasua mun nin bla mun be kannin Zozias wun ndɛ be sɛ jue'm be nun lele ɔ'a fa ju ndɛ. Ɔ kacili be nzuɛn Izraɛl mɛn'n nun. Be klɛli jue sɔ mun sɛ jue fluwa'n nun .

Ezai 15:8

Afin be kpanlɛ i nganniɛn'n ɔ kɔ lele ju Moab mɛn'n i bue kwlakwla su. Be ngwlɛ bɔ be yi'n ɔ kɔ lele ju Eglaim. Be ngwlɛ bɔ be yi'n ɔ kɔ lele ju Beɛr-Elim.

Ezai 22:12

I cɛn sɔ nun'n, Anannganman b'ɔ sie mɛn wunmuan'n, ɔ seli amun kɛ amun `sun yɛ amun `la kondo, i waan amun `kpu amún ti'n su yɛ amun `wla bajɛ tralɛ.

Zeremi 30:5

I waan: «Awlaboɛ nganniɛn tɛ, srɛ kun sran sɔ nga be kpan'n. Bé wla ti-man ase guawa.

Zeremi 4:31

N ti fɛfɛlɛ kɛ bla yɛ ɔ su wu ba sa. Fɛfɛlɛ'n tɛ kɛ bla sɔ'n i talua ba yɛ ɔ su wu i sa-a. Kannzu Siɔn yɛ ɔ fɛfɛ sɔ-ɔ, yɛ ɔ sun aunnvuɛ sunlɛ ɔ tinngɛ i sa'n nglo sɔ-ɔ. Ɔ se kɛ: «M'an wu o! M'an fɛ, min kunfuɛ'm b'a kle min yalɛ lele n si-man wie se kun.»

Zeremi 9:10

Anannganman waan: «N ´yo man Zerizalɛm nunnun mlɔnmlɔn. Ɔ ´yo nsoso'n be lawlɛ. N ´yo man Zida klɔ'm be tɔ srololo. Sran fi su tran-man be su kun.»

Zeremi 9:16

Anannganman b'ɔ sie mɛn wunmuan'n yɛ ɔ kan sɔ-ɔ. «An `bu bla nga sunlɛ yɛ ɔ ti be junman'n be ko flɛlɛ akunndan. An `ko flɛ be nga be si sun kpa'n man be bla.

Ndɛ Nga Nyanmiɛn I Nuan Ijɔfuɛ Oze Kannin'n 4:3

I sɔ'n ti, sa yalɛ wa tɔ mɛn'n su. Nzue su tɔ-man kun. I klɔ sran mun o, i nnɛn mun o, i anunman mun o, be kwlaa bé wun ´fɔ. Jue'm be kwlaa be ´wu.»

Zoɛl 1:11

Fie difuɛ'm bé wun ɔ'a fɔ, vinyi fie difuɛ'm be su fɛfɛ. Ble nin ɔrz bɔ b'a saci'n ti be su fɛfɛ. Like nga afuɛ nuan'n yiali bɔ be nyɛnnin i fie su lɔ'n, i sɔ like'n kwlaa sacili.

Zoɛl 1:14

Amun `kle nglɛmun cilɛ blɛ kun. Amun `flɛflɛ amun wun nan an `yia anyia dan kpa kun. Amun `yia ngbɛn mun ɔ nin klɔ'n su sran'm be kwlaa Anannganman i sua'n nun lɔ nan an `srɛ tantrantan kpa kɛ ɔ ´de amun.

Zoɛl 1:15

Cuekee! Nguɛ cɛn liɛ yɛlɛ nga! Anannganman i ya cɛn'n yɛ ɔ'a mantan yɛ. Cɛn sɔ'n ´ba, Anannganman'n b'ɔ kwla like kwlaa yo i ninnge'm be sacilɛ b'ɔ guguli kɛ ɔ ´saci be'n yɛ be ´ba-a .

Zoɛl 1:8

Amun `la kondo kɛ talua kan wie b'ɔ o sɛ nun, b'ɔ su sun i wun b'ɔ jɛli i-ɔ, ɔ'a cɛ-man bɔ ɔ'a saci i sa nun'n sa.

Amɔs 3:13

Anannganman Nyanmiɛn'n, Nyanmiɛn b'ɔ sie mɛn wunmuan'n wan yoo: «An `sie amún su nan an `fa ndɛ yɛ'n be `ju Zakɔb osufuɛ'm be nyrun.

Amɔs 5:27

I sɔ'n ti, n ´yo man be wa tra amun be ´kɔ Damas sin mmua lɔ kpa.» Nyanmiɛn b'ɔ sie mɛn wunmuan'n, b'ɔ suan Anannganman'n yɛ ɔ kan sɔ kle amun-ɔn .

Amɔs 8:10

Amún cɛn nga amun di be'n, n ´fa be n ´kaci awlaboɛ cɛn, jue nga amun to be'n, n ´fa be n ´kaci sunlɛ. Sran'm be kwlaa be ´wla bajɛ tralɛ. N ´fa nyrɛnnɛn n ´yi nvle wunmuan'n su. Be sran'm be kwlaa be ´kpu bé ti'n su kɛ sran wie bɔ i wa ba kunngba cenje'n ɔ'a saci i sa nun'n sa. Kpɛkuun i agualiɛ'n ko yo-man aklunjuɛ.»

Amɔs 8:3

Anannganman Nyanmiɛn wan yoo: «Min jɔlɛ dilɛ cɛn sɔ nun'n, famiɛn sua'n nun jue tofuɛ'm be ´yaci jue tolɛ be ´sun. Fuɛn'm be ´tru lika'n nun sa trutrɛɛ, kpɛkuun lika'n ´tɔ sa bliin.»

Mise 1:8

I sɔ'n ti n ´sun, n ´koko, n ´nanti mín ja ngbɛn ɔ nin mín wun ngbɛn. N ´kpan kɛ nsoso sa, n ´kplin kɛ klɔnsoklo sa.

Mise 2:4

Blɛ sɔ nun'n, be ´fa amun be ´kpɛ flɛn, be ´kpɛ amun wun nyrɛnnɛn jue. Jue sɔ'n be ´to be ´se kɛ yoo: «B'a wie é bo ninnge'm be fa mlɔnmlɔn, b'a de e mɛn nunfuɛ'm bé sa nun asiɛ'n kwlaa kpan. Be nga be kan e bo e fie'm be su'n, be bɔbɔ be kunngba'm be bli bé nyin be cɛ nun be fa. ?Ɔo, nguɛ sa ti yɛ man be kuankuan é bo weinwein sɔ-ɔ?»

Sa nglô yile 18:10

Kɛ be ´wun nyrɛnnɛn b'ɔ su wun i'n b'ɔ ´yo be sro'n ti'n, be ´jran mmua lɔ be ´se kɛ: ‹?Eee, nzu nyrɛnnɛn sa yɛlɛ nga? ?Nzu nyrɛnnɛn sa yɛlɛ nga? Babilɔni klɔ dan'n b'ɔ ti famiɛn klɔ'n, dɔ kunngba su i sufuɛ'm b'a nyan sa nga be yoli'n i nuan akatua!›

Sa nglô yile 18:19

Be to ndutre'n guali bé ti'n su, be sunnin, be boli awuyomo, yɛ be seli kɛ: ‹?Eee, nzu nyrɛnnɛn sa yɛlɛ nga? ?Nzu nyrɛnnɛn sa yɛlɛ nga? Klɔ dan nga bɔ be kwlaa nga be lɛ mmeli jenvie'n su'n be nyan bé wun i anyanbeun'n ti'n, dɔ kunngba su ɔ'a kaci kɛ aawlɛ flɛnnɛn wie sa !