Amɔs 1:14 - NYANMIƐN NDƐ'N 1998

¹⁴ N ´fa sin n ´yi be klɔ Raba'n nun, i sɔ sin liɛ'n ɔ ´yra klɔ'n su sua nglanman mun. Kɛ ɔ ´yo sɔ'n, wuun sran'm be ´kpan alɛ kpanlɛ. Alɛ kunlɛ cɛn'n nun'n, aunngban dan kun ´fita kɛ nzue su tɔ nan aunngban dan su fita sa.

Amɔs 1:14 ပူးပေါင်းရင်းမြစ်များ

2 Samiɛl 11:1

Kɛ afuɛ nuan yiali bɔ be ´wlu uflɛ nun'n, kpɛkuun famiɛn'm be alɛ kunlɛ blɛ'n juli, yɛ David man Zoab, ɔ nin sonja'm bé su kpɛn mun, ɔ nin Izraɛl sonja'm be kwlaa be ɔli kɛ be nin Amɔnfuɛ'm be ko kun. Be sacili Amɔnfuɛ'm be mɛn'n. Be kpɛ sin yiali Raba klɔ'n, sanngɛ David kali Zerizalɛm lɔ .

2 Samiɛl 12:26

Zoab nin Amɔnfuɛ'm be klɔ nga be flɛ i Raba'n i su fuɛ'm be kunnin, nan ɔ'a fa akpasua nga famiɛn'n tran lɛ'n.

2 Samiɛl 12:31

Ɔ fali klɔ'n nun sran mun bali Izraɛl. Ɔ fa be wlali plɔtrɔ nun: wie'm be dili waka junman, wie'm be kpacili yɛbuɛ, wie'm be kpɛli waka, wie'm be kpɛli bliki. Amɔnfuɛ'm be klɔ'n kwlaa su ɔ yoli be sɔ. Yɛ ɔ nin i sonja'm be sali bé sin Zerizalɛm-ɔ.

1 Be Nyoliɛ 20:1

Kɛ afuɛ'n nuan yiali bɔ be ´wlu uflɛ nun'n, kpɛkuun famiɛn'm be alɛ kunlɛ blɛ'n juli. Zoab dunnin sonja kpanngban kpa be nyrun mmua, be ɔli kɛ be nin Amɔnfuɛ'm be ´ko kun. Be sacili Amɔnfuɛ'm be mɛn'n. Be kpɛli ngblaliɛ sin yiali Raba klɔ'n, sanngɛ David kali Zerizalɛm lɔ. Zoab nin i sonja'm be kwlali Rabafuɛ mun, nan b'a saci klɔ'n.

Zɔb I Nyrɛnnɛn Wunlɛ 39:25

Kɛ ɔ ti awɛ'n i tɛlɛ'n, wuun ɔ ´kpan sɔ su. Kɛ ɔ o mmua lɔ'n, sɛ n ´kwla se'n, ɔ ti alɛ'n i bɔnlɛ. Ɔ ti alɛ su kpɛnngbɛn'm be kpanlɛ, yɛ ɔ ti alɛ'n nun lɔ nganniɛn'n.

Jue Mun 83:15

Kɛ sin fa di bo'n, yɛ kɛ ɔ fa yra oka'm bé su ninnge mun'n,

Ezai 29:6

Anannganman b'ɔ sie mɛn wunmuan'n ɔ wa nian amun osu. Kɛ ɔ ´ba'n, nyanmiɛn'n ɔ ´kpla, asiɛ'n ɔ ´keje, nganniɛn dan kpa kun ´tɛ, seke'n ´tu, aunngban dan kun ɔ ´fita, yɛ sin dan kun ɔ ´jue vlauun-vlauun.

Ezai 30:30

Anannganman ɔ wa ijɔ, ɔ man be ´ti i nɛn'n b'ɔ yo sro'n. Kɛ ɔ fa ya'n, wafa ng'ɔ fɛ i sa bo sran'n, ɔ ´yi i nglo. Ɔ ´yi i nglo sin dan kun b'ɔ ´jue vlauun-vlauun'n nun, ɔ nin nzue kun b'ɔ ´tɔ, b'ɔ ´yi ɔ fa lika kwlakwla'n i nun, ɔ nin aunngban dan kun b'ɔ ´fita'n nun, yɛ ɔ nin nzraama bɔ kɛ nzue ´tɔ ɔ gua'n i nun.

Ezai 9:5

Afin b'a wu ba kun b'a man ye, b'a fa ba yasua kun b'a man ye. Nyanmiɛn fali sielɛ'n wlɛli i sa nun. Be ´flɛ i kɛ Abonuan, Sa'm be siesiefuɛ, Nyanmiɛn b'ɔ kwla, Siɛ b'ɔ o lɛ titi, Aunjuɛ wlengbi .

Zeremi 23:19

Anannganman ɔ'a fa ya kekle kpa, i ya'n ɔ ti kɛ aunngban dan sa. Aunngban dan sɔ'n ɔ kpɛ sin sa tɛ yofuɛ'm bé ti su.

Zeremi 49:2

I sɔ'n ti Anannganman waan: «Cɛn kun m man alɛ awɛ'n ´tɛ Rabat b'ɔ ti Amɔnfuɛ'm be klɔ dan'n su. Klɔ sɔ'n ´saci mlɔnmlɔn! I asa'n su klɔ mun'n, sin ´di be kwlaa kpan! Kpɛkuun be bɔ be sieli Izraɛl'n, be ´kaci yo i kanga.» Anannganman'n yɛ ɔ kannin-ɔn.

Ezekiɛl 21:20

Ɔ yo man sran'm be lɛ-man anwlɛn kun, ɔ yo man sran kpanngban be keje. Anuan'm be kwlaa be nyrun m'an sie tokofi b'ɔ man wie'n kun lɛ. Tokofi sɔ'n ɔ ti nglannglan kɛ nyanmiɛn b'ɔ kpa sin'n sa. Ɔ su wa kun sran.

Ezekiɛl 21:22

M bɔbɔ n kusu, n ´fin mín sa klun kplo, yɛ n ´fa min ya'n lele n ´guɛ i ti nin i bo. Min Anannganman yɛ n kan sɔ-ɔ.»

Ezekiɛl 21:25

Babilɔni sonja'm be ´fa atin sɔ'n kun su be ´ju Raba b'ɔ ti Amɔnfuɛ'm be klɔ'n su. Yɛ be ´fa kun ekun su be ´ju Zerizalɛm b'ɔ ti Zida klɔ dan bɔ be sili i wun'n su.

Ezekiɛl 25:5

N ´fa Raba lika'n n ´kaci nyɔnngɔnmɛn'm be didiwlɛ, yɛ n ´fa Amɔn lika'n n ´kaci bua'm be didiwlɛ, yɛ amun wa si jrɛiin kɛ min yɛ n ti Anannganman nin-ɔn.

Ezekiɛl 25:7

I sɔ'n ti, amun `nian, n wa yi min kwlalɛ bɔ n kwla'n i nglo. E nin amun e wa nyɛn i. N ´fa amun n wla nvle-nvle'm bé sa nun. Be ´fɛn amun bo ninnge'm be kwlaa. Amun nvle'n ´nunnun mlɔnmlɔn. N ´saci amun, yɛ amun wa si jrɛiin kɛ min yɛ n ti Anannganman nin-ɔn .› »

Daniɛl 11:40

Blɛ'n i awieliɛ lɔ'n, Ezipt famiɛn'n ɔ nin i be ´kun, yɛ Siri famiɛn'n kusu wa fa kakaklolo mun, nin nnɛn kpanngɔ mun, nin mmeli kaka kpa ɔ ´ba kɛ aunngban dan sa. Ɔ ´fa i sonja'm be ´wlu mɛn kaka nun, be ´kpɛ mɛn'm be anyialiɛ mun kɛ nzue bɔ ɔ'a yi dan b'ɔ su sonji'n sa.

Amɔs 2:2

N ´fa sin n ´yi Moab mɛn'n nun. Sin'n ´di sua nglanman nga be o Kɛrizɔt klɔ'n su mun. Be ´kpan alɛ kpanlɛ, be ´bo awɛ. Oyo-oyo sɔ'n nun, Moab mɛn'n ´bo.

Zakari 7:14

N kannin be bo n guɛli i nvle nga be bɔbɔ be si-man nun laa'n be nun. Be mɛn'n tɔli bliin, sran fi kɔ-man lɔ, yɛ sran fi fin-man lɔ ba-man. Be bɔbɔ be yoli man be mɛn sɔ'n bɔ i nun yo-man fɛ ngowa'n, ɔ kali lɛ ngbɛn.»

Mmla'n 3:11

Ɔg b'ɔ ti Bazan famiɛn'n yɛ ɔ ti Rɛfafuɛ'm be kasiɛn b'ɔ kali-ɔ. I li bɔ be sieli i su'n ɔ ti blalɛ. Kɛ e se yɛ'n, ɔ o Raba b'ɔ ti Amɔnfuɛ'm be famiɛn klɔ'n su lɔ. I tɛnndɛn nun'n ti mɛtri nnan, yɛ i tɛtrɛ nun'n ti mɛtri nnyɔn.