Amɔs 1:1 - NYANMIƐN NDƐ'N 1998

¹ Tekoa lɔ nnɛn kankanfuɛ nga be flɛ i kɛ Amɔs i nuan su ndɛ yɛ ɔ o fluwa nga nun-ɔn. Anannganman yili Izraɛl mɛn'n i wun ndɛ'n i nglo kleli i. Kɛ ɔ yili kleli i sɔ'n, i afuɛ nnyɔn b'ɔ ´ju'n yɛ asiɛ'n kejeli-ɔ. Blɛ sɔ nun'n, wuun Ozias yɛ ɔ ti Zida famiɛn nin-ɔn. Zɔas i wa Zeroboam kusu yɛ ɔ ti Izraɛl famiɛn nin-ɔn .

Amɔs 1:1 ပူးပေါင်းရင်းမြစ်များ

2 Samiɛl 14:2

Yɛ ɔ sunmannin sran Tekoa lɔ kɛ ɔ ko fa bla ngwlɛlɛfuɛ kun bla. Kɛ bla'n bali'n, ɔ seli i kɛ: «Yo kɛ ɔ sran ɔ'a wu sa. Wla sɛnvuɛ tralɛ nán kpakpa nyanngo. Yo kɛ bla wie b'ɔ o sɛ nun ɔ'a cɛ sa.

1 Famiɛn Mun 19:19

Yɛ Eli fɛ i lɛ ɔli-ɔ. Ɔ ´ko to Safat i wa Elize-ɔ, ɔ su tu kacɛ. Nannin nnyɔn-nnyɔn fa blu-nin-nnyɔn be wo i nyrun. Ɔ o be fa blu-nin-nnyɔn su'n be wun lɛ. Eli sinnin i wun lɔ, kpɛkuun ɔ fɛli i tralɛ dan'n guɛli i su kɛ ɔ yo nan ɔ'a su i su'n ti.

2 Famiɛn Mun 14:21

Zidafuɛ'm be kwlaa be fali Azaria be sieli famiɛn i si osu. Kɛ ɔ ´yo sɔ'n, wuun ɔ lɛ afuɛ blu-nin-nsiɛn.

2 Famiɛn Mun 14:23

Kɛ Zɔas i wa Amazia yoli Zida famiɛn'n, i afuɛ blu-nin-nnun'n su yɛ Zɔas i wa Zeroboam kusu yoli Izraɛl famiɛn-ɔn. Ɔ yoli famiɛn Samari lɔ afuɛ ablanan-nin-kun.

2 Be Nyoliɛ 11:6

Klɔ sɔ mun yɛ: Bɛtleɛm, Etam, Tekoa,

2 Be Nyoliɛ 20:20

Kɛ i aliɛ cɛnnin'n, nglɛmun ndɛ kpa'n, be jasoli be fali Tekoa aawlɛ flɛnnɛn'n i atin'n. Kɛ be wa kɔ'n, Zozafat jaso jrannin nan ɔ'a kan ndɛ ng'ɔ o yɛ'n ɔ'a kle be. I waan: «Zerizalɛmfuɛ mun nin Zidafuɛ mun, amun `tie ndɛ nga n kan'n! Amun `fa amún wla'n gua Anannganman amun Nyanmiɛn'n su kpa, yɛ ɔ ´man amun fanngan. Amun `fa amun wla'n guɛ i nuan ijɔfuɛ'm be su, yɛ amun wa kwla amun kpɔfuɛ mun.»

Ezipt Lɔ Tulɛ'n 3:1

Moiz kɛnkɛn i sia Zetro b'ɔ ti Madian lɔ sraka yifuɛ'n i bua mun nin i boli mun. Cɛn kun ɔ kankannin nnɛn mun ɔli aawlɛ flɛnnɛn'n i sin lɔ, kpɛkuun ɔ ɔli Nyanmiɛn i oka nga be flɛ i Orɛb'n su lɔ.

Ezai 1:1

Amɔz i wa Ezai i aolia nun like ng'ɔ wunnin i'n, ɔ nin ng'ɔ tili'n, b'ɔ ti Zida nin Zerizalɛm bé wun ndɛ'n. Ɔ wunnin i Ozias, nin Zɔtam, nin Akaz, ɔ nin Ezekias bɔ be ti famiɛn'n bɔ be fin Zida'n be blɛ su.

Zeremi 1:1

Ndɛ nga Zeremi kannin'n yɛ ɔ o yɛ. Bɛnzamɛn nvle'n nun lɔ klɔ nga be flɛ i kɛ Anatɔt'n, lɔ Nyanmiɛn nyrun jranfuɛ'm be nun kun bɔ be flɛ i kɛ Ilkiza'n i wa yɛlɛ Zeremi.

Zeremi 28:8

Kɛ ɔ fin lalafuɛ nun'n, Nyanmiɛn nuan ijɔfuɛ nga be dunnin mmua wɔ nin min e nyrun'n, be kannin alɛ nin nyrɛnnɛn ɔ nin tukpacɛ b'ɔ sa ndɛndɛ ng'ɔ wa ju mɛn dandan nin famiɛn diwlɛ kpakpa'm be su'n.

Zeremi 6:1

«Bɛnzamɛn i osu nunfuɛ mun, an `jaso Zerizalɛm be ko fia. An `bo awɛ Tekoa lɔ. An `sie nzɔliɛ kun Bɛt-Akerɛm lɔ. Nyrɛnnɛn dan kpa kun fin mɛn'n i nglo lɔ su ba.

Zeremi 7:27

«Zeremi, a kan ng'ɔ o lɛ'n kle be-ɔ, be su fa-man bé ti de-man. A flɛ be-ɔ, be su tɛ-man wɔ su.

Ndɛ Nga Nyanmiɛn I Nuan Ijɔfuɛ Oze Kannin'n 1:1

Fluwa nga i nun ndɛ'm be ti Anannganman i ndɛ yɛ ɔ fa wlɛli Beeri i wa Oze nuan kɛ ɔ `kan-an. Kɛ ɔ ´fa wlɛ i nuan sɔ'n, wuun Zɔas i wa Zeroboam yɛ ɔ ti famiɛn Izraɛl mɛn'n su-ɔ. I blɛ kunngba sɔ'n nun yɛ Ozias, nin Zɔtam, nin Akaz, ɔ nin Ezekias be yoli famiɛn Zida lɔ-ɔ.

Amɔs 7:14

Yɛ Amɔs tɛli i su kɛ: «Nyanmiɛn nuan ijɔlɛ'n ti-man min junman. I kusu n nun-man Nyanmiɛn ijɔfuɛ'n be anuansɛ'n wie fi nun. N ti min nnɛn kankanfuɛ, min sikomɔr fie yɛ n di n fa nyan mín nuan nun aliɛ-ɔ.

Mise 1:1

Zida famiɛn mun Zɔtam nin Akaz, ɔ nin Ezekias be blɛ su'n Anannganman fa ndɛ wlali Mise b'ɔ fin Mɔresɛt'n i nuan kɛ ɔ kan . Aolia nun sa ng'ɔ wunnin i Samari klɔ'n nin Zerizalɛm klɔ'm bé wun ndɛ-ɔ:

Zakari 14:5

Kpɛkuun amun ´wanndi be ´sin oka bue nnyɔn sɔ'm be afiɛn kongo'n nun. Kongo sɔ'n fɛ i lele kpɛn Atzɛl. Amun ´wanndi kɛ Zida famiɛn Ozias blɛ su asiɛ b'ɔ kejeli bɔ amun nannan'm be fa wanndili'n sa. Kpɛkuun Anannganman min Nyanmiɛn'n ɔ ´ba, ɔ nin i anz'm be kwlaa yɛ be ´ba-a .

Matthieu 4:18

Kɛ ɔ ´sin Galile fɛtɛ'n nuan lɛ'n, ɔ wunnin Simɔn bɔ be flɛ i kɛ Piɛr'n nin Andre. Be sran nnyɔn'n be ti niaan, kɛ ɔ ´wun be'n, wuun be su gua lala fɛtɛ'n nun, afin be ti jue trafuɛ.

1 Korɛntfuɛ Mun 1:27

Afin like nga sran'm be bu-man be like'n, be yɛ Nyanmiɛn fa gua ngwlɛlɛfuɛ'm bé nyin ase-ɔ. Like nga sran'm be bu i kɛ be kwla fa yo-man like fi'n, be yɛ Nyanmiɛn fa gua keklefuɛ'm bé nyin ase-ɔ.