Akunndanfuɛ'n 9:11 - NYANMIƐN NDƐ'N 1998

¹¹ N wunnin i nyanmiɛn'n bo wa ekun kɛ wanndilɛ i akatua'n ɔ ti-man be nga bé wun kpɛ'n be liɛ titi, kwlalɛ'n kusu ti-man safunyrɛn'm be liɛ titi. Nán cɛn kwlaa yɛ ngwlɛlɛfuɛ'n nyɛn i nuan nun aliɛ di-ɔ. Ngwlɛlɛfuɛ'n yo-man anyanbeunfuɛ cɛn ngba. Nán be nga be si sa'n yɛ be man be kɔmin su cɛn ngba-a. Afin kɛ blɛ'n fa ti bɔ sa'm be fa ju'n, i su like yɛ be wun i-ɔ.

Akunndanfuɛ'n 9:11 ပူးပေါင်းရင်းမြစ်များ

2 Samiɛl 17:14

Absalɔm nin Izraɛlfuɛ'm be kwlaa be waan: «Isai i afɔtuɛ liɛ'n ti kpa tra Asitɔfɛl liɛ'n.» Anannganman bɔbɔ man Asitɔfɛl i afɔtuɛ kpa'n b'a fa-man, afin Anannganman waan ɔ ´fa nyrɛnnɛn yi i Absalɔm su.

2 Samiɛl 17:23

Kɛ Asitɔfɛl wunnin kɛ b'a fɛ-mɛn i ndɛ'n su'n, yɛ ɔ fuli i aflunmun'n su ɔli i klɔ-ɔ. Kɛ ɔ juli lɔ'n, ɔ siesieli i awlo'n, kpɛkuun ɔ boli i kɔmin. Be sieli i i si i asieliɛ'n nun.

2 Be Nyoliɛ 20:15

Zasaziɛl waan: «Wɔ, famiɛn Zozafat, a nin Zidafuɛ'm be kwlaa nin be nga be tran Zerizalɛm'n, amun `sie amun su kpa. Anannganman kan ndɛ kle amun. I wan yoo: ‹Nán srɛ kun amun yɛ nán amun sro sonja kpanngban nga mun. Afin nán amun yɛ amun nin be ´kun-ɔn, m bɔbɔ min Nyanmiɛn yɛ min nin be e ´kun-ɔn.

Zɔb I Nyrɛnnɛn Wunlɛ 34:29

?I kusu, sɛ Nyanmiɛn waan ɔ yo-man like fi'n, wan yɛ ɔ kwla bu i fɔ-ɔ? ?Sɛ i waan ɔ su fia'n, wan yɛ ɔ kwla wun i-ɔ? Ɔ nian nvle wunmuan nin klɔ sran'm be su.

Jue Mun 76:5

Nyanmiɛn, kɛ a fin oka nga be ti adudua'n be su lɔ ´ba'n, a yo nyɛnmɛn o, a yo sro o.

Nyanndra Mun 1:5

Sɛ bɔ akunndanfuɛ'n bɔbɔ sie i su ti'n, ɔ ´si sa uflɛ uka laa liɛ'n su. Sɛ sran nga be ti ngwlɛlɛfuɛ'n be ti'n, be ´wun wafa ng'ɔ fata kɛ be nanti'n.

Akunndanfuɛ'n 2:12

Kɛ ɔ yoli sɔ'n, nan m'an bu ngwlɛlɛ'n i akunndan m'an gua, nan m'an bu sinnzin'n kusu i akunndan m'an gua. Yɛ n usali mín wun kɛ: «?Famiɛn ng'ɔ wa tran min osu'n, nzu yɛ ɔ ´yo bɔ m'an yo-man-an?»

Akunndanfuɛ'n 3:14

N wunnin i wlɛ ekun kɛ Nyanmiɛn i sa ti like liɛ ng'ɔ yo'n, ɔ lɛ-man awieliɛ, ɔ ti anannganman. Be kwla uka-man su, be kwla kpɛ-man su. Sa ti bɔ Nyanmiɛn yo sɔ'n yɛlɛ kɛ ɔ klo kɛ sran'm bé nyin yi i .

Akunndanfuɛ'n 3:17

N seli min klun lɔ kɛ: «Nyanmiɛn wa di sran kpa nin sran tɛ'm be jɔlɛ. Afin like kwlaa lɛ blɛ. E nyoliɛ'm be ti Nyanmiɛn wa di e jɔlɛ.»

Akunndanfuɛ'n 4:1

Nyrɛnnɛn nga sran'm be kle be wiengu mun nyanmiɛn'n bo wa'n, m buli i akunndan. Be nga be wun nyrɛnnɛn'n, kannzɛ be ´kpan sɛ, be nyan-man sran b'ɔ ´fɔnvɔ be-ɔ. Afin be nga be kle sran'm be nyrɛnnɛn'n yɛ kwlalɛ'n wo bé sa nun-ɔn. Nyrɛnnɛn wunfuɛ'm be nyan-man sran b'ɔ ´fɔnvɔ be-ɔ.

Akunndanfuɛ'n 4:4

N wunnin ekun kɛ sran'm bé klo kɛ be ´yo kɛ be wiengu'm bé sa, i ti yɛlɛ bé wun ase nga be wla be di junman lɛ'n. Sa sɔ'n tra sran i akunndan'n su, yɛ i kwlaa ti afɛ ngbɛn. Ɔ ti kɛ sran kun waan ɔ ´fuan aunngban'n nan ɔ ´ko trɛ i sa.

Akunndanfuɛ'n 7:13

Nian Nyanmiɛn i sa nuan ninnge mun. ?Wan yɛ sɛ Nyanmiɛn bli like kun'n ɔ kwla tinngɛ nun-ɔn?

Akunndanfuɛ'n 9:2

Sa nga be ju sran'm be kwlakwla bé su'n, i kwlaa ti kunngba. Sran kpa'n i agualiɛ'n nin sran tɛ'n i agualiɛ'n be ti kunngba. Sa ng'ɔ ju sran kpa nin sran ng'ɔ ti saun Nyanmiɛn nyrun bé su'n, i sɔ sa kunngba'n ju sa tɛ yofuɛ'n su. Sran ng'ɔ yi sraka o, sran ng'ɔ yi-man sraka o, klun-ufuefuɛ o, klunwifuɛ o, sran ng'ɔ ta Nyanmiɛn nda o, sran nga be sro nda talɛ o, be awieliɛ'n ɔ ti kunngba.

Akunndanfuɛ'n 9:3

Nyanmiɛn'n i bo wa'n, ninnge'm be nun tɛ kpa kun yɛ ɔ o yɛ. Sran'm be kwlaa be agualiɛ'n ɔ ti kunngba, ɔ man kɛ sran'm be ´yo sa tɛ'n bɔ ngunmin sa, yɛ sinnzin akunndan'n yɛ ɔ o be anwlɛn'n nun sa tititi-ɔ, kpɛkuun b'a fa wu, wuun b'a ko to be nga be dun mmua wuli'n be lɔ.

Zeremi 46:6

Sran nga i wun kpɛ kpa'n bɔbɔ ɔ su kwla nyɛn-mɛn i ti. Safunyrɛn'n bɔbɔ su kwla wanndi-man. Nglo lɔ lika'n nun Efrat nuan lɔ'n, be lɛ-man jranwlɛ kun, b'a tɔ.

Zeremi 48:14

«?Ɔ ju sɛ yɛ man amun ko se kɛ yoo: ‹E ti safunyrɛn, e si alɛ kun nin-ɔn?›

Zeremi 9:23

Sanngɛ sran ng'ɔ lɛ ngwlɛlɛ b'ɔ fa si min'n, bɔ si kɛ min yɛ n ti Anannganman nan n ti klun-ufuefuɛ'n, nan n yo sa i nuan su, n di nanwlɛ'n, i sɔfuɛ'n yɛ ɔ kwla di i nuan-an .» Anannganman'n yɛ ɔ kan sɔ-ɔ.

Zakari 4:6

Nan ɔ'a yiyi nun ɔ'a kle min. Yɛ ɔ seli min kɛ yoo: «Ndɛ nga Anannganman'n kan kle Zorobabɛl'n yɛ. I waan: ‹Nán kɛ ɔ wue kekle'n ti-ɔ, yɛ nan kɛ ɔ wunmiɛn dan'n ti, yɛ a kwla di junman nin-ɔn, sanngɛ min Wawɛ'n ti yɛ man a kwla di-ɔ.

Malasi 3:18

Kpɛkuun amun ´wun ngbaciɛ ng'ɔ o sran kpa nin sran ng'ɔ bu-man Nyanmiɛn nin i nuan ndɛ'n be like fi'n be afiɛn'n, ɔ nin ngbaciɛ ng'ɔ o sran ng'ɔ su Nyanmiɛn nin sran ng'ɔ su-man Nyanmiɛn'n be afiɛn'n.»

Efɛzfuɛ Mun 1:11

Like kwlaa nga Nyanmiɛn klo kɛ ɔ yo'n, ɔ yo, ɔ man kɛ e nin Krist e kacili sran wunmuan'n ɔ fa e kacili i liɛ, afin i bɔbɔ yɛ ɔ sieli i sɔ-ɔ.

Mmla'n 8:17

Nán amun si amun wue nun se kɛ: «E bɔbɔ e wunmiɛn nin é sa kekle yɛ man e kwla nyannin e wun-ɔn.»

Mmla'n 8:18

Nán amún wla fi Anannganman amun Nyanmiɛn'n, afin i kunngba cɛ yɛ ɔ kwla man amun wunmiɛn kɛ amun `fa di junman nan amun `nyan like-ɔ. I waan ɔ ´yo i sɔ nan aenguɛ nga ɔ nin amun nannan mun be trali'n ɔ'a taka kɛ ɔ fa taka ndɛ yɛ'n sa.

1 Samiɛl 17:50

Kɛ David fa kwlali Goliat yɛ kɛ ɔ kunnin i kɛ nga sa. Ɔ ´kun i'n, ɔ'a fa-man tokofi. Kpafloko nin yɛbuɛ kun yɛ ɔ fa kunnin i-ɔ.

1 Samiɛl 6:9

Sɛ amun ´nian nan ɔ fa Izraɛl atin'n ɔ kɔ Bɛt-Semɛs ndɛnman'n, wuun Izraɛl Nyanmiɛn'n yɛ ɔ yoli e sa yaya sɔ nin-ɔn. Sɛ ɔ'a yo-man sɔ'n, wuun nɛ́n i yɛ ɔ yoli ye-ɔ. Wuun sa sɔ'n juli sɔ ngbɛn.»