Abakik 2:3 - NYANMIƐN NDƐ'N 1998

³ Ndɛ nga n ´kan be n ´kle wɔ yɛ'n, be yolɛ blɛ nian ju-man. Kannzɛ ɔ cɛ lele-ɔ ɔ ´cɛ ngbɛn, san i blɛ sɔ'n ´ju le. Man i li cɛ bɔ lele, sanngɛ fa wɔ wla gua su. I kwlaa b'ɔ yoli o, san i sɔ sa liɛ'n ɔ ´tɔ, ɔ su sɛn-mɛn i wun .

Abakik 2:3 ပူးပေါင်းရင်းမြစ်များ

2 Famiɛn Mun 6:33

Elize nuan'n ɔ'a tɔ-man, be ´nian-an, sunmanfuɛ'n yɛ ɔ'a ba yɛ, kpɛkuun sunmanfuɛ sɔ'n waan: «Anannganman bɔbɔ yɛ ɔ man nyrɛnnɛn nga tɔ é su-ɔ. ?Ɔ man nguɛ like uflɛ yɛ n ´usɛ i kɛ ɔ yo man min-ɔn?»

Jue Mun 102:13

Sanngɛ Anannganman, ɔ liɛ'n a ti famiɛn tititi. Bé wla fi ɔ su-ɔ ɔ yo-man ye.

Jue Mun 27:14

Fa ɔ́ wla'n gua Anannganman su. Jran kekle, yɛ tra wɔ anwlɛn. Fa ɔ́ wla'n gua Anannganman su.

Ezipt Lɔ Tulɛ'n 12:41

Kɛ afuɛ ya nnan afuɛ ablasan'n wieli'n, cɛn kasiɛn'n su sɛsɛ'n, Anannganman i sran'm be tuli Ezipt lɔ. Be ´kɔ'n, be lɔngɔ su sɛsɛsɛ kɛ sonja mun sa.

Ezai 30:18

I sɔ'n ti, Anannganman'n sunnzun kɛ ɔ ´yo amun ye, i waan ɔ ´si amun aunnvuɛ. Afin Anannganman ti Nyanmiɛn kun b'ɔ yo sa i nuan su. Be kwlaa bɔ be fa bé wla guɛ i su'n, be liɛ su ti ye .

Ezai 7:4

Se i kɛ: ‹Nán srɛ kun wɔ, tran diin, nán ɔ́ wla bo ɔ́ wun Rɛzɛn b'ɔ ti Sirifuɛ'n nin Rɛmalia i wa'n be ya bɔ b'a fa'n ti. Be ti kɛ yiendre nnyɔn yɛ be su kpunngbun sa.

Ezai 8:17

N su minndɛ Anannganman. Blɛ nga nun liɛ'n, ɔ'a kaci i sin ɔ'a si Zakɔb i osu'n nunfuɛ mun. N fa mín wla guɛ i su kpa.

Zeremi 27:7

Nvle'm be kwlaa be ´su i nin i wa'n, ɔ nin i anunman'n. Be ´su be lele san nvle nga b'a tin'n nin famiɛn dandan mun be ´fa be mɛn liɛ'n kusu.

Ezekiɛl 12:25

Afin m bɔbɔ min Anannganman'n yɛ n kan-an, yɛ nga n kan'n, i nuan ´yia icra'n. Ɛɛn, amun bɔ amún nyin su ti kekle'n, amún nyin kekle sɔ'n i su sa yɛ ɔ ´ju-ɔ. Ndɛ kun nga n ko kan'n, n ´yo i nuan sa'n. Min Anannganman'n yɛ n kan sɔ-ɔ.› »

Ezekiɛl 30:9

Cɛn nga n wa nunnun Eziptfuɛ mun, min sran nga n ´sunman be'n, be ´fu mmeli'm be nun be kɔ Etiopifuɛ'm be wun lɔ be ko yo man be nin be alaje b'ɔ be di'n, be ´usu yɛ afɛ ´tɔ be su Ezipt i cɛn sɔ nun. Afin nian, cɛn sɔ'n wo balɛ!›

Daniɛl 10:14

M bali kɛ n wa fa like ng'ɔ wa ju ɔ nvle'n su blɛ ng'ɔ ´ba lɔ'n nun'n n kle wɔ. Afin a wa wun aolia nun like uflɛ b'ɔ ti blɛ sɔ'n nun lɔ ndɛ.›

Daniɛl 11:27

Famiɛn nnyɔn'm be ´kunndɛ kɛ be ´yo be wiengu tɛ. Blɛ bɔ be wo aliɛ'n sin'n, ato ngunmin yɛ be ´bua kle be wiengu-ɔ. Sanngɛ sa fi su ju-man. Afin kɛ ɔ ´yo sɔ'n, wuun blɛ kasiɛn'n nian ju-man ka.

Daniɛl 11:35

Be ´kun ngwlɛlɛfuɛ'm be nun sran kpanngban. Be wulɛ'n ɔ ´yo nvle nunfuɛ'm be saun, ɔ ´yo be jrɛiin, yɛ ɔ ´yo be weiin, lele awieliɛ'n ´fa ju. Afin kɛ ɔ ´yo sɔ'n, wuun awieliɛ'n nian ju-man.

Daniɛl 8:17

Gabriɛl bali lika nga n wo nun'n i wun koko lɛ. Kɛ ɔ mantannin min'n, srɛ dan kpa kunnin min, yɛ n utuli mín nyin ase-ɔ. Ɔ seli min kɛ: ‹Wɔ, klɔ sran, si kɛ like nga a wunnin i lɛ'n, ɔ ti mɛn'n i awieliɛ'n i wun ndɛ.›

Daniɛl 8:19

I sin ɔ seli min kɛ: ‹B'a sie blɛ kun bɔ Nyanmiɛn i ya'n ɔ wa jɔ, bɔ mɛn'n ɔ wa wie-ɔ. I sɔ blɛ'n i nun'n, sa nga be wa ju'n mun yɛ n wa tike be su n ´kle wɔ lɛ-ɔ.

Daniɛl 9:24

Be mannin ɔ nvle'n nunfuɛ'm be nin klɔ b'ɔ ti Nyanmiɛn liɛ'n i sufuɛ'm be afuɛ ableso sɔ nso kɛ be `fa yaci nyin kekle'n nin sa tɛ'n yolɛ. Blɛ sɔ'n ti cinnjin kɛ ɔ ´yo nan b'a yaci bé sa tɛ mun b'a cɛ be, nan b'a yo sa mun i nuan su, nan sa nga be wun be aolia nun'n be nuan ɔ'a yia, nan Nyanmiɛn i nuan ndɛ bɔ be kannin'n ɔ'a kpɛn su, nan b'a fa Nyanmiɛn i lika kpa tra su'n b'a wlɛ i sa nun'n ti.

Mise 7:7

Min liɛ'n, Anannganman nyrun yɛ min nyin ta-a. Nyanmiɛn b'ɔ de min'n i su yɛ n lafi-ɔ. Min Nyanmiɛn'n ɔ ´ti min aniɛn.

Sofoni 3:8

I sɔ'n ti min waan: «An `tran lɛ be minndɛ min man n kan sa tɛ nga an yoli mun n kle amun afin m'an gugu kɛ n ´yiayia nvle-nvlefuɛ mun nin famiɛn'm be mɛn'n be nunfuɛ mun nan ya dan nga n fali'n, n ´yo i nuan like m ´man be. Min ya dan ng'ɔ jue kɛ sin sa'n, ɔ ´di asiɛ wunmuan'n.»

Kalɛ 23:19

Nán klɔ sran yɛlɛ Nyanmiɛn nan ɔ'a bua ato. Nán bla yɛ ɔ wuli i nan ɔ'a kaci aniɛn. ?Ndɛ ng'ɔ kan'n, ɔ su yo-mɛn i nuan sa? ?Like nga i waan ɔ ´yo'n, ɔ su yo-man?

JÉSUS-CHRIST I DYASIN FE'N BO LUC KLELI'N 2:25

Kɛ ɔ ´yo sɔ'n, wuun bian kun o Zerizalɛm, be flɛ i kɛ Simeɔn. Bian sɔ'n ti sran nanwlɛfuɛ, ɔ sro Nyanmiɛn kpa. Ɔ minndɛ Izraɛl i wla cicilɛ'n, yɛ Nyanmiɛn Wawɛ'n yɛ ɔ sie i-ɔ.

Sa nga bé yôli'n 1:7

Ɔ seli be kɛ: «Cɛn sɔ'n nin blɛ sɔ'n bɔ e Si bɔbɔ sieli'n, ɔ ti-man amun ndɛ su.

Sa nga bé yôli'n 17:26

Sran ng'ɔ yili be'n be kwlaa be osu'n ti kun. Ɔ yili be kɛ be tran asiɛ'n su, ɔ sieli be afuɛ nga be di'n i nuan, yɛ ɔ jali nvle kun nin kun be awɛ.

Galasifuɛ Mun 4:2

Kɛ ɔ tɛ yo bakan sɔ'n, ɔ o sran wie'm bé sa nun, be niɛn i su, yɛ wie'm be kusu be niɛn i ninnge'm be su lele san blɛ nga i si sieli'n ɔ'a ju.

2 Piɛr 2:3

Bé nyin b'ɔ blo ninnge'm bé su'n ti, be ´kpɛ bé ti nun kan ndɛ mun, yɛ be ´fa amun kunndɛ be sika su. Be buli be fɔ ɔ'a cɛ, san be ´mlin.

2 Piɛr 3:9

Like nga e Min'n se kɛ ɔ ´yo, ɔ cuɛn-cuɛn-mɛn i ase kɛ sran'm be bu i'n sa. Sanngɛ ɔ trɛ i anwlɛn amun wun, ɔ klo-man kɛ sran kun sa mlin, ɔ klo kɛ sran'm be kwlaa be kaci be nzuɛn'n.