2 Timote 1:13 - NYANMIƐN NDƐ'N 1998

¹³ Fa ndɛ nanwlɛ nga n kan kleli wɔ'n su, nian su yo, afin sran wunmuan bɔ e nin Krist-Jésus ti'n ti e lafi Nyanmiɛn su, yɛ e klo Nyanmiɛn nin sran.

Nyanmien nde Ufle

¹³ Fa nde nanwle nga n kan kléé wo'n su nian su yô, afin swran wunmuan bo é nin Christ-Jésus ti'n ti é lafi Nyanmien su, é klô Nyanmien nin swran.

2 Timote 1:13 ပူးပေါင်းရင်းမြစ်များ

Nyanndra Mun 23:23

Sɔnnzɔn nanwlɛ dilɛ'n, sɔnnzɔn akunndan bulɛ'n, kunndɛ sa silɛ'n, yo sa cɛcɛ yofuɛ, i sɔ ninnge kpakpa liɛ mun'n, kɛ bé ti ko sin ko yia wɔ'n, nán ɔ́ nyin kpa wie fi su.

Nyanndra Mun 3:18

Be nga be nyɛn i'n, ɔ man be nguan.

Nyanndra Mun 3:21

Mín wa, nán ndɛ nga'm be fi ɔ́ nyin. Man akunndan nin ngwlɛlɛ ndɛ nga'm be ka ɔ klun.

Nyanndra Mun 4:13

Like nga be kle wɔ'n, tra nun kpa, nán yaci nun. Fa sie, afin i yɛ ɔ ti ɔ nguan nyanman nin-ɔn.

Nyanndra Mun 8:14

Ndɛkɛn akunndan liɛ'n ɔ nin cɛn wie liɛ'n, min yɛ m man-an. Ngwlɛlɛ'n yɛlɛ min, wunmiɛn sa'n ɔ ti min liɛ.

Rɔmfuɛ Mun 2:20

an si ngwlɛlɛ nin sa b'ɔ ti nanwlɛ'n i kwlaa amun mmla'n ti. I sɔ'n ti an bu amun wun sinnglinfuɛ'm be fɔ tufuɛ, nin be bɔ be ti kɛ ba kanngan mun sa'n be ngwlɛlɛ klefuɛ.

Rɔmfuɛ Mun 6:17

N ´yo Nyanmiɛn i kwla o, afin laa'n, sa tɛ'n ti amun nzuɛn, sanngɛ siɛn'n, amu'an fa ndɛ nanwlɛ nga be kleli amun'n su kpa.

Filipfuɛ Mun 1:27

Sa'n kwlaa nun'n, an `yo sa ng'ɔ nin Krist jasin fɛ'n ti kun'n nan sɛ m ba amún wun wunlɛ o, sɛ m ba-man o, m'an ti amun ngan kɛ amun kwlaa amún bo ti kun kpa amun jran kekle, yɛ amun akunndan'n ti kun, yɛ an mian amún nyin jasin fɛ'n bɔ an lafi su'n ti.

Filipfuɛ Mun 4:9

Like nga n kleli amun bɔ an tili an fa su'n, nin like nga an wun kɛ n yo'n, an `nian su yo, yɛ Nyanmiɛn b'ɔ man é wun jɔ ye'n, ɔ nin amun ´tran.

Kolɔsfuɛ Mun 1:4

afin e tili Krist-Jésus su bɔ an lafi'n, nin klolɛ nga an fa klo Nyanmiɛn sran'm be kwlaa'n i ndɛ bɔ be kan'n.

1 Tɛsalonikfuɛ Mun 5:21

sanngɛ an `bu i kwlaa i akunndan nian, an `fa ng'ɔ ti kpa'n,

1 Timote 1:10

nin bla nin bian kunndɛfuɛ mun, nin yasua nga be kunndɛ be wiengu yasua'n, nin be nga be tra sran ndɔlɛ'n, nin atofuɛ mun, nin be nga be tɔn sran suɛn'n, ɔ nin be kwlaa nga be yo sa nga b'ɔ nin sa nga be kle be kɛ be yo'n ɔ ti-man kun'n.

1 Timote 1:14

Ye nga e Min'n yoli min'n i nyin fiteli dan, ɔ man kɛ e nin Krist-Jésus e kacili sran wunmuan'n, e lafi i su, yɛ e klo i nin sran mun.

1 Timote 6:3

Sɛ sran wie kle like uflɛ'n, b'ɔ fa-man e Min Jésus-Krist i ndɛ nanwlɛ'n ɔ nin Nyanmiɛn i sulɛ wafa nga ɔ kleli ye kɛ e su i'n su'n,

2 Timote 1:1

M Pɔl bɔ Nyanmiɛn man Krist-Jésus sunmannin min'n, n ´klɛ fluwa nga blɛ wɔ Timote bɔ a ti min anwlɛn su ba'n. Krist-Jésus sunmannin min kɛ n kan nguan nga Nyanmiɛn waan ɔ ´fa man be nga be nin Krist b'a kaci sran wunmuan'n i ndɛ. Man e Si Nyanmiɛn nin e Min Krist-Jésus be man a nyan ye, man be si wɔ aunnvuɛ, yɛ man ɔ́ wun jɔ wɔ fɔuun!

2 Timote 1:14

Like kpa nga be fa wlali ɔ́ sa nun'n, Nyanmiɛn Wawɛ b'ɔ tran ye anwlɛn nun'n, i fanngan nun nian su kpa.

2 Timote 2:2

Ndɛ nga a tili i kɛ n kɛnnin i sran kpanngban be nyrun'n, kan ndɛ sɔ'n, fa yaci i be nga a lafi bé su bɔ be kusu be kwla kan kle sran uflɛ'n, bé sa nun.

2 Timote 3:14

Sanngɛ ɔ liɛ'n, like nga be kleli wɔ bɔ a lafi su'n, nian su kpa. A si sran nga be kleli wɔ like sɔ'n.

2 Timote 4:3

Afin cɛn wie lele'n, sran'm be su fa-man ndɛ nanwlɛ'n su kun, be ´yo sa ng'ɔ yo be bɔbɔ be fɛ'n, yɛ be ´kunndɛ sran kpanngban kpa kɛ be `kle be like ng'ɔ yo be fɛ'n.

Tite 1:9

Man ɔ yo sran b'ɔ lafi ndɛ nanwlɛ nga be kleli i'n su kpa nan ndɛ nanwlɛ b'ɔ kle'n ti, ɔ kwla tu sran'm be fɔ, yɛ ɔ kle be nga be kpalo i ndɛ'n kɛ be si kɛ b'a fɔn .

Tite 2:1

Sanngɛ ɔ liɛ'n, nian ndɛ nanwlɛ nga be kleli wɔ'n su kle.

Tite 2:8

Kan ndɛ ng'ɔ ti kpa'n nan sran fi a se-man kɛ ndɛ nga a kan'n ti tɛ, nan ɔ kpɔfuɛ'm bé nyin gua ase, afin be su wun-man é wun ndɛ fi kan-man.

Hébreu 10:23

Man e tra like nga e kɛn i ndɛ kɛ é wla o su'n i kekle, nán man é sa'n kpɔ, afin Nyanmiɛn b'ɔ se kɛ ɔ ´yo man ye'n, ɔ ti nanwlɛfuɛ.

Hébreu 3:6

Krist kusu, kɛ ɔ ti i Wa'n, ɔ niɛn i bɔbɔ Nyanmiɛn i awlo'n su kpa sɔ. Sɛ e tra ye anwlɛn e jran kekle e lafi like nga é wla o su kɛ e ´nyɛn i'n su kpa'n, e ti i awlo.

Hébreu 4:14

E lɛ Nyanmiɛn nyrun jranfuɛ'm be su kpɛn kpa kun, ɔ ɔli lele juli Nyanmiɛn bɔbɔ nyrun lɔ: yɛlɛ Jésus Nyanmiɛn Wa'n. I sɔ'n ti'n, like nga e lafi su'n, man e lafi su kpa.

Jude 1:3

N sran kpa mun, kɛ n waan n ´klɛ ti nyanlɛ bɔ e nin amun e nyɛnnin i'n i ndɛ blɛ amun'n, n wunnin kɛ sɛ n klɛ amun fluwa nan n wla amun fanngan kɛ an jran Krist sulafilɛ ndɛ'n su'n, ɔ ti kpa. Nyanmiɛn man be kan ndɛ sɔ'n kleli i sran mun kpɛ kunngba cɛ.

Sa nglô yile 2:25

Sanngɛ like ng'ɔ o amún sa nun'n, an `trɛ i kekle lele man ɔ fa ju m balɛ.

Sa nglô yile 3:11

M ´ba icra'n. Like ng'ɔ o amún sa nun'n, an `trɛ i kekle nan sran wie a fa-man like nga n ´fa yo amun mo'n.

Sa nglô yile 3:3

I sɔ'n ti, ndɛ nga be kan kleli amun bɔ an fa su'n, an bu i akunndan, an `fa su, yɛ an `kaci amun nzuɛn'n. Sɛ amu'an tinnge-man'n, n wa fu amun nun kɛ awiefuɛ sa, an su si-man dɔ nga m ´ba'n .