1 Timote 1:9 - NYANMIƐN NDƐ'N 1998

⁹ Afin e si kɛ nán be nga be ti sran kpa'n be ti yɛ be sieli mmla nin-ɔn. Sanngɛ be sie mannin be nga be ti-man kpa'n, nin nyin keklefuɛ mun, nin be bɔ be sro-man Nyanmiɛn'n, nin sa tɛ yofuɛ mun, nin be bɔ bé nyin yi-man Nyanmiɛn bɔ be bu i ninnge'm be finfin'n, nin be bɔ be kun be si nin be nin'n, nin sran kunfuɛ mun,

Nyanmien nde Ufle

⁹ Afin é si ke, nanh bé nga bé ti swran kpa'n bé ti ye bé siéé mmla nion. Sannge bé sié maan bé nga bé ti'a kpa'n, nin nyin kékléfue, nin bé bo bé srô'a Nyanmien'n, nin sa te yôfue, nin bé bo bé nyin yi'a Nyanmien bo bé bu i ninngé'm bé finfin'n, nin bé bo bé kun bé si nin bé nin'n, nin swran kunfue,

1 Timote 1:9 ပူးပေါင်းရင်းမြစ်များ

2 Samiɛl 16:11

David kan kleli Abisai nin i mantanfuɛ'm be kɛ: «Kɛ m bɔbɔ n klun ba'n kunndɛ kɛ ɔ ´kun min'n, yɛ a ´se kɛ Bɛnzamɛnfuɛ. Amun `yaci i nun man ɔ bo min sannzan. Anannganman yɛ ɔ mɛnnin i i wun atin-ɔn.

2 Famiɛn Mun 19:37

Le kun'n, ɔ koto i amuɛn bɔ be flɛ i kɛ Nisrɔk'n i sua'n nun lɔ, kpɛkuun i wa Adramelɛk nin Sarɛzɛr be ko kunnin i nin tokofi, nan b'a wanndi b'a ɔ Ararat mɛn'n nun lɔ. I wa Ezar-Adɔn yoli famiɛn, ɔ sinnin i osu.

2 Be Nyoliɛ 32:21

Anannganman sunmɛnnin i anz kun Asiri famiɛn'n i ngblaliɛ'n nun lɔ. Ɔ ko kunnin sonja nga be ti safunyrɛn'm be kwlaa nin sonja'm be nun kaklaakla'm be ngba, ɔ nin kpɛnngbɛn mun. Asiri famiɛn'n fɛli i sɔ nyannzuɛn'n sɛli i sin i mɛn'n nun. Yɛ cɛn kun b'ɔ ɔli i amuɛn sua'n nun lɔ'n, i bɔbɔ i klun ba'm be ko kunnin i .

Ezipt Lɔ Tulɛ'n 20:13

Nán kun sran .

Ezipt Lɔ Tulɛ'n 21:14

Sanngɛ sɛ sran kun i nyinfu kun sran abɔlɛ su'n, sɛ ɔ ko fia min sɔwlɛ'n wun lɔ bɔbɔ o, amun `trɛ i nan amun `ko kun i.

Nyanndra Mun 20:20

Sran kun ng'ɔ bo i si nin i nin be sannzan'n, i bɔbɔ'n ɔ wa wun kɛ ɔ su wu blɛblɛblɛ kɛ kannin wie b'ɔ su nuan aosin nun'n sa.

Nyanndra Mun 28:17

Sran ng'ɔ kun sran b'ɔ lɛ i wun-ɔn, ɔ lafi-man b'ɔ kunndɛ kɛ ɔ ´kun i wun wie ndɛndɛ'n, sɛ ɔ ´kɔ i wun kunlɛ'n, be `yaci i nun, nán be trɛ i.

Nyanndra Mun 28:24

Sran kun nga bɔ ɔ wua i si nin i nin b'ɔ se kɛ: «N kpa'n, nguɛ sa tɛ yɛ n yoli'n,» i sɔ sran'n nin kodiawiefuɛ'n be ti kun.

Nyanndra Mun 30:11

Sran wie o lɛ'n, sannzan yɛ ɔ bo i si-ɔ, i nin i wun ndɛ tɛtɛ'n yɛ ɔ kan-an.

Nyanndra Mun 30:17

Sran nga b'ɔ sri i si'n, bɔ i nyin yi-mɛn i nin'n, kuankuan'm be ´fiti i nyinma'n, kpɛkuun anunman nyin'n i mma'm be ´di i.

Zeremi 23:11

Anannganman'n wan yoo: ‹Min nuan ijɔfuɛ mun nin min nyrun jranfuɛ'm be kwlaa b'a saci. Be yo sa tɛ'n lele be fa wlu mín sua'n nun.

Ezekiɛl 21:25

Babilɔni sonja'm be ´fa atin sɔ'n kun su be ´ju Raba b'ɔ ti Amɔnfuɛ'm be klɔ'n su. Yɛ be ´fa kun ekun su be ´ju Zerizalɛm b'ɔ ti Zida klɔ dan bɔ be sili i wun'n su.

Saun Yolɛ 20:9

Sɛ sran kun bo i si nin i nin be sannzan'n, ɔ fata kɛ be kun i. I bɔbɔ yɛ ɔ kunnin i wun-ɔn, afin ɔ wuali i si nin i nin be amuɛn.

Matthieu 10:21

Sran bɔ be ti niaan'n, kun ɔ wa fɛ i niaan bian wlɛ sran'm bé sa nun kɛ be `kun i, yɛ sran wie'm be wa yo be mma'm be sɔ wie, ba'm be ´jao be si nin be nin'm be wun kɛ be ´kun be.

Rɔmfuɛ Mun 1:30

be kan sran wun ndɛ, be kpɔ Nyanmiɛn, be kpɛ nzowa, be tu bé wun, be di bé nuan, be kpɛ sa tɛtɛ uflɛ'm be ba, bé nyin yi-man bé si nin be nin mun,

Rɔmfuɛ Mun 4:13

Nyanmiɛn seli Abraam kɛ mɛn'n ɔ ´yo i nin osu nunfuɛ'm be liɛ. Nán mmla'n b'ɔ fa su'n ti yɛ ɔ seli i sɔ-ɔ, sanngɛ i bɔbɔ Nyanmiɛn i su b'ɔ lafi b'ɔ i kusu bu i sran kpa'n ti yɛ ɔ seli i sɔ-ɔ .

Rɔmfuɛ Mun 5:20

Kɛ ɔ ´yo nan sa tɛtɛ'n ɔ'a sɔn'n, i ti yɛ mmla'n ɔ'a kpɛn afiɛn lɛ-ɔ, sanngɛ lika nga be yo sa tɛtɛ kpanngban lɛ'n, lɛ yɛ Nyanmiɛn i aklunye'n i nyin fite dan-an.

Rɔmfuɛ Mun 6:14

An su fa-man amún wun man-man sa tɛ yolɛ'n, afin Nyanmiɛn jran-man mmla'n su yɛ ɔ sie amun kun-ɔn, sanngɛ ɔ yo amun ye titi.

Galasifuɛ Mun 3:19

?Sɛ ɔ ti sɔ'n, mmla'n yo i liɛ nzu? Nyanmiɛn sieli i kusu nan be wun kɛ sa tɛ'n ti tɛ, yɛ be dili su lele fa juli Abraam osufuɛ nga ti yɛ Nyanmiɛn seli kɛ ɔ ´yo like wie mɛn i'n i balɛ. Anz mun yɛ be fa wlali sran kun b'ɔ jran sran'm bé nuan'n i sa nun yɛ ɔ fa bali-ɔ.

Galasifuɛ Mun 5:18

Sɛ an fa atin nga Nyanmiɛn Wawɛ'n kle amun su'n, Nyanmiɛn jran-man mmla'n su yɛ ɔ ´sie amun-ɔn.

Galasifuɛ Mun 5:21

be lɛ konvi, be nɔn nzan bo, be yo sa finfin mun, yɛ be yo i sin sa wie mun ekun. Ndɛ kunngba nga n kan kleli amun laa'n, n ´kan kle amun ekun. Be nga be yo i sɔ sa'n, be su tran-man be nga Nyanmiɛn sie be'n be nun mlɔnmlɔn.

Galasifuɛ Mun 5:23

be yo wɛtɛɛ, yɛ be yo sa i nuan su. B'a sie-man ninnge sɔ'm be su mmla fi.

Mmla'n 27:16

«Sran ng'ɔ bu-mɛn i si nin i nin be sran'n, nán man ɔ wun ye le.» Kpɛkuun man Izraɛlfuɛ'm be kwlaa be tɛ su kɛ: «Man ɔ yo sɔ!»

2 Tɛsalonikfuɛ Mun 2:8

Kɛ ɔ ko yo sɔ'n, bian b'ɔ di-man mmla'n su'n ɔ wa yi i wun nglo, yɛ kɛ e Min Jésus ´ba bɔ i nyrun ti nyannyan'n, ɔ ´fitɛ i fuu, ɔ ´kun i ɔ ´nunkun i .

1 Timote 4:7

Sanngɛ nán fa ndɛ b'ɔ ti-man Nyanmiɛn liɛ b'ɔ ti kɛ bla oke ndɛ sa'm bé su. Mian ɔ́ nyin mantan Nyanmiɛn kpa.

1 Timote 6:20

Timote, n sran kpa, fa sa nga be kan kleli wɔ'n su kpa. Ndɛ ngbɛn-ngbɛn b'ɔ nin Nyanmiɛn ndɛ'n ti-man kun'n, nin akplowa nga be bɔ be bu bé wun kɛ be si sa'n be si'n, nán sie ɔ su bé su.

2 Timote 2:16

Nán fa ɔ wun wla ndɛ ngbɛn-ngbɛn bɔ be nin Nyanmiɛn ndɛ'n be ti-man kun'n be nun, afin be nga be yo sɔ'n be fa-man bé wun mantan-man Nyanmiɛn lele be nin i bu.

2 Timote 3:2

Afin sran'm be ´bu be bɔbɔ be wun akunndan, be ´yo sika klofuɛ, be ´di bé nuan, be ´tu bé wun, be ´saci Nyanmiɛn wun, bé nyin su yi-man bé si nin be nin mun, be su si-man ye, bé nyin su yi-man Nyanmiɛn,

Tite 1:10

Afin sran kpanngban bé nyin ti kekle, yɛ be kan ndɛ ngbɛn-ngbɛn fa laka sran mun. Be kpanngban lika be fin Zuif'm bɔ b'a kaci Kristfuɛ'n be nun.

Tite 1:16

Be yo bé wun kɛ be si Nyanmiɛn, sanngɛ sa nga be yo'n ɔ kle-man kɛ be si i. Bé wun yo tɛ, bé nyin ti kekle, yɛ be kwla yo-man sa kpa bɔ kun sa.

Tite 1:6

N kɛnnin i kɛ man sran nga be ´fɛ i sie asɔnun kpɛnngbɛn'n ɔ yo sran bɔ be kwla saci-mɛn i wun kaan sa, bɔ i yi ti kun, bɔ i mma'm be lafi Nyanmiɛn su, bɔ be kwla saci-man be dunman kɛ be nzuɛn ti tɛ, yɛ bé nyin ti kekle.

Tite 3:3

Afin laa e kusu e ti sinnglinfuɛ yɛ e ti nyin keklefuɛ. Be lakali ye man e yacili atin kpafuɛ'n, é nyin b'ɔ blo ninnge wafa-wafa'n kwlaa nin mɛn dilɛ'n su'n ti e kacili kɛ kanga sa, laa e ti klunwifuɛ, yɛ é nyin ci sran nin like, laa é wun yo tɛ yɛ e kpɔ e wun.

Hébreu 11:31

Nyanmiɛn su bɔ Raab b'ɔ ti tekle bla'n lafi'n ti yɛ kɛ be bɔ bé nyin yi-man Nyanmiɛn'n be wuli'n ɔ'a wu-man wie nin-ɔn, yɛlɛ kɛ be nga be ɔli be mɛn'n i kpla nianlɛ'n, ɔ sikeli be kpa .

Hébreu 12:16

An `nian amún wun kpa nan sran fi a kunndɛ-man bla nin bian, yɛ sran fi a bu-man Nyanmiɛn i ninnge'm be kɛ be ti-man like fi kɛ Ezau bɔ aliɛ talie kun ti ɔ yoli i kpɛnngbɛn'n i atɛ'n sa .

1 Piɛr 2:7

Amun bɔ an lafi yɛbuɛ sɔ'n su'n, ɔ ti amun like kpa. Sanngɛ ɔ seli be nga be lafi-mɛn i su'm be kɛ: «Yɛbuɛ bɔ sua kplanfuɛ'm be yili i blo'n, i yɛ ɔ'a kaci yɛbuɛ kpa b'ɔ tra sua'n i cɔnjɔ'n i ase nin-ɔn .

1 Piɛr 3:20

Be nga laa kɛ Noe ´bobo mmeli'n be yoli nyin kekle Nyanmiɛn su'n, b'ɔ trɛli i anwlɛn bé wun'n, be wawɛ mun-ɔn. Sran mɔcuɛ cɛ yɛ be fuli mmeli sɔ'n nun be trannin nzue'n i nyin su lele be nyannin be ti-ɔ .

1 Piɛr 4:18

?Sɛ be nga be ti kpa'n bé ti nyanlɛ'n ti kekle'n, be nga be sro-man Nyanmiɛn bɔ be yo sa tɛtɛ'n, be liɛ'n ´yo sɛ ?

Jude 1:15

kɛ be `fa sran'm be kwlaa bla be ja su nan be nga be sro-man Nyanmiɛn'n bé sa nga be yoli'n, be `fɛ i nuan like man be. Afin sa tɛ yofuɛ sɔ'm bɔ be sro-man Nyanmiɛn'n, be yo Nyanmiɛn sa, yɛ be kɛn i wun ndɛ tɛtɛ.

Sa nglô yile 21:8

Sanngɛ srɛfuɛ mun'n, nin be nga be lafi-man n su'n, nin be nga be yo tete sa'n, nin sran kunfuɛ mun'n, nin bian nin bla kunndɛfuɛ mun'n, nin baefuɛ mun'n, nin amuɛn sɔfuɛ mun'n, nin be kwlaa nga be bua ato'n, be lika liɛ'n yɛlɛ sin dan'n bɔ sufru b'ɔ jue o nun'n. I yɛ ɔ ti wie'n i nnyɔn su nin-ɔn .»

Sa nglô yile 22:15

Be nga be ti kɛ alua sa'n, be nin baefuɛ mun'n, nin bian nin bla kunndɛfuɛ mun'n, nin sran kunfuɛ mun'n, nin amuɛn sɔfuɛ mun'n, nin be kwlaa nga be bua ato'n, bɔ be yo gblɛgblɛ sa mun'n, be lika liɛ'n yɛlɛ klɔ'n sin lɔ.