Yeremi 3:14 - Bibeli Gusunɔn Gari

¹⁴ Bu wurɑmɑ nɛn mi, be, bii mɛm nɔɔ sɑribɑ. Domi nɑ sɑ̃ɑwɑ ben Yinni. Kon be bɑ tie yɑrɑmɑ wuu sìn mi bɑ wɑ̃ɑ kpuron di, bɑɑ ǹ n tɔn turon nɑ, ǹ kun mɛ yiru. Kpɑ n kɑ bu wurɑmɑ nɛn mi Siɔniɔ.

Yeremi 3:14 ပူးပေါင်းရင်းမြစ်များ

Bɑndun Gɑri II 30:6

Mɑ ɡɔro be, bɑ sinɑ boko kɑ win sinɑ ɑsɑkpɔbun tire ni suɑ bɑ kɑ dɑ Isireliɔ kɑ Yudɑɔ. Mɑ bɑ bu sɔ̃ɔwɑ kɑ sinɑ bokon yĩsiru bɑ nɛɛ, bɛɛ Isirelibɑ, i wurɑmɑ Gusunɔ Aburɑhɑmu kɑ Isɑki kɑ Yɑkɔbun Yinnin mi, kpɑ win tii u mɑɑ wurɑmɑ bɛɛn mi. I de i wurɑmɑ bɛɛ be i kisirɑ Asirin sinɑ bokon nɔmɑn di.

Esɑi 1:9

Gusunɔ, wɔllu kɑ tem Yinni ù kun dɑɑ bɛsɛn sukum fiiko fɑɑbɑ kue Yerusɑlɛmu ye sɔɔ, yɑ koo rɑɑ kɑm kowɑ nɡe Sodomu kɑ Gomɔrɑ.

Esɑi 10:22

Bɑɑ bɑ̀ n dɑɑ dɑbi nɡe nim wɔ̃kun yɑni sɛɛri, ben sukum tɔnɑwɑ mu koo wurɑmɑ. Domi nɛ, Yinni Gusunɔ, wɔllu kɑ tem Yinni, nɑ yen himbɑ yi kɔ n kɑ bu kpeerɑsiɑ. Nɛn ɡem mu koo sɔ̃ɔsirɑ n bɑndɑ. Tem mɛ kpurowɑ kon kpeerɑsiɑ nɡe mɛ nɑ yi.

Esɑi 17:6

Isirelibɑn fiikowɑ yɑ koo tiɑrɑ nɡe dɑ̃ɑ bii ni nu tiɑrɑ sɑnɑm mɛ bɑ dɑ̃ru sirɑ. À n mɛɛrɑ kɑɑ wɑ yiru ǹ kun mɛ itɑ tɔnɑ yɑ tie ten wii kpiirɔ, mɑ nnɛ ǹ kun mɛ nɔɔbu yɑ tie ten kɑ̃ɑsi sɔɔ. Gusunɔ Isirelibɑn Yinniwɑ u yeni ɡeruɑ.

Esɑi 27:12

Sɑɑ ɡɑɑ sisi yè sɔɔ Yinni Gusunɔ u koo bɛɛ Isirelibɑ sirɑ nɡe dɑ̃ru, kpɑ bu bɛɛ dɔbiri tiɑ tiɑ sɑɑ Efɑrɑtin dɑɑrun di n kɑ ɡirɑri Eɡibitin dɑɑrɔ.

Esɑi 31:6

Yen sɔ̃, bɛɛ Isirelibɑ, bɛɛ be i kɑ Yinni Gusunɔ wi tondɑ n kpɑ̃, i ɡɔ̃ru ɡɔsio kpɑ i wurɑmɑ win mi.

Esɑi 44:22

Nɑ wunɛn torɑnu kɑ wunɛn durum kpeesiɑ nɡe ɡuru wiru. Yen sɔ̃, ɑ wurɑmɑ nɛn mi, domi nɑ nun yɑkiɑ.

Esɑi 54:5

Domi nɛ, wunɛn tɑkɑ kowo nɑ sɑ̃ɑwɑ nɡe wunɛn durɔ. Nɛn yĩsirɑ Gusunɔ, wɔllu kɑ tem Yinni, kɑ Isirelibɑn Yinni Dɛɛro, kɑ hɑnduniɑ kpuron Yinni. Nɛnɑ nɑ nun yɑkiɑ.

Esɑi 55:7

Kpɑ durumɡii u win dɑɑ kɔsi, toro u mɑɑ win bwisiku kɔ̃sunu deri, kpɑ u ɡɔsirɑ u wurɑmɑ Yinni Gusunɔn mi. U koo nùn wɔnwɔndu kuɑ, wi, wi u ku rɑ suuru kpɑnɛ.

Esɑi 57:17

Nɛn mɔru yɑ seewɑ Isirelibɑn tɑɑrɛ bɑkɑn sɔ̃, mɑ nɑ bu sɛɛyɑsiɑ sere nɑ ǹ mɑɑ kĩ n bu mɛɛri. Adɑmɑ kɑ mɛ, bɑ yɔ̃rɑriwɑ ben mɛm nɔɔ sɑri te sɔɔ, mɑ bɑ ben tiin ɡɔ̃ru kĩru swĩi.

Esɑi 6:13

Bɑɑ bɑ̀ n tem mɛn tɔmbu bɔnu kuɑ subɑ wɔkuru, mɑ ten teerɑ tie mi, u koo tu surɑwɑ nɡe dɑ̃ɑ bɑkɑru. Adɑmɑ nɡe mɛ dɑ̃ɑ kpiriru tɑ rɑ kpɑre, nɡe mɛyɑ bwese kpɑɑrɑ koo se tɑ n sɑ̃ɑ bwese ɡeeru te u ɡɔsɑ.

Yeremi 2:19

I n yɛ̃ mɑ bɛɛn nuku kɔ̃suru kɑ bɛɛn nɑɑnɛ sɑriru tɑ koo bɛɛ nɔni sɔ̃. Sɑɑ ye sɔɔrɑ i ko wɑ, kpɑ i ɡiɑ mɑ ɡɑ̃ɑ kɔ̃sunɑ i kuɑ mi, ye i kɑ mɑn deri, i ǹ mɑɑ mɑn nɑsie. Nɛ, Gusunɔ wɔllu kɑ tem Yinniwɑ nɑ yeni ɡeruɑ.

Yeremi 2:2

n doo n bɛɛ Yerusɑlɛmuɡibu sɔ̃ n nɛɛ, u yɑɑye nɡe mɛ i nùn kĩɑ yellu nɡe kurɔ kpɑo, i kɑ nùn swĩi ɡbɑbu tèn mi ɡɑ̃ɑnu ku rɑ kpi.

Yeremi 23:3

Kpɑ n nɛn tɔn be bɑ tie mwɛɛrimɑ tem kpuron di, mi nɑ rɑɑ derɑ bɑ yɑrinɛ, n kɑ bu wurɑmɑ ben temɔ, kpɑ bu mɑrurɑ bu dɑbiɑ.

Yeremi 29:14

kpɑ u bɛɛ be bɑ rɑɑ yoru mwɛɛrɑ mi, mɛnnɑmɑ sɑɑ tem kpuron di kɑ bwesenu kpuro sɔɔn di mi u derɑ i yɑrinɛ, kpɑ u bɛɛ ɡɔsiɑmɑ i wurɑmɑ bɛɛn temɔ, mìn di u derɑ bɑ bɛɛ ɡurɑ. Wi, Yinni Gusunɔwɑ u yeni ɡeruɑ.

Yeremi 3:1

Yinni Gusunɔ u mɑɑ nɛɛ, ɡoo ù n win kurɔ yinɑ, mɑ kurɔ wi, u dɑ u durɔ ɡoo suɑ, durɔ ɡuro wi, u rɑ mɑɑ kurɔ wi nɑɑ de? Aɑwo. Ù n kuɑ mɛ, yɑ koo win tem disi doke. Adɑmɑ bɛɛ Isirelibɑ, i kuɑ mɛ. I dɑ i bũu dɑbiru sɑ̃ɑmɔ, mɑ i kĩ n mɑɑ bɛɛ mwɑɑmɑ. Nɛ, Yinni Gusunɔwɑ nɑ yeni ɡeruɑ.

Yeremi 3:12

Yen sɔ̃, ɑ doo sɔ̃ɔ yɛ̃sɑn nɔm ɡeu ɡiɑ ɑ Isirelibɑ ɡɑri yini sɔ̃ ɑ nɛɛ, bu wurɑmɑ, nɑ ǹ kɑ bu nɔnu kɔ̃su mɛɛrimɔ. Domi nɑ sɑ̃ɑwɑ wɔnwɔnduɡii. Nɑ ku rɑ mɔru ko n kɑ tɛ.

Yeremi 3:8

Isirelibɑ bɑ tem mɛ disi doke ben bũu ɡɑsiribun sɔ̃ kɑ ben sekuru sɑrirun sɔ̃ te bɑɑwure u ɡerumɔ. Mɑ bɑ bũu sɑ̃ɑmɔ kpenu kɑ dɑ̃nun nuurɔ. Yen sɔ̃nɑ nɑ bu yinɑ mɑ nɑ bu yinɑbun tireru wɛ̃. Kɑ mɛ, nɑ wɑ Yudɑbɑ bɑ ǹ bɛrum kue. Bɑ dɑwɑ bɑ bũnu ɡɑsirɑ ben tii. Bɑ ǹ wurɑmɛ nɛn mi kɑ ben ɡɔ̃ru kpuro. Weesu sɔɔrɑ bɑ yɔ̃.

Yeremi 31:12

Bɑ koo nɑ Siɔnin ɡuuru wɔllɔ, bɑ n nuku dobu mɔ̀ kɑ kuuki. Bɑ koo duki nɑ ɑrumɑni ye nɛ, Yinni Gusunɔ nɑ bu wɛ̃n sɔ̃. Yeyɑ, dobi kɑ resɛm kɑ olifi ye bɑ rɑ kɑ ɡum ko, kɑ yɑ̃ɑnu kɑ nɛɛ. Ben bwɛ̃rɑ koo yɛmiɑwɑ nɡe dɑ̃ɑ ɡbɑɑru te tɑ nim wɑɑmɔ. Bɑ ǹ koo mɑɑ wɑhɑlɑ ko.

Yeremi 31:32

Adɑmɑ yɑ ǹ ko n sɑ̃ɑ yèn bweseru nɑ rɑɑ kɑ ben bɑɑbɑbɑ bɔkuɑ sɑnɑm mɛ nɑ bu nɔmu nɛnuɑ nɑ yɑrɑmɑ Eɡibitin di. Bɑ ǹ ye mɛm nɔɔwɛ, bɑɑ mɛ nɛ, Yinni Gusunɔ nɑ sɑ̃ɑ ben Yinni.

Yeremi 31:6

Sɑɑ yɑ sisi yè sɔɔ wuun kɔ̃sobu bɑ koo nɔɔɡiru suɑ Efɑrɑimun ɡuuru wɔllun di bu nɛɛ, i seewo su dɑ Siɔniɔ mi Gusunɔ bɛsɛn Yinni u wɑ̃ɑ.

Osee 5:15

Yinni Gusunɔ u nɛɛ, ǹ n mɛn nɑ, kon bu biru kisi kpɑ n wurɑ nɛn wɑ̃ɑ yerɔ sere bu kɑ tubu mɑ bɑ torɑ. Ben nɔni swɑ̃ɑru tɑ koo de bu mɑn kɑsu kpɑ bu mɑn somiru kɑnɑ.

Sɑkɑri 1:4

I ku kɑ bɛɛn bɑɑbɑbɑ weenɑ be nɛn sɔmɔ ɡbiikobu bɑ nɛn ɡɑri sɔ̃ɔwɑ bɑ nɛɛ, bu ben dɑɑ kɔ̃sɑ derio. Adɑmɑ bɑ ǹ sɔmɔ be swɑɑ dɑki bu sere mɑn mɛm nɔɔwɑ.

Romu 9:27

Mɑ Gusunɔn sɔmɔ Esɑi u nɔɔɡiru suɑ u ɡeruɑ Isirelibɑn sɔ̃ u nɛɛ, “Bɑɑ Isirelibɑ bɑ̀ n dɑbiɑ, nɡe nim wɔ̃kun yɑnim, ben sukum tɔnɑwɑ koo fɑɑbɑ wɑ.