Yeremi 2:20 - Bibeli Gusunɔn Gari

²⁰ Yinni Gusunɔ u nɛɛ, sɑɑ yellun di, i tii yoru yɑrɑ, i suɡu kɑ yɔni yi bɑ rɑɑ bɛɛ doke kɑsukɑ. Mɑ i nɛɛ, i ǹ mɑɑ kĩ i mɑn yoru diiyɑ. Mɑ i dɑ ɡunɡunu wɔllɔ kɑ dɑ̃ɑ kubenɔ i bũnu ɡɑsirimɔ i sɑ̃ɑmɔ.

Yeremi 2:20 ပူးပေါင်းရင်းမြစ်များ

Sinɑmbu I 12:32

Yeroboɑmu u tɔ̃ru burɑ bu kɑ tɔ̃ɔ bɑkɑru ko wɔ̃ɔn suru nɔɔbɑ itɑsen sɔ̃ɔ wɔkurɑ nɔɔbuse sɔɔ, nɡe mɛ Yudɑbɑ bɑ rɑ ko. Mɑ u dɑ Betɛliɔ u yɔɔwɑ yɑ̃ku yerɔ u bwɑ̃ɑroku ni yɑ̃kuru koosi. Mɑ u yɑ̃ku kowo be u ɡɔsɑ yi Betɛli mi.

Sinɑmbu I 14:23

Domi ben tii bɑ bũu turɑnu bɑnɑ, mɑ bɑ mɑɑ bũu wi bɑ mɔ̀ Asitɑɑten bwɑ̃ɑrokunu kuɑ bɑ yi ɡunɡunu wɔllɔ kɑ mi dɑ̃ɑ koo bɑkɑnu wɑ̃ɑ.

Womusu 107:14

U bu yɑrɑ yɑm wɔ̃ku te, kɑ ɡɔribun wɑ̃ɑ yee ten min di, mɑ u ben yorun yɔni yi kusiɑ.

Womusu 2:3

su ben dɑm buɑ, su tii yɑkiɑ ben yorun di.

Womusu 78:58

Bɑ win mɔru seeyɑ kɑ ben bũu turɑnu. Bɑ win nisinu seeyɑ kɑ ben bwɑ̃ɑrokunu.

Yɑribu 19:8

Mɑ tɔn be kpuro bɑ wurɑ bɑ nɛɛ, ye Yinni Gusunɔ u ɡeruɑ kpuro, yeyɑ sɑ ko ko. Mɑ Mɔwisi u mɑɑ kɑ tɔn ben ɡere wurɑ Yinni Gusunɔn mi.

Yɑribu 24:3

Mɑ Mɔwisi u dɑ u tɔn be Yinni Gusunɔn ɡɑri kɑ win woodɑbɑ kpuro sɔ̃ɔwɑ. Mɑ be kpuro bɑ wurɑ kɑ ɡɔ̃ru teu bɑ nɛɛ, sɑ ko ko ye Yinni Gusunɔ u ɡeruɑ kpuro.

Yɑribu 3:8

Yerɑ nɑ sɑrɑmɑ n kɑ bu wɔrɑ Eɡibitiɡibun nɔmɑn di, kpɑ n kɑ bu dɑ tem bɑkɑm ɡɑm sɔɔ mɛ mu ɡeɑ sɑ̃ɑ mu tim kɑ bom yibɑ. Tem mɛ sɔɔrɑ Kɑnɑnibɑ kɑ Hɛtibɑ kɑ Amɔrebɑ kɑ Feresibɑ kɑ Hefibɑ kɑ Yebusibɑ bɑ wɑ̃ɑ.

Esɑi 1:21

Gusunɔ u nɛɛ, Yerusɑlɛmu, wunɛ wi nɑ rɑɑ nɑɑnɛ sɑ̃ɑ, wee ɑ kuɑ nɡe kurɔ sɑkɑrɑ kowo, wi u win durɔ deri. Domi yellu ɡemɡibɑ rɑɑ yibɑ wunɛ sɔɔ. Adɑmɑ ɡisɔ, tɔn ɡowobu tɔnɑwɑ bɑ nun wɑ̃ɑsi.

Esɑi 10:27

Tɔ̃ɔ te sɔɔ, kon bɛɛ nɛn tɔmbu yɑrɑ yorun di kpɑ i bɛɛn sɔmunu sɔbiɑ kpɑ i suɡu potɑ bɛɛn wĩinun di. I ǹ mɑɑ suɡu dokemɔ yèn sɔ̃ nɑ bɛɛ ɡɔsɑ nɑ ɡum tɑ̃re.

Esɑi 14:25

Kon Asiriɡibu kɔsuku nɛn tɔmbu Isirelibɑn temɔ. Kon bu tɑɑku nɛn ɡuunu wɔllɔ, kpɑ n nɛn tɔmbu yɑrɑ ben yorun di, bɑ kun ben suɡu kɑ ben sɔmunu sɔɔwɑ.

Esɑi 9:4

Bɑ ǹ mɑɑ tɑbu kowobun bɑrɑ nɑɑsun dɑmu nɔɔmɔ. Ben tɑbu yɑ̃nu nu rɑ n yɛm yibɑ. Bɑ ǹ mɑɑ nu dokemɔ. Bɑ koo yɑ̃ɑ ni kɑ bɑrɑ ni dɔ̃ɔ kɑrewɑ.

Yeremi 13:27

Nɑ wɑɑmɔ sɑkɑrɑru kɑ kuuki yi ɑ mɔ̀, sɑnɑm mɛ ɑ bũnu ɡɑsirimɔ ɑ sɑ̃ɑmɔ ɡuunu wɔllɔ kɑ yɑkɑsɔ. Yɑ sɑ̃ɑwɑ ɡɑ̃ɑ kɔ̃sunu nɛn nɔni sɔɔ. Yen sɔ̃, wunɛ Yerusɑlɛmu, kɑɑ kɑm ko ɑ̀ kun tii dɛɛrɑsie. Sɑɑ yerɑ̀ ɑ mɑrɑ, ɑ kɑ tii dɛɛrɑsiɑ.

Yeremi 17:2

Yɑ sɑ̃ɑwɑ seedɑ ye yɑ bu tɑɑrɛ wɛ̃ɛmɔ. Nɡe mɛyɑ ben bũu turɑnu kɑ ben bwɑ̃ɑrokunu kɑ ben dɑ̃ɑ kubenu kɑ ben ɡunɡunu mi bɑ rɑ bũu wi bɑ mɔ̀ Asitɑɑte sɑ̃, yɑ mɑɑ bu tɑɑrɛ wɛ̃ɛmɔ.

Yeremi 2:31

Bɛɛ Isirelibɑ, bɛɛ be i tie, i nɛ, Yinni Gusunɔn ɡɑri swɑɑ dɑkio i nɔ. Nɑ bɛɛ sɑ̃ɑwɛwɑ nɡe tem mi ɡɑ̃ɑnu ku rɑ kpi? Nɑ bɛɛ sɑ̃ɑwɛwɑ nɡe yɑm wɔ̃ku nɑnumɡiru? Mbɑn sɔ̃nɑ bɛɛ nɛn tɔmbu i ɡerumɔ i mɔ̀, i tii mɔ, i ǹ ɡɔsirɑmɑmɔ nɛn mi.

Yeremi 3:13

Bu ɡesi ben durum wuro. Bu wuro mɑ bɑ ǹ kɑ mɑn yɔ̃re, nɛ, Gusunɔ ben Yinni. Domi bɑ dɑ bɑ bũnu ɡɑsirɑ dɑ̃ɑ kubenɔ. Bɑ yinɑ bu nɛn ɡɑri swɑɑ dɑki. Nɛ, Yinni Gusunɔwɑ nɑ yeni ɡeruɑ.

Yeremi 30:8

Yen tɔ̃ɔ te, nɛ, Yinni Gusunɔ, nɛ wi nɑ wɔllu kɑ tem tɑkɑ kuɑ, kon ben suɡu wunɑ sɑɑ ben wĩinun di n bɔɔku kpɑ n wɛ̃ɛ yi bɑ rɑɑ kɑ bu sɔri kɑsuku, n ben yoru kpeesiɑ. Bɑ ǹ mɑɑ tɔn tukobu sɑ̃ɑmɔ.

Yeremi 5:5

Kon ɡɔsirɑ n dɑ be bɑ bukuren mi, kpɑ n kɑ bu ɡɑri ko. Domi be, bɑ wunɛn swɛɛ yɛ̃, bɑ mɑɑ wunɛn woodɑbɑ yɛ̃. Wee, ben tii bɑ nun yinɑ nɡe yɑ̃ɑ te tɑ wɛ̃ɛ yinɑ mɑ tɑ yi kɑsukɑ.

Esekiɛli 16:28

Yen biru mɑ ɑ dɑ ɑ kɑ Asiriɡibu sɑkɑrɑru kuɑ, domi ɑ ǹ debɑ. A dɑ ɑ tii bu wɛ̃. Adɑmɑ kɑ mɛ, ɑ ǹ debɑ.

Esekiɛli 16:31

Domi ɑ sɑkɑrɑ kunu ɡirɑ swɑɑ kɛɛnɑnɔ mɑ ɑ bũu turɑnu kuɑ bɑɑmɑ kpuro, ɑ ku rɑ mɑm mɑɑ kurɔ tɑnɔ ɡobi mwɛ.

Esekiɛli 16:41

Bɑ koo wunɛn diɑ dɔ̃ɔ mɛniki kpɑ bu nun sɛɛyɑsiɑ kurɔ dɑbinun wuswɑɑɔ kpɑ n de wunɛn sɑkɑrɑru tu kpe. A ǹ mɑɑ ben ɡoo ɡɑ̃ɑnu wɛ̃ɛmɔ.

Esekiɛli 20:28

Nɑ kɑ bu dɑ tem mɛ sɔɔ mɛ nɑ bu nɔɔ mwɛɛru kuɑ nɑ sire kɑ bɔ̃ri. Miyɑ bɑ ben binɛ doke ɡunɡunu ɡiɑ kɑ dɑ̃ɑ kubenu ɡiɑ. Mɑ ye kpuro yɑ kuɑ ben bũu yɑ̃ku yenu. Miyɑ bɑ rɑ yɑ̃ku dɔ̃ɔ mwɑɑrɑruɡinu ko kɑ sere ni bɑ rɑ ko kɑ ɡberun dĩɑnu kɑ tɑm kpɑ bu turɑre dɔ̃ɔ doke. Ye kpuro yɑ derɑ nɛn mɔru seewɑ.

Esekiɛli 23:5

Oholɑ wi, u kuɑ nɑɑnɛ sɑriruɡii, u kurɔ tɑnɑru wɔri. Mɑ u Asiriɡibu kĩɑ too too be bɑ wɑ̃ɑ win bɔkuɔ.

Osee 1:2

Gɑri yi Yinni Gusunɔ u ɡbiɑ u Osee sɔ̃ɔwɑ yi wee. U nɛɛ, Osee, ɑ doo ɑ kurɔ suɑ wi u rɑ sɑkɑrɑru ko. Bɛɛn bibu bɑ koo mɑɑ win yirɑ swĩi. Domi Isirelibɑ bɑ bũnu ɡɑsirimɔ bɑ sɑ̃ɑmɔ nɡe kurɔ sɑkɑrɑ wi u durɔbu ɡɑsirimɔ. Mɑ bɑ nɛ, Yinni Gusunɔ deri.

Osee 2:5

Mɑ n kun mɛ, kon win yɑ̃nu potiri mɑm mɑm kpɑ n nùn yɔ̃su tereru nɡe mɛ bɑ kɑ nùn mɑrɑ. Kon de u n sɑ̃ɑ nɡe tem mi ɡɑ̃ɑnu ku rɑ kpi, kpɑ n de nim nɔru ɡu nùn ɡo.

Osee 3:3

Mɑ nɑ nùn sɔ̃ɔwɑ nɑ nɛɛ, ɑ de ɑ n wɑ̃ɑ nɛn sɔ̃ n kɑ tɛ. A ku mɑɑ sɑkɑrɑru ko. A ku mɑɑ dɑ durɔ ɡoon mi. Nɛn tii kon mɑɑ tii nɛnɛ.

Osee 4:13

Bɑ rɑ de bɑ n yɑ̃kunu mɔ̀ ɡuunu wɔllɔ, kpɑ bɑ n turɑre dɔ̃ɔ dokemɔ ɡunɡunu wɔllɔ kɑ dɑ̃ɑ bɑkɑ bwese bwesekɑn nuurɔ nìn sɑɑrɑ bu wɛ̃re. Yen sɔ̃nɑ ben bii wɔndiɑbɑ bɑ sekuru sɑriru mɔ̀. Mɑ ben biiɡii kurɔbu bɑ sɑkɑrɑru mɔ̀.

Osee 9:1

Bɛɛ Isirelibɑ, i ku tɔ̃ɔ bɑkɑru ko ɡɛ̃ɛbun sɑɑ sɔɔ nɡe bwese ni nu tie. Domi i Yinni Gusunɔ biru kisi. Mɑ i dɑ i bũnu ɡɑsirimɔ i nu siɑrɑmɔ mi bɑ ɑlikɑmɑ soomɔ kpuro.

Sɑ̃ɑrun Woodɑ 26:13

Nɛnɑ Gusunɔ bɛɛn Yinni, nɛ wi nɑ bɛɛ yɑrɑ sɑɑ yorun di Eɡibitiɔ. Nɛnɑ nɑ Eɡibitiɡibun dɑm dɔrebu kpeerɑsiɑ. Tɛ̃ i ko i kpĩ i sĩ n kun kɑ sekuru.

Nɑhumu 1:13

Kon ben yoo te bɑ bɛɛ diisiɑmɔ kpeerɑsiɑ. Kon ten yɔni kɑsuku.

Sɔ̃ɔsiru 12:2

I ko i bwese ni i ko i ɡirɑ min bũnun sɑ̃ɑ yenu kpuro kɔsukuwɑ mɑm mɑm ɡuunɔ kɑ ɡunɡunɔ kɑ dɑ̃ɑ kubenɔ.

Sɔ̃ɔsiru 15:15

I yɑɑyo mɑ i rɑɑ yoru di Eɡibitiɔ, mɑ Gusunɔ bɛsɛn Yinni u bɛɛ yɑkiɑ. Yen sɔ̃nɑ nɑ bɛɛ woodɑ yeni wɛ̃ɛmɔ ɡisɔ.

Sɔ̃ɔsiru 26:17

Gisɔ, i wurɑ mɑ Gusunɔwɑ u sɑ̃ɑ bɛsɛn Yinni, i mɑɑ wurɑ mɑ i ko i sĩ win swɑɑ sɔɔ, kpɑ i win woodɑbɑ kɑ win yiirebu kpuro mɛm nɔɔwɑ.

Sɔ̃ɔsiru 4:20

Adɑmɑ bɛɛ, u bɛɛ nɔmɑ nɛnuɑ u yɑrɑ Eɡibitiɡibun nɔni yi bɑ bɛɛ sɔ̃ɔmɔn di kpɑ i n kɑ sɑ̃ɑ win tɔmbu nɡe mɛ i sɑ̃ɑ ɡisɔ.

Sɔ̃ɔsiru 4:34

Yinni ɡoo u win tɔmbu wɔrɑre ben yibɛrɛbɑn nɔmɑn di kɑ win dɑm bɑkɑm, kɑ lɑɑkɑri mɛɛribu, kɑ yĩrenu, kɑ sɔm mɑɑmɑɑkiɡinu, kɑ tɑbu, kɑ win dɑm kɑ ɡɑ̃ɑ nɑnumɡinu nɡe mɛ Gusunɔ bɛsɛn Yinni u Eɡibitiɡibu kuɑ bɛɛn wuswɑɑɔ?

Sɔ̃ɔsiru 5:27

Yen sɔ̃, nɛ Mɔwisi, n susio Gusunɔ bɛsɛn Yinnin bɔkuɔ kpɑ n swɑɑ dɑki ye u ɡeruɑ. Yen biru, kpɑ n bu ye nɔɔsiɑ. Bɑ koo ye nɔ, kpɑ bu kɑ ye sɔmburu ko.

Yosue 1:16

Bɑ Yosue wisɑ bɑ nɛɛ, ye ɑ sun yiire kpuro, yeyɑ sɑ ko ko. Mi ɑ mɑɑ sun ɡɔrɑ kpuro, sɑ ko dɑwɑ.

Yosue 24:24

Mɑ tɔn be, bɑ Yosue sɔ̃ɔwɑ bɑ nɛɛ, Gusunɔ bɛsɛn Yinniwɑ sɑ ko sɑ̃, kpɑ su nùn mɛm nɔɔwɑ.

Yosue 24:26

Yen biru u ɡɑri yi yoruɑ Gusunɔn woodɑn tireru sɔɔ mɑ u kpee bɑkɑru suɑ u ɡirɑ dɑ̃ɑ bɑkɑru ɡɑrun nuurɔ mi bɑ Yinni Gusunɔn kuu bekuruɡiru ɡire.

Kɑ̃siru 17:1

Yerɑ ɡɔrɑdobɑ nɔɔbɑ yiru be bɑ yorukunu nɔɔbɑ yiru ye nɛni, ben turo u nɑ u mɑn sɔ̃ɔwɑ u nɛɛ, n nɑ u koo mɑn sɔ̃ɔsi nɡe mɛ bɑ koo kɑ kurɔ tɑnɔ kpoko wi siri bu sɛɛyɑsiɑ wi u sɔ̃ nim bɑkɑm wɔllɔ.

Kpɑrobu 10:6

Yenibɑn biru Isirelibɑ bɑ kpɑm kuɑ ye yɑǹ Yinni Gusunɔ dore. Bɑ dɑ bɑ bũu tɔn durɔ be bɑ mɔ̀ Bɑɑlibɑ kɑ bũu tɔn kurɔ be bɑ mɔ̀ Asitɑɑtebɑ sɑ̃ɑmɔ. Bũu ni, nu sɑ̃ɑwɑ Siriɡibu kɑ Sidoniɡibu kɑ Amɔnibɑ kɑ Mɔɑbubɑ kɑ Filisitibɑn bũnu. Nɡe mɛyɑ Isirelibɑ bɑ kuɑ bɑ kɑ Yinni Gusunɔ deri, bɑǹ mɑɑ nùn sɑ̃ɑmɔ.

Kpɑrobu 2:11

Ye Isirelibɑ bɑ kuɑ, yɑǹ Yinni Gusunɔ dore. Domi bɑ nùn deri bɑ dɑ bɑ bũnu sɑ̃ɑmɔ ni bɑ rɑ soku Bɑɑlibɑ.

Sɑmuɛli I 12:10

Yerɑ bɑ Yinni Gusunɔ sokɑ bɑ nùn sɔ̃ɔwɑ bɑ nɛɛ, bɑ durum kuɑ domi bɑ nùn deri bɑ bũu tɔn durɔ be bɑ mɔ̀ Bɑɑlibɑ kɑ bũu tɔn kurɔ wi bɑ mɔ̀ Asitɑɑte sɑ̃ɑmɔ. Adɑmɑ ù n bu wɔrɑ ben yibɛrɛbɑn nɔmɑn di, bɑ koo nu deri bu nùn sɑ̃.