Womusu 98:4 - Bibeli Gusunɔn Gari

⁴ Bɛɛ hɑnduniɑɡibu kpuro, i nɔɔɡiru suo kɑ nuku dobu. I nuku dobun kuuki koowo i kɑ nùn siɑrɑ i nùn tɔmɑ kɑ womusu.

Womusu 98:4 ပူးပေါင်းရင်းမြစ်များ

Womusu 100:1

Siɑrɑbun womu. Ge wee. Bɛɛ hɑnduniɑɡibu kpuro, i Yinni Gusunɔ tɑkɑru koowo kɑ nuku dobu.

Womusu 66:1

Womu ɡe bɑ wom kowobun wiruɡii kuɑ. Ge wee. Bɛɛ hɑnduniɑn tɔmbu kpuro, i Gusunɔ nɔɔɡiru sueyo kɑ nuku dobu.

Womusu 66:4

Hɑnduniɑɡibu kpuro bɑ nùn yiirɑmmɛ. Bɑ nùn tɔmɑmɔ kɑ womusu, mɑ bɑ win yĩsiru bɛɛrɛ wɛ̃ɛmɔ.

Womusu 67:4

Gusunɔ, bwesenu kpuro nu nun siɑrɑmɔ mɑ nu nun tɔmɑmɔ.

Womusu 71:22

Yinni, kon nun tɔmɑ kɑ mɔrɔku, kpɑ n nun siɑrɑ kɑ womusu wunɛn bɔrɔkinirun sɔ̃. Kon wunɛn yĩsiru wɔlle suɑ kɑ mɔrɔku, wunɛ wi ɑ sɑ̃ɑ Isirelibɑn Yinni Dɛɛro.

Womusu 95:1

I nɑ su Yinni Gusunɔ womu kuɑ. Su nùn nɔɔɡiru sue kɑ nuku dobu wi, wi u sɑ̃ɑ fɑɑbɑ kowo dɑmɡii nɡe kpee bɑkɑru.

Womusu 95:2

I de su dɑ win wuswɑɑɔ su nùn siɑrɑ. Su nùn bɛɛrɛ wɛ̃ kɑ siɑrɑbun womusu kɑ nuku dobu.

Esɑi 12:6

Be bɑ wɑ̃ɑ Siɔniɔ, bu nuku dobun kuuki koowo, domi Isirelibɑn Yinni Dɛɛro u kpɑ̃, u mɑɑ wɑ̃ɑ ben suunu sɔɔ.

Esɑi 42:11

Bɛɛ be i wɑ̃ɑ ɡbɑburu kɑ ten ɡberu kpɑɑnɛbɑ sɔɔ kpuro, i nɔɔɡiru suo i Gusunɔ siɑrɑ. Bɛɛ Kedɑɑn bweseru, i ku nɔɔ mɑri, i Gusunɔ siɑro. Bɛɛ bèn wuu ɡɑ sɔ̃ kperu wɔllɔ, i kuuki koowo ɡuunu wɔllun di kɑ nuku dobu.

Esɑi 44:23

Wɔllu, ɑ yɛ̃ɛrio ye Yinni Gusunɔ u kuɑn sɔ̃. Gɔribun wɑ̃ɑ yeru, ɑ ɡɔ̃ru doro. Bɛɛ ɡuunu i kuuki koowo kɑ nuku dobu. Bɛɛ mɑɑ dɑ̃ɑ sɔ̃su, i nuku dobu koowo. Domi Yinni Gusunɔ u win yiiko sɔ̃ɔsi Isireliɔ. U be, Yɑkɔbun bweseru yɑkiɑ.

Yeremi 33:11

Adɑmɑ bɑ koo wure bu nuku dobun kuuki nɔ kɑ tɔ̃ɔ bɑkɑruɡii. Bɑ koo kurɔ kpɑɑnun womusu nɔ. Bɑ koo mɑɑ wure bu womu ɡeni nɔ, ɡe ɡɑ nɛɛ, i Gusunɔ, wɔllu kɑ tem Yinni siɑro. Domi u sɑ̃ɑ tɔn ɡeo. Win kĩru tɑ ǹ nɔru mɔ. Mɛyɑ bɑ koo mɑɑ tɔn be bɑ kɑ yɑ̃kunu nɑ sɑ̃ɑ yerɔn womusu nɔ. Domi kon de tɔn be bɑ rɑɑ yoru mwɛɛrɑ mi, bu wurɑmɑ tem mɛ sɔɔ, kpɑ n bu wesiɑ nɡe yellu. Nɛ, Yinni Gusunɔwɑ nɑ yeni ɡeruɑ.

Sofoni 3:14

Bɛɛ Siɔniɡibu, i ɡɔ̃ru dobun kuuki koowo. Bɛɛ Isirelibɑ kpuro ɡesi, i nuku dobun kuuki koowo. Bɛɛ Yerusɑlɛmuɡibu, i yɛ̃ɛrio kpɑ i nɑsɑrɑn kuuki ko kɑ bɛɛn ɡɔ̃ru kpuro.

Mɑteu 21:9

Tɔn be bɑ nùn ɡbiiye kɑ be bɑ nùn swĩi biruɔ, bɑ ɡbɑ̃rɑmɔ bɑ mɔ̀, su Dɑfidin sikɑdobu wɔlle suɑ. U sɑ̃ɑwɑ domɑruɡii. U sisi kɑ Yinnin yĩsiru! Su Wɔrukoo wɔlle suɑ.

Kɑ̃siru 19:1

Yen biru nɑ nɔɔ nuɑ nɡe tɔn wɔrun wurenu wɔllɔ ɡɑ nɛɛ, su Gusunɔ bɛsɛn Yinni siɑrɑ. U sɑ̃ɑwɑ fɑɑbɑ kowo, u yiiko kɑ dɑm mɔ.

Kɑ̃siru 19:6

Yerɑ nɑ nɔɔ nuɑ nɡe tɔn wɔrun wurenu, ɡɑ sɑ̃ɑ nɡe surun bɑkɑru ǹ kun mɛ ɡuru ɡbɑ̃suku bɑkɑnu, ɡɑ nɛɛ, su Gusunɔ bɛsɛn Yinni dɑm kpuroɡii siɑrɑ domi u bɑndu di.