याकुब 3:1 - बान्‍तावा राई

¹ ब़ब़, नाना खोन्‍कि निछाचि ओ, खानानिन ब़द्‍धेकापाङ काचिन्‌चि मान्‍लिदानिन। देकिनालो खानानिन त़सिन्‍तुम्‌योम, आन्‍कान्‍का काचिन्‍चिओ आन्‍काओ छ़ङ्‌छेन्‍मा ब़द्‍धे चाअ़त्‍लो लि।

याकुब 3:1 ပူးပေါင်းရင်းမြစ်များ

मत्‍ति 10:24

काखेङ अ़काचिन्‍पाएदाङ्‌का तोक्‍पो अ़लिनिन, खोन्‍कि हारुक अ़हाङ्‌पाएदाङ्‌का तोक्‍पो अ़लिनिन।

मत्‍ति 23:13

अ़चाअ़त्‍मादा त़छुक्‍तिन खानानिन य़ङ्‌हुप काचिन्‍पाचि खोन्‍कि फरिसिचि ओ! खानानिन कोङ्‌क़त्‌वाचि ओ! देकिनालो खानानिन्‌आ म़नाचिओ अ़चुबुदा निनाम्‍हाङ्‌होन्‌ओ अ़लाप्‍तिखोप त़छेक्‍तुम्‌योम। ना खानानिन त़वाङिन ना वाङ्‌मा कालाम्‌चि वाङ्‌मा त़प़म्‍च़म।

मत्‍ति 23:14

[अ़चाअ़त्‍मादा त़छुक्‍तिन साय्‌योक काचिन खोन्‍कि फरिसिचि ओ! खानानिन कोङ्‌क़त्‌वाचि ओ! देकिनालो मेन्‍मित्‍माचिओ अ़चुखिम्‌चि त़ङाप्‍तुम्‍च़म, खोन्‍किना म़नाचिआ साम्‌योक्‍मिनि ऩमित्‍तिन्‍काने निकिना खानानिन ब़द्‍धे मेत्‍लोदा यात़मारिन। खोन्‌ओसा निचिदाङ्‌का च़लोक खानानिन दन्‍दा त़तोक्‍तुम।]

मत्‍ति 9:11

ओ अ़खाकिना फरिसिचिआ येसुओ अ़चुकाखेङ्‌पाचि म़सेनुचि, “देकि आम्‍नुओ काचिन्‍पा दाम्‍दु कालात्‌चि खोन्‍कि हेवामिचिएनान चा म़चायाङ?”

लुका 16:2

खोन्‌ओसा कातोक म़नाआ अ़खिम काचि काखाङ्‌पा बुत्‍तुकि लो, ‘आम्‍तुक्‌वादा अ़ङ्‌का ओ दि एनुङ्‌योङ? खाना त़खाङुओ काचिओ छाप्‍मायुङ्‌माय़ङ्‌चि लासाङ्‌पुवाङ। देकिनालो हान्‌दाङ्‌का खाना अ़ङ्‌खिम्‌दा ओ काचि मुमा त़खान्‍नान।’

लुका 6:37

नि म़नाचि छ़ङ्‌मान्‍छेन्‍दानुम्‍च़म, खोन्‍कि खानानिन्‌छाङ निनाम्‍हाङ्‌आ छ़ङ्‌ऩछेन्‍तिमिन। निचि मान्‍ह़त्‍दानुम्‍च़म, खोन्‍कि निनाम्‍हाङ्‌आछाङ खानानिन ऩह़त्‍नानिमिन। निचिआ अ़फिसाओ लेत्‍तापुवानुम्‍च़म खोन्‍कि निनाम्‍हाङ्‌आछाङ खानानिन्‌आ त़फिसुम्‌ओ ऩलेत्‍तिन्‍प़न।

युहन्‍ना 3:10

येसुआ मो अ़लासालोवा, “खाना इस्राएल्‌दाओ काचिन्‍पा ओ, खोन्‍नुछाङ ओ य़ङ्‌चि त़तुप्‍तुन्‍चिन?

छाम्‍माय़ङ 13:1

एन्‍तिओखिया सहरादाओ साम्‍भुङ्‌दा निनाम्‍हाङ्‌य़ङ खाकालुचि खोन्‍कि काचिन्‍पाचि म़याआङा। मोचि बारनाबास, माक़च़क्‍पानि लोवाङाओ सिमियोन, कुरेनिदाओ लुकियस, हेरोद हाङ एन्‍तिपास्‌ओ अ़छायुङ्‌काओ अ़यावा मनेन खोन्‍कि सावल म़याआङा।

१ कोरिन्‍थि 12:28

निनाम्‍हाङ्‌आ साम्‍भुङ्‌दा बुयाओ छाम्‍माय़ङ्‌चि, ह्‍वातात्‌ओतात निनाम्‍हाङ्‌य़ङ खाकालुचि, सुम्‌कातात्‌ओतात काचिन्‌चि, खोन्‍किना म़दोम्‍दाओ काचि कामुचि, खोन्‍कि नुमा सावा कातोक्‌चि, निचि काफाचि, बुसुवाओ सावा कातोक्‌चि, खोन्‍कि अ़खाला-अ़खालाओ य़ङ्‌चि काचेप्‌चि म़छेन्‍तुचि।

२ कोरिन्‍थि 5:10

देकिनालो आन्‍कान झारा ख्रिस्‍तओ अ़चुछ़ङ्‌छेन्‍खाओ अ़बुदा एप्‍माङादोत, ओवात्‍नि आन्‍पोक्‌दा युङिन्‌येन्‌हिदा आन्‍कान मुम्‌ओवा झारासाआ अ़नुवाक माङ्‌लो अ़अ़त्‍पाओ अ़सिवा तोक्‍तुम।

एफिसि 4:11

खोन्‍कि खोक्‍कोसोओ अ़चुओ मोहामाय़ङ्‌चि ओचिङा ओ, खा-खाक्‍को छाम्‍माय़ङ्‌चि, खा-खाक्‍को निनाम्‍हाङ्‌य़ङ खाकालुचि, खा-खाक्‍को नुय़ङ्‌खान खाकालुचि, खा-खाक्‍को साम्‍भुङ्‌दाओ काखाङ्‌चि खोन्‍कि खा-खाक्‍को काचिन्‌चि म़छेन्‍तुचि।

१ तिमोथि 1:7

मोचि मोसाओ अ़य़ङ्‌हुप काचिन्‍पाचि लिमा म़लाम, मेन आप्‍पि म़चेप्‌ओ य़ङ मोचिआ ऩतुप्‍तुन माङ्‌लो राक्‌एनान अ़छ़ङ अ़मुओ अ़तुक्‌वादाछाङ मोचिआ ऩतुप्‍तुन।

१ तिमोथि 2:7

ओ सालुम्‍स़ङ्‌ओ निम्‍पाङ साकोङ्‌छ़ङ खोन्‍कि अ़छ़ङ्‌ओ अ़तुक्‌वादा निरावाचि नुय़ङ्‌खान खाएत्‍माचि निम्‍पाङ अ़ङ्‌का खाकालु खोन्‍कि छाम्‍माय़ङ्‌दा ऩछेन्‍ताङ्‌ओ। अ़ङ्‌का अ़नुछ्‍या य़ङ्‌ङाङा, अ़ङ्‌का अ़म़प्‍ऩङ्‌ऩङ!

२ तिमोथि 1:11

खोन्‍कि ओ नुय़ङ्‌खान्‌ओ निम्‍पाङ अ़ङ्‌का अ़क्‍छा खाकालु, खोन्‍कि छाम्‍माय़ङ खोन्‍कि काचिन ऩछेन्‍ताङ।

हिब्रु 13:17

आम्‍नुओ बुसुवाचिआ ऩलोन्‌ओवा चुवानिन, खोन्‍कि मोचिओ अ़चुपाङ्‌दा युङानिन। देकिनालो मोचिओ अ़चुकाचि खानानिन खाङ्‌मा ओ, मोचिआ निनाम्‍हाङ खाएत्‍मादोत। खोन्‌ओसा ओ काचि मोचिआ अ़चुऩङानुयाङ्‌सा अ़मुने, खोन्‍कि ह़त्‍पादा माआङ। माङ्‌नालो खानानिन नुलोक त़लिसिमिन।

याकुब 1:16

अ़ङ्‌का सोमातुक्‍नाङ्‌नानिन्‌ओ ब़ब़, नाना खोन्‍कि निछाचि ओ, मान्‍धादानिन।

याकुब 1:19

अ़ङ्‌का सोमातुक्‍नाङ्‌नानिन्‌ओ अ़ङ्‍ब़ब़, नाना खोन्‍कि निछाचि ओ, ओ य़ङ तुप्‍तानुम, झारा म़ना एन्‍मादा च़क्‍नि, चेप्‍मादा स़लेनि खोन्‍कि माइसुङ्‌कात्‍मादा स़लेनि लिमादोत।

याकुब 3:10

अ़क्‌तात दोदाङ्‌का चोन्‍मा खोन्‍कि माङ्‌हिम लोन। अ़ङ्‍ब़ब़, नाना खोन्‍कि निछाचि ओ, ओवात्‍नि लिमा अ़नुनिन।

१ पत्रुस 5:3

खानानिन खाङ्‌मा ऩप़न्‌ओचि तिम्‌याङ्‌सा माआङ, मेन अ़लोकाचिओ अ़मात्‍ऩङ लिसानिन।