२ कोरिन्‍थि 6:16 - बान्‍तावा राई

¹⁶ सेम्‍पोक्‌एनान निनाम्‍हाङ्‌ओ अ़चुब़क्‍खाखिम देत्‍नि तोङ्‌मा? देकिनालो आन्‍कान अ़ह़ङ निनाम्‍हाङ्‌ओ अ़चुब़क्‍खाखिम ओ। निनाम्‍हाङ ओवात्‍नि म़य़ङायुङ्‌सा, “‘अ़ङ्‌का मोचिएदा याक्‍ङा, खोन्‍कि मोचिओ अ़चुरादा कोन्‍ङा, खोन्‍कि अ़ङ्‌का मोचिओ अ़चुनिनाम्‍हाङ लिङा, खोन्‍किना मोचि अ़ङ्‌म़ना म़लि।’

२ कोरिन्‍थि 6:16 ပူးပေါင်းရင်းမြစ်များ

मत्‍ति 16:16

सिमोन पत्रुस्‌आ लासुलो, “खानानिन ख्रिस्‍त ओ, अ़ह़ङ निनाम्‍हाङ्‌ओ अ़चुछा ओ।”

मत्‍ति 6:24

साङ्‌आछाङ ह़वाङ अ़हाङ्‌पाचि ब़त्‍मा अ़ऱन्‍चिन। देकिनालो मोसाआ अ़क्‍छा ऩङाछिरु, खोन्‍कि नि सोमातुक्‍तु, माङ्‌नालो मोसाआ अ़क्‍छा साया मेत्‍तु खोन्‍कि नि साया पेप्‍तु। खानानिन्‌आ निनाम्‍हाङ खोन्‍कि चासुम्‍छेन्‍बि ह्‍वातात्‍माङ ब़त्‍मा त़ऱन्‍मिन।

लुका 5:36

येसुआ निछाङ अ़क्‌तात दोय़ङ्‌ला खाम़एत्‍तुचि, “साङ्‌आछाङ अ़ऩङ्‌वा तित्‌दाङ्‌का अ़क्‍धाङ रेउकि अ़पेत्‌वा तित अ़भोक्‍तुन। मोवात्‍नि भोक्‍तुनालो अ़ऩङ्‌वा तित्‌छाङ रेउखाइसु खोन्‍कि अ़ऩङ्‌वा तित्‌दाङ्‌का रेआओ अ़धाङ अ़पेत्‌वा तित्‌एनान्‌छाङ अ़तोङ्‌निन।

युहन्‍ना 14:23

येसुआ अ़लासालोवा, “साङ्‌आ अ़ङ्‌का सोमाअ़तुक्‍ङा, मोसाआ अ़ङ्‌चेम्‍मा य़ङ्‌चि मुचि, खोन्‍कि अ़ङ्‌पापाआ मो सोमाअ़तुक, खोन्‍कि आन्‍काचिआ मोएदा ताच्‍या, खोन्‍कि मोएदा याक्च्‍या।

युहन्‍ना 6:56

अ़ङ्‌पोक काचा खोन्‍कि अ़ङ्‌ह़ कादुङ अ़ङ्‌काएदा युङ, खोन्‍कि अ़ङ्‌का मोएदा युङ्‌ङा।

रोमि 8:11

येसु म़सुवादाओदाङ्‌का अ़ह़ङ कामुओ अ़चुलावा खानानिन्‌एदा म़याक्‌नालो ख्रिस्‍त येसु म़सुवादाओदाङ्‌का काह़ङ्‌लोन्‌आ खानानिन्‌एदा कायाक खोक्‍कोसोओ अ़चुलावालाम्‍पा स़दाओ आम्‍नुओ पोक्‌छाङ ह़ङ्‌म़ङ अ़प़।

रोमि 8:9

मेन खानानिन आम्‍नुओ हेवामि मित्‍माचिआ ऩक़म्‍तिमिन्‌येन। खानानिन्‌एदा निनाम्‍हाङ्‌ओ अ़चुलावा म़युङ्‌याङ्‌नालो खानानिन सेङ्‌लावाआ ऩक़म्‍तिन्‌युङ्‌सिन। मेन साङ्‍एदा ख्रिस्‍तओ अ़चुलावा ऩयाक्‍निन, मो म़ना ख्रिस्‍तओ माआङ।

रोमि 9:26

“खोन्‍किना, खादा ‘खानानिन अ़ङ्‌म़नाचि माआङ’नि ऩलोन्‌ओ, मोदाङा मोचि ‘अ़ह़ङ निनाम्‍हाङ्‌ओ अ़चुछाचि’नि म़लोचि।”

१ कोरिन्‍थि 10:21

खानानिन हाङ्‌पाओ अ़चुलाङ्‌चोक्‍खुङ्‌दाङ्‌का दुङ्‌मा खोन्‍कि चाकावालावाचिओ अ़चुलाङ्‌चोक्‍खुङ्‌दाङ्‌काछाङ दुङ्‌मा त़ऱन्‍मिन। खानानिन हाङ्‌पाओ अ़चुतेबलादाङ्‌का चामा खोन्‍कि चाकावालावाचिओ अ़चुतेबलादाङ्‌का अ़क्‍धुवा चामा त़ऱन्‍मिन।

१ कोरिन्‍थि 6:19

आम्‍नुओ पोक निनाम्‍हाङ्‌ओ सेङ्‌लावाओ अ़चुब़क्‍खाखिम्‌ओ निकिना दि खानानिन त़सिन्‍तिमिन्‌येन? मो सेङ्‌लावा खानानिन्‌आ निनाम्‍हाङ्‌दाङ्‌का त़तोक्‍तुम्‌युङ्‌सुम, खोन्‍कि खोक्‍को खानानिन्‌एदा म़याक। खानानिन्‌छाङ आम्‍नुओ माआङ।

एफिसि 2:20

देकिनालो खानानिन छाम्‍माय़ङ्‌चि खोन्‍कि निनाम्‍हाङ्‌य़ङ खाकालुचिओ अ़चुछ़ङ्‌दा त़लिसिन्‌युङ्‌सिन, खोन्‍कि ख्रिस्‍त आप्‍पि मुलो खुचुरोङ लुङ म़लिसायुङ्‌सा।

एफिसि 2:22

खोन्‍किना सेङ्‌लावादा निनाम्‍हाङ्‌ओ अ़चुयुङ्‌खा लिसि खानानिन्‌छाङ खोक्‍कोएदा अ़क्‍नि त़लिसिन्‌येन।

एफिसि 3:17

खोन्‍कि साकोङ्‌छ़ङ्‌लाम्‍पा ख्रिस्‍त आम्‍नुओ साकोङ्‌वाचिदा म़याक्‍ने, खोन्‍कि सोम्‍तुक्‍मादा आम्‍नुओ भेन पाक्‍तुओ खोन्‍कि छ़ङ युङ्‌सानुम निम्‍पाङ अ़ङ्‌का यामात्‍ङा।

१ तिमोथि 3:15

मेन अ़ङ्‌का बान्‍मा छ़ङानालो निनाम्‍हाङ्‌ओ अ़चुखिम्‍लुम्‍पादा देत्‍नि तुङ्‌मादोत मो खानानिन सिन्‍मादोत। ओ खिम्‍लुम्‍पा अ़ह़ङ निनाम्‍हाङ्‌ओ अ़चुसाम्‍भुङ ओ, खोन्‍कि अ़नुछ्‍याओ अ़तोम्‍खा खोन्‍कि छ़ङ ओ।

२ तिमोथि 1:14

खाना ऩपुवाओ अ़नुवाक य़ङ्‌चि आन्‍कान्‌एदा कायाक सेङ्‌लावाओ अ़सावाआ रात्‍तुयुङ्‌सु।

हिब्रु 3:6

मेन ख्रिस्‍त निनाम्‍हाङ्‌ओ अ़चुखिम्‌दा पाङ कामु छावात्‍नि सोम्‍कुवा मुमा खान्‍तुओ म़मुयाङ। खोन्‍कि आन्‍कान तोक्‍पो लिमायु आन्‍राक खोन्‍कि ख्रिस्‍तएदाओ आन्‍सोम्‍कुवा क़क्‍तुम्‌युङ्‌सुम्‌नालो आन्‍कान खोक्‍कोसोओ अ़चुखिम्‌दाओ म़नाचि ओ।

हिब्रु 8:10

हाङ्‌पा निनाम्‍हाङ म़य़ङ्‌याङ, मो लेन अ़ङ्‌का इस्राएल्‌दाओ म़नाचिएनान ओ य़ङ्‌छ़ङ मुङ, मोचिओ अ़चुमिन्‍माचिदा अ़ङ्‌य़ङ्‌हुप युङ्‌सुङ, खोन्‍कि अ़चुओ साकोङ्‌वाचिदा मोचि छाप्‍तुङ्‌प़ङ्‌च़ङ, खोन्‍कि अ़ङ्‌का मोचिओ अ़चुनिनाम्‍हाङ लिङा, खोन्‍कि मोचि अ़ङ्‌म़नाचि म़लि।

याकुब 4:5

“निनाम्‍हाङ्‌आ आन्‍कान्‌एदा म़पाक्‍तापुवाओ लावा अ़न्‍नुनु ऩङ्‌च़आ भेप्‍तुयुङ्‌सु”नि साम्‍कालिन्‌दा छाप्‌याङ्‌ओ य़ङ खानानिन्‌आ सोज्‍जेनि त़मित्‍तुम्‌योम?

१ पत्रुस 2:5

खोन्‍कि खानानिन्‌छाङ येसु ख्रिस्‍तलाम्‍पा निनाम्‍हाङ्‌आ लोक्‍माखान्‍तुओ लावामि हेन्‍खोक्‌वाचि काधान सेङ्‌याङ्‌ओ काब़क्‍पा लिमा निम्‍पाङ अ़ह़ङ लुङ्‌चिवात्‍नि लावामि खिम लियाङ्‌सा त़खारिन।

१ युहन्‍ना 4:12

साङ्‌आछाङ निनाम्‍हाङ देम्‍खाछाङ मान्‍खाङ्‌युक्‍तु। मेन आन्‍कान अ़क्‍छा निएदा सोमातुक्‍मुन्‌नालो निनाम्‍हाङ आन्‍कान्‌एदा म़युङ, खोन्‍कि खोक्‍कोसोओ अ़चुसोम्‍तुक्‍मा आन्‍कान्‌एदा ताला।

१ युहन्‍ना 4:15

साङ्‌आ येसु निनाम्‍हाङ्‌ओ अ़चुछा निकिना लोउ, मोएदा निनाम्‍हाङ म़युङ, खोन्‍कि मो निनाम्‍हाङ्‌एदा युङ।

खाङ्‌मुमा 2:1

“एफिससदाओ साम्‍भुङ्‌ओ निनाम्‍हाङ काफा खाना ओ य़ङ छाप्‍तु। ओ य़ङ्‌खान सात्‌कातात साङ्‌केन्‍माचि अ़चुचुप्‍ताङ्‌छुक्‌दा काक़क्‍क खोन्‍कि सात्‌कातात हाराक्‌वाओ कुपि युङ्‌खाचिओ अ़चुरादा काकोन म़य़ङ्‌याङ।

खाङ्‌मुमा 21:3

हाङ्‌युङ्‌खादाङ्‌का ओवात्‍नि य़ङाओ अ़क्‌तात अ़धिवा य़ङ अ़ङ्‌का एनुङ, “हान, निनाम्‍हाङ्‌ओ अ़चुयुङ्‌खा म़नाचिएनान लिसायुङ्‌सा। खोक्‍को मोचिएदा म़युङ, खोन्‍कि मोचि खोक्‍कोसोओ अ़चुम़नाचि म़लि। खोन्‍कि निनाम्‍हाङ आप्‍पि मोचिएनान म़युङ, खोन्‍कि खोक्‍को मोचिओ अ़चुनिनाम्‍हाङ म़लि।

खाङ्‌मुमा 21:7

साङ्‌चि म़छो मोचिआ अ़ङ्‌काएदाङ्‌का ओ पाङ्‌यि अ़तोक, खोन्‍कि अ़ङ्‌का मोचिओ अ़चुनिनाम्‍हाङ लिङा, खोन्‍कि मोचि अ़ङ्‌छाचि म़लि।