الرُّؤْيَا 7:2 - العهد الجديد بالدارجة التونسية 2022

² ومْبَعِّدْ شُفْتْ مَلَاكْ آخِرْ جَايْ مِالشَّرْقْ هَازِزْ خِتْمْ اللَّهْ الحَيْ، وعَيِّطْ بْصُوتْ عَالِي لِلأَرْبْعَة مْلَايْكَة الِّي مِتْكَلْفِينْ بَاشْ يْضُرُّوا البَرْ والبْحَرْ،

الرُّؤْيَا 7:2 ပူးပေါင်းရင်းမြစ်များ

مَتَّى 16:16

جَاوِبْ سِمْعَانْ بُطْرُسْ: «إِنْتِ المَسِيحْ إِبْنْ اللَّهْ الحَيْ».

مَتَّى 26:63

آمَا يَسُوعْ بْقَى سَاكِتْ. والكَاهِنْ الكْبِيرْ قَالُّو: «حَلَّفْتِكْ بِاللَّهْ الحَيْ قُولِلْنَا: يَاخِي إِنْتِ المَسِيحْ إِبْنْ اللَّهْ؟».

يُوحَنَّا 6:27

إِسْعَاوْ وْرَاء المَاكْلَة الِّي تْدُومْ لِلْحَيَاةْ الأَبَدِيَّة، مُشْ وْرَاء المَاكْلَة الِّي تِفْنَى. المَاكْلَة هَاذِي يَعْطِيهَالْكُمْ إِبْنْ الإِنْسَانْ الِّي خِتْمُو اللَّهْ الآبْ».

كُورِنْثُوسْ الثَّانْيَة 1:22

وهُوَّ زَادَا الِّي حَطْ عْلِينَا طَابِعْ المِلْكِيَّة مْتَاعُو، وعْطَانَا الرُّوحْ القُدُسْ فِي قْلُوبْنَا كِيمَا العَرْبُونْ.

أَفَسُسْ 1:13

وفِي المَسِيحْ إِنْتُومَا زَادَا، كِي سْمَعْتُوا كِلْمِةْ الحَقْ، البْشَارَة الِّي فِيهَا نْجَاتْكُمْ وأَمَّنْتُوا، حَطْ اللَّهْ عْلِيكُمْ طَابَعْ المِلْكِيَّة مْتَاعُو كِي عْطَاكُمْ الرُّوحْ القُدُسْ الِّي وْعِدْ بِيهْ.

أَفَسُسْ 4:30

ومَا تْحَزْنُوشْ رُوحْ اللَّهْ القُدُّوسْ، الِّي هُوَّ طَابَعْ المِلْكِيَّة الِّي حَطُّو اللَّهْ عْلِيكُمْ لِلنْهَارْ الِّي تِكْمِلْ فِيهْ الفِدْيَة.

تْسَالُونِيكِي الأُولَى 1:9

وهُومَا يَحْكِيوْ كِيفَاشْ قْبِلْتُونَا كِي جِينَاكُمْ، وكِيفَاشْ عْرَفْتُوا اللَّهْ وكِيفَاشْ بْعِدْتُوا عَالصْنَبْ بَاشْ تِعْبْدُوا اللَّهْ الحَيْ الحَقِيقِي،

تِيمُوثَاوُسْ الثَّانْيَة 2:19

آمَا السَّاسْ الصْحِيحْ الِّي حَطُّو اللَّهْ رَاهُو يَبْقَى ثَابِتْ، مَخْتُومْ بِالكْلَامْ هَاذَا: «الرَّبْ يَعْرِفْ النَّاسْ الِّي تَابْعِينُو» و «الِّي يُذْكُرْ إِسْمْ الرَّبْ يِلْزْمُو يِبْعِدْ عَالشَّرْ».

العِبْرَانِيِّينْ 12:22

آمَا إِنْتُومَا جِيتُوا لِجْبَلْ صِهْيَوْنْ، لِمْدِينِةْ اللَّهْ الحَيْ، أُورْشَلِيمْ الِّي فِي السْمَاء، ولْآلَافْ مِالمْلَايْكَة المَلْمُومِينْ والمُحْتَفْلِينْ،

الرُّؤْيَا 1:3

صَحَّة لِيهْ الِّي يَقْرَى كْلَامْ النُّبُوءَة هَاذِي لِلنَّاسْ، وصَحَّة لِيهُمْ الِّي يِسْمْعُوهَا ويْطِيعُوا المَكْتُوبْ فِيهَا، عْلَى خَاطِرْ الوَقْتْ قْرُبْ.

الرُّؤْيَا 10:1

ومْبَعِّدْ شُفْتْ مَلَاكْ آخِرْ قْوِيْ هَابِطْ مِالسْمَاء مَلْفُوفْ بْغِيمَة، وفُوقْ رَاسُو قَوْسْ قُزَحْ، ووِجْهُو كِيفْ الشَّمْسْ، وسَاقِيهْ كِي زُوزْ عْرُصْ نَارْ،

الرُّؤْيَا 10:4

ووَقْتِلِّي نَطْقُوا الرْعُودْ السَّبْعَة، حَضَّرْتْ رُوحِي بَاشْ نِكْتِبْ، يَاخِي سْمَعْتْ صُوتْ مِالسْمَاء يْقُلِّي: «مَا تِكْتِبْشْ الِّي نَطْقِتْ بِيهْ الرْعُودْ السَّبْعَة، خَلِّيهْ سِرْ».

الرُّؤْيَا 16:12

وصَبْ المَلَاكْ السَّادِسْ كَاسُو عْلَى وَادْ الفُرَاتْ الكْبِيرْ يَاخِي مَاهْ شَاحْ، بَاشْ يِتْحَلْ الطْرِيقْ لِلْمُلُوكْ الجَايِينْ مِالشَّرْقْ.

الرُّؤْيَا 5:2

وشُفْتْ مَلَاكْ قْوِي يْعَيِّطْ بْصُوتْ عَالِي: «شْكُونُو الِّي يِسْتَاهِلْ إِنُّو يْحِلْ الكْتَابْ ويْنَحِّي خْتُومُو؟».

الرُّؤْيَا 8:3

وجَاء مَلَاكْ آخِرْ هَازِزْ مَبْخْرَة ذْهَبْ ووْقِفْ بَحْذَا المَذْبَحْ، وتِعْطَالُو بَرْشَة بْخُورْ بَاشْ يْقَدْمُو مْعَ صْلَاوَاتْ القِدِّيسِينْ عْلَى مَذْبَحْ الذَهَّبْ الِّي قُدَّامْ العَرْشْ.

الرُّؤْيَا 9:14

قَالْ لِلْمَلَاكْ السَّادِسْ الِّي عَنْدُو البُوقْ: «سَيِّبْ الأَرْبْعَة مْلَايْكَة الِّي مَرْبُوطِينْ فِي نَهْرْ الفُرَاتْ الكْبِيرْ».

الرُّؤْيَا 9:4

وتِعْطَالُو أَمْرْ بَاشْ مَا يْضُرِّشْ حْشِيشْ الأَرْضْ والزَّرْعْ والشْجَرْ، آمَا يْضُرْ كَانْ النَّاسْ الِّي مَا عَنْدْهُمْشْ خِتْمْ اللَّهْ عْلَى جْبِينْهُمْ،