दरसनन के बातँय 2:9 - Bagheli Bible

⁹ हम तोंहरे कस्ट अउर गरीबी काहीं जानित हएन; (पय तूँ धनी हया) अउर जउन मनई अपने-आप काहीं यहूदी कहत हें, अउर आहीं न, बलकिन सइतान के सभा आहीं, उनखे बुराई काहीं घलाय जानित हएन।

दरसनन के बातँय 2:9 ပူးပေါင်းရင်းမြစ်များ

मत्ती 4:10

तब यीसु ओसे कहिन, “हे सइतान हमसे दूरी होइजा, काहेकि पबित्र सास्त्र माहीं लिखा हय, कि ‘तूँ अपने प्रभू परमातिमा के गोड़न गिरा, अउर केबल उनहिन के अराधना करा’।”

लूका 12:21

अइसन उआ मनइव हय, जउन अपने खातिर धन-सम्पत्ति जोरत हय, पय परमातिमा के नजर माहीं धनी नहिं आय।”

लूका 22:65

अउर ऊँ पंचे उनखर खुब अपमान करत अउर अपमानजनक बातँय कहत रहे हँय।

लूका 4:18

“प्रभू के आत्मा हमरे भीतर हय, एसे कि परमातिमा कंगालन काहीं खुसी के खबर सुनामँइ के खातिर हमार अभिसेक किहिन हीं, अउर हमहीं एसे पठइन हीं, कि बंदिन काहीं छोड़ामँइ के अउर अँधरन काहीं आँखी पामँइ के खुसी के खबर के प्रचार करी, अउर दबे-कुचले लोगन काहीं बन्धन से छोंड़ाई।

लूका 6:20

तब यीसु अपने चेलन कइती देखिके कहिन, “धन्य हया तूँ पंचे जउन दीन हया, काहेकि परमातिमा के राज तोंहरय आय।”

यूहन्ना 16:33

ईं बातन काहीं तोंहसे हम एसे कहेन हय, कि हमरे व्दारा तोंहईं सान्ती मिलय; संसार माहीं तोंहईं दुख मिलत हय, पय ढाढ़स बाँधा, हम संसार काहीं जीत लिहेन हय।”

खास चेलन 14:22

अउर चेलन के मन काहीं स्थिर करत रहिगें, अउर उपदेस देत रहे हँय, कि हमहीं पंचन काहीं खुब कस्ट सहिके परमातिमा के राज माहीं प्रबेस करँइ परी।

खास चेलन 26:11

अउर हरेक यहूदी सभाघरन माहीं, हम उनहीं सजा देबाय-देबाइके यीसु के बुराई कराबत रहे हएन, अउर क्रोध के मारे इहाँ तक पागल होइ गएन तय, कि दुसरे प्रदेस के सहरन माहीं घलाय जाइके, उनहीं परेसान करत रहे हएन।

रोमियन 12:12

अउर अपने आसा माहीं आनन्दित रहा; दुख-मुसीबत माहीं धीरज रक्खा; अउर हमेसा प्राथना करँइ माहीं लगे रहा।

रोमियन 2:17

पय अगर तूँ अपने-आप काहीं यहूदी कहते हया, अउर मूसा के बिधान माहीं तोंहार बिसुआस हय, अउर अपने अउर परमातिमा के सम्बन्ध के बारे माहीं तोंहईं घमन्ड हय।

रोमियन 5:3

केबल एतनय भर नहीं, बलकिन हमहीं पंचन काहीं दुख-मुसीबत माहीं घलाय आनन्द मनामँइ चाही, इआ जानिके कि दुख-मुसीबत से धीरज पइदा होत हय।

रोमियन 8:35

अउर हमहीं पंचन काहीं मसीह के प्रेम से कोऊ अलग नहीं कइ सकय, चाह उआ दुख-मुसीबत होय, चाह हमरे ऊपर अत्याचार होय, चाह अकाल होय, चाह पहिनँय के खातिर ओन्हव न होय, चाह उआ जोखिम होय, अउर चाह उआ तलबारय काहे न होय?

रोमियन 9:6

पय अइसा नहिं आय कि परमातिमा आपन बचन पूर नहीं किहिन, काहेकि जेतने इजराइल के बंस के हें, उनमा से सगले जने परमातिमा के चुने न होंहीं।

2 कुरिन्थियन 6:10

अउर हमहीं पंचन काहीं सोक करँइ बालेन कि नाईं माना जात हय, पय हम पंचे हमेसा आनन्दित रहित हएन, अउर हम पंचे कंगालन कि नाईं देखइत हएन, पय खुब मनइन काहीं आत्मिक रूप से धनी बनाय देइत हएन। अउर मनई समझत हें, कि हमरे पंचन के लघे कुछू नहिं आय, तऊ हमरे पंचन के लघे सब कुछ रहत हय।

2 कुरिन्थियन 8:2

हम इआ बात काहीं एसे बताइत हएन, कि जब उनखे जीबन माहीं दुख-मुसीबत के कारन बड़ी परिच्छा आईं तय। तऊ ऊँ पंचे खुसी रहे हँय, अउर उनखे ऊपर भारी गरीबी आय गे रही हय। तऊ उनखर दान देंइ के उदारता कम नहीं भय, बलकिन बढ़िनगे रही हय।

2 कुरिन्थियन 8:9

अउर तूँ पंचे हमरे पंचन के प्रभू यीसु मसीह के किरपा काहीं जनतेन हया, कि ऊँ केतना धनी रहे हँय, तऊ ऊँ तोंहरे पंचन के खातिर एसे कंगाल बनिगें, कि जउने तूँ पंचे उनखे कंगाल होंइ से धनी बन जा।

1 थिस्सलुनीकियन 3:4

काहेकि पहिलेव, जब हम पंचे तोंहरे लघे रहेन हय, त तोंहसे कहा करत रहेन हय, कि हमहीं पंचन काहीं दुख-मुसीबत सहँय क परी, अउर अइसनय भाबय भ, अउर तूँ पंचे जनते घलाय हया।

1 तीमुथियुस 1:13

हम त पहिले यीसु मसीह के अपमान करँइ बाले रहेन हय, अउर बिसुआसी लोगन काहीं सतामँइ बाले, अउर उनखे ऊपर अत्याचार करँइ बाले रहेन हय; तऊ प्रभू हमरे ऊपर दया किहिन, काहेकि जब हम प्रभू के ऊपर बिसुआस नहीं करत रहेन, उआ दसा माहीं बिना समझे बूझे ईं काम किहेन रहा हय।

1 तीमुथियुस 6:18

अउर ऊँ भलाई करँइ अउर भलाई के कामन काहीं करँइ माहीं धनी बनय, अउर ओदार, अउर अपने धन से दुसरेन के मदत करँइ के खातिर हमेसा तइआर रहँय।

दरसनन के बातँय 1:9

हम यूहन्ना, जउन तोंहार पंचन के भाई, अउर यीसु के कस्ट, अउर राज, अउर धीरज माहीं, तोंहार पंचन के सहभागी आहेन, परमातिमा के बचन, अउर यीसु के गबाही के कारन, पतमुस नाम के टापू माहीं रहेन हय।

दरसनन के बातँय 2:13

हम इआ त जानित हएन, कि तूँ उहाँ रहते हया, जहाँ सइतान के सिंहासन हय; अउर तूँ हमरे नाम माहीं बने रहते हया; अउर हमरे ऊपर बिसुआस करँइ से, उन दिनन माहीं पीछे नहीं हट्या, जउने माहीं हमार बिसुआस के काबिल गबाह अन्तिपास, तोंहरे पंचन के बीच माहीं, उआ जघा माहीं मार डारा ग, जहाँ सइतान रहत हय।

दरसनन के बातँय 2:2

हम तोंहरे काम, अउर मेहनत, अउर तोंहरे धीरज काहीं जानित हएन; अउर इहव घलाय, कि तूँ बुरे मनइन काहीं बरदास नहीं कइ सकते आह्या, अउर जउन अपने-आप काहीं यीसु मसीह के खास चेला कहत हें, अउर आहीं न, उनहीं पंचन काहीं घलाय तूँ जाँच परखिके लबरा पाया हय।

दरसनन के बातँय 2:24

पय तूँ पंचे थुआतीरा के बाँकी मनइन से, जेतने इआ सिच्छा काहीं नहीं मानँय, अउर ऊँ बातन काहीं जिनहीं सइतान के गहिल बातँय कहत हें, नहीं जनते आह्या, इआ कहित हएन, कि हम तोंहरे पंचन के ऊपर अउर बोझ न डारब।

दरसनन के बातँय 3:9

देखा, हम उन सइतान के पीछे चलँइ बालेन काहीं, तोंहरे काबू माहीं कइ देब, जउन खुद काहीं यहूदी कहत हें, पय आहीं न, बलकिन ऊँ झूँठ बोलँइ बाले आहीं, देखा, हम अइसन करब, कि ऊँ तोंहरे गोड़न गिरि हँय, अउर इआ जान लेइहँय, कि हम तोंहसे प्रेम करित हएन।

दरसनन के बातँय 7:14

हम उनसे कहेन; “हे, मालिक, अपनय जानित हएन।” तब ऊँ हमसे कहिन; “ईं ऊँ पंचे आहीं, जउन उआ महाकस्ट से निकरिके आए हँय; ईं पंचे अपने-अपने ओन्हन काहीं मेम्ना के खून से धोइके उजर किहिन हीं।