दरसनन के बातँय 2:10 - Bagheli Bible

¹⁰ जउन कस्ट तोंहईं उठामँइ परी उनसे डेरा न। काहेकि देखा, सइतान तोंहरे पंचन म से कइअक जनेन काहीं जेल माहीं डारँइ बाला हय, जउने तूँ पंचे जाँचे-परखे जा; अउर तोंहईं पंचन काहीं दस दिन तक कस्ट उठामँइ परी, प्रान देंइ तक बिसुआसी रहा; त हम तोंहईं जीबन के मुकुट देब।

दरसनन के बातँय 2:10 ပူးပေါင်းရင်းမြစ်များ

मत्ती 10:28

अउर जे तोंहरे देंह काहीं नास कइ सकत हें, पय आत्मा काहीं नास नहीं कइ सकँय, उनसे न डेरा, बलकिन उनसे डेरा, जउन तोंहरे देंह अउर आत्मा दोनव काहीं नरक माहीं डारिके नास कइ सकत हें।

मत्ती 24:13

पय जे कोऊ अन्त तक धीरज धरे रही, उहय मुक्ती पाई।

मरकुस 13:13

अउर हमरे बात काहीं मानँइ के कारन सगले मनई तोंहसे दुसमनी रखिहँय; पय जे कोऊ अन्त तक धीरज धरे रही, उहय मुक्ती पाई।

मरकुस 8:35

काहेकि जे कोऊ आपन प्रान बचामँइ चाही, उआ ओही गमाय देई, अउर जे कोऊ आपन प्रान हमरे खातिर अउर खुसी के खबर के खातिर गमाय देई, उआ ओही बचाए पाई।

लूका 21:12

पय ईं सगली बातँय होंइ से पहिले, ऊँ पंचे तोंहईं हमार चेला होंइ के कारन पकड़िहँय, अउर मरिहँय, अउर सभाघरन माहीं सउँपिहँय, अउर जेल माहीं बेंड़बाय देइहँय, अउर राजा लोगन अउर अधिकारिन के लघे लइ जइहँय।

यूहन्ना 12:25

जे कोऊ अपने प्रान काहीं पियार जानत हय, उआ ओही गमाय देई; अउर जे कोऊ इआ संसार माहीं अपने प्रान काहीं पियार नहीं जानय; उआ अनन्त जीबन के खातिर ओखर रच्छा करत रही।

यूहन्ना 13:2

जब यीसु अउर उनखर चेला लोग साँझिके खाना खाँइ बइठ रहे हँय, उआ समय तक सइतान समौन इस्करियोती के लड़िका, यहूदा इस्करियोती के मन माहीं इआ बिचार डार चुका तय, कि उआ यीसु काहीं धोखे से पकड़ाबय।

यूहन्ना 13:27

अउर रोटी के टुकड़ा लेतय सइतान ओही अपने काबू माहीं कइ लिहिस: तब यीसु ओसे कहिन, “जउन तोंहईं करँइ काहीं हय, उआ हरबी करा।”

खास चेलन 20:24

पय हम अपने प्रान काहीं कुछू नहीं समझी, कि ओही पियार जानी, बलकिन इआ, कि हम अपने दउड़ अउर उआ सेबकाई काहीं पूर करी, जउन हम परमातिमा के किरपा के खुसी के खबर के गबाही देंइ के खातिर प्रभू यीसु से पाएन हय।

खास चेलन 21:13

पय पवलुस जबाब दिहिन, कि तूँ पंचे का करते हया, रोइ-रोइके हमरे मन काहीं कमजोर करते हया, हम त प्रभू यीसु के नाम के खातिर यरूसलेम सहर म न केबल बाँधे जाँइन भर काहीं नहीं, बलकिन मरऊँ के खातिर तइआर हएन।

1 कुरिन्थियन 9:25

अउर कुस्ती लड़ँइबाले हरेक पहिलमान, अपने देंह काहीं तइआर करँइ के खातिर, हरेकमेर के कसरत करत हें; अउर ऊँ पंचे त नास होंइ बाले मुकुट काहीं पामँइ के खातिर इआ सगली मेहनत करत हें, पय हम पंचे त उआ मुकुट काहीं पामँइ के खातिर मेहनत करित हएन, जउन कबहूँ नहीं नास होय।

इफीसियन 2:2

अउर तूँ पंचे उन दिनन माहीं, इआ संसार के गलत रास्तन माहीं चलत, अउर उआ आत्मा के मुताबिक जीबन बिताबत रहे हया, जउन इआ धरती के ऊपर के बुरी आत्मिक सक्तिन के स्वामी हय, उहय आत्मा अबहिनव उन मनइन के ऊपर काम करत हय, जउन परमातिमा के हुकुम काहीं नहीं मानँय।

इफीसियन 6:12

काहेकि हमार पंचन के लड़ाई खून अउर माँस अरथात कउनव मनई से नहिं आय, बलकिन हमार पंचन के लड़ाई सइतान अउर ओखे बुरी आत्मन से हय, जउन इआ संसार माहीं राज करत हय, अउर हम पंचे अकास माहीं रहँइ बाली बुरी आत्मन के सक्तिन के साथ लड़ि रहेन हय।

याकूब 1:12

उआ मनई धन्य हय, जउन परिच्छा माही अटल रहत हय, काहेकि परिच्छा माहीं खरा उतरे के बाद, उआ जीबन के मुकुट पाई, जउने काहीं परमातिमा अपने प्रेम करँइ बालेन काहीं, देंइ के बचन दिहिन हीं।

1 पतरस 5:4

अउर जब संसार के रखबारी करँइ बाले परमप्रधान अइहँय, त तोंहईं पंचन काहीं महिमा के मुकुट दीन जई, जउन कबहूँ न मुरझई।

1 पतरस 5:8

अउर तूँ पंचे सचेत होइके, हमेसा परमातिमा के बचन माहीं बने रहा, काहेकि तोंहार बइरी सइतान, गरजँय बाले सेर कि नाईं, हमेसा इआ खोज माहीं रहत हय, कि केही परमातिमा के बचन से भटकाय देई।

दरसनन के बातँय 13:14

ऊँ चमत्कार के कामन के कारन, जिनहीं पहिल खतरनाक जानबर के आँगे देखामँइ के अधिकार ओही दीन ग रहा हय; उआ धरती के रहँइ बालेन काहीं, इआमेर भरमाबत रहा हय, अउर उनसे इआ कहत रहा हय, कि जउने खतरनाक जानबर के तलबार लगी रही हय, उआ जिन्दा होइगा हय, ओखर मूरत बनाबा।

दरसनन के बातँय 13:2

जउन खतरनाक जानबर हम देखेन, उआ चीता कि नाईं रहा हय; अउर ओखर गोड़ भालू कि नाईं रहे हँय, अउर ओखर मुँह सेर कि नाईं रहा हय; अउर उआ अजिगर आपन सक्ती, अउर सिंहासन, अउर बड़ा अधिकार, ओही दइ दिहिस।

दरसनन के बातँय 13:7

अउर उआ खतरनाक जानबर काहीं इआ अधिकार दीन ग, कि पबित्र मनइन से लड़य, अउर उनसे जीत जाय, अउर ओही हरेक कुल, अउर लोग, अउर भाँसा, अउर जाति के ऊपर अधिकार दीन ग।

दरसनन के बातँय 17:14

अउर ऊँ पंचे मेम्ना से लड़िहँय, अउर मेम्ना उनखे ऊपर बिजय पइहँय, काहेकि ऊँ प्रभुअन के प्रभू, अउर राजन के राजा आहीं, अउर जउन बोलाए अउर चुने अउर बिसुआसी हें, ऊँ पंचे उनखे साथ रइहँय; अउर ऊँ पंचे घलाय बिजय पइहँय।”

दरसनन के बातँय 2:13

हम इआ त जानित हएन, कि तूँ उहाँ रहते हया, जहाँ सइतान के सिंहासन हय; अउर तूँ हमरे नाम माहीं बने रहते हया; अउर हमरे ऊपर बिसुआस करँइ से, उन दिनन माहीं पीछे नहीं हट्या, जउने माहीं हमार बिसुआस के काबिल गबाह अन्तिपास, तोंहरे पंचन के बीच माहीं, उआ जघा माहीं मार डारा ग, जहाँ सइतान रहत हय।

दरसनन के बातँय 2:9

हम तोंहरे कस्ट अउर गरीबी काहीं जानित हएन; (पय तूँ धनी हया) अउर जउन मनई अपने-आप काहीं यहूदी कहत हें, अउर आहीं न, बलकिन सइतान के सभा आहीं, उनखे बुराई काहीं घलाय जानित हएन।