दरसनन के बातँय 14:4 - Bagheli Bible

⁴ ईं ऊँ पंचे आहीं, जउन मेहेरिअन के साथ असुद्ध नहीं भे रहे आहीं, बलकिन कुमार हें; ईं उँइन पंचे आहीं, जउन जहाँ कहँव मेम्ना जात रहे हँय, ईं पंचे उनखे पीछे-पीछे चल देत रहे हँय, ईं पंचे त परमातिमा अउर मेम्ना के खातिर, पहिल फल होंइ के खातिर, मनइन म से मोल लीन गे हँय।

दरसनन के बातँय 14:4 ပူးပေါင်းရင်းမြစ်များ

मत्ती 19:12

काहेकि कुछ मनई अइसन हें जउन महतारी के पेटेन से नपुंसक पइदा भें हँय; अउर कुछ मनई अइसन हें, जिनहीं मनइन नपुंसक बनाय दिहिन हीं, अउर कुछ मनई अइसन हें, जे स्वरगराज के खातिर खुद काहीं नपुंसक बनाइन हीं। एसे जे कोऊ इआ बचन काहीं सोइकार कइ सकत हय, त उआ इआ बचन काहीं सोइकार कइ लेय।”

मत्ती 25:1

यीसु एकठे उदाहरन बताइन, कि “स्वरग के राज ऊँ दसठे कुमारिन कि नाईं होई, जउन आपन-आपन मसाल लइके दुलहा से मिलँइ के खातिर अपने घरन से निकरीं।

मत्ती 8:19

तब एक जने मूसा के बिधान सिखामँइ बाला उनखे लघे आइके उनसे कहिस, “हे गुरू, जहाँ कहँव अपना जाब, त हमहूँ अपना के पीछे-पीछे चलब।”

यूहन्ना 10:27

हमार सगली गाड़र हमार बात मनती हँय, अउर हम उनहीं सगलेन काहीं जानित हएन, अउर ऊँ सगली हमरे पीछे-पीछे चलती हँय।

यूहन्ना 12:26

अगर कोऊ हमार सेबा करय, त हमरे पीछे-पीछे चलय; अउर जहाँ हम रहब, उहँय हमार सेबा करँइ बाला घलाय रही; अगर कोऊ हमार सेबा करी, त पिता ओखर आदर करिहँय।

यूहन्ना 13:37

तब पतरस यीसु से कहिन, “हे प्रभू, अबे हम अपना के पीछे काहे नहीं आय सकी? हम त अपना के खातिर जानव देंइ काहीं तइआर हएन।”

यूहन्ना 8:12

तब यीसु पुनि मनइन से कहिन, “संसार के जोति हमहिन आहेन; जे हमरे पीछे चली उआ अँधिआर माहीं न चली, पय जीबन देंइ बाली जोति पाई।”

खास चेलन 20:28

एसे अपना पंचे आपन अउर अपने पूरे झुन्ड के रखबारी करी; जउने खातिर पबित्र आत्मा अपना पंचन काहीं अँगुआ ठहराइन हीं; कि अपना पंचे परमातिमा के मसीही मन्डली के रखबारी करी, जेही ऊँ अपने खून से मोल लिहिन हीं।

1 कुरिन्थियन 16:15

हे भाई-बहिनिव, तूँ पंचे स्तिफनास के घर के मनइन काहीं त जनतेन हया, कि ऊँ पंचे अखाया प्रदेस के पहिल बिसुआसी आहीं, अउर ऊँ पंचे पबित्र लोगन के सेबा करँइ के खातिर हमेसा तइआर रहत हें।

1 कुरिन्थियन 6:20

काहेकि परमातिमा दाम चुकाइके तोहईं पंचन काहीं खरीद लिहिन हीं, एसे तूँ पंचे अपने देंह के द्वारा परमातिमा के बड़ाई करा।

1 कुरिन्थियन 7:28

पय अगर तूँ पंचे काजव कइ लेते हया, त उआ पाप न होय; अउर अगर कउनव कुमारी बिटिया आपन काज करत ही, त उआ कउनव पाप न होय; पय अइसन मनइन काहीं दुख-मुसीबत सहँय क परी, पय हम उनहीं इनसे बचामँइ चाहित हएन।

2 कुरिन्थियन 11:2

काहेकि हम तोंहरे खातिर, परमातिमा कि नाईं चिन्ता करित हएन, एसे कि हम तोंहार पंचन के सगाई एकयठे मनई से अरथात मसीह यीसु से कराय दिहेन हय, कि जउने हम तोंहईं पंचन काहीं पबित्र कुमारी कन्या कि नाईं उनहिन काहीं सउँपि देई।

इफीसियन 1:14

उआ पबित्र आत्मा हमरे पंचन के बारिसदार होंय के बयाना के रूप माहीं, उआ समय तक के खातिर हमहीं पंचन काहीं दीनगा हय, जब तक कि ऊँ हमहीं पंचन काहीं, जउन उनखर मोल लीन आहेन, पूरी तरह से छुटकारा नहीं दइ देंय, इआ कारन सगले मनई उनखे महानता के स्तुति करिहँय।

इफीसियन 5:27

अउर ओही अइसन महिमावान मसीही मन्डली बनाइके अपने आँगे ठाढ़ करँय, जउने माहीं कउनव कलंक न होय, न कउनव दाग धब्बा होय, अउर न ओमाहीं कउनव कमी होय, बलकिन उआ पबित्र अउर निरदोस होय।

1 तीमुथियुस 4:3

जउन काज-बिआह करँइ से रोकि हँय, अउर खाँइ बाली कुछ चीजन काहीं न खाँइ चाही, इआ कहिके उनसे दूरी रहँइ के हुकुम देइहँय; जिनहीं परमातिमा एसे बनाइन हीं, कि बिसुआसी अउर सत्य काहीं जानँइ बाले, परमातिमा काहीं धन्यबाद दइके उनहीं खाँय।

इब्रानियन 12:23

अउर उन पहिलउठिन के साधारन सभा, अरथात मसीही मन्डली के लघे आय गया हय, जिनखर नाम स्वरग माहीं लिखे हँय, अउर सबके न्याय करँइ बाले परमातिमा के लघे, अउर परिपूर्न कीन गईं पबित्र मनइन के आत्मन के लघे आय गया हय।

याकूब 1:18

सत्य के बचन के व्दारा आपन सन्तान बनामँइ के खातिर, परमातिमा हमहीं पंचन काहीं चुनिन हीं, जउने हम पंचे सगले जन, सगले प्रानिन के बीच माहीं, उनखे फसल के पहिल फर साबित होई।

1 पतरस 2:9

पय तूँ पंचे परमातिमा के चुने बंस आह्या, अउर राज पदधारी याजकन के समाज आह्या, अउर पबित्र मनई, अउर परमातिमा के खास प्रजा आह्या, अउर उँइन तोहईं पंचन काहीं, अँधिआर से निकारिके, अपने अदभुत जोति माहीं बोलाइन हीं, कि उनखे महिमा काहीं अपने जीबन से देखाबा।

दरसनन के बातँय 17:14

अउर ऊँ पंचे मेम्ना से लड़िहँय, अउर मेम्ना उनखे ऊपर बिजय पइहँय, काहेकि ऊँ प्रभुअन के प्रभू, अउर राजन के राजा आहीं, अउर जउन बोलाए अउर चुने अउर बिसुआसी हें, ऊँ पंचे उनखे साथ रइहँय; अउर ऊँ पंचे घलाय बिजय पइहँय।”

दरसनन के बातँय 21:22

हम ओमाहीं कउनव मन्दिर नहीं देखेन, काहेकि सर्बसक्तिमान प्रभू परमातिमा, अउर मेम्ना ओखर मन्दिर आहीं।

दरसनन के बातँय 21:23

उआ सहर माहीं सुरिज अउर जोंधइआ के उँजिआर के जरूरत नहिं आय, काहेकि परमातिमा के तेज से, ओमाहीं उँजिआर होइ रहा हय, अउर मेम्ना ओखर दीपक आहीं।

दरसनन के बातँय 3:4

पय हाँ, सरदीस माहीं तोंहरे इहाँ कुछ अइसन मनई हें, जउन अपने-अपने ओन्हन काहीं असुद्ध नहीं किहिन, ऊँ पंचे उजर ओन्हा पहिरे हमरे साथ घुमिहँय, काहेकि ऊँ पंचे एखे काबिल हें।

दरसनन के बातँय 5:9

अउर ऊँ पंचे इआ नबा गाना गामँइ लागें, कि “अपनय इआ किताब काहीं लेंइ, अउर एखर मुहरँय खोलँय के काबिल हएन; काहेकि अपना बध होइके अपने खून से हरेक कुल, अउर भाँसा, अउर लोग, अउर जाति म से परमातिमा के खातिर लोगन काहीं मोल लिहेन हँय।