दरसनन के बातँय 13:16 - Bagheli Bible

¹⁶ अउर उआ दूसर खतरनाक जानबर सगले मनइन काहीं, चाह उआ छोट होय, इआ बड़ा, धनी होय, इआ गरीब, अजाद होय, इआ दास, सगलेन काहीं दहिने हाँथ इआ कि, लिलारे माहीं छाप लगबामँइ के खातिर बिबस किहिस।

दरसनन के बातँय 13:16 ပူးပေါင်းရင်းမြစ်များ

खास चेलन 26:22

पय परमातिमा के सहायता से हम आज तक जिन्दा हएन, अउर छोट-बड़े सगलेन के आँगे गबाही देइत हएन, अउर उन बातन काहीं छोंड़िके कुछू नहीं कही, जउन परमातिमा के सँदेस बतामँइ बाले अउर मूसा घलाय कहिन, कि ऊँ पूर होंइ बाली हईं।

1 कुरिन्थियन 12:13

काहेकि हम बिसुआसिअन म से चाह उआ यहूदी होय, चाह उआ गैरयहूदी होय, चाह उआ दास होय, अउर चाह स्वतंत्र होय, हम पंचे सगले जने एकयठे आत्मा के द्वारा अउर एकय देंह होंइ के खातिर बपतिस्मा लिहेन हँय; अउर हमहीं सगलेन काहीं एकयठे आत्मा दीन ग हय।

गलातियन 3:28

अब उनमा से न कोऊ यहूदी रहिगा, अउर न गैरयहूदी, न कोऊ नोकर रहिगा, न अजाद; न कोऊ मंसेरुआ रहिगा, न मेहेरिआ; काहेकि तूँ पंचे सगले जन मसीह यीसु माहीं एक होइ गया हय।

गलातियन 6:17

चिट्ठी के आखिर माहीं, हम तोंहसे बिनती करित हएन, कि अब कउनव मनई ईं बातन के बारे माहीं हमहीं अउर दुख न देय, काहेकि हम यीसु मसीह के दास आहेन, एसे उनखे घावन काहीं अपने देंह माहीं लए चलि रहेन हँय।

इफीसियन 6:8

काहेकि तूँ पंचे खुदय जनते हया, कि जे कोऊ जेतना निकहा काम करी, उआ ओतनय निकहा प्रभू से प्रतिफल पाई, चाह उआ मालिक होय, चाह सेबक।

कुलुस्सियन 3:11

नबा सुभाव पाए के बाद, यहूदी लोगन अउर गैरयहूदी लोगन माहीं कउनव अन्तर नहीं रहिगा, अउर इहइमेर न खतना कराए मनइन माहीं अउर न बिना खतना कराए मनइन माहीं कउनव अन्तर रहिगा आय, अउर न असभ्य मनइन माहीं, अउर न सभ्य मनइन माहीं, कउनव अन्तर रहिगा आय, अउर न दासन अउर न मालिकन माहीं, कउनव अन्तर रहिगा आय, काहेकि मसीह माहीं सब कुछ एक समान होइ जात हय, अउर उँइन सगलेन के भीतर निबास करत हें।

2 तीमुथियुस 3:8

अउर यन्नेस अउर यम्ब्रेस जइसन मूसा नबी के बिरोध किहिन रहा हय, उहयमेर इऊँ पंचे घलाय परमातिमा के सत्य बचन के बिरोध करत हें, ईं त अइसन मनई आहीं, जिनखर बुद्धी भ्रस्ट होइगे ही, अउर ऊँ परमातिमा के सत्य बचन के बिसुआस करँइ माहीं निकम्मा हें।

दरसनन के बातँय 11:18

अउर गैरयहूदी लोग क्रोध किहिन, अउर अपना के कोप आय पहुँचा हय, अउर उआ समय आइगा हय, कि मरे मनइन के न्याय कीन जाय, अउर अपना के सँदेस बतामँइ बाले सेबकन अउर पबित्र मनइन काहीं, अउर उन छोट-बड़ेन काहीं जउन अपना के नाम से डेरात हें, बदला दीन जाय, अउर धरती के बिगाड़ँइ बाले नास कीन जाँय।”

दरसनन के बातँय 15:2

अउर हम आगी से मिले सीसा कि नाईं, एकठे समुंद्र देखेन; अउर जउन मनई उआ खतरनाक जानबर के ऊपर, अउर ओखे मूरत के ऊपर, अउर ओखे संख्या के ऊपर बिजयी भे रहे हँय, उनहीं पंचन काहीं उआ सीसा के समुंद्र के लघे, परमातिमा के बीना काहीं लए ठाढ़ देखेन।

दरसनन के बातँय 19:18

जउने तूँ पंचे राजन के माँस, अउर मुखिअन के माँस, अउर सूरबीर मंसेरुअन के माँस, अउर घोड़न के अउर उनखे सबारन के माँस, अउर का अजाद, का दास, का छोट, का बड़े, सगले जनेन के माँस खा।”

दरसनन के बातँय 19:20

उआ खतरनाक जानबर, अउर ओखे साथ उआ लबरा नबी, पकड़ा ग, जउन उनखे आँगे अइसन चिन्ह देखाइस रहा हय, जिनखे द्वारा उआ उनहीं पंचन काहीं भरमाइस तय, जिनखे ऊपर उआ खतरनाक जानबर के छाप रही हय, अउर जउन ओखे मूरत के अराधना करत रहे हँय। ईं पंचे दोनव जने जिन्दय, उआ आगी के झील माहीं, जउन गन्धक से जरत रहत ही, डारे गें।

दरसनन के बातँय 19:5

अउर सिंहासन म से एकठे अबाज निकरी, “हे हमरे पंचन के परमातिमा से, डेराँइ बाले छोट-बड़े; सगले दासव, तूँ पंचे उनखर स्तुति करा।”

दरसनन के बातँय 20:12

अउर हम छोट-बड़े सब मरे मनइन काहीं सिंहासन के आँगे ठाढ़ देखेन, अउर किताबँय खोली गईं; अउर पुनि एकठे अउर किताब खोली गे, अरथात जीबन के किताब; अउर जइसन ऊँ किताबन माहीं लिखा रहा हय, उहयमेर उनखे कामन के मुताबिक, मरे मनइन के न्याय कीन ग।

दरसनन के बातँय 20:4

ओखे बाद हम सिंहासनन काहीं देखेन, अउर उनमा लोग बइठिगें, अउर उनहीं न्याय करँइ के अधिकार दीनगा। हम उनखे आत्मन काहीं घलाय देखेन, जिनखर मूँड़ यीसु के गबाही देंइ, अउर परमातिमा के बचन के कारन काटे गे रहे हँय, अउर ऊँ पंचे न उआ खतरनाक जानबर के, अउर न ओखे मूरत के पूजा किहिन तय, अउर न ओखर छाप, अपने लिलारे अउर हाँथन के ऊपर लिहिन तय। ऊँ पंचे जिन्दा होइके मसीह के साथ हजार बरिस तक राज करत रहिगें।

दरसनन के बातँय 6:15

अउर धरती के राजा, अउर प्रधान, अउर मुखिया, अउर धनमान, अउर समरथी लोग, अउर हरेक दास, अउर हरेक अजाद, पहारन के खोहन माहीं, अउर चट्टानन माहीं जाइके लुकिगें।

दरसनन के बातँय 7:3

“जब तक हम अपने परमातिमा के सेबकन के लिलारे माहीं, मुहर न लगाय देई, तब तक धरती, अउर समुंद्र, अउर बिरबन काहीं नुकसान न पहुँचाया।”