दरसनन के बातँय 12:9 - Bagheli Bible

⁹ तब उआ बड़ा भारी अजिगर, अरथात उहय पुरान साँप, जउन इबलीस अउर सइतान कहाबत हय, अउर सगले संसार काहीं भरमामँइ बाला, धरती माहीं गिराय दीन ग; अउर ओखर दूत घलाय ओखे साथ गिराय दीनगें।

दरसनन के बातँय 12:9 ပူးပေါင်းရင်းမြစ်များ

मत्ती 13:39

जउन बइरी आइके उनहीं बोइस ही, उआ सइतान आय; अउर कटाई करब संसार के अन्त आय: अउर काटँय बाले स्वरगदूत आहीं।

मत्ती 24:24

काहेकि लबरे मसीह, अउर परमातिमा के सँदेस बतामँइ बाले लबरे मनई तइआर होइहँय, अउर ऊँ पंचे बड़े-बड़े चिन्ह अउर अचरज के काम देखइहँय, कि होइ सकय त चुने मनइन काहीं घलाय भटकाय देंय,

मत्ती 25:41

अउर तब ऊँ राजा अपने बाएँ कइती बालेन से कइहँय, कि “हे स्रापित मनइव, तूँ पंचे हमरे आँगे से उआ नरक के आगी माहीं चले जा, जउन कबहूँ बुझातिन नहिं आय, जउन सइतान अउर ओखर सेबा करँइ बाले दूतन के खातिर तइआर कीनगे ही।

मत्ती 4:1

यीसु के बपतिस्मा के बाद पबित्र आत्मा उनहीं सुनसान जघा माहीं लइगा, जउने सइतान से उनखर परिच्छा होय।

मत्ती 4:10

तब यीसु ओसे कहिन, “हे सइतान हमसे दूरी होइजा, काहेकि पबित्र सास्त्र माहीं लिखा हय, कि ‘तूँ अपने प्रभू परमातिमा के गोड़न गिरा, अउर केबल उनहिन के अराधना करा’।”

मत्ती 4:5

पुनि सइतान उनहीं पबित्र सहर यरूसलेम माहीं लइगा, अउर मन्दिर के गुम्मट माहीं ठाढ़ किहिस,

मत्ती 4:8

पुनि सइतान यीसु काहीं एकठे खुब ऊँच पहार माहीं लइगा, अउर संसार के सगला राज अउर ओखर बैभव देखाइके,

लूका 10:18

तब यीसु उनसे कहिन, “हम सइतान काहीं बिजुली कि नाईं अकास से गिरत देखेन हय।

लूका 13:16

त का इआ उचित नहिं आय, कि इआ मेहेरिआ जउन अब्राहम के कुल के बिटिआ आय, अउर जउने काहीं सइतान अठारा बरिस से अपने काबू माहीं कए रहा हय। पबित्र दिन काहीं इआ ओखे बन्धन से छोंड़ाई जाय?”

लूका 22:3

तब सइतान यहूदा इस्करियोती काहीं अपने काबू माहीं कइ लिहिस, जउन बारा चेलन माहीं गिना जात रहा हय।

लूका 22:31

यीसु कहिन, “समौन हे समौन! देखा, सइतान परमातिमा से तोंहईं माँग लिहिसी, कि गोहूँ कि नाईं फटकय मतलब जाँचय-परखय,

लूका 8:12

गइल के किनारे गिरे बीज ऊँ आहीं, जउन परमातिमा के बचन काहीं सुनिन; पय कुछ देर बाद सइतान आइके उनखर सुनी बात काहीं बिसराय देत हय, कि कहँव अइसा न होय, कि ऊँ पंचे परमातिमा के बचन के बिसुआस कइलेंय अउर पाप से छुटकारा पाय जाँय।

यूहन्ना 12:31

अब इआ संसार के मनइन के न्याय के समय आइगा हय, अब इआ संसार माहीं सासन करँइ बाले सइतान काहीं, परमातिमा हराय देइहँय।

यूहन्ना 14:30

अउर अब हम तोंहसे जादा समय तक बात न करब, काहेकि इआ संसार माहीं सासन करँइ बाला सइतान आमँइ बाला हय, अउर ओखर हमरे ऊपर कउनव अधिकार नहिं आय।

यूहन्ना 16:11

अउर परमातिमा मनई के न्याय कइसा करिहँय, एहू के बारे माहीं घलाय हम समझाउब, काहेकि परमातिमा संसार माहीं सासन करँइ बाले सइतान के घलाय न्याय कइ चुके हँय।

यूहन्ना 8:44

काहेकि तूँ पंचे अपने पिता सइतान के सन्तान आह्या। अउर तूँ पंचे अपने पिता के मरजी काहीं पूर करँइ चहते हया। उआ त संसार के सुरुआतय से कतली आय, अउर उआ सत्य के पच्छ कबहूँ नहीं लिहिस। काहेकि ओखे जीबन माहीं सत्य हइअय नहिं आय: अउर झूँठ बोलब ओखर सुभाबय आय; काहेकि उआ हमेसा झूँठ बोलँइ बाला आय, बलकिन झूँठ बोलँइ के सुरुआतय करँइ बाला आय।

खास चेलन 26:18

कि तूँ उनखर आँखी खोला, जउने ऊँ पंचे अँधिआर से जोति कइती, अउर सइतान के अधिकार से परमातिमा कइती फिरँय; एसे उनहीं पापन से माफी मिली, अउर उन मनइन के बीच माहीं जघा पइहँय, जउन हमरे ऊपर बिसुआस किहे के कारन पबित्र कीन गे हँय।’

खास चेलन 5:3

इआ जानिके पतरस उनसे कहिन, “हे हनन्याह! सइतान काहीं अपने मन माहीं इआ बात काहे डारँय दिहा, कि तूँ पबित्र आत्मा से झूँठ बोला, अउर जमीन बेंचे से जउन दाम मिला हय, ओमा से कुछ हिस्सा बचाइके अपने लघे रख लिहा हय?

रोमियन 16:18

काहेकि इआमेर के मनई हमरे पंचन के प्रभू यीसु मसीह के सेबा नहीं करँय, बलकिन अपने कमाई के खातिर सेबा करत हें; अउर मीठ-मीठ बातँय कइके भोले-भाले मनइन काहीं बिसुआस से भटकाय देत हें।

रोमियन 16:20

अउर सान्ती देंइ बाले परमातिमा सइतान काहीं तोंहरे गोड़ेन से हरबिन कुचरबाय देइहँय। अउर हम प्राथना करित हएन, कि हमरे पंचन के प्रभू यीसु मसीह के किरपा, तोंहरे पंचन के ऊपर होत रहय।

2 कुरिन्थियन 11:14

अउर इआ कउनव अचरज के बात न होय, काहेकि सइतान घलाय उँजिआर माहीं रहँइ बाले स्वरगदूत कि नाईं आपन रूप बनाय लेत हय।

2 कुरिन्थियन 11:3

पय हम डेरातव रहित हएन, कि जइसन साँप अपने चतुराई से हब्बा काहीं बहकाय दिहिस रहा हय, उहयमेर तोंहरेव पंचन के मन माहीं उआ निरमल भक्ती, अउर पबित्रता जउन मसीह के खातिर होंइ चाही, कहँव ओसे भटकाय न दीन जा।

2 कुरिन्थियन 12:7

अउर इहव बात ही, कि जउन हमहीं एतने भारी प्रकासन मिले हँय, त हम उनखे कारन घमन्ड से फूल न जई। एसे हमरे देंह माहीं एकठे काँटा छेदा ग हय, अरथात सइतान के एकठे दूत हमहीं कस्ट देत रहत हय, जउने हम घमन्ड से फूल न जई।

2 कुरिन्थियन 2:11

कि जउने हम पंचे सइतान के चंगुल माहीं न फँसे पाई, काहेकि हम पंचे ओखे चाल काहीं निकहा से जानित हएन।

2 कुरिन्थियन 4:4

इआ संसार के मालिक सइतान, ईं अबिसुआसी मनइन के बुद्धी काहीं भ्रस्ट कइ दिहिस ही, कि जउने ऊँ पंचे परमातिमा के साछात रूप, मसीह के महिमामय खुसी के खबर के उँजिआर काहीं न देखे पामँय।

इफीसियन 4:14

जउने हम पंचे चुने बुदे लड़िका कि नाईं न रही, जउन ठग बिद्या अउर चतुराई के बातन माहीं, अउर दुसरेन के भ्रम माहीं डारँइ बाली बातन माहीं, अउर गलत उपदेसन माहीं परि जात हें, अउर जउनी कइती नहीं जाँय चाहँय ओहिन कइती भटक जात हें।

2 थिस्सलुनीकियन 2:3

अउर कउनव मेर से कोहू के झाँसे माहीं न अया, काहेकि जब तक धरम के त्याग न होइ जई, तब तक उआ दिन न अई, अउर अधरम के पुरुस मतलब बिनास के लड़िका प्रगट न होइ जई।

1 तीमुथियुस 2:14

अउर आदम काहीं सइतान नहीं बहकाए पाइस, पय मेहेरिआ सइतान के बहकाए माहीं परिके, परमातिमा के हुकुम के उलंघन कइके अपराधिन बनिगे।

2 तीमुथियुस 3:13

पय गलत सिच्छा देंइ बाले, अउर दुसरेन काहीं मसीह के बिसुआस से भटकामँइ बाले, दुसरेन काहीं धोखा देत, अउर खुद धोखा खात, मसीह के बचन से दूर होत चले जइहँय।

इब्रानियन 2:14

काहेकि जब लड़िका माँस अउर खून से बने हँय, त यीसु घलाय उनहिन कि नाईं मनई के रूप माहीं पइदा होइके, खून अउर माँस माहीं भागीदार होइगें। कि जउने अपने मउत के द्वारा ऊँ ओही, अरथात सइतान के सक्ती काहीं नास कइ देंइ, जउने काहीं मउत के ऊपर सक्ती मिली रही हय।

1 पतरस 5:8

अउर तूँ पंचे सचेत होइके, हमेसा परमातिमा के बचन माहीं बने रहा, काहेकि तोंहार बइरी सइतान, गरजँय बाले सेर कि नाईं, हमेसा इआ खोज माहीं रहत हय, कि केही परमातिमा के बचन से भटकाय देई।

1 यूहन्ना 5:19

हम पंचे जानित हएन, कि हम पंचे परमातिमा के सन्तान आहेन, अउर सगला संसार दुस्ट सइतान के काबू माहीं हय।

यहूदा 1:9

पय इहाँ तक, कि प्रधान स्वरगदूत मीकाईल घलाय, जब सइतान से मूसा नबी के लहास के बारे माहीं बहँस करत रहे हँय, तब ऊँ सइतान काहीं भला-बुरा कहिके, ओखे ऊपर दोस लगामँइ के हिम्मत नहीं किहिन; बलकिन एतनय कहिन, कि “प्रभू तोही डाँटँय।”

दरसनन के बातँय 12:12

इआ कारन, हे स्वरगव, अउर उनमा रहँइ बाल्या, आनन्द मनाबा; पय हे धरती, अउर समुंद्र तोंहरे ऊपर बड़ी भारी बिपत्ती आमँइ बाली हय! काहेकि सइतान बड़े क्रोध के साथ तोंहरे लघे उतरि आबा हय; काहेकि उआ जानत हय, कि ओखर थोरिन काहीं समय अउर बचा हय।

दरसनन के बातँय 12:3

एकठे अउर चिन्ह स्वरग माहीं देखाई दिहिस; अउर देखा, एकठे बड़ा भारी लाल अजिगर रहा हय, जेखे सातठे मूँड़ अउर दसठे सींग रहे हँय, अउर ओखे मूँड़ेन माहीं सातठे राजमुकुट रहे हँय।

दरसनन के बातँय 12:7

ओखे बाद स्वरग माहीं लड़ाई भे, मीकाईल अउर उनखर स्वरगदूत अजिगर से लड़ँइ काहीं निकरें, अउर अजिगर अउर ओखर दूत उनसे लड़ें।

दरसनन के बातँय 12:8

पय जीत नहीं पाएँ, अउर स्वरग माहीं उनखे खातिर पुनि जघा नहीं रहिगे।

दरसनन के बातँय 13:14

ऊँ चमत्कार के कामन के कारन, जिनहीं पहिल खतरनाक जानबर के आँगे देखामँइ के अधिकार ओही दीन ग रहा हय; उआ धरती के रहँइ बालेन काहीं, इआमेर भरमाबत रहा हय, अउर उनसे इआ कहत रहा हय, कि जउने खतरनाक जानबर के तलबार लगी रही हय, उआ जिन्दा होइगा हय, ओखर मूरत बनाबा।

दरसनन के बातँय 16:14

ईं चमत्कार देखामँइ बाली बुरी आत्मा आहीं, जउन सगले संसार के राजन के लघे निकरिके एसे जाती हईं, कि उनहीं पंचन काहीं, सर्बसक्तिमान परमातिमा के, उआ बड़े दिन के लड़ाई के खातिर एकट्ठा करँय।

दरसनन के बातँय 18:2

ऊँ खुब चन्डे गोहराइके कहिन, “गिरिगा, बड़ा बेबीलोन सहर गिरिगा हय, बुरी आत्मन के निबास, अउर हरेक असुद्ध आत्मन के अड्डा, अउर हरेक असुद्ध अउर घिनहे पंछिन के अड्डा होइगा हय।

दरसनन के बातँय 18:23

अउर दिया के उँजिआर पुनि कबहूँ तोरे भीतर न चमकी, अउर दुलहा अउर दुलहिन के बोल पुनि कबहूँ तोरे भीतर सुनाई न देई; काहेकि तोर बइपारी धरती के प्रधान रहे हँय, अउर तोरे जादू से सगली जाति भरमाई गईं तय।

दरसनन के बातँय 19:20

उआ खतरनाक जानबर, अउर ओखे साथ उआ लबरा नबी, पकड़ा ग, जउन उनखे आँगे अइसन चिन्ह देखाइस रहा हय, जिनखे द्वारा उआ उनहीं पंचन काहीं भरमाइस तय, जिनखे ऊपर उआ खतरनाक जानबर के छाप रही हय, अउर जउन ओखे मूरत के अराधना करत रहे हँय। ईं पंचे दोनव जने जिन्दय, उआ आगी के झील माहीं, जउन गन्धक से जरत रहत ही, डारे गें।

दरसनन के बातँय 2:13

हम इआ त जानित हएन, कि तूँ उहाँ रहते हया, जहाँ सइतान के सिंहासन हय; अउर तूँ हमरे नाम माहीं बने रहते हया; अउर हमरे ऊपर बिसुआस करँइ से, उन दिनन माहीं पीछे नहीं हट्या, जउने माहीं हमार बिसुआस के काबिल गबाह अन्तिपास, तोंहरे पंचन के बीच माहीं, उआ जघा माहीं मार डारा ग, जहाँ सइतान रहत हय।

दरसनन के बातँय 2:24

पय तूँ पंचे थुआतीरा के बाँकी मनइन से, जेतने इआ सिच्छा काहीं नहीं मानँय, अउर ऊँ बातन काहीं जिनहीं सइतान के गहिल बातँय कहत हें, नहीं जनते आह्या, इआ कहित हएन, कि हम तोंहरे पंचन के ऊपर अउर बोझ न डारब।

दरसनन के बातँय 2:9

हम तोंहरे कस्ट अउर गरीबी काहीं जानित हएन; (पय तूँ धनी हया) अउर जउन मनई अपने-आप काहीं यहूदी कहत हें, अउर आहीं न, बलकिन सइतान के सभा आहीं, उनखे बुराई काहीं घलाय जानित हएन।

दरसनन के बातँय 20:10

अउर उनखर भरमामँइ बाला सइतान आगी अउर गन्धक के उआ झील माहीं, जउने माहीं उआ खतरनाक जानबर, अउर लबरा नबी घलाय होई, डार दीन जई। अउर ऊँ पंचे रात-दिना जुगन-जुगन तक पीरा माहीं तड़पत रइहँय।

दरसनन के बातँय 20:8

अउर उआ, ऊँ जातिअन काहीं जउन धरती के चारिव कइती होंइ हँय, अरथात गोग अउर मागोग काहीं, जिनखर गिनती समुंद्र के बारू के बराबर होई, उनहीं भरमाइके लड़ाई के खातिर एकट्ठा करँइ काहीं निकरी।

दरसनन के बातँय 3:9

देखा, हम उन सइतान के पीछे चलँइ बालेन काहीं, तोंहरे काबू माहीं कइ देब, जउन खुद काहीं यहूदी कहत हें, पय आहीं न, बलकिन ऊँ झूँठ बोलँइ बाले आहीं, देखा, हम अइसन करब, कि ऊँ तोंहरे गोड़न गिरि हँय, अउर इआ जान लेइहँय, कि हम तोंहसे प्रेम करित हएन।

दरसनन के बातँय 9:1

जब पचमाँ स्वरगदूत तुरही फूँकिन, त हम स्वरग से धरती के ऊपर एकठे तरइया गिरत देखेन, अउर उनहीं अथाह कुन्ड के उघन्नी दीन गे।

दरसनन के बातँय 9:20

अउर बाँकी मनई जउन ऊँ महामारिन से नहीं मरे रहे आहीं, अपने हाँथन के कामन से मन नहीं फिराइन, ऊँ पंचे बुरी आत्मन के पूजा करत रहिगें, अउर सोन-चाँदी, अउर पीतल अउर पथरा, अउर लकड़ी, के मूरतिन के पूजा करब घलाय नहीं छोंड़िन, जउन न देख सकती आहीं, न सुन सकती आहीं, न चल सकती आहीं।