यूहन्ना 17:3 - Bagheli Bible

³ अउर अनन्त जीबन इआ आय, कि ऊँ पंचे अपना काहीं जउन एकलउते परमातिमा आहेन, अउर यीसु मसीह काहीं जिनहीं अपना पठयन हँय, जानँय।

यूहन्ना 17:3 ပူးပေါင်းရင်းမြစ်များ

मरकुस 9:37

“जे कोऊ हमरे नाम से इआमेर के लड़िकन म से कउनव एकठे काहीं सोइकार करत हय, त उआ हमहीं सोइकार करत हय, अउर जे कोऊ हमहीं सोइकार करत हय, उआ हमहिन भर क नहीं, बलकिन हमहीं पठमँइ बाले परमातिमा काहीं सोइकार करत हय।”

लूका 9:48

अउर अपने चेलन से कहिन, “जे कोऊ हमरे नाम से इआमेर के लड़िकन म से कउनव एकठे काहीं सोइकार करत हय, उआ हमहीं सोइकार करत हय; अउर जे कोऊ हमहीं सोइकार करत हय, उआ हमहिन भर क नहीं, बलकिन हमहीं पठमँइ बाले परमातिमा काहीं सोइकार करत हय।” काहेकि जउन तोंहरे बीच माहीं सगलेन से छोट बनत हय, उहय सगलेन से बड़ा कहाई।

यूहन्ना 10:36

त जेही पिता पबित्र ठहराइके संसार माहीं पठइन हीं, तूँ पंचे उनसे कहते हया, कि तूँ परमातिमा के बुराई करते हया, एसे कि जउन हम कहेन, कि ‘हम परमातिमा के लड़िका आहेन।’

यूहन्ना 11:42

अउर हम जानित हएन, कि अपना हमार हमेसा सुनित हएन, पय जउन भीड़ के मनई हमरे आस-पास ठाढ़ हें, इनखे कारन हम इआ कहेन हय, जउने ईं पंचे बिसुआस करँइ, कि अपनय हमहीं पठएन हँय।”

यूहन्ना 14:26

पय ऊँ सहायक अरथात पबित्र आत्मा, जिनहीं पिता हमरे नाम से पठइहँय, ऊँ तोंहईं पंचन काहीं सगली बातन काहीं सिखइ हँय, अउर जउन कुछू हम तोंहसे कहेन हय, उआ सगला ऊँ तोंहईं सुध देबइहँय।

यूहन्ना 17:18

जइसन अपना हमहीं संसार माहीं पठयन हय, उहयमेर हमहूँ उनहीं संसार माहीं पठइत हएन।

यूहन्ना 17:21

हे पिता परमातिमा, जइसन अपना हमरे साथ हएन, अउर हम अपना के साथ हएन, उहयमेर ऊँ पंचे घलाय हमरे साथ होंय, एसे कि जउने संसार के सगले मनई बिसुआस करँय, कि अपनय हमहीं पठयन हय।

यूहन्ना 17:23

हम उनमा अउर अपना हमरे साथ एक होइके रही, कि ऊँ पंचे पूरी तरह से एक होइ जाँय, जउने संसार के सगले मनई जानँय, कि अपनय हमहीं पठयन हय, अपना जइसन हमसे प्रेम करित हएन, उहयमेर उनहूँ से प्रेम करित हएन।

यूहन्ना 17:25

हे पिता परमातिमा, अपना धरमी हएन, संसार के मनई अपना काहीं नहीं जानँय, पय हम अपना काहीं जानित हएन, अउर हमार चेला लोग जानिगें हँय, कि अपनय हमहीं पठएन हय।

यूहन्ना 17:8

काहेकि जउन सँदेस अपना हमहीं दिहेन तय, हम उनहीं उआ सँदेस बताय दिहेन हय, अउर ऊँ पंचे अपना के सँदेस के बातन काहीं अपनाय लिहिन हीं, अउर इआ सच्चाई जान लिहिन हीं, कि हम अपना के तरफ से आएन हय, अउर इआ बिसुआस मान लिहिन हीं, कि अपनय हमहीं पठयन हय।

यूहन्ना 3:17

परमातिमा अपने लड़िका काहीं संसार माहीं एसे नहीं पठइन, कि ऊँ संसार के मनइन काहीं सजा देंइ, बलकिन एसे पठइन हीं, कि संसार के मनई उनखे व्दारा मुक्ती पामँय।

यूहन्ना 3:34

काहेकि जेही परमातिमा पठइन हीं, उआ परमातिमा के बातन काहीं कहत हय: काहेकि परमातिमा ओही पबित्र आत्मा के अनन्त दान दिहिन हीं।

यूहन्ना 5:44

तूँ पंचे हमरे ऊपर बिसुआस कइसन कइ सकते हया, काहेकि तूँ पंचे त आपस माहीं एक दुसरे से मान-सम्मान चहते हया, अउर उआ मान-सम्मान पामँइ के कोसिस नहीं करते आह्या, जउन एकलउते परमातिमा के तरफ से मिलत हय।

यूहन्ना 6:57

जइसन जिन्दा परमातिमा हमहीं पठइन हीं, अउर हम पिता परमातिमा के कारन जिन्दा हएन, उहयमेर उहव जे हमहीं खई, उआ हमरे कारन जिअत रही।

यूहन्ना 7:29

हम उनहीं जानित हएन; काहेकि हम उनहिन के तरफ से आएन हँय, उँइन हमहीं पठइन हीं।”

यूहन्ना 8:19

तब ऊँ पंचे यीसु से कहिन, “तोंहार पिता कहाँ हें?” यीसु उनहीं जबाब दिहिन, कि “न त तूँ पंचे हमहिन काहीं जनते आह्या, अउर न हमरे पिता काहीं, अगर तूँ पंचे हमहीं जन त्या, त हमरे पिता काहीं घलाय जन त्या।”

1 कुरिन्थियन 15:34

एसे तूँ पंचे होस माहीं आय जा, अउर निकहा जीबन जिआ, पाप करब बंद कइ द्या; अउर तोंहरे पंचन म से कुछ जने अइसन हें, कि ऊँ पंचे परमातिमा के सच्ची सिच्छन काहीं नहीं जानँय; अउर इआ बात हम तोहईं पंचन काहीं सरमिन्दा करँइ के खातिर कहित हएन।

1 कुरिन्थियन 8:4

एसे मूरतिन के ऊपर चढ़ाई जाँय बाली चीजन काहीं, खाँय के बारे माहीं हम पंचे जानित हएन, कि मूरत इआ संसार माहीं बास्तबिक परमातिमा न होय, काहेकि एकठे परमातिमा के अलाबा कउनव दूसर परमातिमा नहिं आँय।

2 कुरिन्थियन 4:6

एसे कि उँइन परमातिमा आहीं, जउन कहिन रहा हय, कि “अँधिआर म से उँजिआर होइ जाय।” अउर उँइन इआ उँजिआर काहीं हमरे पंचन के हिरदँय माहीं चमकाइन हीं, कि जउने हम पंचे यीसु मसीह के सुभाव माहीं, परमातिमा के महिमा के ग्यान के उँजिआर काहीं देख सकी।

फिलिप्पियन 3:10

अउर हम मसीह काहीं निकहा से जानँइ चाहित हएन, अउर उनखे सामर्थ के अनुभव करँइ चाहित हएन, जउने के व्दारा उँ मरेन म से जि उठे रहे हँय, अउर उनखे उआ दुख माहीं सामिल होंइ चाहित हएन, अउर उहय रूप काहीं पामँइ चाहित हएन, जउने काहीं ऊँ अपने मउत के व्दारा पाइन रहा हय।

फिलिप्पियन 3:8

बलकिन हम अपने प्रभू मसीह यीसु के उत्तम बातन काहीं पहिचान लिहेन हय, इआ कारन से मूसा के बिधान के सगली बातन काहीं तुच्छ समझित हएन; अउर सगली चीजन काहीं कूरा-कचरा समझिके छोंडि दिहेन हय, जउने मसीह काहीं अपनाय सकी।

1 थिस्सलुनीकियन 1:9

काहेकि ऊँ पंचे खुदय हमरे बारे माहीं बताबत हें, कि तोंहरे लघे हमार पंचन के आउब कउनमेर भ रहा हय; अउर तूँ पंचे कइसन मूरतिन काहीं पूजब छोंड़िके, परमातिमा के बचन काहीं मानँइ लागे हया। अउर तूँ पंचे जिअत अउर सच्चे परमातिमा के सेबक बन गया।

2 थिस्सलुनीकियन 1:8

तब जउन मनई परमातिमा काहीं नहीं पहिचानँय, अउर हमरे पंचन के प्रभू यीसु के खुसी के खबर काहीं नहीं मानँय, उनसे बदला लेइहँय।

इब्रानियन 3:1

एसे हे पबित्र भाई-बहिनिव, तूँ पंचे जउन स्वरग माहीं रहँइ बाले परमातिमा के द्वारा बोलाए जाँइ माहीं भागीदार हया, परमातिमा के पठए ऊँ प्रतिनिधि अउर महायाजक यीसु के ऊपर ध्यान करा, जिनहीं हम पंचे सोइकार किहेन हँय।

2 पतरस 1:2

तूँ पंचे परमातिमा, अउर हमरे पंचन के प्रभू यीसु काहीं जान चुके हया, एसे तोंहईं परमातिमा के किरपा अउर सान्ती जादा से जादा मिलत रहय।

2 पतरस 1:3

परमातिमा अपने सक्ती से भक्तिमय जीबन जिअँइ के खातिर, अउर उनखे सेबा के खातिर, जउन कुछू हमहीं पंचन काहीं चाही, उआ सब कुछ दिहिन हीं। अउर हमहीं पंचन काहीं अपने ग्यान काहीं पामँइ के काबिल बनाइन हीं, अउर ऊँ हमहीं पंचन काहीं अपने महिमा अउर प्रताप के मुताबिक बोलाइन हीं।

2 पतरस 1:8

काहेकि अगर ईं सगली बातँय तोंहरे पंचन के जीबन माहीं बनी रइहँय, अउर बढ़त जइहँय, त तोहईं पंचन काहीं, हमरे पंचन के प्रभू यीसु मसीह काहीं पहिचानय माहीं निस्फल, अउर निकम्मा न होंइ देइहँय।

1 यूहन्ना 1:2

ऊँ अनन्त जीबन देंइ बाले आहीं, उनहीं परमातिमा सगले मनइन के खातिर प्रगट किहिन हीं। हम पंचे उनहीं देखेन हय, अउर उनखे बारे माहीं जउन खुसी के खबर ही, ओही हम पंचे तोंहईं बताइत हएन, कि ऊँ तोंहऊँ काहीं अनन्त जीबन देंइ बाले आहीं, ऊँ पिता परमातिमा के साथ माहीं रहे हँय, अउर पिता परमातिमा उनहीं हमरे ऊपर प्रगट किहिन हीं।

1 यूहन्ना 1:3

जउन कुछू हम पंचे उनखे बारे माहीं देखेन, अउर सुनेन हय, ओहिन के खबर तोंहईं पंचन काहीं देइत हएन, कि जउने तुहूँ पंचे हमरे पंचन के साथ सहभागी होइजा; अउर हमार पंचन के इआ सहभागिता, पिता परमातिमा के साथ। अउर उनखे लड़िका यीसु मसीह के साथ ही।

1 यूहन्ना 2:23

जे कोऊ लड़िका यीसु काहीं सोइकार नहीं करय, ओखे लघे पिता परमातिमव नहिं आहीं; पय जे कोऊ लड़िका यीसु काहीं अपनाय लेत हय, ओखे लघे पिता परमातिमा घलाय हें।

1 यूहन्ना 4:6

हम पंचे परमातिमा के आहेन, जउन मनई परमातिमा काहीं जानत हय, उआ हमार पंचन के बात सुनत हय; जउन मनई परमातिमा काहीं नहीं जानय, उआ हमार पंचन के बात नहीं सुनय; इआ मेर से हम पंचे सत्य के आत्मा, अउर भटकामँइ बाली आत्मा, काहीं पहिचान सकित हएन।

1 यूहन्ना 5:20

अउर हम पंचे इहव जानित हएन, कि परमातिमा के लड़िका आय चुके हँय, अउर ऊँ हमहीं पंचन काहीं समझ दिहिन हीं, कि हम पंचे ऊँ सच्चे परमातिमा काहीं पहिचानी, अउर हम पंचे जउन उनमा सत्य हय, मतलब उनखे लड़िका यीसु मसीह माहीं बने रहित हएन; सच्चे परमातिमा, अउर अनन्त जीबन ईंन आहीं।