इफीसियन 6:9 - Bagheli Bible

⁹ अउर हे मालिकव, तुहूँ पंचे घलाय धमकी देब छोंड़िके, उनखे साथ निकहा बेउहार करा, काहेकि तूँ पंचे खुदव जनते हया कि उनखर अउर तोंहार दोनव जनेन के मालिक एकय आहीं, जउन स्वरग माहीं हें, अउर ऊँ कोहू के साथ पच्छपात नहीं करँय।

इफीसियन 6:9 ပူးပေါင်းရင်းမြစ်များ

मत्ती 22:10

तब ऊँ दास सड़कन माहीं गें, अउर नीक-नागा जेतने मनई उनहीं मिलें, ऊँ सगलेन काहीं लइ आएँ; अउर बिआह के घर महिमानन से भरिगा।”

मत्ती 22:8

अउर ऊँ अपने दासन से कहिन, कि ‘बिआह-भोज त तइआर हय, पय जिनहीं हम नेउता दिहे रहेन हय, ऊँ पंचे काबिल नहीं ठहरें।’

मत्ती 24:48

पय अगर उआ दुस्ट दास सोचँइ लागय, कि हमार मालिक देर से अइहँय,

मत्ती 24:51

अउर अइसन समय माहीं आय जइहँय, जउने काहीं उआ न जानत होई, अउर ऊँ मालिक आइके ओही खुब सजा देइहँय, अउर ओही कपटी मनइन के बीच माहीं डार देइहँय, जहाँ रोउब अउर दाँत पीसब भर होई।”

मत्ती 7:12

इआ कारन से जउन कुछू तूँ पंचे चहते हया, कि दूसर मनई तोंहरे साथ बेउहार करँय, तुहूँ पंचे उनखे साथ उहयमेर बेउहार करा, काहेकि मूसा के बिधान अउर परमातिमा के सँदेस बतामँइ बाले इहय सिच्छा देत हें।

लूका 6:31

जइसन तूँ पंचे चहते हया, कि दूसर मनई तोंहरे साथ बेउहार करँय, तुहूँ पंचे उनखे साथ उहयमेर बेउहार करा।

यूहन्ना 13:13

तूँ पंचे हमहीं गुरू, अउर प्रभू कहते हया, त ठीकय कहते हया, काहेकि हम उहय आहेन।

खास चेलन 10:34

तब पतरस कहिन, “अब हम समझ गएन हय, कि परमातिमा कोहू के साथ भेदभाव नहीं करँय,

रोमियन 2:11

काहेकि परमातिमा कोहू के साथ पच्छपात नहीं करँय।

1 कुरिन्थियन 1:2

परमातिमा के लोगन के उआ मन्डली काहीं मिलय, जउन कुरिन्थुस सहर माहीं ही, अरथात जे कोऊ मसीह यीसु माहीं जुड़ँइ के द्वारा पबित्र कीन गे हँय, अउर उनखर भक्त होंइ के खातिर अलग कीन गे हँय; अउर ऊँ सगले बिसुआसी भाई-बहिनिन काहीं घलाय मिलय, जउन हमरे पंचन के अउर अपने प्रभू यीसु मसीह के नाम से हरेक जघा माहीं अराधना करत हें।

1 कुरिन्थियन 7:22

काहेकि जे कोऊ दास के परिस्थित माहीं प्रभू माहीं बोलाबा ग हय, त उआ प्रभू के द्वारा स्वतंत्र कीन आय; उहयमेर जउने काहीं स्वतंत्र परिस्थित से बोलाबा ग हय, त उआ मसीह के दास आय।

कुलुस्सियन 3:25

काहेकि जे कोऊ बुरे काम करत हय, उआ अपने बुरे कामन के प्रतिफल पाई; काहेकि परमातिमा के आँगे कोहू के साथ पच्छपात नहीं होय।

कुलुस्सियन 4:1

हे मालिकव, तूँ पंचे इआ सुध रक्खा, कि तोंहरव पंचन के स्वरग माहीं एकठे मालिक हें, एसे अपने-अपने सेबकन के साथ निकहा बेउहार करा, अउर जउन उनखर हक्क होय उनहीं द्या।

याकूब 2:13

काहेकि जउन मनई दुसरे के ऊपर दया नहीं किहिस, ओखर न्याय बिना दया के होई, दया न्याय के ऊपर बिजयी होत ही।

याकूब 2:8

तऊ अगर तूँ पंचे पबित्र सास्त्र के इआ बचन के मुताबिक, कि “तूँ अपने परोसी से उहयमेर प्रेम करा, जउनमेर तूँ अपने-आप से करते हया” त सही-सही उआ राज के बिधान काहीं पूर करते हया, त निकहय करते हया।

याकूब 5:4

देखा, जउन मजूर तोंहार खेत काटिन हीं, उनखर उआ मजूरी, जउन तूँ पंचे धोखा दइके धइ लिहा हय, उआ चिल्लाय रही हय, अउर खेत माहीं काम करँइ बालेन के दोहाई, सेनन के प्रभू के कानन तक पहुँचिगे ही।