इफीसियन 2:5 - Bagheli Bible

⁵ अउर जब हम पंचे अपने अपराधन के कारन मरे रहेन हँय, तब परमातिमा जइसन यीसु मसीह काहीं मरेन म से जिआइन, उहयमेर हमहूँ पंचन काहीं जिआइन हीं; (परमातिमा के किरपय से हमहीं पंचन काहीं मुक्ती मिली हय)

इफीसियन 2:5 ပူးပေါင်းရင်းမြစ်များ

लूका 15:24

काहेकि हमार इआ लड़िका पाप किहे के कारन मरे कि नाईं होइगा तय, पय गलती काहीं सोइकार कइ लेंइ के कारन जिन्दा कि नाईं होइगा हय: जउन हेराइगा रहा हय, अब उआ मिलिगा हय, अउर ऊँ सगले जने आनन्द मनामँइ लागें।

यूहन्ना 5:21

काहेकि जइसन पिता परमातिमा मरे मनइन काहीं जिन्दा कइके जीबन देत हें, उहयमेर लड़िका घलाय जिनहीं चाहत हें, उनहीं जिआबत हें।

यूहन्ना 6:63

परमातिमा के आत्मय हय, जउन अनन्त जीबन देत हय, देंह से कुछू फायदा नहीं आय: जउने बातन काहीं हम तोंहसे कहेन हँय, उँइन आत्मा आहीं, अउर जीबन घलाय आहीं।”

खास चेलन 15:11

हाँ, हमार पंचन के इआ बिसुआस हय, कि जउन रीत से प्रभू यीसु के किरपा से हम पंचे मुक्ती पाएन हय; उहयमेर से ऊँ पंचे घलाय मुक्ती पइहँय।”

रोमियन 16:20

अउर सान्ती देंइ बाले परमातिमा सइतान काहीं तोंहरे गोड़ेन से हरबिन कुचरबाय देइहँय। अउर हम प्राथना करित हएन, कि हमरे पंचन के प्रभू यीसु मसीह के किरपा, तोंहरे पंचन के ऊपर होत रहय।

रोमियन 3:24

पय परमातिमा के किरपा से जउन मुक्ती यीसु मसीह के ऊपर बिसुआस किहे से मिलत ही, ओखे द्वारा हम पंचे सेंत-मेंत माहीं, परमातिमा के नजर माहीं निरदोस ठहराए जइत हएन।

रोमियन 4:16

एसे इआ साबित होत हय, कि मनई परमातिमा के वादा केबल बिसुआस से पाबत हें, अउर इआ उनखे किरपा से सेंत-मेंत माहीं मिलत हय। इआमेर से परमातिमा के वादा अब्राहम के सगले सन्तानन के खातिर निस्चित हय, न केबल उनखे खातिर जउन मूसा के बिधान के पालन करत हें, बलकिन उनहूँ पंचन के खातिर घलाय आय, जउन अब्राहम कि नाईं बिसुआस रक्खत हें। अउर ईंन अब्राहम हमार पंचन के कुल पिता आहीं।

रोमियन 5:10

काहेकि जब हम पंचे परमातिमा के बिरोध माही काम कइके उनखर बइरी रहेन हय, तब उनखर लड़िका यीसु मसीह अपने मउत के द्वारा अपने पिता परमातिमा के साथ हमार पंचन के मेल-मिलाप कराय दिहिन हीं, पुनि जब हमार पंचन के मेल-मिलाप होइगा हय, त उनखे जीबन के द्वारा हम पंचे जरूर मुक्ती पाउब।

रोमियन 5:6

काहेकि जब हम पंचे मुक्ती पामँइ माहीं असमर्थ रहेन हय, अउर परमातिमा के हुकुमन काहीं नहीं मानत रहे आहेन, तऊ हमरे पंचन के खातिर मसीह उचित समय म खुद काहीं बलिदान किहिन।

रोमियन 5:8

पय परमातिमा हमरे पंचन के ऊपर अपने प्रेम के भलाई इआमेर से देखाइन, कि जब हम पंचे पापी रहेन हय, तऊ हमरे पंचन के खातिर मसीह आपन जान दइ दिहिन।

रोमियन 8:2

काहेकि पबित्र आत्मा के बिधान जउन यीसु मसीह माहीं जीबन देत हय, हमहीं पाप के बिधान से जउन मउत के तरफ लइ जात हय, ओसे अजाद कइ दिहिस ही।

2 कुरिन्थियन 13:14

अउर प्रभू यीसु मसीह के किरपा, परमातिमा के प्रेम अउर पबित्र आत्मा के सहभागिता तोंहरे पंचन के साथ हमेसा होत रहय।

इफीसियन 2:1

एक समय रहा हय, जब तूँ पंचे यीसु मसीह के ऊपर बिसुआस नहीं करत रहे आह्या, तब तूँ पंचे खुब पाप करत रहे हया, अउर मरे मनई कि नाईं रहे हया, पय अब परमातिमा तोंहईं पंचन काहीं जिआइन हीं।

इफीसियन 2:8

काहेकि परमातिमा के बड़ी किरपा से हम पंचे यीसु मसीह के ऊपर जउन बिसुआस किहे हएन, ओखे द्वारा हमहीं पंचन काहीं मुक्ती मिली हय, अउर इआ हमहीं पंचन काहीं हमरे कइती से नहीं मिली, बलकिन इआ परमातिमा के दान आय।

इफीसियन 5:14

एहिन से पबित्र सास्त्र माहीं इआ लिखा हय, “हे सोमँइ बाले अरथात पाप माहीं जीबन बितामँइ बाले मनई, मुरदन म से जि उठ, अरथात अपने बुरे कामन काहीं छोंड़िके सत्य काहीं अपनाव; तबहिन मसीह के उँजिआर तोरे ऊपर चमकी।”

कुलुस्सियन 2:13

अउर तूँ पंचे अपने पापन के कारन अउर बिना खतना के देंह के कारन आत्मिक रूप से मरे रहे हया, पय परमातिमा तोंहईं पंचन काहीं मसीह के साथय-साथ अनन्त जीबन दिहिन हीं, अउर हमरे पंचन के सगले पापन काहीं हमेसा के खातिर माफ कइ दिहिन हीं।

तीतुस 2:11

काहेकि सगले मनइन काहीं छुटकारा देंइ के खातिर परमातिमा आपन दया देखाइन हीं।

तीतुस 3:5

अउर हमहीं पंचन काहीं मुक्ती दिहिन; इआ हमरे पंचन के धारमिकता के कामन के मुताबिक नहीं भ, जउन हम पंचे किहेन रहा हय, बलकिन परमातिमा हमरे पंचन के ऊपर दया कइके। पबित्र आत्मा से हमरे पापन काहीं धोय दिहिन, अउर हमहीं पंचन काहीं नबा जनम, अउर नबा जीबन दिहिन हीं।

दरसनन के बातँय 22:21

प्रभू यीसु के किरपा, पबित्र लोगन के ऊपर बनी रहय। आमीन।